8. caturaṅgulakalpaḥ

athātaścaturaṅgulakalpaṃ vyākhyāsyāmaḥ||1|| iti ha smāha bhagavānātreyaḥ||2||

śyāmātrivṛtkalpānantaraṃ mṛduvirecanatvasāmānyāccaturaṅgulakalpo'bhidhīyate||1-2||

āragvadho rājavṛkṣaḥ śampākaścaturaṅgulaḥ| pragrahaḥ kṛtamālaśca karṇikāro'vaghātakaḥ||3||

vyavahārārthaṃ paryāyānāha- āragvadha ityādi||3||

jvarahṛdrogavātāsṛgudāvartādirogiṣu| rājavṛkṣo'dhikaṃ pathyo mṛdurmadhuraśītalaḥ||4|| bāle vṛddhe kṣate kṣīṇe sukumāre ca mānave| yojyo ¹ mṛdvanapāyitvādviśeṣāccaturaṅgulaḥ||5||

adhikaṃ pathya iti jvarādiṣu viśeṣeṇa virecanaprayoge hitaḥ||4-5||

phalakāle ² phalaṃ tasya grāhyaṃ pariṇataṃ ca yat| teṣaṃ guṇavatāṃ bhāraṃ ³ sikatāsu nidhāpayet||6|| saptarātrāt samuddhṛtya śoṣayedātape bhiṣak| tato majjānamuddhṛtya śucau bhāṇḍe nidhāpayet||7||

phalakāle iti ucitaphalakāle| teṣāmiti phalānām| bhāramiti bhūridravyopalakṣaṇam| majjānamiti phalamajjānam||6-7||

drākṣārasayutaṃ dadyāddāhodāvartapīḍite| caturvarṣamukhe bāle yāvaddvādaśavārṣike||8|| caturaṅgulamajjñastu prasṛtaṃ vā'thavā'ñjalim|9|

drākṣetyādiḥ prathamo yogaḥ| caturvarṣamukhe bāle yāvaddvādaśavārṣike ityanenāsya prayogasya caturvarṣādarvāgūrdhvaṃ ca dvādaśavarṣādavaśyatayā yaugikatvaṃ niṣedhayati||8||-

surāmaṇḍena saṃyuktamathavā kolasīdhunā||9|| dadhimaṇḍena vā yuktaṃ ⁴ rasenāmalakasya vā| kṛtvā śītakaṣāyaṃ taṃ ⁵ pibet sauvīrakeṇa vā||10||

surāmaṇḍeneti dvitīyaḥ| athavā kolasīdhuneti tṛtīyaḥ| kolakṛtaḥ sīdhuḥ kolasīdhuḥ| sauvīrakeṇa vetyantena yogatrayamaparaṃ vyaktam||9-10||

trivṛto ⁶ vā kaṣāyeṇa majjñaḥ kalkaṃ tathā pibet| tathā bilvakaṣāyeṇa lavaṇakṣaudrasaṃyutam||11||

trivṛto vā kaṣāyeṇa majjñaḥ kalkaṃ tathā pibediti saptamaḥ| tathetyādinā'ṣṭamaḥ| etatkalkakaṣāyayordvayaṃ ⁷ jatūkarṇe'pyuktameva- ‘trivṛdbilvakaṣāyābhyāṃ sakṣaudralavaṇau dvau’ iti| tenātra pāṭhāntaraṃ na pramāṇam| saṅgrahe ca kariṣyati- ‘kaṣāye ca trivṛto bilvakasya ca’ iti||11||

kaṣāyeṇāthavā tasya trivṛccūrṇaṃ guḍānvitam| sādhayitvā śanairlehaṃ lehayenmātrayā naram||12||

kaṣāyeṇetyādiko leho navamaḥ||12||

caturaṅgulasiddhādvā kṣīrādyadudiyādghṛtam| majjñaḥ kalkena dhātrīṇāṃ rase tatsādhitaṃ pibet||13||

caturaṅguletyādinā prathamaṃ ghṛtam| majjña iti caturaṅgulamajjñaḥ||13||

tadeva daśamūlasya kulatthānāṃ yavasya ca| kaṣāye sādhitaṃ sarpiḥ kalkaiḥ śyāmādibhiḥ pibet||14||

tadevetyādinā ca dvitīyaṃ ghṛtam| śyāmādibhiriti madanakalpapaṭhitairnavabhiḥ ‘śyāmātrivṛddantī ... ’ (ka.a.1) ityādibhiḥ||14||

dantīkvāthe'ñjaliṃ majjñāḥ śampākasya guḍasya ca| dattvā māsārdhamāsasthamariṣṭaṃ pāyayeta ⁸ ca||15||

dantītyādinā'riṣṭayogamāha| guḍasya cāñjalimiti sambandhaḥ| māsārdhamāsasthamiti sārdhamāsastham||15||

yasya yat pānamannaṃ ⁹ ca hṛdyaṃ svādvatha vā kaṭu| lavaṇaṃ vā bhavettena yuktaṃ dadyādvirecanam||16||

yasya yadityādinā'nuktamaparāparasādhanaṃ vidhatte| hṛdyena hi virecanayogasya priyatā syāt| pānamannaṃ ceti hṛdyamityādibhiḥ pratyekaṃ sambadhyate||16||

tatra ślokāḥ drākṣārase surāsīdhvordadhni cāmalakīrase| sauvīrake kaṣāye ca trivṛto bilvakasya ¹⁰ ca||17|| lehe'riṣṭe ghṛte dve ca yogā dvādaśa kīrtitāḥ| caturaṅgulakalpe'smin sukumārāḥ sukhodayāḥ||18||

drākṣetyādisaṅgraho vyaktaḥ||17-18||

ityagniveśakṛte tantre carakapratisaṃskṛte'prāpte dṛḍhabalasampūrite kalpasthāne caturaṅgulakalpo nāmāṣṭamo'dhyāyaḥ||8||

iti śrīcakrapāṇidattaviracitāyāmāyurvedadīpikāyāṃ carakatātparyaṭīkāyāṃ kalpasthāne caturaṅgulakalpo nāmāṣṭamo'dhyāyaḥ||8||

pāṭhāntarāḥ

1 ‘deyaḥ’ iti pā. ↩
2 ‘recanārthe pariṇataṃ phalaṃ tasyāharedbudhaḥ’ iti pā. ↩
3 ‘jātaṃ’ iti, ‘sāraṃ’ iti ca pā. ↩
4 ‘samyak’ iti pā. ↩
5 ‘vā’ iti pā. ↩
6 ‘trivṛnmajjñostathā kalkaṃ tatkaṣāyeṇa vā pibet’ iti pā. ↩
7 ‘kaṣāye yogadvayam’ iti pā. ↩
8 ‘pāyayedbhiṣak’ iti pā. ↩
9 ‘pānamamlaṃ ca’ iti pā. ↩
10 ‘sauvīrake'tha trivṛtaḥ kaṣāye tilvakasya ca’ iti, ‘sauvīrake kaṣāyābhyāṃ bilvaśampākayostathā’ iti ca pā. ↩