7. pannarūpīyamindriyam

athātaḥ pannarūpīyamindriyaṃ vyākhyāsyāmaḥ||1|| iti ha smāha bhagavānātreyaḥ||2||

vyādhirūpānantaraṃ vedanopadravau uddiṣṭau, tau ca pūrvādhyāya eva “śūlāṭopāntrakūjāśca” (iṃ.a.5) ityādinā tathā anyatra “ānāhaścātisāraśca” (iṃ.a.6) ityādinā riṣṭarūpatayā uktāveveti kṛtvā chāyāpraticchāyārūpāriṣṭasya kramaprāptasyābhidhāyakaṃ pannarūpīyamucyate| pannarūpāmadhikṛtya kṛtaṃ pannarūpīyam||1-2||

dṛṣṭyāṃ yasya vijānīyāt pannarūpāṃ kumārikām| praticchāyāmayīmakṣṇornainamiccheccikitsitum||3||

pannarūpāmiti naṣṭarūpām| kumārikāmiti puruṣāntaranayanagatāṃ kumārikāṃ; kiṃvā, āturanayanagatāmeva| yaduktaṃ hārīte- “adarśanamasaṅghāte netre naṣṭakumārike” iti| praticchāyāmayīmiti praticchāyārūpām||3||

jyotsnāyāmātape dīpe salilādarśayorapi| aṅgeṣu vikṛtā yasya cchāyā pretastathaiva ¹ saḥ||4||

anyatrāpi chāyāvikṛtimāha- jyotsnetyādi| aṅgeṣu vikṛteti śirobāhujaṅghādiṣu chāyādhikaraṇabhūteṣu bhavantī praticchāyā yasya vikṛtā bhavatītyarthaḥ| tena vyastasamastāṅgavikṛtā'pi chāyā gṛhyate| anye tu- vibhaktivipariṇāmādaṅgānāmiti vyākhyānayanti; tathā ca sugama evārthaḥ||4||

chinnā bhinnā''kulā cchāyā hīnā vā'pyadhikā'pi vā| naṣṭā tanvī dvidhā cchinnā vikṛtā viśirā ca yā||5|| etāścānyāśca yāḥ kāścit praticchāyā vigarhitāḥ| sarvā mumūrṣatāṃ jñeyā na cellakṣyanimittajāḥ||6||

etāneva chāyāvikṛtibhedānāha- chinnetyādi| ākuleti aniścitapratibimbā| vikṛtā vikṛtānukāriṇī ²| yadyapyariṣṭādhikāre'nimittameva yadbhavati tadariṣṭamuktaṃ, tathā'pi punaḥ spaṣṭārthaṃ ‘na cellakṣyanimittajāḥ’ ityuktam||5-6||

saṃsthānena pramāṇena varṇena prabhayā tathā| chāyā vivartate yasya svastho'pi preta eva saḥ||7||

samprati chāyārūpaṃ sāmānyena darśayañchāyāśrayāriṣṭamāha- saṃsthānenetyādi| etacca chāyāpraticchāyayoḥ samānaṃ sūtram| tatra saṃsthānena pramāṇena ca praticchāyāḥ svarūpakathanaṃ, tathā varṇena prabhayā ca chāyāyāḥ svarūpakathanam| tatra saṃsthānena pramāṇena ca sadṛśī chāyā praticchāyā jñeyā; varṇena prabhayā ca lakṣitā varṇaprabhāśrayā'gre vakṣyamāṇā pañcavidhā cchāyā jñeyā| atra yattadornityābhisambandhāt ‘sā’ ityadhyāhāryate| tena saṃsthānādibhiryā chāyā praticchāyārūpā, sā yasya vivartate anyathā bhavati, sa preta eveti yojanā||7||

saṃsthānamākṛtirjñeyā suṣamā viṣamā ca sā| madhyamalpaṃ mahaccoktaṃ pramāṇaṃ trividhaṃ nṛṇām||8|| pratipramāṇasaṃsthānā jalādarśātapādiṣu| chāyā yā sā praticchāyā cchāyā varṇaprabhāśrayā||9||

praticchāyākāraṇabhūte saṃsthānapramāṇe eva vivṛṇoti- saṃsthānamityādi| ākṛtiḥ ākāraḥ| pratītyādi praticchāyāvivaraṇaṃ, ‘chāyā varṇaprabhāśrayā’ ityādi tu chāyāvivaraṇaṃ bhaviṣyati| pratipramāṇasaṃsthānetyatra prati sādṛśye; tena pramāṇasadṛśī, saṃsthānasadṛśī ca| pramāṇasaṃsthānasadṛśatayā jalādiṣu yā chāyā, sā praticchāyā| chāyā tu yā pañcavidhā sā varṇaprabhāśrayā varṇaprabhāsahacaritopalabhyata ityarthaḥ||8-9||

khādīnāṃ pañca pañcānāṃ chāyā vividhalakṣaṇāḥ| nābhasī nirmalā nīlā sasnehā saprabheva ca||10|| rūkṣā śyāvāruṇā yā tu vāyavī sā hataprabhā| viśuddharaktā tvāgneyī dīptābhā darśanapriyā||11|| śuddhavaidūryavimalā susnigdhā cāmbhasī matā| sthirā snigdhā ³ ghanā ślakṣṇā śyāmā śvetā ca pārthivī||12|| vāyavī garhitā tvāsāṃ catasraḥ syuḥ sukhodayāḥ ⁴| vāyavī tu vināśāya kleśāya mahate'pi vā||13||

khādīnāmityādinā chāyāṃ vibhajate| saprabheti dīptābhā| vāyavī garhiteti vāyavī riṣṭāya prāyo bhavati| yasya janmaprabhṛti vāyavī, sa cāpi prabhūtakleśabhāgbhavatītyāha- vāyavītyādi| vināśāyeti akasmādutpannā ⁵ vināśāya, sahajā tu vāyavī kleśāyeti jñeyam||10-13||

syāttaijasī prabhā sarvā sā tu saptavidhā smṛtā| raktā pītā sitā śyāvā haritā pāṇḍurā'sitā||14|| tāsāṃ yāḥ syurvikāsinyaḥ snigdhāśca vipulāśca yāḥ| tāḥ śubhā rūkṣamalināḥ saṅkṣiptāścāśubhodayāḥ ⁶||15||

samprati chāyāśrayatvena varṇabheda uktaḥ, tatra varṇabhedāstadariṣṭaṃ ca prathamādhyāya evoktaṃ; prabhāyāstu bhedaṃ riṣṭaṃ cāha- syāttaijasītyādi| prabhā ca yadyapi prathamādhyāye saṅgrahe noktā; tathā'pi tatra cchāyāśrayatvena varṇabhedā uktāḥ, tatra varṇabhedāstadariṣṭaṃ ca prathamādhyāye saṅgraheṇoktaṃ, chāyāśrayatvena tatra prabhā'pi sūciteti jñeyam| aśubhodayā iti akasmādutpāde maraṇodayāḥ, sahajotpāde tu bahuduḥkharūpā aśubhodayā iti jñeyam||14-15||

varṇamākrāmati cchāyā bhāstu ⁷ varṇaprakāśinī| āsannā lakṣyate cchāyā bhāḥ prakṛṣṭā ⁸ prakāśate||16|| nācchāyo nāprabhaḥ kaścidviśeṣāścihnayanti tu| nṛṇāṃ śubhāśubhotpattiṃ kāle chāyāprabhāśrayāḥ||17||

prabhācchāyayordurlakṣyatvena bhedakaṃ lakṣaṇamāha- varṇamityādi| varṇamākrāmatīti chāyākrānto varṇo nopalabhyate samyak| āsannā lakṣyate cchāyā, yathā- citragatā chāyā pratyāsannaiva lakṣyate| bhāḥ prakṛṣṭā prakāśate; yathā- maṇimauktikādīnāṃ prabhā dūrādupalabhyata ityarthaḥ| viśeṣā iti chāyāprabhayoḥ ⁹ śubhāśubharūpaviśeṣāḥ| cihnayantīti gamayanti| kāle iti paripākakāle||16-17||

kāmalā'kṣṇormukhaṃ pūrṇaṃ śaṅkhayormuktamāṃsatā| santrāsaścoṣṇagātratvaṃ ¹⁰ yasya taṃ parivarjayet||18|| utthāpyamānaḥ śayanāt pramohaṃ yāti yo naraḥ| muhurmuhurna saptāhaṃ sa jīvati vikatthanaḥ ¹¹||19|| saṃsṛṣṭā vyādhayo yasya pratilomānulomagāḥ| vyāpannā grahaṇī prāyaḥ so'rdhamāsaṃ na jīvati||20||

kāmalā'kṣṇoriti kāmalina iva pītākṣatvam| vikatthana iti nindāparaḥ| saṃsṛṣṭā iti parasparasambaddhāḥ, kiṃvā saṃsṛṣṭadoṣajanyāḥ| pratilomānulomagā iti adhomārgordhvamārgagatāḥ| vyāpannā grahaṇīti cchedaḥ; kiṃvā, vyāpannā grahaṇī yasya sa ‘vyāpannagrahaṇī’ iti pāṭhaḥ| prāyaḥ so'rdhamāsaṃ na jīvatīti anenārdhamāsamatikramyāpi maraṇaṃ bhavati, na tu maraṇavyabhicāraḥ||18-20||

uparuddhasya rogeṇa karśitasyālpamaśnataḥ| bahu mūtrapurīṣaṃ syādyasya taṃ parivarjayet||21|| durbalo bahu bhuṅkte yaḥ prāgbhuktādannamāturaḥ ¹²| alpamūtrapurīṣaśca yathā pretastathaiva saḥ||22|| iṣṭaṃ ca guṇasampannamannamaśnāti ¹³ yo naraḥ| śaśvacca balavarṇābhyāṃ hīyate na sa jīvati||23|| prakūjati praśvasiti śithilaṃ cātisāryate| balahīnaḥ pipāsārtaḥ śuṣkāsyo na sa jīvati||24|| hrasvaṃ ca yaḥ praśvasiti vyāviddhaṃ spandate ca yaḥ| mṛtameva tamātreyo vyācacakṣe punarvasuḥ||25|| ūrdhvaṃ ca yaḥ praśvasiti śleṣmaṇā cābhibhūyate| hīnavarṇabalāhāro yo naro na sa jīvati||26||

prāgbhuktāditi yāvadannaṃ bhuṅkte sma pūrvadineṣu tato bahu bhuṅkte ityarthaḥ| iṣṭamiti iṣṭarasam| guṇasampannamiti pathyam| śithilamiti pūrveṇa sambadhyate, tena ślatha iva prakūjati| praśvasitīti antaḥ śvāsaṃ nayati| vyāviddhamiti kuṭilam||21-26||

ūrdhvāgre nayane yasya manye ¹⁴ cāratakampane| balahīnaḥ pipāsārtaḥ śuṣkāsyo na sa jīvati||27|| yasya gaṇḍāvupacitau jvarakāsau ca dāruṇau| śūlī pradveṣṭi cāpyannaṃ tasmin karma na sidhyati||28|| vyāvṛttamūrdhajihvāsyo ¹⁵ bhruvau yasya ca vicyute| kaṇṭakaiścācitā jihvā yathā pretastathaiva saḥ||29|| śephaścātyarthamutsiktaṃ niḥsṛtau vṛṣaṇau bhṛśam| ataścaiva viparyāso vikṛtyā pretalakṣaṇam||30|| nicitaṃ yasya māṃsaṃ syāttvagasthiṣveva ¹⁶ dṛśyate| kṣīṇasyānaśnatastasya māsamāyuḥ paraṃ bhavet||31|| tatra ślokaḥ- idaṃ liṅgamariṣṭākhyamanekamabhijajñivān| āyurvedavidityākhyāṃ labhate kuśalo janaḥ||32||

ūrdhvāgre iti ūrdhvamukhe| āratakampane aviśrāntakampane| utsiktamiti antaḥpraviṣṭam| ataścaiva viparyāsa iti śepho'tiniḥsṛtaṃ, vṛṣaṇau cātipraviṣṭau| vikṛtyeti svabhāvaṃ vinā; tena svabhāvotsiktaśephādi na riṣṭaṃ, kintvanimittaṃ kādācitkaṃ sadeva riṣṭam| nicitamiti kṣīṇaṃ, niśabdasya pratiṣedhārthatvāt| evaṃ ca tathā māṃsaṃ kṣīṇaṃ bhavati, yathā tvagasthiṣveva lagnā dṛśyate; kiṃvā nicitamupacitaṃ māṃsaṃ syāt, tvagasthiṣveva dṛśyate tvagasthimātrāvaśeṣo vā bhavatīti yāvat||27-32||

ityagniveśakṛte tantre carakapratisaṃskṛte indriyasthāne pannarūpīyamindriyaṃ nāma saptamo'dhyāyaḥ||7||

iti śrīcakrapāṇidattaviracitāyāmāyurvedadīpikāyāṃ carakatātparyaṭīkāyāmindriyasthāne pannarūpīyamindriyaṃ nāma saptamo'dhyāyaḥ||7||

pāṭhāntarāḥ

1 ‘pretastathāvidhaḥ’ iti pāṭhaḥ ↩
2 ‘vikṛtāṅgānusāriṇī’ iti pāṭhaḥ ↩
3 ‘snigdhā''yatā’ iti pāṭhaḥ ↩
4 ‘śubhodayāḥ’ iti pāṭhaḥ ↩
5 ‘akasmādudbhūtā’ iti pāṭhaḥ ↩
6 ‘saṅkliṣṭāḥ’ iti pāṭhaḥ ↩
7 ‘prabhā’ iti pāṭhaḥ ↩
8 ‘vikṛṣṭā bhāḥ’ iti pāṭhaḥ ↩
9 ‘chāyāpraticchāyayoḥ’ iti pāṭhaḥ ↩
10 ‘santrāsaścoṣṇatā cāṅge’ iti pāṭhaḥ ↩
11 ‘kathañcana’ iti pāṭhaḥ ↩
12 ‘prāgabhuktvā'nnamāturaḥ’ iti pāṭhaḥ ↩
13 ‘vardhiṣṇuguṇasampannaṃ’ iti pāṭhaḥ ↩
14 ‘yasyānāratakampane’ iti pāṭhaḥ ↩
15 ‘vyāvṛttamukhajihvasya’ iti pāṭhaḥ ↩
16 ‘tu tvagasthi caiva’ iti pāṭhaḥ ↩