5. vatsakakalpaḥ

athāto vatsakakalpaṃ vyākhyāsyāmaḥ||1|| iti ha smāha bhagavānātreyaḥ||2||

yathoktasambandhādvatsakakalpābhidhānam||1-2||

atha vatsakanāmāni bhedaṃ strīpuṃsayostathā| kalpaṃ cāsya pravakṣyāmi ¹ vistareṇa yathātatham||3|| vatsakaḥ kuṭajaḥ śakro vṛkṣako girimallikā| bījānīndrayavāstasya tathocyante kaliṅgakāḥ||4|| bṛhatphalaḥ śvetapuṣpaḥ ² snigdhapatraḥ pumān bhavet| śyāmā cāruṇapuṣpā strī phalavṛntaistathā'ṇubhiḥ ³||5|| raktapittakaphaghnastu sukumāreṣvanatyayaḥ| hṛdrogajvaravātāsṛgvīsarpādiṣu śasyate||6||

vatsakanāmāni vyavahārārthaṃ strīpuruṣabhedaṃ cāha- athetyādi| atra vatsakastrīpuruṣabhedena yadyapi guṇabhedaḥ prayogabhedo vā na pratipāditaḥ, tathā'pi strīrūpavatsake'puṣpaphalatvādiviśiṣṭalakṣaṇayukte'pyaviśeṣeṇobhābhyāmevāmayanivṛttiḥ syādityetadarthamubhayorapi samānaguṇatā jñātavyā||3-6||

kāle phalāni saṅgṛhyā tayoḥ śuṣkāṇi nikṣipet ⁴| teṣāmantarnakhaṃ muṣṭiṃ jarjarīkṛtya bhāvayet ⁵||7|| madhukasya kaṣāyeṇa kovidārādibhistathā| niśi sthitaṃ vimṛdyaitallavaṇakṣaudrasaṃyutam||8|| pibettadvamanaṃ śreṣṭhaṃ pittaśleṣmanibarhaṇam|9|

kāle iti ucite kāle| śuṣkāṇīti pakvaśuṣkāṇi| teṣāmantarnakhamityādinā kaṣāyairnavayogānāha| kṣaudrasaindhavayogo yadyapi sarvavamaneṣveva sāmānyena vihitaḥ, tathā'pīha ‘lavaṇakṣaudrasaṃyutam’ iti vacanādutkarṣo lavaṇasaindhavayorabhidhīyate||7-8||-

aṣṭāhaṃ payasā''rkeṇa teṣāṃ cūrṇāni bhāvayet||9|| jīvakasya ⁶ kaṣāyeṇa tataḥ pāṇitalaṃ pibet| phalajīmūtakekṣvākujīvantīnāṃ pṛthak tathā||10|| sarṣapāṇāṃ madhūkānāṃ lavaṇasyāthavā'mbunā|11|

aṣṭāhamityādinā pañca cūrṇayogānāha||9-10||-

kṛśareṇāthavā yuktaṃ vidadhyādvamanaṃ bhiṣak||11||

kṛśareṇetyādinā kṛśarayoga ucyate| atra ca indrayavacūrṇamadhikṛtatvādevocyate||11||

tatra ślokaḥ- kaṣāyairnava cūrṇaiśca pañcoktāḥ salilaistrayaḥ| ekaśca kṛśarāyāṃ syādyogāste'ṣṭādaśa smṛtāḥ ⁷||12||

kaṣāyairityādisaṅgrahaśloko vyākhyātārtha eva||12||

ityagniveśakṛte tantre carakapratisaṃskṛte'prāpte dṛḍhabalasampūrite kalpasthāne vatsakakalpo nāma pañcamo'dhyāyaḥ||5||

iti śrīcakrapāṇidattaviracitāyāmāyurvedadīpikāyāṃ carakatātparyaṭīkāyāṃ kalpasthāne vatsakakalpo nāma pañcamo'dhyāyaḥ||5||

pāṭhāntarāḥ

1 ‘nibodhemaṃ’ iti pā. ↩
2 ‘sitaiḥ puṣpaiḥ’ iti pā. ↩
3 ‘phalapuṣpaiḥ’ iti pā. ↩
4 ‘saṅkṣipet’ iti pā. ↩
5 ‘tepayet’ iti, ‘temayet iti’ ca pā. ↩
6 ‘jīmūtakakaṣāyeṇa’ iti pā. ↩
7 ‘kṛśarā'ṣṭādaśayogā vatsakasya nidarśitāḥ’ iti pā. ↩