3. khuḍḍikāgarbhāvakrāntiśārīram

pūrvādhyāye śukraśoṇite garbhakāraṇatvenokte, natu kṛtsnaṃ garbhakāraṇamuktam, ataḥ sampūrṇagarbhakāraṇābhidhānārthaṃ khuḍḍikāgarbhāvakrāntirucyate| khuḍḍikāmiti alpām| garbhasyāvakrāntiḥ melakaḥ, utpattiriti yāvat||1-2||

puruṣasyetyādi| anupahataretasa iti padenaiva puruṣasyeti labhyate, yataḥ puruṣasyaiva retaso garbhajanakatvamuktaṃ; tena puruṣasyeti padena ya eva sampūrṇadhātuḥ puruṣaśabdavācyo bālavyatiriktastaṃ grāhayati| striyāśceti padamarthalabdhaṃ sad yauvanavatīṃ striyaṃ lambhayati| saṃsargaḥ maithunam| ṛtau puṣpadarśane praśastaḥ kālaḥ ṛtukālaḥ; tena ṛtukālasyāditryahaṃ niṣedhayati| yataḥ “rajasvalābhigamanamalakṣmīmukhānāṃ” (sū. 25) ityādinā ṛtau tryahaṃ niṣiddham| ārtavadarśanaṃ ca śaradādyṛtusādharmyād ṛtuśabdenocyate| yathā ṛtāvuptāni bījāni prarohanti, tathā ārtavadarśanākhye'pi ṛtau śukrarūpaṃ bījamuptamiti ³ ṛtusādharmyam| na kevalamevambhūtaḥ saṃsarga eva garbhakāraṇaṃ, kiṃ tu jīvādhiṣṭhāne satītyāha- yadetyādi| tathāyukta iti aduṣṭaretasaḥ puruṣasya aduṣṭayonyādeśca striyāḥ saṃsarge| ayaṃ cārthaḥ puruṣasyetyādinaiva labdho'pi punaḥ śukraśoṇitasaṃsargamityādigranthavakṣyamāṇādhikadharmavidhyarthamanūdyate, tena na paunaruktyam| kiṃvā, puruṣasyetyādinā pūrvaṃ maithunāt prāganupahataretastvādyuktaṃ, tathāyukte cetyanena tu maithunasamaye'pi śukrayonyādīnāmaduṣṭirucyate| maithunakāle hi īrṣyādinā śukraduṣṭiḥ sambhāvyate| śukraśoṇitasaṃsargamiti śukraśoṇitamelakam| antarityanena garbhāśayabāhyagataṃ saṃsargamakāraṇaṃ garbhasya niṣedhayati| jīvaśabdena cetanādhāturātmā| nanvātmā vyāpakaḥ, tat kathamayamavakrāmatītyāha- sattvetyādi| sattvasamprayogāditi manogamanādityarthaḥ| tad yathoktaṃ- “yuktasya manasā tasya nirdiśyante vibhoḥ kriyāḥ” (śā.a.1) iti| yadyapyātmā vibhutvāt sarvagatatvena na kvacidapi yāti, tathā'pi yatrāsya karmavaśānmano yāti, tatraiva caitanyopalabdherātmā'pi gata iti vyapadiśyata iti bhāvaḥ| athaivamutpanno garbhaḥ kathamabhivardhate, kathaṃ vā jāyata ityāha- samyagupacārairiti; garbhahitakarairāhāravihārairityarthaḥ| prāptakāla iti prāptaprasavakālaḥ, prasavakālo navamadaśamamāsau| paripūrṇaśarīra iti sarvāṅgopacitadehaḥ| sampacchabdo balādibhiḥ pratyekamabhisambadhyate| samudayāditi samyaṅmelakāt| eṣāmityanena puruṣasyetyādigranthoktān reta-ārtava-jīva-sattva-sātmya-rasa-samyagupacārān pratyavamṛśati| etadeva samudāyaprabhavatvaṃ garbhasya pratyekaṃ mātrādigarbhakāraṇavyutpādanena darśayannāha- mātṛjaścetyādi| sātmyajaścetyatra sātmyaśabdena rasavyatiriktarūpādi, tathā ācāraśca sātmyo grāhyaḥ| sātmyarasastu ‘rasaja’ ityanenaiva gṛhītaḥ| aupapādukamiti ātmanaḥ śarīrāntarasambandhopapādakam| etacca vyākṛtameva pūrvam| atra yadyapi puruṣasyānupahataretasa ityanena pitaiva prathamamuktaḥ, tathā'pi mātṛpradhānatāṃ garbhasya darśayituṃ mātṛjaścāyamiti prathamaṃ kṛtaṃ; mātā ca garbhe pradhānaṃ kāraṇaṃ, yena āsekāt prabhṛti prasavaparyantaṃ mātureva guṇadoṣāvanuvidadhāti garbhaḥ; prathamaṃ tu puruṣasya maithune svātantryāt tathā śarīradhārakapradhānāsthikāraṇatvāccāgre'bhidhānaṃ kṛtam||3||

pūrvapakṣoddhāreṇa siddhāntaṃ grāhayituṃ mātrādigarbhakāraṇāni bharadvājamukhenākṣipati- netyādi| netītyanena sāmānyenātreyavacanasyoktasyākṣepaḥ| kiṃ kāraṇamityanena kasmādātreyavacanametadviruddhamityatra kāraṇaṃ pṛcchato nahi mātetyādinoktamātrādikāraṇānāmakāraṇatvaṃ bharadvājaḥ pratijānīte||4 (1)||

yadi hītyādinā mātrādīnāmakāraṇatve hetuṃ brūte| kiṃvā, mātrādīnāmakāraṇatvaṃ bharadvājena pratijñātaṃ tatra ‘kiṃ kāraṇamiti’ hetupraśnaḥ, tataḥ ‘nahi mātā’ ityādinā hetukathanam| asya cāyamarthaḥ- yat- na mātrādayo garbhakāraṇatvena pratyakṣeṇa dṛśyante, tato na mātrādayo garbhakāraṇam| yadi hītyādinā tūpapattivirodho'pi mātrādikāraṇatve'stīti darśayati; tena na paunaruktyam| maithunadharmaḥ vyavāyaḥ| putrakāmāḥ putrāneva janayeyuḥ, duhitṛkāmā duhitṝrvā janayeyuriti yojanā| natu kāścit striya ityatra maithunamāpadyamānā eva striyaḥ puruṣāśca parideveran na ceti yojanā ⁵| mātāpitradhīnatvena garbhasya yadaivecchantyapatyaṃ, tadaiva maithunamāpadyamānāḥ sāpatyāḥ syuḥ; tataśca sarvāpatyatvena na kecit parideverannityarthaḥ||4 (2)||

ātmajatvaṃ garbhasya niṣedhayati- na cātmetyādi| manuṣyakarituragādirūpeṇa ātmānaṃ janayatītyarthaḥ| sattvāditi janyasyātmano vidyamānatvāt, na ca vidyamāno janyata ityarthaḥ| asattvāditi kāraṇabhūtasyātmano'jātapakṣe'sattvānna kāraṇatvamupapannamityarthaḥ| atraiva dūṣāṇāntaramāha- tiṣṭhatvityādi| yoniṣvivi jātiṣu| ato vā bhūya iti yathoktaguṇayuktādapyadhikaṃ śakrādiparamardhitulyamityarthaḥ||4 (3)||

taccobhayamiti saprajatvamanapatyatvaṃ ca| ubhayatreti sātmyasevinyasātmyasevinyapi||4 (4)||

yo rasānnopayuṅkte iti rasaścedgarbhakāraṇaṃ taṃ ca sarva eva strīpuruṣāḥ sevante, tena sarva eva sāpatyāḥ syuriti bhāvaḥ| atha rasajo garbha ityasya śreṣṭharasa ityartho varṇyate, tatrāpi dūṣaṇamāha- śreṣṭhetyādi||4 (5)||

‘asti ca sattvamaupapādukam’ iti yaduktaṃ, taddūṣayati- na khalvapītyādi| paurvadehikamiti pūrvadehānubhūtam| aviditamadṛṣṭaṃ veti iha janmanyapi pūrvadehānubhūtaṃ nāviditamadṛṣṭaṃ vā syāt; viditaṃ pratyakṣavyatiriktapramāṇopalabdhaṃ, dṛṣṭaṃ tu pratyakṣopalabdham, etadviparyayādaviditamadṛṣṭaṃ ca vijñeyam| na ca kiñcidapi smaratīti naca pūrvajanmānubhūtaṃ smaratītyarthaḥ| evaṃ manyate- yanmanaḥ paurvadehikamanubhavati tacceha janmanyapyanuvartate, tathā yat tena janmāntare'nubhūtaṃ tadiha janmanyapi tathaiva smaratu; yathā- devadatto bālyānubhūtaṃ yauvane smarati, na cāyaṃ tathā smarati; tena na pūrvāparajanmanyekaṃ sattvamiti| tasmādityādinā dūṣaṇadūṣitamarthaṃ punarnigamanena darśayati||4||

bharadvājamatamātreyavacasā dūṣayati- netītyādi| samuditebhya iti vacanāt pratyekaṃ mātrādīnāmitarakāraṇanirapekṣāṇāṃ garbhakāraṇatvaṃ niṣedhayati| tena, mātrādigarbhakāraṇasānnidhye'pi garbhakāraṇāntarajīvāvakramādyabhāvād garbhānutpādo yukta eva| na ca sāmagrījanye kārye ekadeśasyājanakatvenākāraṇatvam| evaṃ sati tantūnāmapi paṭakāraṇānāṃ kāraṇāntarāsānnidhye paṭājanakatvenākāraṇatvaṃ syāditi bhāvaḥ| idameva garbhasya mātrādijanyatvaṃ yat- mātrādivyatirekeṇānutpadyamānatvam||5||

evaṃvidhameva mātustāvat kāraṇatvamāha- mātṛjaścāyaṃ garbha ityādinā| garbhotpattau mātuḥ kāraṇatvaṃ darśayitvā jarāyujajanmani kāraṇatvamāha- na ca janmetyādi| jarāyuḥ amarā, yena veṣṭitā manuṣyādayaḥ prajāyante; jarāyuṇā veṣṭitā jāyante iti jarāyujāmanuṣyādayaḥ saṃsvedajānāṃ maśakādīnāmudbhijjādīnāṃ bhekādīnāṃ ca mātaraṃ vinā'pi janma bhavati| aṇḍajānāmapi yadyapi mātā kāraṇaṃ bhavatyeva janmani, tathā'pi jarāyujasya mānuṣasyeha prakaraṇe'bhipretatvenāṇḍajān vihāya jarāyujānāmiti kṛtam| kiṃvā, jarāyujasyābhivyaktirūpe janmani yāvadabhivyakti yathā mātā kāraṇaṃ bhavati, na tathā'ṇḍaje; tatra kūrmādāvaṇḍotpattimātra eva mātā kāraṇaṃ, na janmanyabhivyaktirūpe| yattu ‘piturvinā na jarāyujānāṃ janma’ iti vakṣyati, tajjarāyujotpāde pituravaśyāpekṣaṇīyatvopadarśanārtham; aṇḍajāstu matsyādayaḥ pitaraṃ vinā'pi ṛtuviśeṣaprāptyaiva bhavantīti bhāvaḥ| mātṛjānītyasya vivaraṇaṃ- yānyasya mātṛtaḥ sambhavataḥ sambhavantīti sambhavato garbhasya yāni mātṛta iti māturāgatācchoṇitāt sambhavantyutpadyante, tāni mātṛjāni tvagādīnyanuvyākhyāsyāma iti yojanā| evamanyatrāpi yāni tvityādigrantho vyākhyeyaḥ| mātṛjatvaṃ ca tvagādīnāmāgamagamyageva| purīṣādhānaṃ pakvāśayaḥ| uttaragudādharagudau gudottarādharabhāgau| vapāvahanaṃ ‘tailavartikā’ iti kathyate ⁷||6||

śukramiti vicchidyapāṭhena śukrasya sarvadhātusārasyopādeyatāṃ darśayati||7||

ātmaja ityādinā ātmajatvaṃ vyutpādayati| antarātmocyata ityanena garbhakāraṇabhūtamātmānaṃ ṣaḍdhātusamudāyavartyātmaśabdābhidheyād vyāvartayati| ācakṣata iti āgameṣu śāśvatādiśabdairbruvate vṛddhāḥ| aloḍyamiti akṣobhyam| garbhatvena janayatyātmānamiti garbhasvarūpo yaḥ ṣaḍdhātuka ātmā taṃ janayatītyarthaḥ| garbhasyātmaśabdābhidheyatāmāha- ātmasañjñā hi garbhe iti| tasyetyanena paramātmānaṃ pratyavamṛśati| yasmādasyānāditvājjanma nopapadyate tasmājjāta evāyamajātaṃ garbhaṃ janayatīti pakṣo'na, iti yojyam| atha jātaḥ sa na cejjanayati kathaṃ tarhi janayatītyaha- ajāto hyayamiti; nityo hyayamityarthaḥ| tena nityatvenākāśavanna jātaḥ sannantarātmā garbhasvarūpamātmānaṃ janayati| ataścāntarātmarūpatayā nityavidyamānatvenājātaḥ san garbharūpāvasthāyāṃ jāta ucyate| evamajātatvaṃ jātatvaṃ cātmani dvayamapi vyapadiśyate| etadevātmani jātatvamajātatvaṃ ca darśayituṃ dṛṣṭāntārthaṃ garbha eva jātatvamajātatvaṃ ca darśayati- sa caivetyādi| puraskṛteti agre bhaviṣyantī| yathā- bālasya vṛddhatvāvasthā'jātā janyata iti ca, tathā ajāto janayatyātmanā''tmanamiti ca śabdaprayogasamarthanamātrametad vivakṣābhedādboddhavyam| anena cātmanyavasthābhedakṛtajātatvasamarthanena ‘jāto vājanayet, ajāto vā’ ityādigranthakṛtapūrvapakṣaḥ śabdaprayogasamarthanatayā parihṛtaḥ| paramārthatastu nityatvenājāta evātmā ātmano'jātāvasthāṃ garbhādirūpāṃ janayati| tena, nāsataḥ kāraṇatvaṃ sato vā janyatvamiti pakṣaḥ sthita eva| sato hītyādinā satkāryapakṣaṃ sāṅkhyamataṃ darśayati| kiṃvā vayobhedena yadevāvasthāntaragamanaṃ ⁹ tadeva janmeti darśayati| tasyāṃ tasyāmavasthāyāmiti cchedaḥ| pitṛtvamiti pitṛtvena vyapadeśa ityarthaḥ||8||

yaduktaṃ- yadyātmā ātmānaṃ janayati tadā vaśitvādiguṇayuktaṃ janayediti, tatrottaramāha- na khalvityādi| garbhasya sarvabhāveṣu na mātrādīnāṃ yatheṣṭakāritvamiti yojyam| atra ca yadyapyātmaiva prakṛtaḥ, tathā'pi tulyasamādhānatvena mātāpitarāvapyupāttau| yathā ātmanaḥ sarvabhāveṣu yatheṣṭakāritveneṣṭayonigamanādiprasaktiḥ samādhīyate, tathā mātāpitrorapi yatheṣṭakāritvena putrāneva janayeyurityādipūrvapakṣaḥ ¹⁰ parihṛto bhavati| atha kuta evātmādīnāṃ yatheṣṭakāritvaṃ kvacinna bhavatītyāha- kiñcidityādi| kiñciditi na sarvam| tatra mātāpitarau svavaśau maithunaṃ garbhakāraṇaṃ sātmyarasasevādikaṃ cācarataḥ, garbhasya jīvādhiṣṭhānādau tu karmādhīne paravaśau; tathā, ātmā'pi garbhasya caitanye tathā dharmādharmahetukriyānuṣṭhāne svavaśaḥ, karmajanye iṣṭāniṣṭayonyādigamane tu dharmādharmaparādhīna eva; tena karmādhīne viṣaye na mātrādīnāṃ yatheṣṭakāritvam| yatheṣṭakāritvamapi mātrādīnāṃ kvaciddarśayannāha- kvaciccaiṣāmityādi| karaṇamupakaraṇaṃ sādhanopāya iti yāvat| sattvaṃ manaḥ, ādi pradhānaṃ yeṣāṃ tāni sattvādīni mana-indriyaśukraśoṇitādīni| yathābalamiti yathākarma; balaśabdenehādṛṣṭamucyate ¹¹| etena, yatra mātrādīnāṃ putrecchāyāmiṣṭayonigamanādikaraṇaśaktirbhavati ¹², karma cānuguṇaṃ bhavati, tatrepsitaputrādiṣviṣṭayonigamanādi kāryaṃ bhavati; yathā- yadi tatra viśuddhabhūriśukraḥ puruṣo bhavati, strī ca viśuddhayonyāśrayatvādiguṇayuktā, putrajanakaṃ ca karmaṃ tayorbalavat, tadā putrajanmābhisandhāya maithunamāpadyamānau īpsitaṃ putraṃ janayataḥ; tathā ātmā'pi viśuddhasattvādiguṇayuktaḥ śubhakarmavān tatkāle ¹³ iṣṭāṃ yonimanudhyāyati, tadā'bhīṣṭayonigamanaṃ sampādayatyātmana ityādi yatheṣṭakāritvodāharaṇaṃ jñeyam| ato'nyathā iti sattvādikaraṇāśaktau viguṇe ca daive| viparyaya iti na yatheṣṭakāritvam| kiṃvā, kvacicca maithunādāveṣāṃ pitrādīnāṃ svavaśatvaṃ, tat kimiti jīvopakramādāvapi na svavaśatvameṣāṃ bhavatītyāha- kvaciccaiṣāmityādi| kvacideva kārye yasmāt kiñcit karaṇaṃ mātrādīnāṃ śaktaṃ na sarvatra, tena sarveṣveva garbhasya bhāveṣu na svavaśatvamiti bhāvaḥ| yatrāpi caite mātrādayaḥ svavaśāḥ santaḥ kurvanti, tatrāpi svīyasvīyakaraṇayuktā eva kurvantītyāha- yatra sattvetyādi| yathābalamiti yathāśakti| anena ca mātrādayo garbhasya yeṣu viśeṣeṣu śaktāḥ, teṣu sattvādikaraṇasampattau yatheṣṭakāriṇo bhavanti, na tvaśakye viṣaye upahatakaraṇā vā yatheṣṭakāriṇo bhavantīti darśayati| ato'nyathā viparyaya ityasya cārtho'gre vyākṛtaḥ| nanu sattvādikaraṇadoṣāccedayamātmā garbhaṃ na janayati tathāvidhaṃ, hanta tarhyakāraṇamevāyamātmā, kāraṇaṃ hi yadbhavati tat karotyeva kāryamityāha- na cetyādi| karaṇadoṣādakurvan garbhaṃ kadācidātmāna garbhajanane kāraṇaṃ bhavatīti na, apitu bhavatyeva kāraṇam; evaṃ manyate- mṛdādyabhāvāt ghaṭamakurvannapi kumbhakāraḥ kāraṇameva ghaṭasya bhavati, ghaṭajananaśaktiyuktatvāt; tathā ātmā'pi karaṇadoṣādakurvannapi tathāvidhaṃ garbhaṃ, tajjananaśaktatvena bhūyodṛṣṭatvāt kāraṇameva bhavati| tatheṣṭayonigamane prasaktirapi prodbhāvitā ātmanaḥ kāraṇatvena sā kvacidbhavatītyapi darśayannāha- dṛṣṭaṃ cetyādi| ātmādhīnā yoniḥ puruṣaṃ prati iṣṭā yoniḥ; tathā aiśvaryādayaścātmādhīnā dṛṣṭāḥ, yathoktaṃ katidhāpuruṣīye- “āveśaścetaso jñānaṃ” (śā. 1) ityādinā| ātmanaḥ kāraṇatve hetvantaramāha- na hyanya ityādi|- hi yasmādātmano'nyaḥ sukhaduḥkhayoḥ kartā nāsti, kiṃ tvātmaiva ¹⁴ sukhaduḥkhasādhanendriyakarmaśarīrādikartā; tena ātmā kāraṇaṃ garbhasya sukhaduḥkhādyādhārasyeti bhāvaḥ| atha bhūtānyeva kasmāt saṃyogavaśāccetanāmāsādya sukhādikāraṇāni na bhavantītyāha- na cānyata ityādi| anyata iti vijātīyāt| jāyamāna iti utpadya mānaḥ| sadṛśameva kāraṇāt kāryamutpadyate; yena na śaṇasyāṅkurotpattirnārikelabījādbhavati; abījāditi kāryatvenābhimatāṅkurasyābījāt| etena, garbhasya yaccaitanyaṃ tadacetanebhyo bhūtebhyo na bhavati, kintu cetanādhātorātmana eveti darśayati||9||

evamātmajatvaṃ garbhasya vyutpādyātmajān viśeṣānāha- yānītyādi| preraṇaṃ dhāraṇaṃ cendriyāṇāmeva| atra ca tattaddevādipaśvādiyonigamanādau dharmādharmajanye dharmādharmasyāpi janakatvenātmaiva mūlakāraṇamucyate; ātmajñānaprāṇāpānapreraṇādau tu manaḥkaraṇa ātmaivāvyavadhānena kāraṇam||10||

sātmyajaścetyādinā sātmyajatvaṃ vyutpādayati, asātmyasevāṃ ca garbhopaghātinīṃ darśayan sātmyasevāyā garbhaṃ prati kāraṇatvaṃ draḍhayati| asātmyasevināmapi prajābhavanopapattiṃ darśayan ‘asātmyasevinaśca nikhilenāpatyāḥ syuḥ’ iti pūrvapakṣaṃ pariharati| sātmyasevināṃ punarityādinā tu granthena ‘sātmyasevināmekāntena prajā syāt’ iti yaduktaṃ tat pariharati| sannipatitānāmiti vyavāyamāpannānām| atra svaravarṇau sātmyajatvena tathā ātmajatvena coktau, tena dvāvapyatra kāraṇamiti jñeyam||11||

prāṇayātrā'pi syāditi garbhadhāraṇakāraṇabhūtāyā māturapi prāṇasthitirityarthaḥ| na caivāsamyagupayujyamānā ityādinā asātmyarasopayogasya garbhopaghātitvaṃ darśayati| asātmyarasopayogināṃ prajābhavanaṃ yat, tadasātmyaseviprajābhavananyāyatulyamiti neha punardarśitam| samudāyo'pyatra kāraṇamityanena tu asamyagrasasevināṃ cāpatyabhavane kāraṇaṃ dharmādi darśayati| abhinirvṛttiḥ aṅgapratyaṅgavyaktatā| prāṇānubandha iti balānubandhaḥ puṣṭiḥ upacayaḥ| vṛddhistu dairghyeṇa vṛddhiḥ| utsāhaḥ balam| iti śabdaḥ prakāre; tenaivamprakārāṇyanyānyapi varṇādīni rasajānīti darśayati| evaṃ pūrvatrāpi itiśabdo ¹⁷ vyākhyeyaḥ| yadā tvitiśabdaḥ parisamāptyarthastadā'pyāviṣkṛtānāṃ rasajānāṃ parisamāptirjñeyā; tena anāviṣkṛtā varṇādayo'pi rajasā labhyante||12||

astītyādinā manasa aupapādukatvamākṣiptaṃ samādadhāti| apiśabdo'vadhāraṇe| atra ca ‘yajjīvaṃ spṛkśarīreṇābhisambadhnāti’ ityādinā manaso'sādhāraṇadharmakathanamevaupapādukasādhanaṃ ²¹ bhavati, manovyatirekeṇaitaducyamānadharmāṇāmasiddheḥ| nityamātmānaṃ spṛśatīti spṛk, śarīramātivāhikaśarīraṃ; tena spṛkśarīreṇa kāraṇabhūtena jīvamātmarūpamabhisambadhnāti bhogāyatanaśarīreṇetyarthaḥ| ātivāhikaśarīrasadbhāvaśca “bhūtaiścaturbhiḥ sahitaḥ susūkṣmairmanojavo dehamupaiti dehāt” (śā. 2) ityanena pratipāditaḥ|kiṃvā, jīvam ātmānaṃ, spṛkśarīreṇeti sparśavatā śarīreṇa, yanmano'bhisambadhnāti tadupapādukamastīti yojanā| evaṃ manyate- yadi mano'trātmanaḥ śarīrasambandhena svīkriyate tadā vyāpakatvādātmanaḥ sarvatraivopalabdhyā bhavitavyaṃ, na ca bhavati; tasmādyatraiva sparśavati śarīre manaḥ ²² pratibaddhaṃ bhavati tatraivāyaṃ sukhādyupalabhate| spṛgitiviśeṣaṇena śarīrasya mūtranakhakeśādau manogamanābhāvādātmano'nupalabdhiṃ darśayati| apagamanapuraskṛte iti dehāntaragamanābhimukhe| bhaktiḥ icchā| yasmāddhīna iti manasā tyaktaḥ| yeneti yathābhūtena sāttvikena rājasena tāmasena vā manasā bhūyiṣṭhamityabhiprāyaḥ| dvitīyāyāmājātāviti dvitīyajanmani; pūrvajanmani yādṛśaṃ manastādṛśameva janmāntare prāyo bhavatītyarthaḥ| kecittu, ‘tena na dvitīyāyāṃ’ ityādi paṭhanti| tatrāpi prāyo dvitīye janmani tulyena manasā yogo na bhavati, kadācittu bhavatītyarthaḥ| yaduktaṃ ‘nāsya kiñcit paurvadehikamaviditaṃ syāt’ iti, tat paurvadehikaṃ jñānaṃ kvacidbhavatīti darśayannāha- yadā tvityādi| śuddheneti viśuddhasattvaguṇena| tasyaiveti vakṣyamāṇena yasyetyanena sambadhyate| yoniyantrapīḍāyāṃ hi udbhūtena tamasā viplutaṃ mano nātikrāntajanmagataṃ ²³ smarati; yastūdbhūtasattvastamasā nābhibhūyate, sa smaratyevātikrāntajanmānubhūtamiti bhāvaḥ| puraskṛtyeti kāraṇatvenāvadhārya| ayaṃ ca manodharmasamūha indriyopakramaṇīyokto'pi punariha prakaraṇavaśāducyamāno na punaruktadoṣamāvahati| yadyapi sattvasya garbhajanakatvaṃ ²⁴ sākṣānnoktaṃ, tathā'pi sattvasya yadupapādukatvaṃ garbhaṃ prati tenaiva sattvasya garbhajanakatvaṃ pratijñātaṃ mantavyam| tena ‘yāni khalvasya garbhasya sattvajāni’ ityādinā garbhe sattvajabhāvakathanamupapannameva| garbhakāraṇasyāpi ca sattvasyopapādukabhāṣayā kāraṇatvaṃ yaduktaṃ taddehāddehāntaragamanarūpamanodharmasya garbhakāraṇatvātiriktasya pratipādanārtham| nānāvidhānīti nānāvidhasāttvikarājasatāmaṃsavṛttibhinnāni| tānyekapuruṣe bhavantītyanenaika eva puruṣaḥ kadāciddharmakriyāyāṃ sāttviko bhavati, kadācit kāmacintāyāṃ rājasaḥ, kadācinmohe ²⁵ tamomaya iti darśayati| na bhavantyekakālamiti ekadaiva sāttvikādayo dharmā na bhavanti, kintu paryāyeṇa bhavanti| nanu yadyekapuruṣa eva sarve sāttvikādayo bhavanti, tat katham ‘ayaṃ sāttvikaḥ’ ityādivyapadeśo bhavatītyāha- ekaṃ tvityādi| prāyovṛttyeti ²⁶ bhūyiṣṭhā yasya sāttvikavṛttayo bhavanti ²⁷ sa sāttvikaḥ, yasya bhūyiṣṭhaṃ rājasyo vṛttayo bhavanti sa rājasa ucyate ityādi| etadeva pūrvamuktaṃ- “yadguṇaṃ cābhīkṣṇaṃ puruṣamanuvartate sattvaṃ, tatsattvamevopadiśanti bāhulyānuśayāt” (sū. 8) iti||13||

evaṃ mātrādikāraṇavyutpādanena garbhasya samudāyaprabhavatāṃ vyutpāditāṃ dṛṣṭāntena draḍhayannāha- evamayamityādi| kūṭāgāraṃ vartulākāraṃ gṛhaṃ jentākasvedapratipāditam; anye tu vastrādikṛtaṃ sañcārigṛhaṃ kūṭāgāramāhuḥ| atra ca prakaraṇe yadyapi mātrādīnāṃ sarveṣāṃ samuditānāmeva garbhaṃ prati kāraṇatvaṃ, tathā'pi mātāpitrātmasattvāni vihāya sātmyarasayoreva kāraṇatvavyutpādane yat ‘samudāyo'pyatra kāraṇam’ ityuktaṃ tatraivaṃ manyate- atra yathā mātrādayaścatvāro'vaśyaṃ garbhaṃ prati kāraṇabhūtā na tathā sātmyaṃ raso vā; yena śukraśoṇitasattvātmasaṃsargādeva garbho bhavati, nāvaśyaṃ garbhamelake sātmyarasayorapekṣā; garbhamelakottarakālaṃ sātmyarasābhyāṃ garbhasya hi puṣṭyādayo janyante, tena sātmye rase cāvaśyaṃ samudāyāpekṣāṃ darśayatā tatraiva ‘samudāyo'pyatra kāraṇam’ ityuktaṃ, mātrādayastu parasparasamudāyamapekṣamāṇā api nāvaśyaṃ sātmyarasasamudāyamādigarbhamelake'pekṣanta iti kṛtvā punastatra samudāyāpekṣitvaṃ ²⁸ noktam| samudāyādeṣāṃ bhāvānāmityanena granthena yat parasparasamudāyāpekṣitvaṃ mātrādīnāṃ caturṇāṃ, taduktameva| yadapi ²⁹ garbhaṃ pratyaviśeṣeṇa sātmyarasayorapi kāraṇatvaṃ, ‘sātmyajaścāyaṃ, rasajaścāyaṃ’ ityanenoktaṃ, tadgarbhamelakottarakālaṃ kāraṇatvena, tathā mātāpitrorapi viśuddhaśukraśoṇitotpādahetutayā pāramparyeṇa kāraṇatvāditi jñeyam||14||

punarbharadvājaḥ pṛcchati- yadyayamityādi| kathaṃ sandhīyata iti kayā paripāṭhyā milatītyarthaḥ| manuṣyavigraheṇa jāyata iti manuṣyajātau kasmānmanuṣyavigraheṇaiva jāyata ityarthaḥ| samudāyātmaka iti yaduktaṃ tadayuktamiti atra mātrādyatiriktajāteḥ kāraṇatvakathanena tathā jātereva manuṣyādirūpāyā balavatkāraṇatvena yathoktamātrādisamudāyaprabhavatvaṃ na yuktamiti bhāvaḥ| dūṣaṇāntaramāha- yadi cetyādi| jaḍo jaḍabuddhiḥ, minminaḥ sānunāsikāvyaktasvaraḥ| pitṛsadṛśarūpā ityatra pitṛśabdena mātāpitarau grāhyau| kāraṇasadṛśarūpatvena cenmanuṣyā bhavanti tadā jaḍādirūpakāraṇajātā api kāraṇasadṛśatvena jaḍādirūpāḥ syuriti bhāvaḥ| atra jaḍādibahūdāharaṇakaraṇaṃ pakṣasya bahūdāharaṇasiddhatvena dṛḍhatvapratipādanārtham| kṛtapūrvapakṣe samādhānamāśaṅkate- athātretyādi| svenaiveti ātmakarmopārjitenaiva| tena, indriyāṇi yasmādātmajānyuktāni na tu mātāpitṛrūpamanuṣyajanyāni, tataśca pitrorindriyaṃ pratyakāraṇatvena na tadindriyasadṛśānīndriyāṇyasya bhavantīti bhāvaḥ| svenaiveti śrotrādibhirabhisambadhyate| jaḍādibhirjātā ityatra ādiśabdaḥ prakāravācī, tena kubjakuṣṭyādīnāṃ grahaṇam| kubjatvakuṣṭhādyādhārabhūtaṃ hi śarīraṃ nātmajaṃ, kintu mātāpitṛjameva; tataśca kubjādijātasya kubjatvādiprasaṅgenaivāpakṛtatvaṃ tadavasthameva| āśaṅkitaṃ samādhānaṃ dūṣayati- atrāpītyādi| pratijñādoṣaḥ syāditi “atmā jñaḥ” (śā. 1) ityādinā ātmano jñatvapratijñāyāḥ, tathā “nirvikāraḥ parastvātmā” (sū. 1) ityādinā kṛtāyā nirvikāratvapratijñāyā doṣaḥ syāditi bhāvaḥ| asatsvajña ityanena kadācidajñatvāt pratijñātaṃ jñatvaṃ vyāhatam, indriyādhīnatvena jñatvamātmanaḥ parādhīnaṃ sanna vāstavaṃ syāditi bhāvaḥ| yatretyādinā savikāratvaṃ sādhayati| jñatvaparityāgenājñatve prakṛteranyathābhūtatvena ³³ vikāro bhavatīti bhāvaḥ| savikāra iti ‘vikāravān’ ityartho matublopājjñeyaḥ| ātmana indriyādhīnatvena jñatve dūṣaṇāntaramāha- yadi cetyādi| ajñatvādakāraṇamiti ajñatvāt jñānapūrvakaśarīrapreraṇādau na kāraṇaṃ syādityarthaḥ| akāraṇatvācca nātmeti śarīrapreraṇādau buddhiniṣpādye'kāraṇatvādacetanapañcabhūtātiriktaścetanābhidha ātmaśabdavācya ityarthaḥ| vāgvastumātramiti artharahitaśabdamātrametad- yaducyate- ātmā svena cakṣuṣā rūpaṃ paśyatītyādi||15||

ātreyaḥ samādadhāti- purastādityādi|- etacca ‘kathamayaṃ sandhīyate’ ityasyottaram| sattvaṃ śukrārtavasandhānakāraṇamityarthaḥ| bhūtānāmiti prāṇinām| yoniḥ jātiḥ, yadā'pi yoniśabdaḥ kāraṇavacanastadā'pi jarāyujādirūpayonijātā api jarāyujādaya evocyante, kārye kāraṇopacārāt| ākṛtiḥ saṃsthānaṃ, tasyā viśeṣāḥ parasparavisadṛśākṛtaya eva nara-kari-turagādi-rūpāḥ| sambhave yonibhedaṃ darśayitvā yathā yonyanukāro bhavati tadāha- tatretyādi| garbhakārā bhāvāḥ śukrādayaḥ| madhūcchiṣṭavigraheṣviti sikthakena mṛttikāyāṃ nirmitasañcakarūpavigraheṣu| manuṣyabimbamiti manuṣyākāraṃ sikthakakṛtaṃ sañcakam| kanakādibahudravyodāharaṇaṃ yathā kanakādīnāṃ bahūnāmapi manuṣyasañcakasikthakasthānāṃ manuṣyākṛtijanakatvaṃ, tathā śukrādīnāmapi bahūnāṃ manuṣyayonipatitānāṃ manuṣyavigrahakartṛtvamiti sādharmyodāharaṇārtham| samudāyātmakaḥ sanniti yadyapi samudāyajanyastathā'pi yonirūpakāraṇamahimnā svayonisadṛśa eva bhavati nānyayonisadṛśaḥ; na ca kāraṇadharmaḥ paryanuyogamarhati| tena, śukrādisamudāyo'pi kāraṇaṃ bhavati, mātāpitarau viśeṣeṇa garbhasya sajātīyatve kāraṇaṃ bhavata iti na kācit kṣatiḥ| tadyonitvāditi viśeṣeṇa manuṣyasya kāraṇatvāt||16||

bīja iti śukraśoṇite| bījasyāṅgapratyaṅganirvartako bhāgo bījabhāgaḥ| ubhayopapattirapyatreti pitṛsadṛśarūpā bhavanti na bhavanti cetyarthaḥ| ātmajānīti ātmapratibaddhakarmajāni| bhāvābhāvaheturdaivamiti indriyabhāve indriyajanakaṃ śubham, indriyābhāve cāśubhaṃ daivaṃ heturityarthaḥ| upasaṃharati- tasmādityādi| evaṃ manyate- manuṣyabījaṃ hi pratyaṅgabījabhāgasamudāyātmakaṃ svasadṛśapratyaṅgasamudāyarūpapuruṣajanakam, indriyāṇi ca bhogasādhanāni ātmapratibaddhakarmādhīnāni; tena pitā yadi kuṣṭhyapi bhavati, bījaṃ cāduṣṭaṃ bhavati kuṣṭhādhāratvagādijanakaṃ, tato niṣkuṣṭhānyeva tvagādīnyanupataptatvagādibījāt sadṛśāni jāyante; yadā tvativṛddhakuṣṭhatayā pitrorbījamapi kuṣṭhajanakadoṣeṇa duṣṭaṃ bhavati, tadā duṣṭatvagādibījabhāgāt kuṣṭhaduṣṭaiva tvag jāyate| yaduktaṃ- “dampatyoḥ kuṣṭhabāhulyādduṣṭaśoṇitaśukrayoḥ| yadapatyaṃ tayorjātaṃ jñeyaṃ tadapi kuṣṭhitam” (su. ni. 5) iti| evaṃ kuṣṭhino'pi yadi hetubalād bīje kuṣṭhajanako doṣo bhavati, tadā kuṣṭhino'pi kuṣṭhavadapatyaṃ bhavati| andhatvādāvindriyopaghātarūpe durdaivameva kāraṇaṃ; taccāndhāpatye'pyavaśyamasti; tena yadā'ndhe'patye dṛṣṭyupaghātakamaśubhaṃ bhavati, tadā kākatālīyanyāyādandhajāto'pyandho dṛśyate| evaṃ kubjādau jaḍādau ca vyākhyeyam||17||

yā cājñatvaprasaktirātmanyuktā, tatrāha- na cetyādi| indriyabhāve tathendriyābhāve'pi nityaṃ jñānavānevātmā iti pratijñārthaḥ ³⁵| na hyasattvaḥ kadācidityatra hiśabdo hetau; tena yasmāt sarvadā samanaska evātmā, tena bāhyendriyābhāve'pyantaḥkaraṇamanoyogānnityamātmā manaḥkaraṇako ³⁶ jñānavānevāyamityarthaḥ| yattvetadbāhyaviṣayagataṃ jñānaṃ, tat sattvasyendriyādhiṣṭhānaviśeṣādbhavati; tena, indriyabhāve ³⁷ indriyajanyaṃ viśiṣṭaṃ jñānaṃ bhavati; yattu kevalamanojanyamātmajñānaṃ, tad bhavatyeva sarvadā; tasmādyannityabhāvi manosannidhimātrajanyamātmajñānaṃ, tat sadaivāsti||18||

na cāsya jñānajananaśaktiḥ parāhatā bhavatītyāśayenāha- netyādi| yatvaitadaindriyakaṃ viṣayopabhogavattadbhavati kadācit, kadāciccendriyābhāvānna bhavatītyadhyātmavido manyante; kiñca bāhyajñāne'pi jñānajananaśakta evāyamātmā, paraṃ karaṇābhāvāt kadācinna pravartate| kāryajñānamiti kāryapravṛttijanakabāhyaviṣayajñānaṃ; tena nirviṣayaṃ jñānamātmana indriyābhāve bhavatīti sūcayati ³⁹| bhāvairityatra ‘yaiḥ’ iti śeṣaḥ| vartate utpadyate| atraiva dṛṣṭāntamāha- jānannapītyādi| jānannapīti ghaṭaṃ kartuṃ jānannapītyarthaḥ| mṛdo mṛttikāyā abhāvāt||19||-

ātmano jñatve sādhanāntaramāha- śrūyatāmityādi| ātmānamadhi adhyātmam| ātmano jñānasya balamātmajñānabalam| saṅkṣipyeti viṣayebhyo vyāvartya| manaḥ saṅkṣipyeti mano'pyātmavyatiriktaviṣayānnigṛhya| cañcalamiti svabhāvataḥ| sve jñāne iti ātmajñāne| sarvabhāvān parīkṣata iti vinā'pīndriyaiḥ samādhibalādeva yasmāt sarvajño bhavati, tasmājjñasvabhāva eva nirindriyo'pyātmā||20-21||-

aparamapi laukikaṃ nirindriyasya jñānasadbhāvodāharaṇamāha- gṛhṇīṣvetyādi| svapnagata iti svapnadarśanāvasthāṃ prāptaḥ| ātmajñānaviṣayajñānayorviśeṣamāha- nātmetyādi| ātmajñānānnityādvinā, kiñcijjñānaṃ viṣayajam, ekam sahāyaṃ, na pravartate indriyādikaraṇarūpasahāyaṃ vinā notpadyate| ātmajñānaṃ ca nityameva sāṅkhye'pyuktaṃ ⁴³ - “cicchaktirapariṇāminī” ityādinā “ātmanaḥ” ityantena| atropapattimāha- na hyeko vartate bhāva iti| bhāvaḥ utpattidharmā, ekaḥ san kāraṇarahitaḥ san, na vartate notpadyate| tathā bhāvaḥ kāraṇajanyatve satyapi ahetuka iti akartṛko na vartate notpadyate, kintu kartṛkumbhakārādhiṣṭhitānyeva mṛccakrādīni pravartante; tasmādviṣayajñānānyapi indriyamanorthaistathā kartrā cātmanā janyanta iti bhāvaḥ||22-24||

upasaṃharati- tasmādityādi| atra cātmano jñatvājñatvaprasaktyā''pāditaṃ savikāratvamātmano nityajñānasādhanenaiva ⁴⁴ parihṛtamiti kṛtvā na pṛthak parihṛtam| bharadvājaśabdeneha nātreyagururucyate, kintu anya eva bharadvājagotraḥ kaścit; tena, tasya saṃśayacchedanamātreyeṇopapannameva||25||

saṅgrahe hetuśabdo garbhādiṣu janmānteṣu sambadhyate| pratijñāpratiṣedho bharadvājakṛto jñeyaḥ| tatsādhanaṃ ca yadātreyasya tat ‘viśadaścātmanirṇayaḥ’ ityanenoktam| taditi sāmānyena mātrādipratyavamarśānnapuṃsakam||26-27||

iti śrīcakrapāṇidattaviracitāyāṃ carakatātparyaṭīkāyāmāyurvedadīpikāyāṃ śārīrasthāne khuḍḍīkāgarbhāvakrāntiśārīraṃ nāma tṛtīyo'dhyāyaḥ||3||