3. bastisūtrīyā siddhiḥ

athāto bastisūtrīyāṃ ¹ siddhiṃ vyākhyāsyāmaḥ||1|| iti ha smāha bhagavānātreyaḥ||2||

pūrvādhyāye vamanādipravṛttiviṣayādikamabhidhāya ² kalpanāsiddhyuktabastikalpanāyāḥ prapañcenābhidhānārthaṃ bastisūtrīyā siddhirucyate| basteritikartavyatābhidhāyakasūtramadhikṛtya kṛtā siddhirbastisūtrīyasiddhiḥ||1-2||

kṛtakṣaṇaṃ śailavarasya ramye sthitaṃ dhaneśāyatanasya pārśve| maharṣisaṅghairvṛtamagniveśaḥ punarvasuṃ prāñjaliranvapṛcchat||3|| bastirnarebhyaḥ kimapekṣya dattaḥ syāt siddhimān kimmayamasya netram| kīdṛkpramāṇākṛti kiṅguṇaṃ ca kebhyaśca kiṃyoniguṇaśca bastiḥ||4|| nirūhakalpaḥ praṇidhānamātrā snehasya kā vā śayane vidhiḥ kaḥ| ke bastayaḥ keṣu hitā itīdaṃ śrutvottaraṃ prāha vaco maharṣiḥ||5||

dhaneśāyatanasyeti himālayasya| bastirnarebhya ityādayo daśa praśnāḥ| netraṃ nalikā| kiṃyoniguṇaśca bastirityatra bastiḥ bastipuṭakaḥ, yoniḥ prabhavasthānam| snehasya vā keti anuvāsanasya kā praṇidhānamātrā| anuvāsanasya ³ cātra prapañco'bhidhātavyaḥ; tenānuvāsanasya kalpamātrapraśno'tra boddhavyaḥ; yadā tu ‘snehasya vā kaḥ’ iti pāṭhaḥ, tadā snehasya nirūhadinadīyamānasya ko vidhirityarthaḥ, sa cottaragranthena saṅgatārtha eva| ke bastayaḥ keṣu hitā iti kebhyaḥ puruṣebhyaḥ kiṃyonayā hitā bastaya ityarthaḥ||3-5||

samīkṣya ⁴ doṣauṣadhadeśakālasātmyāgnisattvādivayobalāni| bastiḥ prayukto niyataṃ guṇāya syāt sarvakarmāṇi ca siddhimanti||6||

samīkṣyetyādi| atra doṣādayo ye daśa parīkṣaṇīyāḥ proktāsteṣveva upakalpanīyoktadoṣabheṣajādyekādaśakasya tathā rogabhiṣagjitīyoktadaśaparīkṣyasyāvarodho vyākhyeyaḥ; anuktāvarodhaścāyaṃ yonivyāpattika evāsmābhirukto'nusaraṇīyaḥ| samīkṣyeti jñānapūrvakamavekṣya| sarvakarmāṇi ceti vamanādīni ca doṣādīnapekṣya prayuktāni guṇakarāṇi bhavanti||6||

suvarṇarūpyatraputāmrarītikāṃsyāsthiśastradrumaveṇudantaiḥ ⁵| nalairviṣāṇairmaṇibhiśca taistairnetrāṇi kāryāṇi su(tri)karṇikāni ⁶||7||

kimmayamasya netramityasya praśnasyottaraṃ- suvarṇetyādi| trapu vaṅgaṃ, rītiḥ pittalam| viṣāṇairiti mahiṣādiśṛṅgaiḥ| sukarṇikānīti susamāhitakarṇikāni; ‘trikarṇikāni’ iti kecit paṭhanti, trikarṇikatvaṃ cāgre vakṣyamāṇam||7||

ṣaḍdvādaśāṣṭāṅgulasammitāni ṣaḍviṃśatidvādaśavarṣajānām| syurmudgakarkandhusatīnavāhicchidrāṇi vartyā'pihitāni caiva||8|| yathāvayo'ṅguṣṭhakaniṣṭhikābhyāṃ mūlāgrayoḥ syuḥ pariṇāhavanti| ṛjūni gopucchasamākṛtīni ślakṣṇāni ca syurguḍikāmukhāni||9|| syāt karṇikaikā'gracaturthabhāge mūlāśrite bastinibandhane dve|10|

‘kīdṛkpramāṇākṛti’ ityasyottaraṃ- ṣaḍityādi| tatra ṣaḍaṅgulamekavarṣāt prabhṛti yāvat ṣaḍvarṣaṃ, dvādaśavarṣasyāṣṭāṅgulaṃ netraṃ bhavati, viṃśativarṣasya dvādaśāṅgulaṃ netraṃ bhavati| atra vyutkramābhidhānena ṣaḍvarṣādarvāgviṃśativarṣādūrdhvaṃ ca netramānavikalpo nāsti, ṣaḍvarṣādūrdhvaṃ netramānavikalpo'stīti darśayati; tena ṣaḍvarṣādūrdhvaṃ pratyabdamaṅgulatṛtīyabhāgavṛddhirbhavati, dvādaśādūrdhvaṃ pratyabdamardhāṅgulavṛddhiḥ, evamuktamānapūraṇaṃ bhavati| suśrute netramānabheda uktaḥ, sa nātivirodhakāritayā upekṣaṇīya eva| uktaṃ hi tatra- “sāṃvatsarikāṣṭadviraṣṭavarṣāṇāṃ ṣaḍaṣṭadaśāṅgulaṃ netraṃ, pañcaviṃśativarṣādūrdhvaṃ dvādaśāṅgulam” (su.ci.a.35) iti| mudgādivāhicchidratvaṃ yathāsaṅkhyaṃ ṣaḍdvādaśāṣṭāṅgulanetreṣu jñeyam| karkandhuśabdeneha śṛgālabadarī ⁷ svalpā gṛhyate; uktaṃ hi suśrute- “kolāsthimātracchidraṃ” (su.ci.a.35) iti| bṛhadbadarīgrahaṇe ⁸ tu kaniṣṭhāpramāṇāgraṃ tadvahanaṃ nārhati; kecidevaṃ virodhaṃ paśyanto badarāsthimajjānamiha karkandhūśabdena grāhayanti| satīnaḥ vartulakalāyaḥ| vartyā'pihitānīti dravyāntarapraveśanirāsārthaṃ vartyā'pihitamukhāni kartavyāni| yathāvaya iti yasmin vayasi ⁹ netraṃ vihitaṃ, tadvayaḥsthasyaivāṅguṣṭhakaniṣṭhābhyāṃ yathāsaṅkhyaṃ mūle'gre ca tulyapariṇāhaṃ netraṃ kartavyam| ṛjūnītyādinā netraguṇānāha| ślakṣṇānīti akarkaśāni| guṭikāmukhānītyanena vartulamukhatayā'tīkṣṇamukhatāṃ darśayati| ekā karṇikā'gre kartavyā netrasyāntaḥpraveśanirāsārthaṃ, bastinibandhane dve iti bastinibandhanaprayojanake dve||8-9||-

jāradgavo māhiṣahāriṇau vā syācchaukaro bastirajasya vā'pi||10|| dṛḍhastanurnaṣṭasiro vigandhaḥ kaṣāyaraktaḥ sumṛduḥ suśuddhaḥ ¹⁰| nṛṇāṃ vayo vīkṣya yathānurūpaṃ netreṣu yojyastu subaddhasūtraḥ||11||

kebhyaśca kiṃyoniguṇaśca bastirityasyottaraṃ- jāradgava ityādi|- jāradgavaḥ vṛddhagobhavaḥ| bastiriti mūtrāśayapuṭakam| naṣṭasira iti samuddhṛtasirāsantatiḥ ¹¹| vigataḥ pūtigandho yasya sa vigandhaḥ| kaṣāyarakta iti kaṣāyabhāvanayā raktīkṛtaḥ ¹²| vayo vīkṣya yathānurūpamiti vayobhedena yathoktena yo bastiryasyocitapramāṇo bhavati, sa tasya netre nibandhanīyaḥ| etena ‘kebhyaḥ ko bastiḥ’ ityasyottaraṃ bhavati||10-11||

basteralābhe plavajo galo vā syādaṅkapādaḥ sughanaḥ paṭo vā|12|

bastyaprāptāvanukalpavidhimāha- basteralābhe ityādi| plavaja iti prasevakagalaḥ pakṣī ‘plava’ iti khyātaḥ| aṅkapādaḥ carmacaṭakaḥ, tasya carma grāhyaṃ bastyartham|12|

āsthāpanārhaṃ puruṣaṃ vidhijñaḥ samīkṣya puṇye'hani śuklapakṣe||12|| praśastanakṣatramuhūrtayoge jīrṇānnamekāgramupakrameta ¹³|13|

‘nirūhakalpaḥ’ ityādipraśnasyottaram- āsthāpanārhamityādi| śuklapakṣe iti śuklapakṣasya sarvārambheṣu praśastatvāt, hārītena tu kṛṣṇapakṣa evātra vihitaḥ; uktaṃ hi- “kṛṣṇapakṣe kāryaṃ, janmani sarvarogā hatāḥ suhatā bhavantīti vadanti śāstrajñāḥ; śukle devā jātāḥ, kṛṣṇe'surāśca sarvarogāśca; tasmādrogacikitsā kṛṣṇe sadaiva kartavyā” iti| ekāgramiti bastiprayogaikamanasam||12||-

balāṃ guḍūcīṃ triphalāṃ sarāsnāṃ dve pañcamūle ca palonmitāni||13|| aṣṭau phalānyardhatulāṃ ca māṃsācchāgāt pacedapsu caturthaśeṣam| pūtaṃ yavānīphalabilvakuṣṭhavacāśatāhvāghanapippalīnām||14|| kalkairguḍakṣaudraghṛtaiḥ satailairyutaṃ sukhoṣṇaistu picupramāṇaiḥ| guḍāt palaṃ dviprasṛtāṃ tu mātrāṃ snehasya yuktyā madhu saindhavaṃ ¹⁴ ca||15|| prakṣipya bastau mathitaṃ khajena subaddhamucchvāsya ¹⁵ ca nirvalīkam| aṅguṣṭhamadhyena mukhaṃ pidhāya netrāgrasaṃsthāmapanīya vartim||16|| tailāktagātraṃ kṛtamūtraviṭkaṃ nātikṣudhārtaṃ śayane manuṣyam| same'thaveṣannataśīrṣake ¹⁶ vā nātyucchrite svāstaraṇopapanne||17|| savyena pārśvena sukhaṃ śayānaṃ kṛtvarjudehaṃ svabhujopadhānam| saṅkocya ¹⁷ savyetaradasya sakthi vāmaṃ prasārya praṇayettatastam||18|| snigdhe gude netracaturthabhāgaṃ snigdhaṃ śanaiṛujvana ¹⁸ pṛṣṭhavaṃśam| akampanāvepanalāghavādīn pāṇyorguṇāṃścāpi vidarśayaṃstam ¹⁹||19|| prapīḍya caikagrahaṇena dattaṃ netraṃ śanaireva tato'pakarṣet|20|

balāmityādinā ²⁰ bastividhānamāha| palonmitatvamiha triphalāpañcamūlyorapi pratidravyam| phalānīti madanaphalāni, tāni cākṛtyaivāṣṭāviha| atra balādīnāmauṣadhānāmautsargikakvāthavidhinā'ṣṭamadanaphalādhikaṣaṭṣaṣṭipalatvaṃ “kvāthaḥ ²¹ kvāthyasamaḥ” itivacanād bahukvātho bhavati; bastau ca puṭatrayadāne'pi pratipuṭake daśapalakvāthadānaniyamāt triṃśatpalāni paramupayujyante, śeṣastu yadyapi niṣprayojanastathā'pi maharṣivacanādyāvatpramāṇamuktaṃ tāvataiva ²² kriyamāṇaḥ kvātho'tra guṇavān bhavatīti, tena na mīmāṃsyametat; uktaṃ hi- “yathā kurvanti, sa upāyaḥ” (sū.a.26); iti kiṃvā, upayuktakvāthyadravyamānavibhāgodāharaṇārthametaduktaṃ ²³, tena tadanusāreṇopayuktakvāthasādhanayogyamānameva kvāthyaṃ grahītavyam| yavānyādīnāṃ pratyekaṃ pratinirūhaṃ picumānatvaṃ; picuḥ karṣaḥ| snehasyeti ghṛtatailasya, uktatvāt ²⁴| etacca snehamānaṃ prakṛtisthe puruṣe vakṣyamāṇavyavasthayā jñeyam| ‘yuktyā madhusaindhave ca’ ityanena madhusaindhavayoḥ prakṛtyādyapekṣayā'niyataṃ mānaṃ darśayati; cakāro māṃsarasakṣīragomūtrādīnāṃ cāniyataṃ mānaṃ darśayati; eṣāṃ ca mānavyavasthāmagre kaṣāyamānaprastāve darśayiṣyāmaḥ| ucchvāsyeti ucchvāsanena dravyābhighātajanitavātanirgamamicchati| nirvalīkamiti kriyāviśeṣaṇam| netrāgrasaṃsthāmiti prathamaṃ dravanirgamādipratiṣedhārthaṃ nalikāgramukhadattāṃ vartim| tailāktagātramiti abhyaṅgasāhacaryāt svedo'pi jñeyaḥ, tenābhyaktasvinnamityarthaḥ; uktaṃ hyanyatra “anuvāsitamāsthāpayedabhyaktasvinnaśarīram” (su.ci.a.38) iti| prastāvāgataśayanavidhimāha- śayane manuṣyamityādi| same'thaveṣannataśīrṣake veti vikalpadvayamāturecchayā kartavyaṃ; kiṃvā, unnatakaṭīdeśasya puruṣasya samaṃ, tucchakaṭīkasyonnataśīrṣaṃ śayanaṃ vidheyam, evaṃ hi tayoḥ samyagbastirdehānusārī bhavati| savyeneti vāmena; vāmapārśvaśayanaprayojanaṃ ‘vāmāśraye hi’ ityādinā vakṣyamāṇam| manuṣyaṃ yathoktasarvaguṇaṃ kṛtvā taṃ praṇayediti sambandhaḥ| svabhujopadhānaṃ yathā bhavati tathā śayānam; upadhānaṃ gaṇḍuḥ| savyetarad dakṣiṇam| sakthi jaṅghā| vāmaṃ sakthi prasārya, tadupari dakṣiṇaṃ sakthi saṅkocya, visṛtasavyasakthisaṅkucitadakṣiṇasakthītyarthaḥ| snigdhe gude netracaturthabhāgamiti karṇikāvacchinnaṃ sarvaṃ caturthabhāgamiti| anu pṛṣṭhavaṃśamiti pṛṣṭhavaṃśamanugataṃ kṛtvā| akampanetyādau kampanaṃ calanaṃ, vepanaṃ vepathuḥ, lāghavaṃ śīghrakriyatā; ādiśabdena bastigrahaṇapīḍanādi gṛhyate| vidarśayanniha sampādayan| prapīḍya caikagrahaṇena dattamityanena viśramya punaḥ pīḍanaṃ vāyujanakaṃ niṣedhayati||13-19||-

tiryak praṇīte tu na yāti dhārā gude vraṇaḥ syāccalite tu netre||20|| dattaḥ śanairnāśayameti bastiḥ kaṇṭhaṃ pradhāvatyatipīḍitaśca| śītastvatistambhakaro vidāhaṃ mūrcchāṃ ca kuryādatimātramuṣṇaḥ||21|| snigdho'tijāḍyaṃ pavanaṃ tu rūkṣastanvalpamātrālavaṇastvayogam| karoti mātrābhyadhiko'tiyogaṃ kṣāmaṃ tu sāndraḥ sucireṇa caiti||22|| dāhātisārau lavaṇo'ti kuryāttasmāt suyuktaṃ samameva dadyāt|23|

tiryakpraṇidhānādidoṣamāha- tiryagityādi| na yāti dhāreti tiryakpraṇidhāne sati gudavalīrodho bhavati, tena dhārā na yāti| atistambhakara iti bastirdehasya stambhaṃ karoti| jāḍyamiti śarīrajaḍatā| tanvalpamātrālavaṇastvayogamiti tanurvā, alpamātralavaṇo ²⁵ vā| sāndraḥ tanuviparītaḥ, kṣāmaṃ puruṣaṃ kuryāt| lavaṇo'tīti atimātralavaṇaḥ| tasmāditi yathoktavidhāneṣu doṣanidarśanāt| suyuktamiti tiryakpraṇidhānādirahitaṃ, śītatvādirahitaṃ ca||20-22||-

pūrvaṃ hi dadyānmadhu saindhavaṃ tu snehaṃ vinirmathyaṃ tato'nu kalkam||23|| vimathya saṃyojya punardravaistaṃ bastau nidadhyānmathitaṃ ²⁶ khajena|24|

‘pūrvaṃ hi dadyād’ iti granthaṃ kecidanārṣamāhuḥ; tantrāntareṣu tvasyārthasya dṛṣṭatvādyukta evāyaṃ pāṭhaḥ; ucyate hi suśrute “dattvā''dau saindhavasyākṣaṃ madhunaśca paladvayam ²⁷| pātre talena mathnīyāt” (su.ci.a.38) ityādi| punardravaistamityatra dravaśabdena kvāthasya ²⁸ grahaṇam||23||-

vāmāśraye ²⁹ hi grahaṇīgude ca tat pārśvasaṃsthasya sukhopalabdhiḥ||24|| līyanta evaṃ valayaśca tasmāt savyaṃ śayāno'rhati bastidānam|25|

vāmapārśvaśayanaṃ yaduktaṃ tasya prayojanamāha- vāmāśraye ityādi| vāmāśraye ³⁰ yasmād grahaṇīgude, tena vāmapārśvasuptasya grahaṇīgude prakṛtisthe bhavataḥ, prakṛtisthe ca gude gudasya bastinā samyagupaśleṣād ³¹ vyāptirbhavati, tathā ³² valayaśca līnā bhavanti, tena sukhaṃ bastiryāti, grahaṇīgudayoḥ prakṛtisthatayā ca bastirvyāpya sukhaṃ grahaṇīṃ bhāvayatīti boddhavyam||24||-

viḍvātavego yadi cārdhadatte niṣkṛṣya mukte praṇayedaśeṣam ³³||25|| uttānadehaśca kṛtopadhānaḥ syādvīryamāpnoti tathā'sya deham ³⁴|26|

viḍvātetyādau niṣkṛṣya mukte iti nalikāmākṛṣya viḍvātavege mukte| datte tu bastau uttānadehaḥ kṛtopadhānaśca syāt| etatkaraṇaprayojanamāha- vīryamāpnotītyādi||25||-

eko'pakarṣatyanilaṃ svamārgāt pittaṃ dvitīyastu kaphaṃ tṛtīyaḥ||26||

eko'pakarṣatītyādi| etadvātādibhedena ekādibastidānavidhānaṃ; na tu tridoṣe prathamo vātaṃ jayati, dvitīyaḥ pittaṃ jayati, tṛtīyaḥ kaphamityādi vyākhyeyaṃ; yataḥ, “snigdhoṣṇa ekaḥ pavane samāṃsaḥ” ityādinā pavanādibhedenaiva saṅkhyāniyamaṃ kariṣyati| evaṃ ³⁵ svamārgāccānilameko bastirapakarṣati, pittaṃ dvitīyastu svamārgāditi pittaṃ dvāveva jayataḥ ³⁶, kaphaṃ traya eva jayantīti jñeyaṃ; svamārgāditi svasthānāt| yadyapi ca bastiḥ ³⁷ pakvāśayagatameva doṣaṃ jayatītyuktaṃ, tathā'pi pittādisthāne'pi viśeṣabastividhisāmarthyāddoṣaharaṇamucyate; tena, utsargatastadgatadoṣaharaṇaṃ viśiṣṭavidhānena ca sthānāntaragatadoṣaharaṇaṃ bhavati| ayamartho jatūkaṇe'pyucyate- “bastiḥ kāryaḥ sakṛdbastisthānaśaktyā'nilādiṣu” iti| atra dvitīyaḥ pittamapakarṣati, tṛtīyaḥ kaphamapakarṣatītyucyate; tathā'pi prathamadvitīyayorapi pittakaphāpahatvamastyeva ³⁸, paraṃ dvitīyena pittāpaharaṇaṃ, tṛtīyena ca kaphāpaharaṇaṃ sthānapratyāsattyā kriyata iti kṛtvā dvitīyaḥ pittaṃ harati, tṛtīyaḥ kaphaṃ haratīti coktam| pittakaphayośca yadyapi sukhaṃ cikitsitaṃ bastirna bhavati, tathā'pi vātāvarake vātānubandhe vā pitte kaphe caitadbastidānaṃ jñeyam; uktaṃ hi suśrute- “bastirvāte ca pitte ca kaphe rakte ca śasyate” (su.ci.a.35) iti||26||

pratyāgate koṣṇajalāvasiktaḥ śālyannamadyāttanunā rasena| jīrṇe tu sāyaṃ laghu cālpamātraṃ bhukto'nuvāsyaḥ paribṛṃhaṇārtham||27|| nirūhapādāṃśasamena tailenāmlānilaghnauṣadhasādhitena| dattvā sphicau pāṇitalena hanyāt snehasya śīghrāgamarakṣaṇārtham||28|| īṣacca pādāṅguliyugmamāñcheduttānadehasya ³⁹ talau pramṛjyāt| snehena pārṣṇyaṅgulipiṇḍikāśca ye cāsya gātrāvayavā rugārtāḥ||29|| tāṃścāvamadgīta sukhaṃ tataśca nidrāmupāsīta kṛtopadhānaḥ|30|

śālyannamityādau jīrṇe iti āsthāpanopalepe koṣṭhasthe jīrṇe| tanumāṃsarasādibhojanaṃ ceha nirūheṇa manāgupahatasya vahneḥ paripālanārtham| peyādikramastvatra na kriyate, virecanavadihāmasyābhāvāt; ata eva suśrute peyādikramaṃ tyaktvā rasādikrama uktaḥ| paribṛṃhaṇārthamityanena lekhanārthaṃ kriyamāṇe nirūhe paribṛṃhaṇārthamanuvāsanaṃ tadahaḥ kartavyamiti darśayati| ata eva kalpanāsiddhāvapi- “narastato niśyanuvāsanārhaḥ” (si.a.1) ityanena tadaharanuvāsanasyāvaśyakatvamuktaṃ ⁴⁰; jatūkarṇe'pyuktaṃ- “jīrṇe sāyaṃ kṛtānnaṃ ca puṣṭyarthamanuvāsayet” iti| nirūhapādāṃśasamena taileneti nirūhapādapramāṇena, caturviṃśatipale nirūhe ṣaṭpalena snehenetyarthaḥ; iyaṃ cottamā mātrā'nuvāsanasya; uktaṃ hyanyatra- “uttamā ṣaṭpalī proktā madhyamā tripalī bhavet| kanīyasī ⁴¹ sārdhapalā tridhā mātrā'nuvāsane” iti; suśrute'pyetāvanmānameva snehasyānuvāsana mātrābastivibhāgenānuvāsane uktam| snehaśīghrāgamanarakṣārthaṃ vidhānamāha- īṣadityādi| tacca pādāṅgulyottānadehasya mātrāśataṃ sthāpanaṃ kartavyam| nirūhe tu triṃśanmātrākālaṃ yāvaduttānasya sthāpanaṃ manyante| pādāṅguliyugmamiti parvasandhiḥ| āñchediti ⁴² ākarṣet| nidrāmupāsīteti vacanaṃ kriyāntarasya niṣedhārtham||27-29||-

bhāgāḥ kaṣāyasya tu pañca, pitte snehasya ṣaṣṭhaḥ prakṛtau sthite ca||30|| vāte vivṛddhe tu caturthabhāgo, mātrā nirūheṣu kaphe'ṣṭabhāgaḥ|31|

samprati trividho yo dvādaśaprasṛto nirūhastasya kaṣāyasnehamātrāṃ nirūpayannāha ⁴³ - bhāgā ityādi| bhāgāḥ kaṣāyasya pañcetyanena sarvatraiva doṣe svasthe ca puruṣe dvādaśaprasṛtabhāgarūpe nirūhe pañcabhāgāḥ kaṣāyasya bhavanti, tena pañca prasṛtāḥ kaṣāyasya| snehasya ca doṣabhedena svasthe ca mānabhedamāha- pitte ityādi| pitte snehasya ṣaṣṭhaḥ, tathā prakṛtau sthite ca puruṣe svasthe ṣaṣṭha ityarthaḥ; tatra ṣaṇṇāṃ pūraṇaḥ ṣaṣṭhaḥ, tena dvādaśaprasṛtasya ṣaṣṭho bhāgo dviprasṛtaṃ bhavati| snehaśabdena ghṛtatailādigrahaṇam| vāte tu vṛddhe caturtho bhāgaḥ; snehacaturtho bhāgaḥ prasṛtatrayam| aṣṭabhāga iti sārdhaḥ prasṛtaḥ| asminnarthe hārītaḥ- “kvāthasya pañcaprasṛtā vibhāgāḥ, snehasya ṣaṣṭho hyadhike tu pitte| svasthe ca tāvat, pavane caturthaḥ, kaphe'ṣṭamo'tyantagate(?) vikalpaḥ” iti| eṣā snehamātrā hīnamātre'pi nirūhe kvāthasnehayoruktamātrānusāreṇa yojanīyā; śeṣaṇāṃ tu madhukalkasaindhavānāmiha mātrāniyamo noktaḥ, teṣāmapi prakṛtyādibhadenāniyatatvāt; tena madhvādīnāṃ prakṛtyādyanusāreṇa prasṛtamānena dvādaśaprasṛtatvaṃ pūraṇīyam| tatra jatūkaṇapratyayāt sarvatra kalkasya paladvayaṃ bhavati| uktaṃ hi tatra “caturviṃśatike puṭake peṣyāṇāṃ dvipalaṃ, kiñcicca madhusaindhavāt, sneho vakṣyamāṇaḥ, śeṣaṃ kaṣāyasya; vāte tailaṣaṭpalaṃ svasthe ca; catvāri pitte ghṛtasya, kaphe trīṇi tailasya” iti; saindhavaṃ tu karṣapramāṇamasti; yataḥ suśrute- “saindhavākṣaṃ samādāya madhunaḥ prasṛtadvayam” (su.ci.a.38) ityādyuktam; hārīta tu- “kṣaudraṃ tu deyaṃ prasṛtapramāṇaṃ dvitīyamāhurlavaṇasya cākṣam” ityuktaṃ; tenānayā diśā saindhavamadhukalpanā| yathoktakaṣāyasnehakalkamadhusaindhavāpūritāṃśapūraṇaṃ cāvāpenaiva kartavyam; āvāpaścātrānukto'pyuttaratra vakṣyamāṇo vātādibhedena māṃsarasakṣīragomūtrādiko jñeyaḥ| vakṣyati hi- “snigdhoṣṇa ekaḥ pavane nirūho, dvau svāduśītau payasā ca pitte| trayaḥ samūtrāḥ kaṭukoṣṇatīkṣṇāḥ kaphe nirūhā na paraṃ vidheyāḥ” iti| hārīta'pyuktaṃ “snehaṃ guḍaṃ māṃsarasaṃ payaśca hyamlāni mūtrāṇi ca saindhavaṃ ca| etāni sarvāṇyapi yojayīta nirūhayoge madanāt phalaṃ ca” iti| yattu tantrāntare- dvādaśaprasṛtapūraṇaṃ prati pratidravyavibhāgenoktaṃ; yathā- “dattvā''dau saindhavasyākṣaṃ madhunaḥ prasṛtadvayam| vinirmathya tato dadyāt snehasya prasṛtatrayam| ekībhūte tataḥ snehe kalkasya prasṛtaṃ kṣipet| sammūrcchite kaṣāyaṃ tu catuḥprasṛtasammitam|| vitarecca tadāvāpamante ⁴⁴ dviprasṛtonmitam| evaṃ sukalpito bastirdvādaśaprasṛto bhavet” (su.ci.a.38) iti; tadvātaviṣayameva, snehasya vātaghnatvāt; kintvatra yaccatuḥprasṛtaṃ kaṣāyasya manyate, tadasmattantrānumatameva ⁴⁵| yattvanye paṭhanti- “madhusnehanakalkākhyakaṣāyāvāpataḥ kramāt| trīṇi ṣaṭ dve daśa trīṇi palānyanilarogiṇām|| pitte catvāri catvāri dve dvipañca catuṣṭayam ⁴⁶| ṣaṭ trīṇi dve daśa trīṇi kaphe cāpi nirūhaṇam” iti; tadasmattantrānugatatvādanumatameva||30||-

nirūhamātrā prasṛtārdhamādye varṣe tato'rdhaprasṛtābhivṛddhiḥ||31|| ādvādaśāt syāt prasṛtābhivṛddhiraṣṭādaśād dvādaśataḥ paraṃ syuḥ| āsaptatestadvihitaṃ ⁴⁷ pramāṇamataḥ paraṃ ṣoḍaśavadvidheyam||32|| nirūhamātrā prasṛtapramāṇā bāle ca vṛddhe ca mṛdurviśeṣaḥ|33|

idānīṃ vayobhedena nirūhapramāṇaṃ darśayannāha- nirūhetyādi| ādye varṣe bālasya palamāne nirūhe kvāthādi yathoktamānānusāreṇa vaktavyam; ardhaprasṛtābhivṛddhiḥ tataḥ prativarṣaṃ bhavati; tena dvādaśavarṣe ṣaṭprasṛto bastirbhavati; dvādaśādūrdhvamaṣṭādaśavarṣaparyantaṃ prativarṣaṃ prasṛtavṛddhyā dvādaśaprasṛtapūraṇaṃ bhavati; ‘dvādaśataḥ paraṃ syuḥ’ ityanenādhikapramāṇabastimānaṃ mahātyayakaraṃ kaiścidanumataṃ niṣedhayati; yathā hārīte ekīyamataṃ paṭhyate- “ardhāḍhakaṃ paramatamaṃ ⁴⁸ pramāṇam” iti ⁴⁹; tathā suśrute'pi (?)- “dvādaśaprasṛtaṃ kecit triṃśatpalamathā'pare” ityādi| bastimānaṃ darśayitumāha- āsaptaterityādi| āsaptatestaditi dvādaśaprasṛtamānaṃ saptatiṃ yāvadbhavati| ṣoḍaśavaditi daśaprasṛtapramāṇam| bālavṛddhayoryathoktaprasṛtamānaviṣayaṃ darśayan ⁵⁰ tatrānyaṃ viśeṣamāha- nirūhamātretyādi| bālavṛddhayoryathoktaiva nirūhamātrā prasṛtapramāṇā kāryā, viśeṣeṇa tayorbastirmṛduḥ kāryaḥ| tīkṣṇatvamārdavakaraṃ ca vidhānaṃ vakṣyati; yathā- “tīkṣṇatvaṃ mūtrapīlvagnilavaṇakṣārasarṣapaiḥ| prāptakālaṃ vidhātavyaṃ kṣīrādyairmārdavaṃ tathā” (si.a.7) iti||31-32||-

nātyucchritaṃ nāpyatinīcapādaṃ sapādapīṭhaṃ śayanaṃ praśastam||33|| pradhānamṛdvāstaraṇopapannaṃ prākśīrṣakaṃ śuklapaṭottarīyam|34|

samprati ‘śayane vidhiḥ kaḥ’ iti praśnasyottaramāha- nātyucchritamityādi| pūrvaṃ yaḥ śayanavidhiruktaḥ sa tātkālikaḥ, ayaṃ tūttarakālika iti viśeṣaḥ| pradhānaṃ mahanmṛdu cāstaraṇaṃ pradhānamṛdvāstaraṇaṃ, tenopapannaṃ yuktam| prākśīrṣakamiti “prācyāṃ diśi sthitā devāstatpūjārthaṃ ca prākśirāḥ” (su.sū.a.19) iti vacanāt||33||-

bhojyaṃ punarvyādhimavekṣya tadvat ⁵¹ prakalpayedyūṣapayorasādyaiḥ||34|| sarveṣu vidyādvidhimetamādyaṃ vakṣyāmi bastīnata uttarīyān|35|

yūṣādi bhojyavidhānaṃ yathākramaṃ kaphe, pitte, vāte; kiṃvā, agnyapekṣaṃ yathāyogyatayā vyākhyeyam| yathoktavidhānaṃ vakṣyamāṇavidhiṣu kartavyatayā darśayannāha- sarveṣvityādi| etadādyamiti pradhānam, autsargikamiti yāvat; tena viśeṣavidhānenāpavādo'pyasya bhaviṣyatīti sūcayati||34||-

dvipañcamūlasya raso'mlayuktaḥ sacchāgamāṃsasya sapūrvapeṣyaḥ||35|| trisnehayuktaḥ pravaro nirūhaḥ sarvānilavyādhiharaḥ pradiṣṭaḥ| sthirādivargasya balāpaṭolatrāyantikairaṇḍayavairyutasya||36|| prastho rasācchāgarasārdhayuktaḥ sādhyaḥ punaḥ prasthasamastu yāvat| priyaṅgukṛṣṇāghanakalkayuktaḥ satailasarpirmadhusaindhavaśca||37|| syāddīpano māṃsabalapradaśca cakṣurbalaṃ cāpi dadāti bastiḥ ⁵²| eraṇḍamūlaṃ tripalaṃ palāśā ⁵³ hrasvāni mūlāni ca yāni pañca||38|| rāsnāśvagandhātibalāguḍūcī punarnavāragvadhadevadāru| bhāgāḥ palāṃśā madanāṣṭayuktā ⁵⁴ jaladvikaṃse kvathite'ṣṭaśeṣe||39|| peṣyāḥ śatāhvā hapuṣā priyaṅguḥ sapippalīkaṃ madhukaṃ balā ⁵⁵ ca| rasāñjanaṃ vatsakabījamustaṃ bhāgākṣamātraṃ ⁵⁶ lavaṇāṃśayuktam||40|| samākṣikastailayutaḥ samūtro bastirnṛṇāṃ dīpanalekhanīyaḥ| jaṅghorupādatrikapṛṣṭhaśūlaṃ kaphāvṛtiṃ mārutanigrahaṃ ca||41|| viṇmūtravātagrahaṇaṃ saśūlamādhmānatāmaśmariśarkare ca| ānāhamarśograhaṇīpradoṣāneraṇḍabastiḥ śamayet prayuktaḥ||42|| catuṣpale tailaghṛtasya bhṛṣṭācchāgācchatārdho dadhidāḍimāmlaḥ| rasaḥ sapeṣyo balamāṃsavarṇaretognidaścāndhyaśirortiśastaḥ ⁵⁷||43|| jaladvikaṃse'ṣṭapalaṃ palāśāt paktvā raso'rdhāḍhakamātraśeṣaḥ| kalkairvacāmāgadhikāpalābhyāṃ ⁵⁸ yuktaḥ śatāhvādvipalena cāpi||44|| sasaindhavaḥ kṣaudrayutaḥ satailo deyo nirūho balavarṇakārī| ānāhapārśvāmayayonidoṣān gulmānudāvartarujaṃ ca hanyāt||45||

‘ke bastaya’ ityādipraśnasyottaraṃ- dvipañcamūlasyetyādi| atra māṃsaṃ daśamūlasamam| rasaḥ kvāthaḥ| amlaṃ kāñjikādi| sapūrvapeṣya iti balādyuktakalkayuktaḥ| trisnehayukta ityanena, majjaparityāgaṃ sarvabastisiddhaṃ smārayati; uktaṃ hyanyatra- “vijñeyastrividhaḥ sneho bastyartha majjavarjitaḥ” iti| sthirādivargasyetyādau madhusaindhave yadyapi sāmānyenoktabastividhānalabdhe, tathā'pi tailādīnāmatrāprakarṣārthaṃ punastayorabhidhānaṃ, kiṃvā sāmānyavidhismaraṇārthamatrābhidhānam; evamanyatrāpi sāmānyavidhiprāptasya punarabhidhāne vyākhyeyam| eraṇḍamūlamityādau palāśā śaṭī| hrasvāni mūlānīti sthirādipañcamūlam| kaṃsa āḍhakaḥ| bhāgākṣamātramiti bhāgenākṣamātram| chāgācchatārdha iti pañcāśatpalo bhavati| sapeṣya iti balādikasya kalkayuktaḥ||35-45||

yaṣṭyāhvayasyāṣṭapalena ⁵⁹ siddhaṃ payaḥ śatāhvāphalapippalībhiḥ| yuktaṃ sasarpirmadhu vātaraktavaisvaryavīsarpahito nirūhaḥ||46|| yaṣṭyāhvalodhrābhayacandanaiśca śṛtaṃ payo'gryaṃ kamalotpalaiśca| saśarkaraṃ kṣaudrayutaṃ suśītaṃ pittāmayān hanti sajīvanīyam||47|| dvikārṣikāścandanapadmakardhiyaṣṭyāhvarāsnāvṛṣasārivāśca| salodhramañjiṣṭhamathāpyanantābalāsthirāditṛṇapañcamūlam ⁶⁰||48|| toye samutkvāthya rasena tena śṛtaṃ payo'rdhāḍhakamambuhīnam| jīvantimedardhiśatāvarībhirvīrādvikākolikaśerukābhiḥ||49|| sitopalājīvakapadmareṇu prapauṇḍarīkaiḥ kamalotpalaiśca| lodhrātmaguptāmadhukairvidārīmuñjātakaiḥ keśaracandanaiśca||50|| piṣṭairghṛtakṣaudrayutairnirūhaṃ sasaindhavaṃ śītalameva dadyāt| pratyāgate dhanvarasena śālīn kṣīreṇa vā'dyāt pariṣiktagātraḥ||51|| dāhātisārapradarāsrapittahṛtpāṇḍurogān viṣamajvaraṃ ca| sagulmamūtragrahakāmalādīn sarvāmayān pittakṛtānnihanti||52|| drākṣādikāśmaryamadhūkasevyaiḥ sasārivācandanaśītapākyaiḥ| payaḥ śṛtaṃ śrāvaṇimudgaparṇītugātmaguptāmadhuyaṣṭikalkaiḥ||53|| godhūmacūrṇaiśca tathā'kṣamātraiḥ sakṣaudrasarpirmadhuyaṣṭitailaiḥ| pathyāvidārīkṣurasairguḍena ⁶¹ bastiṃ yutaṃ pittaharaṃ vidadhyāt||54|| hṛnnābhipārśvottamadehadāhe ⁶² dāhe'ntarasthe ca sakṛcchramūtre| kṣīṇe kṣate retasi cāpi naṣṭe paitte'tisāre ca nṛṇāṃ praśastaḥ||55||

yaṣṭyāhvayasyetyādikāścatvāraḥ pitte, pūrvaṃ tūktāḥ pañca vāte| atra payaḥsādhanaṃ kṣīrapākaparibhāṣayaiva| yaṣṭyāhvalodhretyādinā jīvanīyamityantenaiko yogaḥ| jīvanīyānāmatra kalkaḥ| suśītatvamihautsargikaṃ mṛdukoṣṭheṣvadhikaṃ ⁶³ pittahitatvāt; anayā ca diśā'parapittaharabastāvapi śītatvaṃ jñeyam| dvikārṣikamityādau anantā utpalasārivā| tṛṇapañcamūlaṃ- “śarekṣudarbhakāśānāṃ śālīnāṃ mūlameva ca” (ca.ci.a.1pā.1) ityādinoktam| ambuhīnamiti kṣīrāvaśeṣaparyantaṃ śṛtam| rājakaśeruḥ kaśerureva| sasaindhavamiti īṣatsaindhavam| sasārivetyādau śītapākī śītalī| madhuyaṣṭitailaṃ madhuyaṣṭisādhitaṃ tailam| uttamadehaḥ mastakam||46-55||

koṣātakāragvadhadevadāruśārṅgeṣṭamūrvākuṭajārkapāṭhāḥ ⁶⁴| paktvā kulatthān bṛhatīṃ ca toye rasasya tasya prasṛtā daśa syuḥ||56|| tān sarṣapailāmadanaiḥ sakuṣṭhairakṣapramāṇaiḥ prasṛtaiśca yuktān| phalāhvatailasya samākṣikasya ⁶⁵ kṣārasya tailasya ca sārṣapasya||57|| dadyānnirūhaṃ kapharogiṇe jño mandāgnaye cāpyaśanadviṣe ca| paṭolapathyāmaradārubhirvā sapippalīkaiḥ kvathitairjale'gnau||58|| dvipañcamūle triphalāṃ sabilvāṃ phalāni gomūtrayutaḥ kaṣāyaḥ| kaliṅgapāṭhāphalamustakalkaḥ sasaindhavaḥ kṣārayutaḥ satailaḥ||59|| nirūhamukhyaḥ kaphajān vikārān sapāṇḍurogālasakāmadoṣān| hanyāttathā mārutamūtrasaṅgaṃ bastestathā''ṭopamathāpi ⁶⁶ ghoram||60|| rāsnāmṛtairaṇḍaviḍaṅgadārvīsaptacchadośīrasurāhvanimbaiḥ| śampākabhūnimbapaṭolapāṭhātiktākhuparṇīdaśamūlamustaiḥ||61|| trāyantikāśigruphalatrikaiśca kvāthaḥ sapiṇḍītakatoyamūtraḥ| yaṣṭyāhvakṛṣṇāphalinīśatāhvārasāñjanaśvetavacāviḍaṅgaiḥ||62|| kaliṅgapāṭhāmbudasaindhavaiśca kalkaiḥ sasarpirmadhutailamiśraḥ| ayaṃ nirūhaḥ krimikuṣṭhamehabradhnodarājīrṇakaphāturebhyaḥ||63|| rūkṣauṣadhairapyapatarpitebhya eteṣu rogeṣvapi satsu dattaḥ| nihatya vātaṃ jvalanaṃ pradīpya vijitya rogāṃśca balaṃ karoti||64||

koṣātaketyādikāścatvāraḥ kaphe bastayaḥ| śārṅgeṣṭā guñjā| atra kvāthadaśaprasṛtena tathā kalkena kṣaudrādinā ca yadyapi mānamadhikaṃ bhavati, tathā'pyevameva dravyasaṃyogaṃ kṛtvā dvādaśaprasṛta eva bastirdeyaḥ, tadadhikamānasya niṣiddhatvāt| paṭoletyādau paṭolādipippalyantaistoyaṃ sādhayitvā pūrvavad dvitīyaḥ, kapharogiṇe dvipañcamūlyādibhistṛtīyaḥ kartavyaḥ| kṣāraḥ yavakṣāraḥ| rāsnetyādau śampākaḥ caturaṅgulaḥ| tiktā kaṭurohiṇī| atra piṇḍītakakvātho'pyāvāpakalpo ⁶⁷ yena praviśati; piṇḍītakaḥ madanaḥ| rūkṣauṣadhairatyapatarpitebhyo'pyeteṣu kuṣṭhādirogeṣvayaṃ datto balaṃ karotīti yojanā||56-64||

punarnavairaṇḍavṛṣāśmabhedavṛścīrabhūtīkabalāpalāśāḥ ⁶⁸| dvipañcamūlaṃ ca palāṃśikāni kṣuṇṇāni dhautāni phalāni ⁶⁹ cāṣṭau||65|| bilvaṃ yavān kolakulatthadhānyaphalāni caiva prasṛtonmitāni| payojaladvyāḍhakavacchṛtaṃ ⁷⁰ tat kṣīrāvaśeṣaṃ sitavastrapūtam||66|| vacāśatāhvāmaradārukuṣṭhayaṣṭyāhvasiddhārthakapippalīnām ⁷¹| kalkairyavānyā madanaiśca yuktaṃ nātyuṣṇaśītaṃ guḍasaindhavāktam||67|| kṣaudrasya tailasya ca sarpiṣaśca tathaiva yuktaṃ prasṛtaistribhiśca ⁷²| dadyānnirūhaṃ vidhinā vivijñaḥ sa sarvasaṃsargakṛtāmayaghnaḥ||68||

punarnavetyādikaḥ sarvavātādisaṃsargaviṣayaḥ| vṛścīraḥ śvetapunarnavā| dhānyāni phalāni ceti dhānyaphalāni| payojaladvyāḍhakavaditi samajalakṣīradviprasthayuktam||65-68||

snigdhoṣṇa ekaḥ pavane samāṃso dvau svāduśītau payasā ca pitte| trayaḥ samūtrāḥ kaṭukoṣṇatīkṣṇāḥ kaphe nirūhā na paraṃ vidheyāḥ||69||

uktānāṃ vātādiharabastīnāṃ saṅkhyākalpanāṃ viśiṣṭāṃ darśayannāha- snigdhoṣṇa ityādi| eka iti eka eva puṭakaḥ| payasā ceti payoyuktau| kaṭukoṣṇatīkṣṇatvaṃ kaphaharadravyayogādeva jñeyam| na paraṃ vidheyā ityanena tantrāntaravihitaṃ caturthabastidānamatyarthaśarīrahiṃsakaṃ niṣedhayati; yathā suśrute- “dvitīyaṃ vā tṛtīyaṃ vā caturthaṃ vā yathārhataḥ| samyaṅnirūḍhaliṅge tu prāpte bastiṃ nivartayet” (su.ci.a.32) ityanenoktaṃ caturthadānamiti||69||

rasena vāte pratibhojanaṃ syāt kṣīreṇa pitte tu kaphe ca yūṣaiḥ| tathā'nuvāsyeṣu ca bilvatailaṃ syājjīvanīyaṃ phalasādhitaṃ ca||70|| itīdamuktaṃ nikhilaṃ yathāvadbastipradānasya vidhānamagryam| yo'dhītya vidvāniha bastikarma karoti loke labhate sa siddhim||71||

samprati vātādibhedena pratibhojanaṃ viśiṣṭaṃ tathā'nuvāsanaṃ cāha- rasena vāte ityādi| pratibhojanaṃ nirūhānantarabhojanam| vāte bilvatailānuvāsanaṃ, pitte jīvanīyasādhitaṃ, kaphe ca madanaphalasādhitam| atra bilvatailādīni vakṣyamāṇāni vyākhyānayanti; tena snehavyāpatsiddhau yad vakṣyati “daśamūlaṃ” (si.a.4) ityādinā bilvatailaṃ, jīvanīyaṃ ca “jīvantī madanaṃ” (si.a.4) ityādinā vakṣyamāṇayamakaṃ, tathā “madanairvā'mlasaṃyuktaiḥ” (si.a.4) ityādinā vakṣyamāṇaṃ madanatailaṃ jñeyam||70-71||

ityagniveśakṛte tantre carakapratisaṃskṛte'prāpte dṛḍhabalasampūrite siddhisthāne bastisūtrīyasiddhirnāma tṛtīyo'dhyāyaḥ||3||

iti śrīcakrapāṇidattapraṇītāyāmāyurvedadīpikāyāṃ carakatātparyaṭīkāyāṃ siddhisthāne bastisūtrīyasiddhirnāma tṛtīyodhyāyaḥ||3||

pāṭhāntarāḥ

1 ‘bastisūtrīyasiddhiṃ’ iti pā. ↩
2 ‘vamanapravṛttiviṣayādimabhidhāya’ iti pā. ↩
3 ‘anuvāsanaṃ cātra prapañcenābhidhātavyaṃ’ iti pā. ↩
4 ‘apekṣya’ iti pā. ↩
5 ‘kāṃsyāyasāsthidrumaveṇudantaiḥ’ iti pā. ↩
6 ‘netrāṇi śṛṅgairmaṇibhirnalaiśca trikarṇikāni pravadanti tajjñāḥ’ iti pā. ↩
7 ‘tadasthi’ iti pā. ↩
8 ‘badarāsthigrahaṇe’ iti pā. ↩
9 ‘yannetraṃ’ iti pā. ↩
10 ‘subaddhaḥ’ iti pā. ↩
11 ‘anucchūnasiraḥ’ iti pā. ↩
12 ‘kaṣāyarakta iti triphalādikaṣāyadravyabhāvanayā rañjitaḥ’ iti śivadāsasenaḥ ↩
13 ‘jīrṇānnamekāgramupācarettam’ iti pā. ↩
14 ‘madhusaindhavādi’ iti pā. ↩
15 ‘bastiṃ tataḥ savyakare nidhāya’ iti pā. ↩
16 ‘same'thaveṣannatamastake vā’ iti pā. ↩
17 ‘nikuñcaya’ iti pā. ↩
18 ‘śanairmṛdvṛjupṛṣṭhavaṃśam’ iti pā. ↩
19 ‘hi darśayaṃstam’ iti pā. ↩
20 ‘bhāgodāharaṇārthaṃ balādikaṃ bastimāha- balāmityādi’ iti pā. ↩
21 ‘kvāthyāt kvāthaḥ samo mataḥ’ iti pā. ↩
22 ‘tathaiva’ iti pā. ↩
23 ‘upayuktasya’ iti pā. ↩
24 ‘pūrvamuktatvāt’ iti pā. ↩
25 ‘alpamātro vā alavaṇo vā’ iti pā. ↩
26 ‘nidadhyādbhiṣagapramattaḥ’ iti pā. ↩
27 ‘madhunaḥ prasṛtadvayam’ iti pā. ↩
28 ‘kvāthasyāvyavahitasya’ iti pā. ↩
29 ‘vāmāśrayo'gnirgrahaṇī gudaṃ ca’ iti pā. ↩
30 ‘vāmāśrayo yasmādagnirgrahaṇīgude ca’ iti pā. ↩
31 ‘samyagupalabdhyā’ iti pā. ↩
32 ‘tathā dravamapi suprasṛtaṃ bhavati, tena sukhaṃ bastiryāti, grahaṇyāḥ prakṛtisthataya bastidravyaṃ sukhaṃ grahaṇīṃ bhāvayatīti boddhavyam’ iti pā. ↩
33 ‘praṇayetta śeṣam’ iti pā. ↩
34 ‘dehaḥ’ iti pā. ↩
35 ‘evaṃ ca mārge'pi eko bastiranilamapakarṣati’ iti pā. ↩
36 ‘jayata ityādi jñeyam’ iti pā. ↩
37 ‘bastinā pakvāśayagata eva doṣo hriyate’ iti pā.| ‘anilasya pakvāśayaḥ sthānaṃ, tasya ca pratyāsannatvādeka eva puṭo yuktaḥ, pittāśayasthānasyātivyavahitatvāddvitīyaḥ, āmāśayasyātivyavahitatvāttṛtīyaḥ’ iti śrīkaṇṭhadattaḥ ↩
38 ‘atra dvitīyaḥ pittamapakarṣati tṛtīyo vātakaphamapakarṣatītyucyate, atrāpi prathamadvitīyayoḥ pittakaphāpahatvamastyeva, paraṃ dvitīyena tṛtīyena ca vātakaphāpaharaṇaṃ sthānapratyāsattyā kriyata iti kṛtvā dvitīyaḥ pittaṃ harati, tṛtīyaḥ kaphaṃ haratīti coktam’ iti pā. ↩
39 ‘īṣat padāṅguṣṭhayugaṃ ca karṣe…’ iti pā. ↩
40 ‘tadaharanuvāsanaṃ sārvatrikamuktaṃ’ iti pā. ↩
41 ‘kanīyasyadhyardhapalā’ iti pā. ↩
42 ‘āñchediti prasārayedityarthaḥ’ iti pā. ↩
43 ‘niyamayannāha’ iti pā. ↩
44 ‘tathā''vāpamante’ iti pā. ↩
45 ‘tadasmattantrānugatatvādanumatameva’ iti pā. ↩
46 ‘pitte catvāri dve pañca catuṣṭayapalāni hi’ iti pā. ↩
47 ‘āsaptateruktamidaṃ’ iti pā. ↩
48 ‘paramataṃ’ iti pā. ↩
49 asyāgre hastalikhitapustake ‘tathāhi hārīte ekīyamatamapyanumatam, ‘apratiṣiddhaṃ paramatamanumatam’ iti nyāyāt’ ityadhikaṃ paṭhyate ↩
50 ‘darśayitumevānyaṃ’ iti pā. ↩
51 ‘samyak’ iti pā. ↩
52 ‘sadyaḥ’ iti pā. ↩
53 ‘palāni’ iti pā. ↩
54 ‘madanāṣṭakaṃ ca’ iti pā. ↩
55 ‘vacā’ iti pā. ↩
56 ‘akṣapramāṇaṃ’ iti pā. ↩
57 ‘…śirorujāghnaḥ’ iti pā. ↩
58 ‘…rbalāmāgadhikāpalābhyāṃ’ iti pā. ↩
59 ‘yaṣṭyāhvamūlāṣṭapalena’ iti pā. ↩
60 salodhramañjiṣṭhabalāyavāsasthirāśarādidvayapañcamūlam’ iti pā. ↩
61 ‘tathā’ iti pā. ↩
62 ‘hṛnnābhipārśvodaradehadāhe’ iti pā. ↩
63 ‘mṛdukoṣṭhasambādhakaṃ’ iti, ‘mṛdukoṣṭhatvabādhakaṃ’ iti ca pā. ↩
64 ‘…devadārumūrvāśvadaṃṣṭrākuṭajārkapāṭhāḥ’ iti pā. ↩
65 ‘kṣaudrasya tailasya phalāhvayasya’ iti pā. ↩
66 ‘…matīva ghoram’ iti pā. ↩
67 ‘…'vayavakalpaḥ’ iti pā. ↩
68 ‘…dhattūravṛścīrabalāpalāśāḥ’ iti pā. ↩
69 ‘palāni’ iti pā. ↩
70 ‘payojaladvyāḍhakapācitaṃ’ iti, ‘payojalārdhāḍhakapācitaṃ’ iti, ‘payojaladvyāḍhakayoḥ śṛtaṃ’ iti ca pā. ↩
71 ‘…bilva…’ iti pā. ↩
72 ‘prasṛtitrayeṇa’ iti pā. ↩