7. śyāmātrivṛtkalpaḥ

athātaḥ śyāmātrivṛtkalpaṃ vyākhyāsyāmaḥ||1|| iti ha smāha bhagavānātreyaḥ||2||

vamanārthakalpanānantaraṃ virecanakalpeṣu vaktavyeṣu trivṛtāyā virecanadravyeṣu sukhavirecanatayā pradhānatvāt trivṛtkalpa evābhidhīyate| trivṛtābheda eva ca śyāmā, tena śyāmāyāstrivṛtāyāśca kalpaḥ śyāmātrivṛtkalpaḥ| yadyapi cāruṇamūlaiva trivṛdatrotkṛṣṭā vaktavyā, tathā'pyadhyāyasañjñāyāṃ śyāmāyā agre pāṭhenāśudoṣahantṛtayā śyāmāyāḥ prakarṣaṃ darśayati| ye cātra yogā vaktavyāste'ruṇayā vā śyāmayā vā ubhābhyāṃ vā doṣaśarīrādibalābalamavekṣya kartavyāḥ||1-2||

virecane trivṛnmūlaṃ śreṣṭhamāhurmanīṣiṇaḥ ¹| tasyāḥ sañjñā guṇāḥ karma bhedaḥ kalpaśca vakṣyate||3||

virecane ityādau trivṛnmūlaśabdena śyāmamūlāyā aruṇamūlāyāśca sāmānyena mūlaṃ gṛhyate||3||

tribhaṇḍī trivṛtā caiva ² śyāmā kūṭaraṇā tathā| sarvānubhūtiḥ suvahā ³ śabdaiḥ paryāyavācakaiḥ||4||

paryāyatvena vācakaiḥ paryāyavācakaiḥ||4||

kaṣāyā madhurā rūkṣā vipāke kaṭukā ca sā| kaphapittapraśamanī raukṣyāccānilakopanī||5|| sedānīmauṣadhairyuktā vātapittakaphāpahaiḥ| kalpavaiśeṣyamāsādya ⁴ sarvarogaharā bhavet||6||

sedānīmityādi| vātāpahauṣadhayogena vātahantṛtvamavidyamānaṃ bhavati, kaphapittahantṛtvaṃ vidyamānamadhikaṃ bhavatīti jñeyam| kalpavaiśeṣyamiti kalpanāviśeṣam| sarvarogahareti vyastasamastasarvadoṣārabdharogaharā||5-6||

mūlaṃ tu dvividhaṃ tasyāḥ śyāmaṃ cāruṇameva ca| tayormukhyataraṃ ⁵ viddhi mūlaṃ yadaruṇaprabham||7|| sukumāre śiśau vṛddhe mṛdukoṣṭhe ca tacchubham ⁶| mohayedāśukāritvācchyāmā kṣiṇvīta mūrcchayet ⁷||8|| taikṣṇyāt karṣati hṛtkaṇṭhamāśu doṣaṃ haratyapi| śasyate bahudoṣāṇāṃ krūrakoṣṭhāśca ye narāḥ||9||

trivṛtayorbhedamāha- mūlaṃ tu dvividhamityādi| mukhyataramiti virecanakriyāyāmevāvyāpattikaratvācchreṣṭhataram| sukumārāḥ śiśavaśca yadyapyavirecanīyā uktāstathā'pi teṣāṃ vidhīyamānavirecane hitamiti jñeyam| mohayedityādinā śyāmamūlāyā guṇakarmaṇī brūte| kṣiṇvīteti dhātukṣayaṃ kuryāt||7-9||

guṇavatyāṃ tayorbhūmau jātaṃ mūlaṃ samuddharet| upoṣya prayataḥ śukle śuklavāsāḥ samāhitaḥ||10|| gambhīrānugataṃ ślakṣṇamatiryagvisṛtaṃ ca yat| tadvipāṭyoddharedgarbhaṃ ⁸ tvacaṃ śuṣkāṃ nidhāpayet||11||

yadyapi madanakalpa eva guṇavadbhūmijātatvādi sāmānyena bheṣajānāmuktameva, tathā'pi gambhīrānugatatvādiviśeṣasya tatrānuktasyehābhidhāne sati tatprasaṅgāt tatkiñciducyate- guṇavatyāmityādi| śukle iti śuklapakṣe| gambhīrānugamiti dūrapraviṣṭam| uddharedgarbhamiti mūlasyāsthi uddharet| nidhāpayediti yathoktabhaiṣajyasthāpanavidhānena sthāpayet||10-11||

snigdhasvinno virecyastu peyāmātroṣitaḥ ⁹ sukham|12|

peyāmātroṣita iti pūrvadine peyāmātrāhāratayā uṣitaḥ; yadyapi cānyatra virecanapūrvadineṣu tathaivāhāro niyamitaḥ- “snehavaddravamuṣṇaṃ ca tryahaṃ bhuktvā rasaudanam” (sū.a.13) ityanena, tathā'pi trivṛdvirecanaprayoge pūrvadine viśeṣavidhānāt peyādānaṃ jñeyam| kiñceyameva tadvacanāt snigdhoṣṇamāṃsarasasādhitā ca kriyamāṇā na pūrvoktasnehavaddravauṣṇamāṃsarasaudanaviruddhā bhavati|12|

akṣamātraṃ tayoḥ piṇḍaṃ vinīyāmlena nā pibet||12|| go'vyajāmahiṣīmūtrasauvīrakatuṣodakaiḥ| prasannayā triphalayā śṛtayā ca pṛthak pibet||13||

akṣamātramityādinā navabhiramlādibhirdravyairnavayogānāha| tayoriti śyāmātrivṛdaruṇatrivṛtayoḥ| etayośca militayoḥ pratyekaṃ ca prayogā iti prāgeva pratipāditam| amleneti kāñjikena||12-13||

ekaikaṃ saindhavādīnāṃ dvādaśānāṃ sanāgaram| trivṛddviguṇasaṃyuktaṃ ¹⁰ cūrṇamuṣṇāmbunā pibet||14||

ekaikamityādinā saindhavādibhirdvādaśayogānāha| saindhavādayaśca dvādaśa rogabhiṣagjitīye (vi.a.8) lavaṇaskandhoktā jñeyāḥ| sanāgaramiti nāgarasahitaṃ sat pratyekaṃ saindhavādīnāṃ cūrṇaṃ dviguṇatrivṛtācūrṇayuktaṃ pātavyam||14||

pippalī pippalīmūlaṃ maricaṃ gajapippalī| saralaḥ kilimaṃ hiṅgu bhārgī tejovatī tathā||15|| mustaṃ haimavatī pathyā citrako rajanī vacā| svarṇakṣīryajamodā ca śṛṅgaveraṃ ca taiḥ pṛthak||16|| ekaikārdhāṃśasaṃyuktaṃ pibedgomūtrasaṃyutam|17|

pippalītyādinā pippalyādidravyabhedena mūtre'ṣṭādaśayogānāha||15-16||-

madhukārdhāṃśasaṃyuktaṃ śarkarāmbuyutaṃ pibet||17||

madhuketyādinaikaḥ prayogaḥ| ayaṃ ca saṅgrahoktayoḥ ‘yaṣṭyāṃ dvau’ ityanayorekataraḥ||17||

jīvakarṣabhakau medāṃ śrāvaṇīṃ karkāṭāhvayām| mudgamāṣākhyaparṇyau ca mahatīṃ śrāvaṇīṃ tathā||18|| kākolīṃ kṣīrakākolīmindrāṃ ¹¹ chinnaruhāṃ tathā| kṣīraśuklāṃ payasyāṃ ca yaṣṭyāhvaṃ vidhinā pibet||19|| vātapittahitānyetānyanyāni tu kaphānile|20|

jīvaketyādinā caturdaśayogān tathā yaṣṭyāhvamityekaṃ cāha| ayaṃ ca saṅgrahoktayoḥ ‘yaṣṭyāṃ dvau’ iti dvayoranyataraḥ| kṣīraśuklā kṣīravidārī| indrā kokilākṣaḥ| payasyā arkapuṣpī||18-19||-

kṣīramāṃsekṣukāśmaryadrākṣāpīlurasaiḥ pṛthak||20|| sarpiṣā vā tayoścūrṇamabhayārdhāṃśikaṃ pibet|21|

kṣīretyādinā kṣīrādau sapta yogānāha| pīlu auttarapathikaṃ phalam||20||-

lihyādvā madhusarpirbhyāṃ saṃyuktaṃ sasitopalam||21|| ajagandhā tugākṣīrī vidārī śarkarā trivṛt| cūrṇitaṃ kṣaudrasarpirbhyāṃ līḍhvā sādhu viricyate||22|| sannipātajvarastambhadāhatṛṣṇārdito naraḥ| śyāmātrivṛtkaṣāyeṇa kalkena ca saśarkaram||23|| sādhayedvidhivallehaṃ lihyāt pāṇitalaṃ tataḥ| sakṣaudrāṃ śarkarāṃ paktvā kuryānmṛdbhājane nave||24|| kṣipecchīte ¹² trivṛccūrṇaṃ tvakpatramaricaiḥ saha| mātrayā ¹³ lehayedetadīśvarāṇāṃ virecanam||25|| kuḍavāṃśān ¹⁴ rasānikṣudrākṣāpīluparuṣakāt| sitopalāpalaṃ kṣaudrāt kuḍavārdhaṃ ca sādhayet||26|| taṃ lehaṃ yojayecchītaṃ trivṛccūrṇena śāstravit| etadutsannapittānāmīśvarāṇāṃ ¹⁵ virecanam||27|| śarkarāmodakān vartīrgulikāmāṃsapūpakān| anena vidhinā kuryāt paittikānāṃ virecanam||28|| pippalīṃ nāgaraṃ kṣāraṃ śyāmāṃ trivṛtayā saha| lehayenmadhunā sārdhaṃ śleṣmalānāṃ ¹⁶ virecanam||29|| mātuluṅgābhayādhātrīśrīparṇīkoladāḍimāt| subhṛṣṭān svarasāṃstaile sādhayettatra cāvapet||30|| sahakārāt kapitthācca madhyamamlaṃ ca yat phalam| pūrvavadbahalībhūte trivṛccūrṇaṃ samāvapet||31|| tvakpatrakeśarailānāṃ cūrṇaṃ madhu ca mātrayā| leho'yaṃ kaphapūrṇānāmīśvarāṇāṃ virecanam||32||

lihyādvā madhvityādinā'ṣṭau lehānāha| lihyādvetyādinā prathamo lehaḥ| ajagandhetyādinā dvitīyaḥ| ajagandhā ajamodā| śyāmātrivṛdityādinā tṛtīyo lehaḥ| atra śarkarātrivṛccūrṇābhyāṃ samābhyāṃ kvāthapādikābhyāṃ lehaḥ| sakṣaudrāmityādinā caturthaḥ| atra kṣaudrapāko yogamahimnā| trivṛccūrṇamātrāpādikatvaṃ tvakpatrādīnāṃ, saugandhamātraprayojanatvāt ¹⁷| īśvarāṇāṃ virecanamiti vacanena sukumāratvādasnigdhaviṣayatāmasya darśayati, īśvarā hi prāyeṇa sukumārāḥ snigdhāśca bhavanti| kuḍavāṃśānityādiḥ pañcamaḥ| atra trivṛccūrṇamanirdiṣṭamānaṃ, tacca prakṣepanyāyāllehāt pādikaṃ kartavyam| utsannapittānām udbhūtapittānām| śarkaretyādinā sitāyogāṃścaturo'tideśānuguṇyāllehānāṃ madhya evāha| atra vartyādayo'pi śarkarākṛtā eva jñeyāḥ| anena vidhineti ikṣvādirasasaṃskāreṇa trivṛccūrṇayogena ca| pippalīṃ nāgaramityādinā ṣaṣṭho lehaḥ| madhyamiti amlakapitthasya madhyaṃ bhāgam| amlaṃ ca yat phalamiti mātuluṅgādi| pūrvavaditi kauḍavikatvaṃ mātuluṅgādirasānāṃ darśayati||21-32||

pānakāni rasān yūṣānmodakān rāgaṣāḍavān| anena vidhinā kuryādvirekārthaṃ kaphādhike||33||

pānakānītyādinā'tideśānuguṇyāt pānakādipañcayogānāha| rāgapradhānaḥ ṣāḍavo rāgaṣāḍavaḥ| anena vidhineti pūrvalehoktavidhinā||33||

bhṛṅgailābhyāṃ samā nīlī taistrivṛttaiśca śarkarā| cūrṇaṃ phalarasakṣaudraśaktubhistarpaṇaṃ pibet||34|| vātapittakaphottheṣu rogeṣvalpānaleṣu ca| nareṣu sukumāreṣu nirapāyaṃ virecanam||35||

bhṛṅgailābhyāmityādinā tarpaṇayogaṃ prathamamevāha, dvitīyastu tarpaṇayogo bhaviṣyatīti| bhṛṅgaṃ guḍatvak| taiśca śarkareti bhṛṅgalānīlītrivṛdbhiḥ| phalarasaḥ dāḍimarasaḥ||34-35||

śarkarātriphalāśyāmātrivṛtpippalimākṣikaiḥ| modakaḥ sannipātordhvaraktapittajvarāpahaḥ||36||

śarkaretyādinā modakaḥ prathamaḥ| tatra ca “modake dviguṇo guḍaḥ” iti vacanāt guḍaśarkarāṃ cūrṇāddviguṇāmicchanti||36||

trivṛcchāṇā matāstisrastisraśca triphalātvacaḥ| viḍaṅgapippalīkṣāraśāṇāstisraśca cūrṇitāḥ||37|| lihyāt sarpirmadhubhyāṃ ca modakaṃ vā guḍena tu| bhakṣayenniṣparīhārametacchodhanamuttamam ¹⁸||38|| gulmaṃ plīhodaraṃ śvāsaṃ ¹⁹ halīmakamarocakam| kaphavātakṛtāṃścānyān vyādhīnetahyapohati||39||

trivṛcchāṇā ityādineha modake ca yadyapi paṭhyate yogaḥ, tathā'pyasya lehenaiva grahaṇādayamaṣṭamo leho bhavati||37-39||

viḍaṅgapippalīmūlatriphalādhānyacitrakān| maricendrayavājājīpippalīhastipippalīḥ||40|| lavaṇānyajamodāṃ ca cūrṇitaṃ kārṣikaṃ pṛthak| tilatailatrivṛccūrṇabhāgau cāṣṭapalonmitau||41|| dhātrīphalarasaprasthāṃstrīn guḍārdhatulāṃ tathā| paktvā mṛdvagninā khādedbadarodumbaropamān||42|| guḍān kṛtvā na cātra syādvihārāhārayantraṇā| mandāgnitvaṃ jvaraṃ mūrcchāṃ mūtrakṛcchramarocakam||43|| asvapnaṃ gātraśūlaṃ ca kāsaṃ śvāsaṃ bhramaṃ kṣayam| kuṣṭhārśaḥkāmalāmehagulmodarabhagandarān||44|| grahaṇīpāṇḍurogāṃśca hanyuḥ puṃsavanāśca te| kalyāṇakā iti khyātāḥ sarveṣvṛtuṣu yaugikāḥ||45|| iti kalyāṇakaguḍaḥ|46|

viḍaṅgetyādinā dvitīyo modakaḥ||40-45||

vyoṣatvakpatramustailāviḍaṅgāmalakābhayāḥ ²⁰| samabhāgā bhiṣagdadyāddviguṇaṃ ca mukūlakam||46|| trivṛto'ṣṭaguṇaṃ bhāgaṃ śarkarāyāśca ṣaḍguṇam| cūrṇitaṃ guḍikāḥ kṛtvā kṣaudreṇa palasammitāḥ||47|| bhakṣayet kalyamutthāya śītaṃ cānu pibejjalam| mūtrakṛcchre jvare vamyāṃ kāse śvāse bhrame kṣaye||48|| tāpe pāṇḍvāmaye'lpe'gnau śastā niryantraṇāśinaḥ| yogaḥ sarvaviṣāṇāṃ ca mataḥ śreṣṭho ²¹ virecane||49|| mūtrajānāṃ ca rogāṇāṃ vidhijñenāvacāritaḥ|50|

vyoṣetyādinā tṛtīyo modakaḥ| ayaṃ modakastantrāntare ‘abhayādya’ iti khyātaḥ| mukūlakaṃ dantī| atra mukūlādīnāmekaikadravyāpekṣayā dvaiguṇyādi bhavati| madhu ca tāvanmātraṃ yāvatā modako bhavati| kecidatra vyoṣādimilitacūrṇāddantyādīnāṃ dvaiguṇyaṃ vadanti||46-49||-

pathyādhātryurubūkāṇāṃ prasṛtau dvau trivṛtpalam||50|| daśa tānmodakān kuryādīśvarāṇāṃ virecanam|51|

pathyetyādinā caturthaḥ||50||-

trivṛddhaimavatī śyāmā nīlinī hastipippalī||51|| samūlā pippalī mustamajamodā durālabhā| kārṣikaṃ nāgarapalaṃ guḍasya palaviṃśatim||52|| cūrṇitaṃ modakān kuryādudumbaraphalopamān| hiṅgusauvarcalavyoṣayavānībiḍajīrakaiḥ||53|| vacājagandhātriphalācavyacitrakadhānyakaiḥ| modakān veṣṭayeccūrṇaistān satumburudāḍimaiḥ||54|| trikavaṅkṣaṇahṛdbastikoṣṭhārśaḥplīhaśūlinām| hikkākāsāruciśvāsakaphodāvartināṃ śubhāḥ ²²||55||

trivṛddhaimavatītyādinā pañcamo modakaḥ pūryate| veṣṭayediti avacūrṇayet||51-55||

trivṛtāṃ kauṭajaṃ bījaṃ pippalīṃ viśvabheṣajam| kṣaudradrākṣārasopetaṃ ²³ varṣāsvetadvirecanam||56|| trivṛddurālabhāmustaśarkarodīcyacandanam| drākṣāmbunā sayaṣṭyāhvasātalaṃ jaladātyaye||57|| trivṛtāṃ citrakaṃ pāṭhāmajājīṃ saralaṃ vacām| svarṇakṣīrīṃ ca hemante piṣṭvā tūṣṇāmbunā pibet||58|| śarkarā trivṛtā tulyā grīṣmakāle virecanam| trivṛttrāyantihapuṣāḥ sātalāṃ kaṭurohiṇīm ²⁴||59|| svarṇakṣīrīṃ ca sañcūrṇya gomūtre bhāvayettryaham| eṣa sarvartuko yogaḥ snigdhānāṃ maladoṣahṛt||60|| trivṛcchyāmā durālambhā vatsakaṃ hastipippalī| nīlinī triphalā mustaṃ kaṭukā ca sucūrṇitam||61|| sarpirmāṃsarasoṣṇāmbuyuktaṃ pāṇitalaṃ tataḥ| pibet sukhatamaṃ ²⁵ hyetadrūkṣāṇāmapi śasyate||62|| tryūṣaṇaṃ triphalā hiṅgu kārṣikaṃ trivṛtāpalam| sauvarcalārdhakarṣaṃ ca palārdhaṃ cāmlavetasāt||63|| taccūrṇaṃ śarkarātulyaṃ madyenāmlena vā pibet| gulmapārśvārtinutsiddhaṃ jīrṇe cādyādrasaudanam||64||

trivṛtāṃ kauṭajamityādinā ṣaḍṛtuvihitān yogān rūkṣāṇāmapi śasyate ityantenāha| sātalā carmakaśā| jaladātyaye śaradi| hemante yadyapi prabalaśītavāte virecanaṃ niṣiddhaṃ, tathā'pi vyādhiviṣayavihitaṃ virecanametajjñeyam| sarvartukayogau anukte ṛtau vasantādau ca jñeyau| trivṛcchyāmetyādiko'pi sarvartuko yogaḥ| tryūṣaṇamityādiścūrṇayogo dvitīyaḥ||56-64||

trivṛtāṃ triphalāṃ dantīṃ saptalāṃ vyoṣasaindhavam| kṛtvā cūrṇaṃ tu saptāhaṃ bhāvyamāmalakīrase||65|| tadyojyaṃ tarpaṇe yūṣe piśite rāgayuktiṣu|66|

trivṛtāṃ triphalāmityādikastarpaṇayogaḥ| evaṃ sarvartukayogena samaṃ dvau tarpaṇayogau bhavataḥ||65||-

tulyāmlaṃ trivṛtākalkasiddhaṃ gulmaharaṃ ghṛtam||66|| śyāmātrivṛtayormūlaṃ pacedāmalakaiḥ saha| jale tena kaṣāyeṇa ²⁶ paktvā sarpiḥ pibennaraḥ||67|| śyāmātrivṛtkaṣāyeṇa siddhaṃ sarpiḥ pibettathā| sādhitaṃ vā payastābhyāṃ sukhaṃ tena viricyate||68||

tulyāmlamityekaṃ ghṛtaṃ, śyāmetyādi dvitīyaṃ, śyāmātrivṛtkaṣāyeṇetyādi tṛtīyam| sādhitaṃ cetyādinā kṣīrayogamekamāha| ghṛtena kṣīreṇa ca ghṛtena kṣīreṇa vaikena militvā catvāro ghṛtakṣīrairbhavanti||66-68||

trivṛnmuṣṭīṃstu sanakhānaṣṭau droṇe'mbhasaḥ pacet ²⁷| pādaśeṣaṃ kaṣāyaṃ taṃ pūtaṃ guḍatulāyutam||69|| snigdhe sthāpyaṃ ghaṭe kṣaudrapippalīphalacitrakaiḥ| pralipte madhunā ²⁸ māsaṃ jātaṃ tanmātrayā pibet||70|| grahaṇīpāṇḍurogaghnaṃ gulmaśvayathunāśanam| surāṃ vā trivṛtāyogakiṇvāṃ ²⁹ tatkvāthasaṃyutām||71||

trivṛnmuṣṭīnityādinā prathamā surā, surāṃ vetyādinā dvitīyā, evaṃ dvau surāyogau bhavataḥ| trivṛdyogayuktaṃ kiṇvaṃ yasyāṃ sā tathā||69-71||

yavaiḥ śyāmātrivṛtkvāthasvinnaiḥ kulmāṣamambhasā| āsutaṃ ṣaḍahaṃ palle jātaṃ sauvīrakaṃ pibet||72|| bhṛṣṭān vā satuṣāñchuddhān ³⁰ yavāṃstaccūrṇasaṃyutān| āsutānambhasā tadvat pibejjātaṃ tuṣodakam||73||

yavairityādinā sauvīrakatuṣodake prāha| etau dvau kāñjikayogau| kulmāṣa utsvinnayavapiṣṭakam| palle iti dhānyādirāśau| taccūrṇasaṃyutāniti trivṛccūrṇasaṃyutān| tadvaditi ṣaḍahaṃ palle sthitāna||72-73||

tathā madanakalpoktān ṣāḍavādīn pṛthagdaśa| trivṛccūrṇena saṃyojya virekārthaṃ prayojayet||74||

tathetyādinā ṣāḍavādiyogān daśāha| daśa ṣāḍavādayo “badaraṣāḍavarāgalehamodakotkārikātarpaṇaśākamāṃsarasayūṣamadyānāṃ” (ka.a.1) iti granthena madanakalpoktāḥ||74||

bhavataścātra- tvakkeśarāmrātakadāḍimailāsitopalāmākṣikamātuluṅgaiḥ| madyaistathā'mlaiśca manonukūlairyuktāni deyāni virecanāni||75|| śītāmbunā pītavataśca tasya siñcenmukhaṃ chardivighātahetoḥ| hṛdyāṃśca mṛtpuṣpaphalapravālānamlaṃ ca dadyādupajighraṇārtham||76||

samprati daśottaraṃ yogaśatamabhidhāya vāntinirāsārthaṃ kṛtyatrayeṇa samaṃ virecanaprayogānāha- tvakkeśaretyādi||75-76||

tatra ślokāḥ- eko'mlādibhiraṣṭau ca daśa dvau saindhavādibhiḥ| mūtre'ṣṭādaśa yaṣṭyāṃ ³¹ dvau jīvakādau caturdaśa||77|| kṣīrādau sapta lehe'ṣṭau catvāraḥ sitayā'pi ca| pānakādiṣu pañcaiva ṣaḍṛtau pañca modakāḥ||78|| catvāraśca ghṛte kṣīre dvau cūrṇe tarpaṇe tathā| dvau madye kāñjike dvau ca daśānye ṣāḍavādiṣu||79|| śyāmāyāstrivṛtāyāśca kalpe'smin samudāhṛtam| śataṃ daśottaraṃ siddhaṃ yogānāṃ paramarṣiṇā||80||

eko'mlādibhirityādisaṅgraho vyaktārthaḥ| yaṣṭyāṃ dvāviti ‘yaṣṭyāhvaṃ vidhinā’ iti jīvakādāvekaḥ, madhuketyādinā cāparaḥ||77-80||

ityagniveśakṛte tantre carakapratisaṃskṛte'prāpte dṛḍhabalasampūrite kalpasthāne śyāmātrivṛtkalpo nāma saptamo'dhyāyaḥ||7||

iti śrīcakrapāṇidattaviracitāyāmāyurvedadīpikāyāṃ carakatātparyaṭīkāyāṃ kalpasthāne śyāmātrivṛtkalpo nāma saptamo'dhyāyaḥ||7||

pāṭhāntarāḥ

1 ‘…rmaharṣayaḥ’ iti pā. ↩
2 ‘śyāmā suvahā koṭarā tathā| trivṛt sarvānubhūtiśca’ iti pā. ↩
3 ‘saralā’ iti pā. ↩
4 ‘kalpe vaiśeṣyamāsādya’ iti pā. ↩
5 ‘tayoḥ śreṣṭhataraṃ’ iti pā. ↩
6 ‘taddhitam’ iti pā. ↩
7 ‘śyāmā kaṇṭhaṃ kṣiṇotyapi’ iti pā. ↩
8 ‘tadvipothyoddharedgarbha’ iti pā. ↩
9 ‘peyāmātrocitaḥ’ iti, ‘peyāmātrāśritaḥ’ iti ca pā. ↩
10 ‘trivṛttriguṇasaṃyuktaṃ’ iti pā. ↩
11 ‘kṣudrāṃ’ iti, ‘citrāṃ’ iti ca pā. ↩
12 ‘dadyācchīte’ iti pā. ↩
13 ‘lihyāttaṃ mātrayā lehaṃ’ iti pā. ↩
14 ‘rasān kauḍavikānikṣu...’ iti pā. ↩
15 ‘etadutkṛṣṭapittānā...’ iti pā. ↩
16 ‘ślaiṣmikāṇāṃ’ iti pā. ↩
17 ‘trivṛccūrṇamatra pādikaṃ, tvakpatrādīni saugandhamātraprayojanatvādalpāni’ iti pā. ↩
18 ‘... metacchreṣṭhaṃ virecanam’ iti pā. ↩
19 ‘kāsaṃ’ iti pā. ↩
20 ‘... malakān samān| trivṛto'ṣṭaguṇaṃ bhāgaṃ’ iti pā. ↩
21 ‘śreṣṭhaṃ virecanam’ iti pā. ↩
22 ‘hitāḥ’ iti pā. ↩
23 ‘samṛdvīkārasakṣaudraṃ’ iti pā. ↩
24 ‘hapuṣāṃ saptalāṃ śyāmāṃ dravantīṃ kaṭurohiṇīm’ iti pā. ↩
25 ‘pibedetatsarvakālaṃ’ iti pā. ↩
26 ‘niryūheṇa tayoryuktyā’ iti pā. ↩
27 ‘jale droṇe trivṛnmuṣṭīnaṣṭau tu sanakhān pacet’ iti pā. ↩
28 ‘vidhinā’ iti pā. ↩
29 ‘trivṛtākiṇvāṃ pibettatkvāthasaṃyutām’ iti pā. ↩
30 ‘kṣuṇṇān’ iti pā. ↩
31 ‘yaṣṭyā’ iti pā. ↩