3. gulmanidānam · e-Caraka

athāto gulmanidānaṃ vyākhyāsyāmaḥ||1|| iti ha smāha bhagavānātreyaḥ||2|| iha khalu pañca gulmā bhavanti; tadyathā- vātagulmaḥ, pittagulmaḥ, śleṣmagulmo, nicayagulmaḥ, śoṇitagulma iti||3||

dakṣādhvaroddhvaṃse raktapittamanu gulma utpanna iti raktapittamanu gulmanidānam| iha pañcetivacanāccikitsite'dhikān gulmān sūcayati; vakṣyati hi- “vyāmiśraliṅgānaparāṃstu gulmāṃstrīnādiśedauṣadhakalpanārtham” (ci.a.5) iti| nicayaḥ sannipātaḥ, tatkṛto gulmo nicayagulmaḥ| iha pratyekavātādigulmakriyāmelakādeva dvandvajagulmāḥ sādhyanta iti kṛtvā na pṛthaguktāḥ| sannipātagulmastu vātādigulmakriyāmelakena sādhyo na bhavatyeva vātādisaṃyogamahimnā; tena, atiriktāsādhyatvayogānnicayagulmaḥ pṛthaguktaḥ| etadeva gulme'sminnasādhyatvaṃ pratipādayituṃ sannipātaśabdaṃ sādhyajvarādisannipāte'pi vartamānaṃ parityajya nicayaśabdaḥ kṛtaḥ; atyarthaṃ hi asādhyarūpaścāyaṃ nicayaḥ||1-3||

evaṃvādinaṃ bhagavantamātreyamagniveśa uvāca- kathamiha bhagavan pañcānāṃ gulmānāṃ viśeṣamabhijānīmahe; nahyaviśeṣavidrogāṇāmauṣadhavidapi bhiṣak praśamanasamartho bhavatīti||4|| tamuvāca bhagavānātreyaḥ- samutthānapūrvarūpaliṅgavedanopaśayaviśeṣebhyo viśeṣavijñānaṃ gulmānāṃ bhavatyanyeṣāṃ ca rogāṇāmagniveśa! tattu khalu ¹ gulmeṣūcyamānaṃ nibodha||5||

samutthānetyādau liṅgāntarniviṣṭā vedanā pṛthagucyate, gulmādiṣvantargateṣu vedanāpradhānavikāreṣu prāyo vedanayaiva viśeṣāvadhāraṇaṃ bhavatīti darśayitum| samprāptestvihākathanaṃ gulmaviśeṣāgamakatvenaiva boddhavyaṃ, gulmavijñānaṃ cehādhikṛtaṃ; saṅkhyādibhedabhinnā tu sāmānyasamprāptiḥ ² sarvaroganidānaprastāva evokteti bhāvaḥ| balakālabhinnā tu samprāptiryadyapi vātikatvādiviśeṣaṃ gamayatyapi, tathā'pyalpatvāttathā liṅgagṛhītatvācca sā nādriyate| divasāntajaraṇāntādibalasamprāptirhi vātāderliṅgamadhya eva paṭhyate tatra tatra; tena liṅgagrahaṇenaiva tat sustham| prāgrūpaṃ ca yadyapi pṛthagvātādigulmagamakaṃ sākṣānna paṭhitaṃ, tathā'pi viśeṣaliṅgāvyaktatārūpaṃ viśiṣṭaṃ prāgrūpaṃ viśeṣaliṅgakathanenaivoktameva; tena, vātādigulmaviśeṣagamakanidānādimadhye pūrvarūpapāṭho nyāyya eva; kiṃvā, pūrvarūpaviśeṣo'pyatra raktapittādirogāntarāpekṣayā sāmānyokto'pi viśeṣo jñeyaḥ||4-5||

yadā puruṣo vātalo viśeṣeṇa jvaravamanavirecanātīsārāṇāmanyatamena karśanena karśito vātalamāhāramāharati, śītaṃ vā viśeṣeṇātimātram ³, asnehapūrve vā vamanavirecane pibati, anudīrṇāṃ vā chardimudīrayati, udīrṇān vātamūtrapurīṣavegānniruṇaddhi, atyaśito vā pibati navodakamatimātram, atisaṅkṣobhiṇā vā yānena yāti, ativyavāyavyāyāmamadyaśokarucirvā, abhighātamṛcchati vā, viṣamāsanaśayanasthānacaṅkramaṇasevī ⁴ vā bhavati, anyadvā kiñcidevaṃvidhaṃ viṣamamatimātraṃ vyāyāmajātamārabhate, tasyāpacārādvātaḥ ⁵ prakopamāpadyate||6||

vātalo viśeṣeṇeti vacanāt pittalāderapi yathoktamācarato vātagulmo bhavati, vātalasya tvatyarthamiti darśayati| śītaṃ vā viśeṣeṇeti atyarthaśītamityarthaḥ| atimātramiti cchedaḥ| ativyavāyavyāyāmādirucirvā ‘bhavati’ iti śeṣaḥ; vyavāyādirucyā vyavāyādyācaraṇaṃ lakṣayati||6||

sa prakupito vāyurmahāsroto'nupraviśya raukṣyāt kaṭhinībhūtamāplutya ⁶ piṇḍito'vasthānaṃ karoti hṛdi bastau pārśvayornābhyāṃ vā; sa śūlamupajanayati granthīṃścānekavidhān, piṇḍitaścāvatiṣṭhate, sa piṇḍitatvād ‘gulma’ ityabhidhīyate; sa muhurādhamati ⁷, muhuralpatvamāpadyate; aniyatavipulāṇuvedanaśca bhavati calatvādvāyoḥ, muhuḥ pipīlikāsampracāra ivāṅgeṣu, todabhedasphuraṇāyāmasaṅkocasuptiharṣapralayodayabahulaḥ; tadāturaḥ sūcyeva śaṅkuneva cābhisaṃviddhamātmānaṃ manyate, api ca divasānte jvaryate ⁸, śuṣyati cāsyāsyam, ucchvāsaścoparudhyate, hṛṣyanti cāsya romāṇi vedanāyāḥ prādurbhāve; plīhāṭopāntrakūjanāvipākodāvartāṅgamardamanyāśiraḥśaṅkhaśūlabradhnarogāścainamupadravanti; kṛṣṇāruṇaparuṣatvaṅnakhanayanavadanamūtrapurīṣaśca bhavati, nidānoktāni cāsya nopaśerate, viparītāni copaśerata iti vātagulmaḥ||7||

raukṣyāt kaṭhinībhūtamiti mahāsrotoviśeṣaṇaṃ; tacca prakupitasya vāyo raukṣyeṇa tathoktajvarakarśanādihetukṛtācca raukṣyāt koṣṭhasya kaṭhinatvamupapannam| āplutyeti vyāpya, koṣṭhameva| anyatrāpyuktam- “āplutaṃ māruteneha śarīraṃ yasya kevalam” (iṃ. a. 10) iti; āplutaṃ vyāptamityarthaḥ| yadā tu ‘raukṣyāt kaṭhinībhūta’ iti pāṭhastadā vātaviśeṣaṇaṃ, vātasya kaṭhinatvamatyarthaṃ prakopeṇa ghanatvameva boddhavyam| piṇḍita iti kuṇḍalībhūtaḥ| nābhyāṃ veti cchedaḥ| piṇḍitaśceti dvitīyapiṇḍitaśabdena māṃsādyuttuṇḍanena gulmapradeśasyāpi piṇḍitatvamucyate; pūrveṇa piṇḍitaśabdena tu vāyoḥ piṇḍitatvamiti na paunaruktyam| anekavidhāniti cchedaḥ| granthīṃścānekavidhāniti dīrghavṛttasthūlādibhedena bhinnān| piṇḍitatvād ‘gulma’ ityucyate ityanena latādigulmasādṛśyanibandhanāṃ ⁹ gulmasañjñāṃ darśayati| ādhamati vistārībhavati| aniyatavipulāṇuvedana iti kadācidvipulavedanaḥ kadācidalpavedanaścāniyamena bhavati| atraiva hetumāha- calatvādvāyoriti| āyāmaḥ vistaraṇaṃ, harṣaḥ romaharṣaḥ, pralayaḥ nāśaḥ, udayaḥ janma; sphuraṇādīnāṃ janmanāśau bahudhā bhavata ityarthaḥ| atrāpi calatvameva vāyorheturboddhavyaḥ| hṛṣyanti cāsya romāṇīti vedanāprādurbhāve pratiniyamena, sphuraṇādau tu harṣo vinā'pi vedanāmiti jñeyam||7||

taireva tu karśanaiḥ karśitasyāmlalavaṇakaṭukakṣāroṣṇatīkṣṇaśuktavyāpannamadyaharitakaphalāmlānāṃ vidāhināṃ ca śākadhānyamāṃsādīnāmupayogādajīrṇādhyaśanādraukṣyānugate cāmāśaye vamanamativelaṃ ¹⁰ sandhāraṇaṃ vātātapau cātisevamānasya pittaṃ saha mārutena prakopamāpadyate||8|| tat prakupitaṃ māruta āmāśayaikadeśe saṃvartya ¹¹ tāneva vedanāprakārānupajanayati, ya uktā vātagulme; pittaṃ tvenaṃ vidahati kukṣau hṛdyurasi kaṇṭhe ca; sa vidahyamānaḥ sadhūmamivodgāramudgiratyamlānvitaṃ, gulmāvakāśaścāsya dahyate dūyate dhūpyate ¹² ūṣmāyate svidyati klidyati śithila ¹³ iva sparśāsaho'lparomāñcaśca ¹⁴ bhavati; jvarabhramadavathupipāsāgalatālumukhaśoṣapramohaviḍbhedāścainamupadravanti; haritahāridratvaṅnakhanayanavadanamūtrapurīṣaśca bhavati; nidānoktāni cāsya nopaśerate, viparītānyupaśerata iti pittagulmaḥ||9||

raukṣyānugate cāmāśaye iti rūkṣaṇahetubhī ¹⁵ rūkṣīkṛte ityarthaḥ; kiṃvā raukṣyānugate cāmāśaye sati vamanaṃ sevamānasyeti yojanīyam| āmāśayaikadeśe saṃvartyetivacanāt pittagulmasya kaphagulmasya ca bastiḥ sthānaṃ na bhavatīti darśayati; vacanaṃ hi- “nābhistanāntaraṃ jantorāmāśaya iti smṛtaḥ” (vi.a.2) iti; vātagulmasya tu bastirapi sthānaṃ bhavati, ata eva tatra sāmānyena mahāsrota iti kṛtaṃ, mahāsrotograhaṇena ca bastirapi gṛhyate; tathā vātagulma eva ‘hṛdi bastau’ ityādi kṛtam| dāhadūyanādayaḥ pittavedanāviśeṣā asakṛdvyākhyātāḥ| davathuḥ ‘dhakdhak’ iti loke kathyate||8-9||

taireva tu karśanaiḥ karśitasyātyaśanādatisnigdhagurumadhuraśītāśanāt piṣṭekṣukṣīratilamāṣaguḍavikṛtisevanānmandakamadyātipānāddharitakātipraṇanayādānūpaudakagrāmyamāṃsātibhakṣaṇāt ¹⁶ sandhāraṇādabubhukṣasya ¹⁷ cātipragāḍhamudapānāt saṅkṣobhaṇādvā śarīrasya śleṣmā saha mārutena prakopamāpadyate||10|| taṃ prakupitaṃ māruta āmāśayaikadeśe saṃvartya ¹⁸ tāneva vedanāprakārānupajanayati ya uktā vātagulme; śleṣmā tvasya śītajvarārocakāvipākāṅgamardaharṣahṛdrogacchardinidrālasyastaimityagauravaśirobhitāpānupajanayati, api ca gulmasya sthairyagauravakāṭhinyāvagāḍhasuptatāḥ, tathā kāsaśvāsapratiśyāyān rājayakṣmāṇaṃ cātipravṛddhaḥ, śvaityaṃ tvaṅnakhanayanavadanamūtrapurīṣeṣūpajanayati, nidānoktāni cāsya nopaśerate, viparītāni copaśerata iti śleṣmagulmaḥ||11||

śleṣmagulme abubhukṣasyeti abubhukṣitasya; ‘atisuhitasya’ iti vā pāṭhaḥ| yadyapi rājayakṣmā tridoṣajaḥ, tathā'pi kaphagulma eva rogamahimnā ajanitadoṣatrayeṇa janyata iti boddhavyam||10-11||

tridoṣahetuliṅgasannipāte tu sānnipātikaṃ gulmamupadiśanti kuśalāḥ| sa vipratiṣiddhopakramatvādasādhyo ¹⁹ nicayagulmaḥ||12||

vipratiṣiddhopakramatvāditi parasparaṃ vātādiviruddhopakramatvāt| iha ca vipratiṣiddhopakramatvaṃ vikṛtiviṣamasannipātena boddhavyam| tena, sādhyatridoṣajvarādau vātādiviruddhopakramatvaṃ sadapi nāsādhyatāmāpādayati||12||

śoṇitagulmastu khalu striyā eva bhavati na puruṣasya, garbhakoṣṭhārtavāgamanavaiśeṣyāt| pāratantryādavaiśāradyāt satatamupacārānurodhādvā vegānudīrṇānuparundhatyā āmagarbhe vā'pyacirapatite'thavā'pyaciraprajātāyā ṛtau vā vātaprakopaṇānyāsevamānāyāḥ kṣipraṃ vātaḥ prakopamāpadyate||13|| sa prakupito yonimukhamanupraviśyārtavamuparuṇaddhi, māsi māsi tadārtavamuparudhyamānaṃ kukṣimabhivardhayati| tasyāḥ śūlakāsātīsāracchardyarocakāvipākāṅgamardanidrālasyastaimityakaphaprasekāḥ samupajāyante, stanayośca stanyam, oṣṭhayoḥ stanamaṇḍalayośca kārṣṇyam, atyarthaṃ glāniścakṣuṣoḥ, mūrcchā, hṛllāsaḥ, dohadaḥ, śvayathuśca pādayoḥ, īṣaccodgamo romarājyāḥ, yonyāścāṭālatvam, api ca yonyā daurgandhyamāsrāvaścopajāyate, kevalaścāsyā gulmaḥ piṇḍita eva spandate, tāmagarbhāṃ garbhiṇīmityāhurmūḍhāḥ||14||

śoṇitagulme striyā eveti vacanādeva na puruṣasyeti labdhe punarna puruṣasyeti vacanaṃ spaṣṭārtham| garbhārthaḥ koṣṭho garbhakoṣṭhastasmin garbhakoṣṭhe ya ārtavasyāgamanarūpo viśeṣo raktagulmakāraṇaṃ, sa striyā eva bhavati; tenaivaṃrūpa ārtavapratibandhajanyaḥ śoṇitagulmaḥ puruṣasya na bhavati| sāmānyaśoṇitaduṣṭijanyastu puruṣasyāpi bhavati; tathāhi vakṣyati- “kapho vāte jitaprāye pittaṃ śoṇitameva ca| yadi kupyati vā tasya kriyamāṇe cikitsite” (ci.a.5) ityādi; tathā ‘gulmopakuśavīsarpa’ (sū.a.24) ityādayo ‘raktajā gadāḥ’ ityuktam| pāratantryādihetutrayaṃ vegavidhāraṇe, pāratantryādeva striyo vegaṃ vidhārayanti| avaiśāradyam ajñānaṃ; tena, vegavidhāraṇena mahān vyādhirbhavatītyajñānādvegaṃ vidhārayanti| upacārānurodhāditi bhartrādyupacāraparatvāt| yonimukhamiti garbhāśayadvāram| stanayoḥ stanyamiti rogaprabhāvādeva boddhavyam| ārtavarodhalakṣaṇasya vyādherayaṃ prabhāvo yat stanyaṃ karoti, dṛṣṭatvāt| tena, yaducyate- “striyā hyāpannasattvāyāstridhā rasaḥ sampadyate- svaśarīrapuṣṭaye, stanyāya, garbhābhivṛddhaye ca” (śā.a.6) iti vacanād “garbha eva stanyaṃ bhavati” tannirastaṃ mantavyam| dohadaśabdeneha nāryā uccāvacabhāvatṛṣṇāyogo ²⁰ dohadābhidhāno jñeyaḥ| yaduktaṃ kṣārapāṇinā- “dohadinī vā syānnārī śoṇitagulminī” iti| na tviha dvaihṛdyakṛto dohado'bhipretaḥ, sa hi garbhahṛdayasya mātṛhṛdayena sambandhādbhavati; vacanaṃ hi- “mātṛjaṃ hyasya hṛdayaṃ, tadasya mātṛhṛdayena sambaddhaṃ bhavati rasavāhinībhiḥ saṃvāhinībhiḥ, tasmāttayostābhirbhaktiḥ sampadyate” (śā.a.4) iti; śoṇitagulme ca cetanā nāsti, tena naivaṃrūpamiha dvaihṛdyaṃ dohadam| tena garbhabhrāntyā yatkiñcidabhyavahārecchādilakṣaṇaṃ ²¹ dohadaṃ tasyā bhavati, asatyapi viṣasambandhe yathā śaṅkāviṣādviṣaliṅgāni bhavanti; vacanaṃ hi- “śaṅkāviṣeṇopahatāḥ ²² kurvanti viṣalakṣaṇam” iti| āṭālatvaṃ vistṛtatvaṃ; yonivistāreṇa ca romarājyā api vistaraṇaṃ vitanyamānacarmaromṇā caivopapannam| kevalaḥ spandata iti naikadeśena; garbho hyekadeśenāpi spandate, tenaitallakṣaṇaṃ garbhaśaṅkāvyāvartakam| nanu yaduktaṃ raktagulme- “samagarbhaliṅgaḥ” iti, tathā “māse vyatīte daśame cikitsyaḥ” (ci.a.5) iti; tadanupapannaṃ, yato garbhādviśiṣṭaṃ piṇḍitaspandanaṃ vidyata eva; tathā navatvaṃ sukhasādhyatāhetutvenoktam, iha ca kathaṃ kālātikrameṇopakramaṇīyatvamucyate? brūmaḥ- samagarbhaliṅgatvaṃ tāvadbhūrigarbhasamaliṅgatābhiprāyeṇoktaṃ; kiṃvā, samasyāvaikārikasya daśamāsikaparyantasya garbhasya liṅgāni yasya sa samagarbhaliṅgaḥ, tena vaikārikasuptanāgodarāderlakṣaṇaṃ neha bhavatīti darśayati| daśamamāsacikitsyatvaṃ ceha vyādhimahimnā boddhavyaṃ, daśamamāsa evāyaṃ ²³ śithilībhūtaḥ san cikitsyo bhavatīti vyādhiprabhāvaḥ| dṛṣṭā ca vyādhiprabhāvakṛtā kālāpekṣā- “jvare peyāḥ kaṣāyāśca sarpiḥ kṣīraṃ virecanam| ṣaḍahe ṣaḍahe deyam” ityādiṣu| yattu samagarbhaliṅgatvena garbhaśaṅkānirāsārthaṃ raktagulmasya daśamamāsāpekṣaṇaṃ; tanna, daśamamāsādarvāgapi piṇḍitaspandanena raktagulmasyāvadhāraṇam, tathā daśamamāsādūrdhvamapi garbhāvasthānasya dṛṣṭatvena garbhaśaṅkānapagamācca; vakṣyati hi daśamamāsādūrdhvamavasthānaṃ garbhasya- “vaikārikamata ūrdhvamavasthānaṃ” (śā.a.4) iti||13-14||

eṣāṃ tu khalu pañcānāṃ gulmānāṃ prāgabhinirvṛtterimāni pūrvarūpāṇi bhavanti; tadyathā- anannābhilaṣaṇam, arocakāvipākau, agnivaiṣamyaṃ, vidāho bhuktasya, pākakāle cāyuktyā chardyudgārau, vātamūtrapurīṣavegānāṃ cāprādurbhāvaḥ, prādurbhūtānāṃ cāpravṛttirīṣadāgamanaṃ vā, vātaśūlāṭopāntrakūjanāpariharṣaṇātivṛttapurīṣatāḥ, abubhukṣā, daurbalyaṃ, sauhityasya cāsahatvamiti||15||

tadyathetyādinā pūrvarūpāṇyāha| ayuktyeti chardyudgārakāraṇamantareṇa vyādhiprabhāvādevetyarthaḥ| ativṛttapurīṣatā udāvartaḥ||15||

sarveṣvapi khalveteṣu gulmeṣu na kaścidvātādṛte sambhavati gulmaḥ| teṣāṃ sānnipātikamasādhyaṃ jñātvā naivopakrameta, ekadoṣaje tu yathāsvamārambhaṃ praṇayet, saṃsṛṣṭāṃstu sādhāraṇena karmaṇopacaret| yaccānyadapyaviruddhaṃ manyeta tadapyavacārayedvibhajya gurulāghavamupadravāṇāṃ, gurūnupadravāṃstvaramāṇaścikitsejjaghanyamitarān| tvaramāṇastu viśeṣamanupalabhamāno gulmeṣvātyayike karmaṇi vātacikitsitaṃ praṇayet, snehasvedau vātaharau snehopasaṃhitaṃ ca mṛdu virecanaṃ bastīṃśca; amlalavaṇamadhurāṃśca rasān yuktyā'vacārayet| mārute hyupaśānte svalpenāpi prayatnena śakyo'nyo'pi doṣo niyantuṃ gulmeṣviti||16|| bhavati cātra- gulmināmanilaśāntirupāyaiḥ sarvaśo vidhivadācaritavyā| mārute hyavajite'nyamudīrṇaṃ doṣamalpamapi karma nihanyāt||17||

pittādikṛteṣvapi tu gulmeṣu samprāptisiddhasya vātasya prādhānyamāha- sarveṣvapītyādi| sādhāraṇeneti saṃsṛṣṭobhayadoṣapratyanīkena| yaccānyadapīti saṃsarge ekadoṣopaśamakamapi| aviruddhamiti upadravāṇāṃ gurūṇāmaviruddham| vibhajyeti gurulāghavaṃ vibhajya| tenaikadoṣapraśamanamapi tadeva kartavyaṃ yadgurūpadravapraśamanaṃ bhavatīti bhāvaḥ| etadevāha- gurūnityādi| sarvagulmānāṃ vātamūlatvena vātanirapekṣacikitsāviśeṣānupalambhe vātacikitsaiva tvarayā kartavyetyāha- tvaramāṇastvityādi| ātyayike karmaṇi ‘kriyamāṇe’ iti śeṣaḥ| alpamapīti karmaviśeṣaṇam||16-17||

tatra ślokaḥ- saṅkhyā nimittaṃ rūpāṇi pūrvarūpamathāpi ca| diṣṭaṃ nidāne gulmānāmekadeśaśca karmaṇām||18||

saṅgrahe ekadeśaśca karmaṇāmiti cikitsitānām||18||

ityagniveśakṛte tantre carakapratisaṃskṛte nidānasthāne gulmanidānaṃ nāma tṛtīyo'dhyāyaḥ||3||

iti śrīcakrapāṇidattaviracitāyāṃ carakatātparyaṭīkāyāmāyurvedadīpikāyāṃ nidānasthāne gulmanidānaṃ nāma tṛtīyo'dhyāyaḥ||3||

pāṭhāntarāḥ

1 ‘tatra tāvat’ iti pā. ↩
2 ‘samprāptiḥ’ iti pā. ↩
3 ‘atimātramasnehapūrve vā’ iti gaṅgādharasammataḥ pāṭhaḥ ↩
4 ‘viṣamāśanaśayanāsanasthānacaṅkramaṇasevī’ iti pā. ↩
5 ‘tasya tadapacārādvāyuḥ’ iti pā. ↩
6 kaṭhinībhūta āplutya’ iti pā. ↩
7 ‘avadhamati’ iti pā. ↩
8 ‘jīryati’ iti pā. ↩
9 ‘latādikalpitagulmasādṛśyanibandhanāṃ iti pā. ↩
10 ‘vamanavirecanamativelaṃ’ iti pā. ↩
11 ‘sammūrcchya’ iti pā. ↩
12 ‘dhūmāyate’ iti pā. ↩
13 ‘mṛduśithila’ iti pā. ↩
14 ‘alparomā ca’ iti pā. ↩
15 ‘raukṣyeṇa hetunā'tīva rūkṣīkṛte’ iti pā. ↩
16 ‘piṣṭekṣukṣīratilamāṣavikṛtisevanānmadyātipānāt’ iti pā. ↩
17 ‘atisuhitasya’ iti pā. ↩
18 ‘sammūrcchya’ iti pā. ↩
19 ‘viruddhopakramatvāt’ iti pā. ↩
20 ‘uccāvacabhāvatṛṣṇāyogāddohadābhidhāno jñeyaḥ’ iti pā. ↩
21 ‘yatkiñcidabhyavahārecchādilakṣaṇā dohadinī bhavati’ iti pā. ↩
22 ‘durandhakāre viddhasya kenaciddaṣṭaśaṅkayā|viṣodvego jvaraśchardirmūrcchā dāho'pi vā bhavet||glānirmoho'tisāro vā tacchaṅkāviṣamucyate||’ (vā.u.a.36.) ↩
23 ‘daśama evāyaṃ māse’ iti pā. ↩