12. śvayathucikitsitam

athātaḥ śvayathucikitsitaṃ vyākhyāsyāmaḥ||1|| iti ha smāha bhagavānātreyaḥ||2||

kṣatakṣīṇe marmopaghāto bhavati, śothe'pi marmopaghātaḥ kāraṇaṃ, tena samānahetutayā kṣatakṣayamanu śothacikitsitamucyate||1-2||

bhiṣagvariṣṭhaṃ surasiddhajuṣṭaṃ munīndramatryātmajamagniveśaḥ| mahāgadasya śvayathoryathāvat prakoparūpapraśamānapṛcchat||3||

juṣṭamiti sevitam| prakopayatīti prakopo heturityarthaḥ, kiṃvā kāryakāraṇayorabhedopacārāt prakopaśabdena śvayathukāraṇamucyate; rūpaśabdena rūpapūrvarūpayorgrahaṇaṃ; śamanena cikitsocyate||3||

tasmai jagādāgadavedasindhupravartanādripravaro'trijastān| vātādibhedāttrividhasya samyaṅnijānijaikāṅgajasarvajasya||4||

agadārtha ārogyārtho yo vedaḥ so'gadavedaḥ, sa eva gambhīraprasannatvāt sindhuriva sindhuḥ, tasya pravartane'dripravaro himālaya ivetyarthaḥ; yathā himālayo gaṅgāyāḥ pravartakastathā'trijo'pi āyurvedapravartaka ityarthaḥ| tāniti prakopādīn yāñ śiṣyaḥ pṛṣṭavān| ekāṅgajasarvajasyetyatra sarvajaśabdena sarvaśarīrajasya grahaṇam, ekāṅgajaśabdena ca sāmānyena śarīrāvyāpakasya grahaṇaṃ; tena sarvārdhagātrāvayavāśritatvena yattraividhyaṃ vaktavyaṃ tatraikāṅgajenārdhagātrāśritāvayavāśritayoriha grahaṇaṃ jñeyam||4||

śuddhyāmayābhaktakṛśābalānāṃ kṣārāmlatīkṣṇoṣṇagurūpasevā| dadhyāmamṛcchākavirodhiduṣṭagaropasṛṣṭānnaniṣevaṇaṃ ca||5|| arśāṃsyaceṣṭā na ca dehaśuddhirmarmopaghāto viṣamā prasūtiḥ| mithyopacāraḥ pratikarmaṇāṃ ca nijasya hetuḥ śvayathoḥ pradiṣṭaḥ||6||

śuddhiḥ vamanādiśodhanam, āmayā jvarādayaḥ, abhaktam abhojanaṃ viguṇaṃ ca bhojanaṃ, taiḥ kṛśānāmabalānāṃ ca kṣārādisevā nijasya śvayathorheturiti yojyam| dadhyādi tu svatantrameva hetuḥ| āmam apakvaṃ, duṣṭaṃ doṣakārakaṃ navodakādi, garaḥ saṃyogajaṃ viṣam| naca dehaśuddhiriti śodhanārhe'pi dehe dehāśuddhiḥ| marmopaghāta iha doṣakṛta eva jñeyaḥ; bāhyahetujastu marmopaghāta āgantuhetureva| viṣamā prasūtiḥ akālagarbhapatanādikā| pratikarmaṇāmiti vamanādīnāṃ; mithyopacāra iti asamyakkaraṇamasamyagupacāraśca||5-6||

bāhyāstvaco dūṣayitā'bhighātaḥ kāṣṭhāśmaśastrāgniviṣāyasādyaiḥ ¹| āgantuhetuḥ, ...|7|

bāhyā ityādinā''gantuśothahetumāha| bāhyā iti agambhīrāḥ; etena gambhīratvagdūṣakatvaṃ śothasya na bhavati| tvaca iti karmapadaṃ halantam| dūṣayitā abhighātaviśeṣeṇa| kāṣṭhāśmaśastrāgniviṣāyasādyairiti kāṣṭhādikāraṇakaḥ; ādiśabdo hi kāraṇavācī, tena kāṣṭhādikāraṇako'bhighāta ityarthaḥ| kāṣṭhādayaśceha saṅkṣepeṇoktā dantādīnāmapyupalakṣaṇā jñeyāḥ| kiṃvā ādi śabdaḥ prakāravācī, tena kāṣṭhādikṛto'bhighātaḥ kāṣṭhādiśabdenocyata iti kṛtvā'bhighātena samaṃ sāmānādhikaraṇyaṃ jñeyam| āgantuheturiti cchedaḥ||7||-

... trividho nijaśca sarvārdhagātrāvayavāśritatvāt||7||

trividha iti sarvārdhagātrāvayavāśritatvena nijastrividhaḥ; cakārādāganturapi yathoktabhedāttrividha ityarthaḥ||7||

bāhyāḥ sirāḥ prāpya yadā kaphāsṛkpittāni sandūṣayatīha vāyuḥ| tairbaddhamārgaḥ sa tadā visarpannutsedhaliṅgaṃ śvayathuṃ karoti||8||

bāhyāḥ sirā ityādisamprāptikathanam| bāhyā iti agambhīrāḥ| sirāśabdena srotasāṃ sāmānyena grahaṇam| baddhamārga iti āvṛtamārgaḥ| utsedhenāvyabhicāriṇā liṅgyata iti utsedhaliṅgaḥ||8||

uraḥsthitairūrdhvamadhastu ² vāyoḥ sthānasthitairmadhyagataistu madhye| sarvāṅgagaḥ sarvagataiḥ kvacitsthairdoṣaiḥ kvacit syācchvayathustadākhyaḥ||9||

uraḥsthitairityādinā viśiṣṭaśothānāṃ samprāptiviśeṣamāha| ūrdhvamiti uraḥprabhṛtyūrdhvaśarīre| adha iti pakvāśayaprabhṛtau| vāyoḥ sthānaṃ pakvāśayaḥ| madhyagatairiti uraḥpakvāśayamadhyagataiḥ| kvaciditi kaṇṭhatālvādideśe| tadākhya iti ‘galaśotha’ ityādiśabdākhya iti; kiṃvā ūrdhvaśothādhaḥśotha ityādiśabdākhya iti sarvatra yojanīyam||9||

ūṣmā tathā syāddavathuḥ sirāṇāmāyāma ityeva ca pūrvarūpam|10|

ūṣmetyādinā pūrvarūpamāha| davathuḥ upatāpaścakṣurādau| sirāṇāmāyāma iti sirāprasaraṇam|10|-

sarvastridoṣo'dhikadoṣaliṅgaistacchabdamabhyeti bhiṣagjitaṃ ca||10||

sarvaśothānāṃ tridoṣajatve'pi vātajādivyapadeśo vātajādicikitsā ca yathā bhinnā bhavati tadāha- sarva ityādi| adhikāni adhikasya vā doṣasya liṅgānīti adhikadoṣaliṅgāni, taiḥ adhikadoṣaliṅgaiḥ| tacchabdamiti adhikadoṣaśabdaṃ ³ vātajo'yamityādikaṃ prāpnoti; tathā bhiṣagjitaṃ cādhikadoṣaliṅgaiḥ prāpnoti, adhikadoṣaliṅgaprayuktaṃ cikitsatabhedaṃ prāpnotītyarthaḥ||10||

sagauravaṃ syādanavasthitatvaṃ sotsedhamuṣmā'tha sirātanutvam| salomaharṣā'ṅgavivarṇatā ca sāmānyaliṅgaṃ śvayathoḥ pradiṣṭam||11||

sagauravamityādinā sāmānyaliṅgaṃ paṭhati||11||

calastanutvakparuṣo'ruṇo'sitaḥ prasuptiharṣārtiyuto'nimittataḥ| praśāmyati pronnamati prapīḍito divābalī ca śvayathuḥ samīraṇāt||12||

cala ityādinā vātajaśothaliṅgamāha| tanutvagiti abahalatvak| asita iti kṛṣṇaḥ| suptiḥ sparśājñānaṃ; harṣaḥ ‘jhaṇajhaṇikā’ iti khyātā vedanā, kiṃvā romaharṣaḥ| animittataḥ praśāmyatīti vāyoścalatvena kadācinnimittaṃ vinā'pi līno bhavatītyarthaḥ| kecit ‘nimittataḥ’ iti paṭhanti, tena “snehoṣṇamardanābhyāṃ ca praṇaśyet sa ca vātikaḥ” (sū.a.18) iti yaduktaṃ tadevedamucyate| pronnamatīti sampīḍanānantaramevonnamati||12||

mṛduḥ sagandho'sitapītarāgavān bhramajvarasvedatṛṣāmadānvitaḥ| ya uṣyate sparśarugakṣirāgakṛt ⁴ sa pittaśotho bhṛśadāhapākavān||13||

mṛdvityādinā pittaśothamāha| uṣyata iti dahyate| sparśarugiti ⁵ sparśanaṃ na sahate||13||

guruḥ sthiraḥ pāṇḍurarocakānvitaḥ prasekanidrāvamivahnimāndyakṛt| sa kṛcchrajanmapraśamo nipīḍito na connamedrātribalī kaphātmakaḥ||14||

gururityādinā kaphaśothamāha| arocakānvita iti arocakavyādhisahacārī| kṛcchrajanmapraśama iti cirotpattivināśaḥ| rātribalī kaphātmaka iti rātrau srotorodhajena dehakledenāceṣṭayā ca kaphasya vṛddhatvāt tajjanitaśotho balavān bhavati, divā tu sphuṭasrotasi śarīre ceṣṭāyukte na kapho balībhavati kintu vāyuḥ; tena vātaśotho divā balībhavati, kaphaśothastu hīyate||14||

kṛśasya rogairabalasya yo bhavedupadravairvā vamipūrvakairyutaḥ| sa hanti marmānugato'tha rājimān parisraveddhīnabalasya sarvagaḥ||15||

sampratyasādhyatvamāha- kṛśasyetyādi| vamipūrvakairiti triśothīye “chardiḥ śvāso'rucistṛṣṇā jvaro'tīsāra eva ca| suptiḥ śoṣaḥ ⁶ sadaurbalyaḥ śothopadravasaṅgrahaḥ” (sū.a.18) ityanenoktaiḥ| marmānugato rājimāniti ca pṛthaglakṣaṇaṃ, parisravedityādi ca pṛthak pṛthagasādhyalakṣaṇam||15||

ahīnamāṃsasya ya ekadoṣajo navo balasthasya sukhaḥ sa sādhane|16|

ahīnetyādinā sukhasādhyalakṣaṇamucyate| kṛcchrasādhyalakṣaṇaṃ ca sukhasādhyalakṣaṇāsampūrṇatāyāṃ jñeyam| śvayathośca hetulakṣaṇāni triśothīyoktānyapi prakaraṇāt saṅkṣepeṇehocyante|16|

nidānadoṣartuviparyayakramairupācarettaṃ baladoṣakālavit||16||

sāmānyena cikitsāsūtramāha- nidānetyādi| nidānādiviparītakramaiḥ laṅghanādibhirupācaredityarthaḥ| baladoṣakālavidityanena nidānāderviparītā kriyoktā; balaṃ tathā doṣamāmādibhedabhinnaṃ tathā kālaṃ ca vyādhyavasthārūpaṃ viditvā yā yujyate sā kartavyeti darśayati| nidānetyādau doṣaśabdena vātādayo gṛhyante, ṛtuśabdena ca nityagaḥ kālaḥ| tenaiva tadviśiṣṭavācakatayā baladoṣakālaviditi vacanaṃ na punaruktam| anye tu prathamena doṣaśabdena dūṣyadhātugrahaṇaṃ, dvitīyena tu vātādigrahaṇamityāhuḥ; prathamavyākhyāne tu doṣaśabdenaiva dūṣyasyāpi doṣādhārasya grahaṇaṃ jñeyam||16||

athāmajaṃ laṅghanapācanakramairviśodhanairulbaṇadoṣamāditaḥ| śirogataṃ śīrṣavirecanairadho ⁷ virecanairūrdhvaharaistathordhvajam||17|| upācaret snehabhavaṃ virūkṣaṇaiḥ prakalpayet snehavidhiṃ ca rūkṣaje| vibaddhaviṭke'nilaje nirūhaṇaṃ ghṛtaṃ tu pittānilaje satiktakam||18|| payaśca mūrcchāratidāhatarṣite viśodhanīye tu samūtramiṣyate| kaphotthitaṃ kṣārakaṭūṣṇasaṃyutaiḥ samūtratakrāsavayuktibhirjayet||19||

āmajamiti āmadoṣajanitam, apakvatā ca prāyo doṣāṇāṃ prathamaduṣṭau bhavati| kramairiti upakramaiḥ| adha iti adhobhāgajaṃ, virecanairupācaret| ūrdhvaharairiti vamanaiḥ, ūrdhvajamiti ūrdhvabhāgajam| satiktakaṃ ghṛtamiti tiktadravyasādhitaṃ ghṛtam| pittānilaje iti vātapittajadvandve| mūrcchādaya iha sañjātā yasya tasmin mūrcchāratidāhatarṣite| viśodhanīye iti mūrcchāyukte eva viśodhanīye| samūtretyādi mūtrasamabhāgaistakrāsavayogaiḥ||17-19||

grāmyābjānūpaṃ piśitamabalaṃ śuṣkaśākaṃ navānnaṃ gauḍaṃ piṣṭānnaṃ dadhi tilakṛtaṃ ⁸ vijjalaṃ ⁹ madyamamlam| dhānā vallūraṃ samaśanamatho gurvasātmyaṃ vidāhi svapnaṃ cārātrau śvayathugadavān varjayenmaithunaṃ ca||20||

grāmyetyādinā nidānatvenaiva prāptaniṣedhānapi mahātyayāvaha- tvādatyarthaniṣedhopadarśanārthamāha| gauḍamiti guḍavikāraṃ, tasya vikāre aṇ| dhānā aṅkuritabhṛṣṭayavāḥ| vallūraṃ śuṣkamāṃsam| samaśanaṃ pathyāpathyayorekatra bhojanam||20||

vyoṣaṃ trivṛttiktakarohiṇī ca sāyorajaskā triphalārasena| pītaṃ kaphotthaṃ śamayettu śophaṃ gavyena mūtreṇa harītakī ca||21|| harītakīnāgaradevadāru sukhāmbuyuktaṃ sapunarnavaṃ vā| sarvaṃ pibettriṣvapi mūtrayuktaṃ snātaśca jīrṇe payasā'nnamadyāt||22||

atra kaphadoṣasyaiva prathamaṃ cikitsyatvena vyoṣamityādinā kaphaśothacikitsāmāha| sāyorajasketi anena māritamevātra ayoraja icchanti, rasāyane'pi mṛtāyorajasa eva prayogopadeśāt| ayorajo na samaṃ tulyamānam, ayo hi duṣpariṇāmaṃ, tenāyaḥprayoge'lpameva lohaṃ mātrānusāreṇa jñeyam| harītakyādīnāṃ kalkaḥ sukhāmbunā peyaḥ| sapunarnavaṃ vā sarvamiti harītakyādi| triṣvapi vātādijeṣu| snātaścetyādividhirante uktatvāduktasarvaprayogeṣu jñeyaḥ||21-22||

punarnavānāgaramustakalkān prasthena dhīraḥ payasā'kṣamātrān| mayūrakaṃ māgadhikāṃ samūlāṃ sanāgarāṃ vā prapibet savāte||23|| dantītrivṛttryūṣaṇacitrakairvā payaḥ śṛtaṃ doṣaharaṃ pibennā| dviprasthamātraṃ tu palārdhikaistairardhāvaśiṣṭaṃ pavane sapitte||24|| saśuṇṭhipītadrurasaṃ prayojyaṃ śyāmorubūkoṣaṇasādhitaṃ vā| tvagdāruvarṣābhumahauṣadhairvā guḍūcikānāgaradantibhirvā||25|| saptāhamauṣṭraṃ tvathavā'pi māsaṃ payaḥ pibedbhojanavārivarjī| gavyaṃ samūtraṃ mahiṣīpayo vā kṣīrāśano mūtramatho gavāṃ vā||26|| takraṃ pibedvā gurubhinnavarcāḥ savyoṣasauvarcalamākṣikaṃ ca| guḍābhayāṃ vā guḍanāgaraṃ vā sadoṣabhinnāmavibaddhavarcāḥ||27|| viḍvātasaṅge payasā rasairvā prāgbhaktamadyādurubūkatailam ¹⁰| srotovibandhe'gnirucipraṇāśe madyānyariṣṭāṃśca pibet sujātān||28||

punarnavetyādau prasthamānaṃ kṣīramatibahutvāttadardhāvaśiṣṭaṃ paktvā peyam| mayūrakamityādāvapi pūrvayogoktaṃ kṣīraṃ dravyamānaṃ ca jñeyam| palārdhikairiti dvikarṣamānaiḥ| atra ca bheṣajāpekṣayā kṣīrasya bahutvāt stokakṣīradānaṃ kecidicchanti sādhanatvena kartavyamiti, ‘yathā kurvanti sa upāyaḥ’ (sū.a.26) iti vacanāt| pītadruḥ devadāruḥ| ūṣaṇaṃ maricam| bhojanavārivarjīti bhojanaṃ vāri ca tyaktavyamityarthaḥ| gavyamityādāvapi gavāṃ mūtramityantena saptāhaṃ māsaṃ veti tathā bhojanavārivarjīti cānuvartayanti| samūtramityatra mūtrasamaṃ kṣīrāśanamiti sambadhyate||23-28||

gaṇḍīrabhallātakacitrakāṃśca vyoṣaṃ viḍaṅgaṃ bṛhatīdvayaṃ ca| dviprasthikaṃ gomayapāvakena droṇe pacet kūrcikamastunastu ¹¹||29|| tribhāgaśeṣaṃ ca supūtaśītaṃ droṇena tat prākṛtamastunā ca| sitopalāyāśca śatena yuktaṃ lipte ghaṭe citrakapippalīnām||30|| vaihāyase sthāpitamādaśāhāt prayojayaṃstadvinihanti śophān| bhagandarārśaḥkrimikuṣṭhamehān vaivarṇyakārśyānilahikkanaṃ ca||31|| iti gaṇḍīrādyariṣṭaḥ|

kūrcikamastuna ityatra dadhnā saha payasi pakvaṃ yanmastu tat kūrcikamastu, kevalasya dadhno yanmastu tat prākṛtamastu| vaihāyase iti antarikṣe||29-31||

kāśmaryadhātrīmaricābhayākṣadrākṣāphalānāṃ ¹² ca sapippalīnām| śataṃ śataṃ jīrṇaguḍāttulāṃ ¹³ ca saṅkṣudya kumbhe madhunā pralipte||32|| saptāhamuṣṇe dviguṇaṃ tu śīte sthitaṃ jaladroṇayutaṃ pibennā| śophān vibandhān kaphavātajāṃśca nihantyariṣṭo'ṣṭaśato'gnikṛcca||33|| ityaṣṭaśato'riṣṭaḥ|

kāśmaryetyādau uṣṇe iti uṣṇakāle| dviguṇamiti dvisaptāhaṃ, śītakāle sthāpyam| aṣṭaśata iti sañjñā kāśmaryādisaptaśataṃ militvā kṛtatvājjñeyā||32-33||

punarnave dve ca bale sapāṭhe dantīṃ ¹⁴ guḍūcīmatha citrakaṃ ca| nidigdhikāṃ ca tripalāni paktvā droṇāvaśeṣe salile tatastam||34|| pūtvā rasaṃ dve ca guḍāt purāṇāttule madhuprasthayutaṃ suśītam| māsaṃ nidadhyādghṛtabhājanasthaṃ palle yavānāṃ paratastu māsāt||35|| cūrṇīkṛtairardhapalāṃśikaistaṃ patratvagelāmaricāmbulohaiḥ ¹⁵| gandhānvitaṃ kṣaudraghṛtapradigdhe jīrṇe pibed vyādhibalaṃ samīkṣya||36|| hṛtpāṇḍurogaṃ śvayathuṃ pravṛddhaṃ plīhajvarārocakamehagulmān| bhagandaraṃ ṣaḍjaṭharāṇi kāsaṃ śvāsaṃ grahaṇyāmayakuṣṭhakaṇḍūḥ||37|| śākhānilaṃ baddhapurīṣatāṃ ca hikkāṃ kilāsaṃ ca halīmakaṃ ca| kṣipraṃ jayedvarṇabalāyurojastejonvito māṃsarasānnabhojī||38|| iti punarnavādyariṣṭaḥ|

punarnave dve ityādau pratyekaṃ dravyāṇāṃ dvipalikatvam| droṇāvaśeṣavidhānācca caturdroṇaṃ jalasya jñeyam| tathā sati caturbhāgāvaśeṣeṇa droṇaḥ kvātho bhavati| palle yavānāmiti yavarāśau, kṣaudraghṛtapradigdhe kumbhe kṛtvā māsaṃ sthāpyamiti jñeyaṃ; kiṃvā kṣaudraghṛtapralipte sugandhe bhājane kṛtvā pacet| ṣaṭjaṭharāṇīti bheṣajāsādhyau chidrodakadarau varjayitvā||34-38||

phalatrikaṃ dīpyakacitrakau ca sapippalīloharajo viḍaṅgam| cūrṇīkṛtaṃ kauḍavikaṃ dviraṃśaṃ kṣaudraṃ purāṇasya tulāṃ guḍasya||39|| māsaṃ nidadhyādghṛtabhājanasthaṃ yaveṣu tāneva nihanti rogān| ye cārśasāṃ pāṇḍuvikāriṇāṃ ca proktā hitāḥ śophiṣu te'pyariṣṭāḥ||40|| iti triphalādyariṣṭaḥ|

phalatrikamityādau dviprasthe triphalādīnāṃ caturguṇaṃ jalaṃ dattvā pādāvaśeṣaḥ kaṣāya āsavāntare dṛṣṭatvājjñeyaḥ| cūrṇīkṛtamiti kaṣāyārthaṃ jarjarīkṛtam| anye tu cūrṇe eva droṇārdhaṃ paraṃ jalaṃ dadati; kiṃvā kuḍavamānatvaṃ cūrṇasya deyaṃ, tena dviraṃśaṃ kṣaudramiti dvikuḍavamiti yāvat||39-40||

kṛṣṇā sapāṭhā gajapippalī ca nidigdhikā citrakanāgare ca| sapippalīmūlarajanyajājīmustaṃ ca cūrṇaṃ sukhatoyapītam||41|| hanyāttridoṣaṃ cirajaṃ ca śophaṃ kalkaśca bhūnimbamahauṣadhasya| ayorajastryūṣaṇayāvaśūkacūrṇaṃ ca pītaṃ triphalārasena||42||

pippalyādye cūrṇe tridoṣamiti pratyekaṃ militairvā vātādibhirjanitamiti jñeyam; na cātra tridoṣasyāsādhyatvaṃ yuktam||41-42||

kṣāradvayaṃ syāllavaṇāni catvāryayorajo vyoṣaphalatrike ca| sapippalīmūlaviḍaṅgasāraṃ mustājamodāmaradārubilvam||43|| kaliṅgakāścitrakamūlapāṭhe yaṣṭyāhvayaṃ sātiviṣaṃ palāṃśam| sahiṅgukarṣaṃ tvaṇuśuṣkacūrṇaṃ droṇaṃ tathā mūlakaśuṇṭhakānām||44|| syādbhasmanastat salilena sādhyamāloḍya yāvadghanamapradagdham| styānaṃ tataḥ kolasamāṃ tu mātrāṃ kṛtvā suśuṣkāṃ vidhinopayuñjyāt||45|| plīhodaraśvitrahalīmakārśaḥpāṇḍvāmayārocakaśoṣaśophān| visūcikāgulmagarāśmarīśca saśvāsakāsāḥ praṇudet sakuṣṭhāḥ||46|| iti kṣāraguḍikā|

catvāri lavaṇāni sāmudravarjaṃ dīrghañjīvitīyoktāni| aṇuśuṣkacūrṇamiti sūkṣmacūrṇaṃ grāhyam| atra jalamānamapi cūrṇacaturguṇaṃ deyam| styānamiti ghanam||43-46||

prayojayedārdrakanāgaraṃ vā tulyaṃ guḍenārdhapalābhivṛddhyā| mātrā paraṃ pañcapalāni māsaṃ jīrṇe payo yūṣarasāśca bhaktam||47|| gulmodarārśaḥśvayathupramehāñ śvāsapratiśyālasakāvipākān| sakāmalāśoṣamanovikārān kāsaṃ kaphaṃ caiva jayet prayogaḥ||48||

ārdrakanāgaramiti aśuṣkanāgaram| ardhapalābhivṛddhiśca iha guḍanāgarābhyāṃ jñeyā, anyathā kevalārdrakavṛddhyā pañcapalamāne guḍena samaṃ daśapalatāyāṃ bhūrimātratayā'gnivadhādidoṣakārakaṃ syāt; ardhapalādārabhya pratidinamardhapalavṛddhyā daśabhirdinaiḥ pañcapalaṃ bhavati; tatastu pañcapalasya yāvanmāsamupayogaḥ||47-48||

rasastathaivārdrakanāgarasya peyo'tha jīrṇe payasā'nnamadyāt| jatvaśmajaṃ ¹⁶ ca triphalārasena hanyāttridoṣaṃ śvayathuṃ prasahya||49|| iti śilājatuprayogaḥ|

rasastathaivetyādau pūrvayogavadardhapalābhivṛddhiḥ guḍayuktatvaṃ cetyādi sarvaṃ tathaiveti padena gṛhyate||49||

dvipañcamūlasya pacet kaṣāye kaṃse'bhayānāṃ ca śataṃ guḍasya| lehe susiddhe'tha vinīya cūrṇaṃ vyoṣaṃ trisaugandhyamuṣāsthite ca||50|| prasthārdhamātraṃ madhunaḥ suśīte kiñcicca cūrṇādapi yāvaśūkāt| ekābhayāṃ prāśya tataśca lehācchuktiṃ nihanti śvayathuṃ pravṛddham||51|| śvāsajvarārocakamehagulmaplīhatridoṣodarapāṇḍurogān| kārśyāmavātāvasṛgamlapittavaivarṇyamūtrānilaśukradoṣān||52|| iti kaṃsaharītakī|

dvipañcamūlasyetyādau nirdiṣṭatvāt kaṃsaḥ kvāthādbhavati, tāvanmānaṃ daśamūlaṃ catuḥṣaṣṭipalaṃ grāhyam| anye tu ‘dvipañcamūlasya tulākaṣāye kaṃso'bhayānāṃ ca śataṃ guḍasya’ iti paṭhanti| vyoṣatrisaugandhyayoḥ mānānirdeśena anyatra lehāntaroktacūrṇamānānusāreṇa mānaṃ jñeyam| agastyaharītakyāṃ guḍatulāyāṃ pippalīcūrṇapalacatuṣṭayamuktaṃ, tathā cyavanaprāśe matsyaṇḍikārdhatulāyāṃ pippalīcūrṇapaladvayamuktaṃ, tadvadihāpi guḍaśate vyoṣasya kaṭudravyasya palacatuṣṭayaṃ; tathā cyavane cāturjātakasya gandhārthasya palamuktaṃ, tadanusāreṇeha dvipalaṃ trisaugandhyam| kiñcicchabdasyālpavacanatvādatroktanāgarādicūrṇādardhamānaṃ yāvaśūkasya jñeyaṃ, kecittu kiñcicchabdaṃ karṣaparyāyaṃ vadanti; tantrāntarapratyayāt| jatūkarṇasaṃvādāt trisaugandhyasya pratyekaṃ karṣamānatvaṃ, tryūṣaṇayavakṣārāṇāṃ tu pratyekaṃ palam| yaduktaṃ- “daśamūlakaṣāyasya kaṃse pathyāśataṃ guḍāt| tulāṃ pacettato dadyād vyoṣakṣāracatuḥpalam| trisugandhasya karṣāṃśa prasthārdhaṃ madhuno hime” ityādi||50-52||

paṭolamūlāmaradārudantītrāyantipippalyabhayāviśālāḥ| yaṣṭyāhvayaṃ tiktakarohiṇī ca sacandanā syānniculāni dārvī||53|| karṣonmitaistaiḥ kvathitaḥ kaṣāyo ghṛtena peyaḥ kuḍavena yuktaḥ| vīsarpadāhajvarasannipātatṛṣṇāviṣāṇi śvayathuṃ ca hanti||54||

paṭolamūletyādau kvāthyadravyapalatrayamaṣṭaguṇajalaparibhāṣayā kvathanīyaṃ; tataścaturbhāgāvaśeṣeṇa ṣaṭpalamānaḥ kaṣāyo bhavati| uktaṃ hi- “karṣādau tu palaṃ yāvat dadyāt ṣoḍaśakaṃ jalam| tataśca kuḍavaṃ yāvattoyamaṣṭaguṇaṃ bhavet” iti||53-54||

sacitrakaṃ ¹⁷ dhānyayavānyajājīsauvarcalaṃ tryūṣaṇavetasāmlam| bilvāt phalaṃ dāḍimayāvaśūkau sapippalīmūlamathāpi cavyam||55|| piṣṭvā'kṣamātrāṇi jalāḍhakena paktvā ghṛtaprasthamatha prayuñjyāt| arśāṃsi gulmaṃ śvayathuṃ ca kṛcchraṃ nihanti vahniṃ ca karoti dīptam||56|| pibedghṛtaṃ vā'ṣṭaguṇāmbusiddhaṃ sacitrakakṣāramudāravīryam| kalyāṇakaṃ vā'pi sapañcagavyaṃ tiktaṃ mahadvā'pyatha tiktakaṃ vā||57||

sacitraketyādau kecit ‘bilvāt palaṃ’ iti paṭhanti; tanmate bilvaṃ palamānaṃ, śeṣaṃ tu kārṣikam||55-57||

kṣīraṃ ghaṭe citrakakalkalipte dadhyāgataṃ sādhu vimathya tena| tajjaṃ ghṛtaṃ citrakamūlagarbhaṃ takreṇa siddhaṃ śvayathughnamagryam||58|| arśo'tisārānilagulmamehāṃścaitannihantyagnibalapradaṃ ¹⁸ ca| takreṇa cādyāt saghṛtena tena bhojyāni siddhāmathavā yavāgūm||59|| iti citrakaghṛtam|

dadhyāgatamiti dadhibhāvena pariṇatam| takreṇeti yathoktadadhimathanajātena takreṇa||58-59||

jīvantyajājīśaṭipuṣkarāhvaiḥ sakāravīcitrakabilvamadhyaiḥ| sayāvaśūkairbadarapramāṇairvṛkṣāmlayuktā ghṛtatailabhṛṣṭā||60|| arśo'tisārānilagulmaśophahṛdrogamandāgnihitā yavāgūḥ| yā pañcakolairvidhinaiva ¹⁹ tena siddhā bhavet sā ca samā tayaiva||61|| kulatthayūṣaśca sapippalīko maudgaśca satryūṣaṇayāvaśūkaḥ| rasastathā viṣkirajāṅgalānāṃ sakūrmagodhāśikhiśallakānām||62|| suvarcalā gṛñjanakaṃ paṭolaṃ savāyasīmūlakavetranimbam| śākārthināṃ śākamiti praśastaṃ bhojye purāṇaśca yavaḥ saśāliḥ||63||

jīvantītyādau badarapramāṇairiti dviśāṇikaiḥ| vidhinaiva tenetyatra badaramānatvaṃ dravyāṇāṃ jñeyam| sakūrmetyādau kūrmavidhānaṃ matsyamāṃsaniṣedhe'pyapavādarūpaṃ jñeyam| śallakaḥ śalalīsañjñaḥ| suvarcikā sūryāvartaḥ| gṛñjanakaṃ rasonakasadṛśaṃ; kiṃvā gṛñjanakaṃ śobhāñjanam| vāyasī kākamācī||60-63||

ābhyantaraṃ bheṣajamuktametadbarhirhitaṃ yacchṛṇu tadyathāvat| snehān pradehān pariṣecanāni svedāṃśca vātaprabalasya kuryāt||64|| śaileyakuṣṭhāgurudārukauntītvakpadmakailāmbupalāśamustaiḥ| priyaṅguthauṇeyakahemamāṃsītālīśapatraplavapatradhānyaiḥ||65|| śrīveṣṭakadhyāmakapippalībhiḥ spṛkkānakhaiścaiva yathopalābham| vātānvite'bhyaṅgamuśanti tailaṃ siddhaṃ supiṣṭairapi ca pradeham||66|| jalaiśca vāsārkakarañjaśigrukāśmaryapatrārjakajaiśca ²⁰ siddhaiḥ| svinno mṛdūṣṇai ²¹ ravitaptatoyaiḥ snātaśca gandhairanulepanīyaḥ||67||

śaileyetyādau tailaṃ siddhaṃ supiṣṭairiti śaileyādibhiḥ supiṣṭaistailaṃ siddhamiti vadanti; tathā taireva supiṣṭaiḥ pradehaṃ kathayanti| raviṇā sūryeṇa taptatoyaiḥ snāto gandhairagurvādibhirālepanīyaḥ||64-67||

savetasāḥ kṣīravatāṃ drumāṇāṃ tvacaḥ samañjiṣṭhalatāmṛṇālāḥ| sacandanāḥ padmakavālakau ca paitte pradehastu satailapākaḥ||68|| āktasya tenāmbu raviprataptaṃ sacandanaṃ sābhayapadmakaṃ ca| snāne hitaṃ kṣīravatāṃ kaṣāyaḥ kṣīrodakaṃ candanalepanaṃ ca||69||

savetasā ityādinā paitte pradehamāha| kṣīridrumā aśvatthādayaḥ| satailapāka iti mañjiṣṭhādibhireva kvāthakalkena snehaḥ paktavyaḥ| sacandanamityādau abhayam uśīram||68-69||

kaphe tu kṛṣṇāsikatāpurāṇapiṇyākaśigrutvagumāpralepaḥ| kulatthaśuṇṭhījalamūtrasekaścaṇḍāgurubhyāmanulepanaṃ ca||70|| bibhītakānāṃ phalamadhyalepaḥ sarveṣu dāhārtiharaḥ pradiṣṭaḥ| yaṣṭyāhvamustaiḥ sakapitthapatraiḥ sacandanaistatpiḍakāsu lepaḥ||71|| rāsnāvṛṣārkatriphalāviḍaṅgaṃ śigrutvaco mūṣikaparṇikā ca| nimbārjakau vyāghranakhaḥ sadūrvā suvarcalā tiktakarohiṇī ca||72|| sakākamācī bṛhatī sakuṣṭhā punarnavā citrakanāgare ca| unmardanaṃ śophiṣu mūtrapiṣṭaṃ śastastathā mūlakatoyasekaḥ||73||

sikatā vālukā| śigrostvak| anulepanaṃ snānānantaramanulepanam| tatpiḍakāsviti dāhādiyuktapiḍikāsu| rāsnetyādinā sarvaśotheṣūnmardanasekau brūte| vyāghranakhaṃ nakhī| mūṣikaparṇī ‘putraśreṇī’ iti khyātā||70-73||

śophāstu gātrāvayavāśritā ye te sthānadūṣyākṛtināmabhedāt| anekasaṅkhyāḥ ²² katicicca teṣāṃ nidarśanārthaṃ gadato nibodha||74||

śothāstvityādi| sthānaṃ galādi, dūṣyā raktādayaḥ, ākṛtiḥ ākāro dīrghatvādiḥ, nāmabhedastu śalyādiṣu vistareṇokto'pi ‘kaṇṭhaśālūka’ ityādinā leśenābhihitāḥ; evaṃ sthānādibhedakṛtādatibahutvādbahusaṅkhyā jñeyā iti yojyam||74||

doṣāstrayaḥ svaiḥ kupitā nidānaiḥ kurvanti śophaṃ śirasaḥ sughoram|75|

śirasaḥ sughoramityatra lakṣaṇaṃ tridoṣakṛtaṃ, nāma ca ‘śiraḥśotha’ iti vijñeyaṃ, tantrāntare'yam ‘upaśīrṣaka’ ityuktaḥ||75|

antargale ghurghurikānvitaṃ ca śālūkamucchvāsanirodhakāri||75||

ghurghurikānvitamiti ghurghurākāraśabdena vedanayā vā yuktam||75||

galasya sandhau cibuke gale ca sadāharāgaḥ śvasanāsu ²³ cograḥ| śopho bhṛśārtistu biḍālikā ²⁴ syāddhanyādgale cedvalayīkṛtā sā||76||

galasya sandhāviti galavadanasandhau| śvasanāsviti śvāsavahanāḍīṣu| biḍālikāyāṃ tridoṣāśrayaḥ kāraṇatvenānuvartate| valayīkṛtā seti kṛtsnagalaveṣṭakatvena valayākārā syāt| suśrute'pyuktaṃ- “taṃ sarvathaivāprativāryavīryaṃ vivarjanīyaṃ valayaṃ vadanti” (su. ni. a. 16) iti| iyaṃ ca tridoṣajā'pi raktapittādhikā jñeyā||76||

syāttāluvidradhyapi dāharāgapākānvitastāluni sā tridoṣāt| jihvopariṣṭādupajihvikā syāt kaphādadhastādadhijihvikā ca||77|| yo dantamāṃseṣu tu raktapittāt pāko bhavet sopakuśaḥ pradiṣṭaḥ| syāddantavidradhyapi dantamāṃse śophaḥ kaphācchoṇitasañcayotthaḥ||78||

upajihvikeha triśothīyoktā'pi tatrānuktādhijihvikāprasaṅgenoktā||77-78||

galasya pārśve galagaṇḍa ekaḥ syādgaṇḍamālā bahubhistu gaṇḍaiḥ| sādhyāḥ smṛtāḥ pīnasapārśvaśūlakāsajvaracchardiyutāstvasādhyāḥ||79|| teṣāṃ sirākāyaśirovirekā dhūmaḥ purāṇasya ghṛtasya pānam| syāllaṅghanaṃ vaktrabhaveṣu cāpi pragharṣaṇaṃ syāt kavalagrahaśca||80||

sādhyāḥ smṛtā ityādi| pīnasādirahitāḥ sādhyāḥ| sādhyāsādhyavibhāgādibhedāḥ śiraḥśothādiṣu sarveṣveva jñeyāḥ| sireti sirāvyadhaḥ| viśeṣacikitsā tu suśrute pratipattavyā||79-80||

aṅgaikadeśeṣvanilādibhiḥ syāt svarūpadhārī sphuraṇaḥ sirābhiḥ| granthirmahānmāṃsabhavastvanartirmedobhavaḥ snigdhatamaścalaśca||81|| saṃśodhite sveditamaśmakāṣṭhaiḥ sāṅguṣṭhadaṇḍairvilayedapakvam| vipāṭya coddhṛtya bhiṣak sakośaṃ śastreṇa dagdhvā vraṇavaccikitset||82|| adagdha īṣat pariśeṣitaśca prayāti bhūyo'pi śanairvivṛddhim| tasmādaśeṣaḥ kuśalaiḥ samantācchedyo bhavedvīkṣya śarīradeśān||83|| śeṣe kṛte pākavaśena śīryāttataḥ kṣatotthaḥ prasaredvisarpaḥ| upadravaṃ taṃ pravicārya tajjñastairbheṣajaiḥ ²⁵ pūrvatarairyathoktaiḥ||84|| nivārayedādita ²⁶ eva yatnādvidhānavit svasvavidhiṃ vidhāya| tataḥ krameṇāsya yathāvidhānaṃ vraṇaṃ vraṇajñastvarayā cikitset||85|| vivarjayet kukṣyudarāśritaṃ ca tathā gale marmaṇi saṃśritaṃ ca| sthūlaḥ kharaścāpi bhavedvivarjyo yaścāpi bālasthavirābalānām||86||

aṅgaikadeśetyādinā granthīnāha| svarūpadhārīti vātena vātalakṣaṇadhārī, pittena pittalakṣaṇadhārī, kaphena kaphalakṣaṇadhārī ca| granthisañjñayā granthyākāratvaṃ darśayati| sphuraṇaḥ vepamāna ityarthaḥ| medobhavo'nartirbhavati| mahān granthirmāṃsabhavo bhavati| saṃśodhite iti kṛtaśodhane puruṣe| vilayediti vimlāpayet| sakośamiti kośasahitamuddhṛtya tato dagdhvā vraṇavaccikitset| asamyagdagdhe pariśeṣite ²⁷ ca granthau doṣamāha- adagdha ityādi| svairbheṣajairiti visarpabheṣajaiḥ| vivarjayedityādinā'sādhyagranthibhedānāha||81-86||

granthyarbudānāṃ ca yato'viśeṣaḥ pradeśahetvākṛtidoṣadūṣyaiḥ| tataścikitsedbhiṣagarbudāni vidhānavidgranthicikitsitena||87||

arbudacikitsātideśārthamāha- granthyarbudānāmityādi| aviśeṣa iva aviśeṣa iha jñeyaḥ| suśrute'pyarbudalakṣaṇamuktaṃ- “gātrapradeśe kvacideva doṣāḥ sammūrcchitā māṃsamabhipradūṣya| vṛttaṃ sthiraṃ mandarujaṃ mahāntamanalpamūlaṃ ciravṛddhyapākam|| kurvanti māṃsocchrayamatyagādhaṃ tadarbudaṃ śāstravido vadanti” (su. ni. a. 11) iti; tasmāt stokaviśeṣe satyapi srāvādyaviśeṣādgranthiviśeṣacikitsaivātidiśyate'rbude||87||

tāmrā saśūlā ²⁸ piḍakā bhavedyā sā cālajī nāma parisrutāgrā| śopho'kṣataścarmanakhāntare ²⁹ syānmāṃsāsradūṣī bhṛśaśīghrapākaḥ||88|| jvarānvitā vaṅkṣaṇakakṣajā yā vartirnirartiḥ kaṭhināyatā ca| vidārikā sā kaphamārutābhyāṃ teṣāṃ yathādoṣamupakramaḥ syāt||89|| visrāvaṇaṃ piṇḍikayopanāhaḥ pakveṣu caiva vraṇavaccikitsā|90|

carmanakhāntara iti carmanakhasandhau| vidārikeha kaphavātābhyāmucyate, suśrute vidārikā “sarvajāṃ sarvalakṣaṇām” (su. ni.a.13) iti paṭhitā, tenehāpi kaphavātādhikā hīnapittā ca vijñeyā| teṣāmityanena alajyakṣatavidārikārogān pratyavamṛśati| visrāvaṇamiti raktavisrāvaṇam| piṇḍikayeti piṇḍikāsvedena||88-89||-

visphoṭakāḥ sarvaśarīragāstu sphoṭāḥ ³⁰ sarāgajvaratarṣayuktāḥ||90|| yajñopavītapratimāḥ prabhūtāḥ pittānilābhyāṃ janitāstu kakṣāḥ ³¹| yāścāparāḥ syuḥ piḍakāḥ prakīrṇāḥ sthūlāṇumadhyā api pittajāstāḥ||91|| kṣudrapramāṇāḥ piḍakāḥ śarīre sarvāṅgagāḥ sajvaradāhatṛṣṇāḥ| kaṇḍūyutāḥ sārucisaprasekā romāntikāḥ pittakaphāt pradiṣṭāḥ||92|| yāḥ sarvagātreṣu masūramātrā masūrikāḥ pittakaphāt pradiṣṭāḥ| vīsarpaśāntyai vihitā kriyā yā tāṃ teṣu ³² kuṣṭhe ca hitāṃ vidadhyāt||93||

sphoṭā iha kakṣoktasphoṭāścirasthāyinaḥ| yajñopavītapratimā iti yajñopavītavyāpyasthānamātravyāpakāḥ sphoṭā eva, kakṣā iti kakṣāśabdākhyāḥ| prakīrṇā iti bahuvidhajātikāḥ| visarpetyādau teṣviti visphoṭa-kakṣā-masūrikākhyeṣu vidārikānantarokteṣvityarthaḥ||90-93||

bradhno'nilādyairvṛṣaṇe ³³ svaliṅgairantraṃ nireti praviśenmuhuśca| mūtreṇa pūrṇaṃ mṛdu medasā cet snigdhaṃ ca vidyāt kaṭhinaṃ ca śotham||94|| virecanābhyaṅganirūhalepāḥ pakveṣu caiva vraṇavaccikitsā| syānmūtrasekaḥ ³⁴ kaphajaṃ vipāṭya viśodhya sīvyedvraṇavacca pakvam||95||

bradhna ityādau vṛṣaṇe iti jātāvekavacanaṃ, tena vṛṣaṇayorapi grahaṇam| svaliṅgairiti vātādiliṅgaiḥ| vātaliṅgena vātikaḥ, pittaliṅgena paittikaḥ, kaphaliṅgena kaphajo bradhno jñeya ityarthaḥ| antraṃ muhurnireti svasthānād vṛṣaṇaṃ praviśecceti antravṛddhilakṣaṇam| mūtreṇa tu yadbradhnaṃ tat pūrṇaṃ mṛdu ca bhavati| medasā tu kṛtaṃ snigdhaṃ kaṭhinaṃ ca| evaṃ ṣaḍvidho bradhna uktaḥ| suśrute tu raktajo'pi bradhna uktaḥ, sa iha pittaje evāntarbhāvanīyaḥ| virecanetyādinā sāmānyacikitsāsūtramāha| kaphajānāṃ ³⁵ vaiśeṣikī cikitsocyate- vipāṭya viśodhya ca sīvyed vipakvaṃ bradhnaṃ, vraṇavaccopacarediti bhāvaḥ||94-95||

krimyasthisūkṣmakṣaṇanavyavāyapravāhaṇānyutkaṭakāśvapṛṣṭhaiḥ ³⁶| gudasya pārśve piḍakā bhṛśārtiḥ pakvaprabhinnā tu bhagandaraḥ syāt||96|| virecanaṃ caiṣaṇapāṭanaṃ ca viśuddhamārgasya ca tailadāhaḥ| syāt kṣārasūtreṇa supācitena ³⁷ chinnasya cāsya vraṇavaccikitsā||97||

krimyasthītyādinā bhagandaraṃ pañcavidhamapīha saṅkṣepāt sāmānyenāha| eṣaṇaṃ śalākayā gatyavekṣaṇam| kṣārasūtreṇa supācitena chinnasyetyanena śalyatantroktaṃ kṣārasūtravidhānaṃ darśayati; prapañcastviha parādhikāratvena na kṛtaḥ; supāciteneti samyagvipācitakṣāreṇa||96-97||

jaṅghāsu piṇḍīprapadopariṣṭāt ³⁸ syācchlīpadaṃ māṃsakaphāsradoṣāt| sirākaphaghnaśca vidhiḥ samagrastatreṣyate sarṣapalepanaṃ ca||98||

jaṅghāsviti bahuvacanaṃ vyaktyapekṣayā; kiṃvā bahuvacanena jaṅghādiṣvityādipadalopo jñeyaḥ| uktaṃ hi- “śiśnauṣṭhanāsāsvapikecidāhuḥ” ityādi| tathāhi puṣkalāvataḥ- “grīvāvaṅkṣaṇajaṅghauṣṭhapādakarṇakarāśrayam| ślīpadaṃ māṃsamedobhyāṃ vidyāt” iti| piṇḍīti māṃsapiṇḍī| prapadaṃ pādāgram||98||

mandāstu pittaprabalāḥ praduṣṭā doṣāḥ sutīvraṃ tanuraktapākam| kurvanti śothaṃ jvaratarṣayuktaṃ visarpaṇaṃ jālakagardabhākhyam||99|| vilaṅghanaṃ raktavimokṣaṇaṃ ca virūkṣaṇaṃ kāyaviśodhanaṃ ca| dhātrīprayogāñ śiśirān pradehān kuryāt sadā jālakagardabhasya||100||

mandā ityādau mandā iti alpavṛddhāḥ; mandā iti bahuvacanaṃ vyaktyapekṣayā| pittaṃ prabalaṃ yeṣāṃ te pittaprabalāḥ| tanuḥ raktapāko yasmin tat tanuraktapākaṃ; suśrute hi apākaśabdena īṣatpāka uktaḥ “apākaḥ śvayathuḥ pittāt sa jñeyo jālagardabhaḥ” (su. ni. a. 13) iti| raktasya pākena yuktaṃ raktapākaṃ, natu raktavarṇamātram||99-100||

evaṃvidhāṃścāpyaparān parīkṣya śothaprakārānanilādiliṅgaiḥ| śāntiṃ nayeddoṣaharairyathāsvamālepanacchedanabhedadāhaiḥ||101||

atrānuktaśothaprakārasaṅgrahārthamāha- evaṃvidhānityādi||101||

prāyo'bhighātādanilaḥ saraktaḥ śothaṃ sarāgaṃ prakaroti tatra| vīsarpanunmārutaraktanucca kāryaṃ viṣaghnaṃ viṣaje ca karma||102||

āgantuśothacikitsāmāha- prāya ityādi| viṣaje śothe iti sambandhaḥ||102||

tatra ślokaḥ- trividhasya doṣabhedāt sarvārdhāvayavagātrabhedācca| śvayathordvividhasya ³⁹ tathā liṅgāni cikitsitaṃ coktam||103||

saṅgrahe sarvārdhagātrāvayavabhedācca trividhasyeti sambandhaḥ| dvividhasyeti nijāgantubhedena||103||

ityagniveśakṛte tantre'prāpte dṛḍhabalasampūrite cikitsāsthāne śvayathucikitsitaṃ nāma dvādaśo'dhyāyaḥ||12||

iti śrīcakrapāṇidattaviracitāyāṃ carakatātparyaṭīkāyāmāyurvedadīpikāyāṃ śothacikitsitaṃ nāma dvādaśo'dhyāyaḥ||12||

pāṭhāntarāḥ

1 ‘kāṣṭhāgniśalyāśmaviṣāyasādyaiḥ’ iti pā. ↩
2 ‘ūrdhvaṃ sthitaiḥ’ iti pā. ↩
3 ‘adhikadoṣasañjñā’ iti pā. ↩
4 ‘'sparśasaho'kṣirāgakṛt’ iti pā. ↩
5 ‘asparśasaha’ iti pā. ↩
6 ‘saptako'yaṃ sadaurbalyaḥ’ iti pā. ↩
7 gaṅgādharastu ‘adhovirecanairūrdhvamadhastathordhvagaṃ’ iti paṭhati, ‘ūrdhvagaṃ śothamadhovirecanairupācaret, tathā'dhaḥśothamūrdhvavirecanairupācaret’ iti ca vyākhyānayati ↩
8 ‘salavaṇaṃ’ iti, ‘sakṛśaraṃ’ iti ca pā. ↩
9 vijjalaṃ picchilaṃ dravyam ↩
10 ‘prāguktamadyā...’ iti pā. ↩
11 ‘kāñjikamastunastu’ iti pā. ↩
12 ‘kṣudrāphalānāṃ’ iti pā. ↩
13 ‘kṣudraguḍāt purāṇāttulāṃ tu’ iti pā. ↩
14 ‘vāsāṃ’ iti pā. ↩
15 ‘hematvagelāmaricāmbupatraiḥ’ iti pā. ↩
16 ‘śilāhvayaṃ’ iti pā. ↩
17 ‘yavānikācitrakadhānyapāṭhāḥ sadīpyakatryūṣaṇavetasāmlāḥ’ iti pā. ↩
18 ‘arśāṃsi sāmānilagulmamehāṃstaddhanti dīptaṃ ca karoti vahnim’ iti pā. ↩
19 ‘pañcamūlaiḥ’ iti pā. ↩
20 ‘jalaistathairaṇḍavṛṣārkaśigru...’ iti pā. ↩
21 ‘svinnaḥ kavoṣṇaiḥ’ iti pā. ↩
22 ‘śophā bahutvādativṛttasaṅkhyāsteṣāṃ tu kāṃścicchṛṇu cocyamānān’ iti pā. ↩
23 ‘śvasanocchvasograḥ’ iti gaṅgādharasammataḥ pāṭhaḥ ↩
24 ‘vitānikā’ iti pā. ↩
25 ‘svairbheṣajaiḥ’ iti pā. ↩
26 ayamardhaślokaḥ kvacitpustake na paṭhyate ↩
27 ‘apariśodhite’ iti pā. ↩
28 gaṅgādharastu ‘samūlā’ iti paṭhati, ‘samūlā na yā calati prapīḍanena sā samūlā pīḍakā’ iti ca vyākhyānayati ↩
29 ‘rogaḥ kṣataḥ’ iti pā. ↩
30 ‘sphoṭāḥ sadāhā jvaratarṣayuktāḥ’ iti pā. ↩
31 ‘kakṣyāḥ’ iti pā. ↩
32 ‘tāsu’ iti pā. ↩
33 ‘vṛddhe’ iti pā. ↩
34 ‘syānmūtramedaḥkaphajaṃ’ iti pā. ↩
35 ‘mūtramedaḥkaphajānāṃ’ iti pā. ↩
36 ‘kṛmestṛṇādikṣaṇanavyavāya...’ iti pā. ↩
37 ‘supāṭitasya bhinnasya’ iti pā. ↩
38 ‘jaṅghāsu piṇḍīṣu padopariṣṭāt’ iti pā. ↩
39 ‘vividhasya’ iti pā. ↩