3. ikṣvākukalpaḥ

athāta ikṣvākukalpaṃ vyākhyāsyāmaḥ||1|| iti ha smāha bhagavānātreyaḥ||2|| siddhaṃ vakṣyāmyathekṣvākukalpaṃ yeṣāṃ praśasyate|3|

uktādhyāyasambandhādikṣvākukalpo'bhidhīyate| yeṣāṃ praśasyate ikṣvākukalpastān vakṣyāmīti yojyam||1-2||-

lambā'tha ¹ kaṭukālābūstumbī piṇḍaphalā tathā||3|| ikṣvākuḥ phalinī caiva procyate tasya kalpanā|4|

lambetyādi paryāyakathanam||3||-

kāsaśvāsaviṣacchardijvarārte kaphakarṣite||4|| pratāmyati nare caiva vamanārthaṃ tadiṣyate|5|

tadiṣyate iti ikṣvākukalpanamiṣyate||4||-

apuṣpasya pravālānāṃ muṣṭiṃ prādeśasammitam||5|| kṣīraprasthe śṛtaṃ dadyāt pittodrikte kaphajvare| puṣpādiṣu ca catvāraḥ kṣīre jīmūtake yathā||6|| yogā haritapāṇḍūnāṃ surāmaṇḍena pañcamaḥ| phalasvarasabhāgaṃ ca triguṇakṣīrasādhitam||7|| uraḥsthite kaphe dadyāt svarabhede ca pīnase| jīrṇe madhyoddhṛte kṣīraṃ ² prakṣipettadyadā dadhi||8|| jātaṃ syāt sakaphe kāse śvāse vamyāṃ ca tat pibet| ajākṣīreṇa bījāni bhāvayet ³ pāyayet ca||9|| viṣagulmodaragranthigaṇḍeṣu ślīpadeṣu ca| mastunā vā phalānmadhyaṃ pāṇḍukuṣṭhaviṣārditaḥ||10|| tena takraṃ vipakvaṃ vā sakṣaudralavaṇaṃ pibet|11|

apuṣpasyetyādinā ekaḥ kṣīrayogaḥ| apuṣpasyeti anutpannapuṣpasya| muṣṭiṃ prādeśasammitamiti pradeśinyā mūlaparyantakṛtamuṣṭiparimāṇam; evaṃ ca nātra muṣṭiśabdaḥ palavacanaḥ| kṣīraprasthe śṛtamiti vacanāt kṣīraprasthe yathoktamānamikṣvākumāvāpya caturguṇaṃ pānīyaṃ dattvā kṣīraṃ sādhanīyam| puṣpādiṣvityādinā caturaḥ kṣīrayogānāha| jīmūtake yathā “payaḥ puṣpe'sya nirvṛtte phale peyā payaskṛtā| romaśe kṣīrasantānaṃ dadhyuttaramaromaśe” (ka.a.2) ityanenoktaṃ, tathehāpi yogacatuṣṭayaṃ karaṇīyam| haritetyādinā surāyogamāha| haritapāṇḍūnāmikṣvākuphalānāṃ surāmaṇḍe jīmūtakavadyogaḥ kartavyaḥ; jīmūtakavidhānātideśena “āsutya ca surāmaṇḍe muditvā prasrutaṃ pibet” (ka.a.2) iti granthoktavidhānamihāpi bhavati| phalasvarasetyādinā ṣaṣṭhaḥ kṣīrayogo'bhidhīyate| triguṇakṣīrasādhitamiti triguṇena kṣīreṇa sādhitaṃ; tacca caturguṇena toyena sādhanīyam| phalaśabdenātrekṣvākuphalamucyate| jīrṇe ityādinā saptamaḥ kṣīrayogaḥ| madhyoddhṛte iti uddhṛtamadhye| ajākṣīreṇetyādinā'ṣṭamaḥ kṣīrayogaḥ| tena takramityādinā takrayogaḥ| teneti tumbīphalamadhyena||5-10||-

tumbyā phalarasaiḥ śuṣkaiḥ sapuṣpairavacūrṇitam||11|| chardayenmālyamāghrāya gandhasampatsukhocitaḥ|12|

tumbyā ityādinā ghreyayogamāha| gandhasampatsukhocita iti gandhasampat sugandhavattvaṃ, tayā gandhasampadā sukhamucitamabhyastaṃ yena saḥ; avacūrṇitekṣvākuphalarasapuṣpaṃ ⁴ mālyamāghrāyaiva vamatyanabhyastadurgandha iti bhāvaḥ||11||-

bhakṣayet phalamadhyaṃ vā guḍena palalena ca||12|| ikṣvākuphalatailaṃ vā siddhaṃ vā pūrvavadghṛtam|13|

bhakṣayedityādinā vamanayogamekamāha| phalamadhyam ikṣvākuphalamadhyam| ikṣvākuphalakalkasādhitaṃ tailamikṣvākuphalatailam; ayameka eva tailayogaḥ| pūrvavaditi jīmūtakavat, tena “tathā jīmūtakakṣīrāt” (ka.a.2) ityādinoktavidhānena jīmūtakasthāne ikṣvākuphalaṃ dattveha ghṛtaṃ sādhanīyam||12||-

pañcāśaddaśavṛddhāni phalādīnāṃ yathottaram||13|| pibedvimṛdya bījāni kaṣāyeṣvāśataṃ pṛthak|14|

pañcāśadityādinā ṣaḍ vardhamānakayogānāha| pañcāśadārabhya daśakena vṛddhairikṣvākubījaiḥ śataṃ pūraṇīyam| tena ṣaḍyogā bhavanti| tāni ca yathāsaṅkhyaṃ madanaphalādīnāṃ ṣaṇṇāmanyatamakaṣāyeṣvāsutya vimṛditāni pātavyāni ⁵| anye tu daśabījādārabhya pañcāśadbījaparyantaṃ doṣādyapekṣayā pātavyaṃ; tatra madanādikaṣāyabhedādeva yogabheda ityāhuḥ||13||-

yaṣṭyāhvakovidārādyairmuṣṭimantarnakhaṃ pibet||14||

yaṣṭyāhvetyādinā navakaṣāyayogānāha| tatra yaṣṭyāhvamekaṃ, kovidārādayo madanakalpoktā aṣṭau||14||

kaṣāyaiḥ kovidārādyairmātrāśca ⁶ phalavat smṛtāḥ|15|

kaṣāyairityādinā madanaphalasadṛśavidhā aṣṭau mātrālakṣitāḥ prayogā ucyante|15|-

bilvamūlakaṣāyeṇa tumbībījāñjaliṃ pacet||15|| pūtasyāsya trayo bhāgāścaturthaḥ ⁷ phāṇitasya tu| saghṛto bījabhāgaśca piṣṭānardhāṃśikāṃstathā ⁸||16|| mahājālinijīmūtakṛtavedhanavatsakān| taṃ lehaṃ sādhayeddarvyā ghaṭṭayanmṛdunā'gninā||17|| yāvat syāttantumattoye patitaṃ tu na śīryate| taṃ lihanmātrayā lehaṃ ⁹ pramathyāṃ ca pibedanu||18|| kalpa eṣo'gnimanthādau catuṣke pṛthagucyate|19|

bilvetyādinā eko lehaḥ, tathā ‘kalpa’ ityādinā catvāro lehā ante draṣṭavyāḥ, evaṃ pañca lehāḥ| añjaliḥ palacatuṣṭayam| atra ca “tataśca kuḍavaṃ yāvattoyamaṣṭaguṇaṃ bhavet” iti vacanādbilvamūlakaṣāyasyāṣṭāvañjalayo deyāḥ, tataścaturbhāgāvaśeṣeṇa kuḍavadvayam| phāṇitam ardhaśṛta ikṣurasaḥ| ‘caturthaḥ phāṇitasya ca’ ityasya sthāne ‘trayastrikaṭukasya ca’ iti kecit paṭhanti| saghṛta iti ghṛtasyaiko bhāgaḥ| ardhāṃśikāniti ekabhāgārdhamānān pratyekaṃ mahājālinyādīn| mahājālinī pītakoṣātakī, kṛtavedhanaḥ ghoṣakabhedaḥ ‘jyotsnikā” iti khyātaḥ| yāvat syāttantumadityādinā lehapākalakṣaṇamāha; etacca lakṣaṇaṃ lehāntareṣvapi pācanīyeṣu jñeyam| na śīryate na vistīryate| pramathyāṃ ca pibedanviti atīsāracikitsite “pippalī nāgaraṃ dhānyaṃ” (ci.a.19) ityādinoktapramathyānāṃ madhye'nyatamapramathyākṛtaṃ kaṣāyaṃ pibedityarthaḥ| ‘pramathyāṃ ca’ ityasya sthāne kecit ‘manthaṃ cāpi’ iti paṭhanti| agnimanthādāviti pratyekamagnimantha-syonāka-pāṭalā-gambhārīmūlacatuṣkaṃ pañcamūlakathanaprastāve rasāyane kathitam||15-18||-

śaktubhirvā pibenmanthaṃ tumbīsvarasabhāvitaiḥ||19|| kaphaje'tha jvare kāse kaṇṭharogeṣvarocake|20|

śaktubhirityādinaiko manthayogaḥ||19||-

gulme mehe ¹⁰ praseke ca kalkaṃ māṃsarasaiḥ pibet| naraḥ sādhu vamatyevaṃ na ca daurbalyamaśnute||20||

gulme jvara ityādinā rasaikayogamāha| kalkam ikṣvākubījakalkam||20||

tatra ślokāḥ- payasyaṣṭau surāmaṇḍa-mastu-takreṣu ca trayaḥ| ghreyaṃ sapalalaṃ tailaṃ vardhamānāḥ phaleṣu ṣaṭ||21|| ghṛtamekaṃ kaṣāyeṣu navānye madhukādiṣu| aṣṭau vartikriyā lehāḥ pañca mantho ¹¹ rasastathā||22|| yogā ikṣvākukalpe ¹² te catvāriṃśacca pañca ca| uktā maharṣiṇā samyak prajānāṃ hitakāmyayā||23||

payasyaṣṭāvityādisaṅgrahārtho vyākṛta eva| atra phaleṣviti madanaphalādiṣu| ghṛtaṃ yadyapi vardhamānapūrvapaṭhitaṃ, tathā'pi chandonurodhādiha paścāt paṭhitam||21-23||

ityagniveśakṛte tantre carakapratisaṃskṛte'prāpte dṛḍhabalasampūrite kalpasthāne ikṣvākukalpo nāma tṛtīyo'dhyāyaḥ||3||

iti śrīcakrapāṇidattaviracitāyāmāyurvedadīpikāyāṃ carakatātparyaṭīkāyāṃ kalpasthāne ikṣvākukalpo nāma tṛtīyo'dhyāyaḥ||3||

pāṭhāntarāḥ

1 ‘lambā piṇḍaphalā tumbī kaṭukālābukī ca sā’ iti pā. ↩
2 ‘jīrṇamadhyoddhṛtaṃ kṣīre’ iti pā. ↩
3 ‘bhāvitāni prayojayet’ iti pā. ↩
4 ‘avacūrṇitamikṣvākuphalarasabhāvitaṃ’ iti pā. ↩
5 ‘tena madanaphalādīnāṃ ṣaṇṇāṃ kaṣāye āsutāḥ santo vimṛditāḥ pātavyāḥ’ iti pā. ↩
6 ‘rvartayaḥ’ iti pā. ↩
7 ‘bhāgāstrayastrikaṭukasya ca’ iti pā. ↩
8 ‘piṣṭvā hyardhāṃśikāṃstathā’ iti pā. ↩
9 ‘kāle’ iti pā. ↩
10 ‘śophe’ iti pā. ↩
11 ‘manthe rase tathā’ iti pā. ↩
12 ‘ikṣvākukalpe'smin’ iti pā. ↩