6. tasyāśitīyo'dhyāyaḥ

mātrāśitīye mātrāvadāhārasya balādihetutvaṃ pratipāditaṃ, tacca ṛtusātmyamapekṣya kṛtasyāhārasya bhavati; tena, ṛtupravibhāgapūrvakamṛtusātmyābhidhāyakaṃ tasyāśitīyaṃ brūte||1-2||

aśitādyāditi aśitapītalīḍhajagdhāt| balaṃ varṇaśceti cakāreṇa pūrvādhyāyoktasukhāyuṣī api gṛhyete; yadi vā balavarṇābhyāmeva nāntarīyakaṃ kṛtsnaṃ dhātusāmyakāryaṃ sukhādi gṛhyate| viditamityanena samyakjñānapūrvakamṛtusātmyānuṣṭhānaṃ darśayati| ceṣṭāgrahaṇena vyavāyavyāyāmābhyaṅgādīnāṃ grahaṇam| ceṣṭāhāravyapāśrayaṃ ceṣṭāhāragocaram||3||

ṛtujñānamantarā ṛtusātmyajñānaṃ na sambhavatītyṛtūnāmupayuktasvarūpajñānārthamāha- ihetyādi| ṛtupratipādanaprastāve saṃvatsaraṃ vidyāditi saṃvatsarapratipādanamṛtūnāmeva militānāṃ saṃvatsaratvapratipādanārtham| melakaśca buddhyā vyavahriyate ¹, na tu paramārthataḥ ṛtūnāṃ melako'sti| ṛtūnāṃ saṃvatsarātmakatvaṃ punaḥ punasta evartavaḥ parāvartanta iti jñānārthamavaśyaṃ pratipādanīyam| iheti iha prakaraṇe, ṣaḍaṅgaṃ vidyāt; anyatra tu rogabhiṣagjitīyādau tattatkāryavaśādanyathā'pi| uktaṃ ca- “śītoṣṇavarṣalakṣaṇaḥ kāla” ityādi| ṣaḍaṅgamiti samāhāre dviguḥ, ṛtuvyatirekeṇa saṃvatsarasyāvidyamānatvāt; yadi vā samudāyibhyo'nyaḥ samudāya ityāśritya bahuvrīhiḥ kāryaḥ| tatreti ṛtuvibhāgakathane| udag uttarāṃ diśaṃ prati, ayanaṃ gamanamudagayanam| ādadāti kṣapayati pṛthivyāḥ saumyāṃśaṃ ² prāṇināṃ ca balamityādānam| trīn śiśirādīnityanenaiva labdhe'pi grīṣmāntatve grīṣmāntāniti śiśirasyādiriti vigrahasya tathā''diśabdasya prakāravācitāyāḥ pratiṣedhārtham| evaṃ hemantāntāniti ca vyākhyeyam| dakṣiṇāṃ diśaṃ prati ayanaṃ dakṣiṇāyanam| visṛjati janayati āpyamaṃśaṃ prāṇināṃ ca balamiti visargaḥ| sañjñāpraṇayanaṃ ca vyavahārārthaṃ, niruktipratīyamānārthapratipādanārthaṃ ca||4||

visargadharmaṃ nirdiśati- visarge punarityādi| yadyapi cādānamādau paṭhitaṃ, tathā'pi pratilomatantrayuktyā''dau visargaguṇakathanaṃ; yadi vā prathamamādānasyottarāyaṇarūpasya praśastatvādagre'bhidhānam, iha tu visargasya balajanakatvenābhipretatvādagre'bhidhānam| nātirūkṣā iti saumyavisargakālasambandhena mandīkṛtaraukṣyāḥ pravāntīti| itare punarādāna iti apraśāntātirūkṣāśca, āgneyādānasambandhāhitarūkṣatvāt ³| somaścetyādi prakṛtena visargeṇa sambadhyate| avyāhatabala iti kālamārgameghavātādibhistadā sūryasya somaparipanthino hatabalatvāt| śiśirābhiḥ śītābhiḥ| śaśvaditi chedaḥ| saumyaḥ somaguṇapradhānaḥ| āgneyam agniguṇapradhānam, apratihatabalatvenetyarthaḥ| nanvetāvataivādityacandravātānāṃ balavattvamabalavattvaṃ ca kathaṃ bhavatītyāha- tāvetāvityādi| kālo devatārūpaḥ, sa ca nityarūpo'pi prāṇināmadṛṣṭena nānārūpeṇa gṛhītaḥ san kadācit sūryabalavāyubalasomabalādīn karoti; svabhāvaḥ sūryasya saumyāṃśakṣayakartṛtvādirvāyorvirūkṣaṇādiḥ somasyāpyāyanādiḥ; mārgo dakṣiṇa uttaraśca, tatra dakṣiṇaḥ karkaṭādayo dhanurantāḥ, makarādiruttaraḥ| ete ca kālasvabhāvamārgaparigrahā yathāsambhavaṃ boddhavyāḥ; na hi some mārgaparigrahaḥ ka(ki)ñcidviśeṣamāvahati, vāyośca mārgaparigraha eva nāsti| parigṛhītāḥ sambaddhāḥ| kālartvādīnāṃ nirvṛttipratyayabhūtā niṣpattikāraṇabhūtāḥ, upadiśyante ‘ācāryaiḥ’ iti śeṣaḥ; kālaḥ saṃvatsaro'yanadvayaṃ ca, ṛtavaḥ śiśirādayaḥ, dehasya balaṃ dehabalam| anye tu bruvate- saṃvatsarasyāyanadvayasya ca ṛtumelakarūpatvādṛtugrahaṇenaiva grahaṇaṃ labdhaṃ, tena kālagrahaṇamṛtuviśeṣaṇaṃ, tena kālarūpaḥ ṛturiti strīṇāmevārtavadarśanaṃ yadṛtustadvyāvartyate| pratyayabhūtā ityatra bhūtaśabda upamāne| kecidvyākhyānayanti- ‘arkavāyū’ ityekatayā paṭhitvā ‘somaśca’ iti yat pṛthak paṭhati, tenārkavāyvormilitayorādānaṃ prati kāraṇatvaṃ, visargaṃ prati pṛthageva somasya kāraṇatvamiti darśayati| evaṃ balaharaṇabalakaraṇādiṣvapi boddhavyam||5||

tatretyādi| ādadāna ucchoṣayan| jagataḥ sthāvarajaṅgamasya| snehaṃ sāraṃ saumyabhāgamityarthaḥ| na kevalaṃ raviḥ, vāyavaśca śoṣayantaḥ snehamiti sambandhaḥ| tīvrāśca rūkṣāśca tīvrarūkṣāḥ; yadi vā tīvraṃ raukṣyaṃ yeṣāṃ te tīvrarūkṣāḥ; etaccādāne tīvreṇa raviṇā sambandhādvāyorbhavati yogavāhitvādvāyoḥ| uktaṃ hi- “yogavāhī(haḥ) paraṃ vāyuḥ saṃyogādubhayārthakṛt” (ci.a.3) ityādi| yathākramamiti śiśire raukṣyamalpaṃ tiktaṃ rasamalpaṃ ca daurbalyaṃ, tathā vasante madhyaṃ raukṣyaṃ kaṣāyaṃ rasaṃ madhyaṃ daurbalyaṃ, tathā grīṣme prakṛṣṭaṃ raukṣyaṃ kaṭukaṃ rasaṃ mahacca daurbalyaṃ darśayati| yadyapi ca kaṣāyo raso rūkṣatamaḥ kaṭukaśca rūkṣataraḥ, yaduktaṃ- “raukṣyāt kaṣāyo rūkṣāṇāṃ pravaro madhyamaḥ kaṭuḥ” (sū.a.26) ityādi; raukṣyaprakarṣaśca grīṣme, madhyabalaṃ ca raukṣyaṃ vasante, tathā'pi vāyvagniguṇabāhulyāt kaṭukasya vāyvagniguṇabahule grīṣmakāla evotpattiḥ, pavanapṛthivyutkarṣavati tu vasante pavanapṛthivyutkarṣajanyasya kaṣāyasyotpattiḥ| yaduktaṃ- “vāyvagniguṇabhūyiṣṭhatvāt kaṭukaḥ, pavanapṛthivyatirekāt kaṣāyaḥ” (sū.a.26) iti| pṛthivyādyutkarṣaśca kālaviśeṣaprabhāvakṛtaḥ kāryadarśanādunneyaḥ| abhivardhayanta iti vacanādyathāsvakāle tiktādīnāmabhivṛddhiḥ sūcyate, tena na tadaikarasatvam| atra ca kramavadraukṣyotpattitiktādyutpattī api daurbalyotpattau kāraṇaṃ, yato raukṣyamutpādayanta iti tiktakaṣāyakaṭukānabhivardhayanta iti ca hetugarbhaviśeṣaṇadvayaṃ kṛtvā daurbalyamāvahantītyuktam||6||

varṣetyādi| tuśabdaḥ pūrvapakṣavyāvṛttau| dakṣiṇābhimukhe dakṣiṇāśāṃ gantumudyata evārke, tena viṣuvadudayopalakṣitamadhyadeśāduttareṇa ⁴ vartamāno'pi raviryadaiva dakṣiṇāśāṃ gantumudyato bhavati tadaiva kṣīyamāṇabalo bhavati, uttarāśāgamanaprakarṣāhitabalaprakarṣatayā tu stokastokakramāpacīyamānabalo'pi tathā durbalo na lakṣyate| evamuttarāyaṇe'pi vyākhyeyam| kālaḥ pūrvaṃ vyākhyātaḥ, mārga iha dakṣiṇābhimukhaḥ, meghasya vāto meghavātaḥ, varṣaṇaṃ varṣaḥ, etairabhihatapratāpe'rka iti sambandhaḥ| vātastviha meghasambandhāhitaśaityo'rkatāpaparipanthī bhavati, śaśino'vyāhatabalatvaṃ sūryasya paripanthino'bhihatapratāpatvādanuguṇameghavātavarṣaṇayogācca| jagati sthāvarajaṅgame| atra ca “pṛthivyagnibhūyiṣṭhatvādamlaḥ”, “salilāgnibhūyiṣṭhatvāllavaṇaḥ” (sū.a.26) ityuktaṃ, tat kathaṃ saumye visarge tayoścāgneyayorutpāda iti na vācyam, yato balaprakarṣavato'rkasya kṣīyamāṇabalasyāpi viṣuvaparyantaṃ balavattvamastyeveti vyutpāditameva||7||

samprati śiśirādau balahrāsaḥ pratipādito varṣādau ca balotkarṣaḥ; tatra śiśire durbalā varṣāsu balavantaḥ prāṇino bhavantītyādidurgrahaṃ niṣeddhumāha- ādāvante cetyādi| visargasyādau varṣāsu, ādānasyānte grīṣme, daurbalyaṃ prakarṣaṃ prāptaṃ nirdiśediti sambandhaḥ; tathā madhye visargasya śaradi, ādānasya madhye vasante, madhyaṃ nātikṣīṇaṃ nātivṛddhaṃ balaṃ vinirdiśediti yojyaṃ; tathā'nte visargasya hemante, agre ca prathame ādānasya śiśire, śreṣṭhaṃ balaṃ vinirdiśediti yojanā| evaṃ manyate- visargaprakarṣāhitabalaprakarṣaḥ puruṣa ādānasyādau śiśire stokakṣīyamāṇabalo'pi balavān bhavati, yathā- pauṣamāsāntāhitavṛddhiprakarṣā niśā māghaphālgunayoḥ kṣīyamāṇā'pi divasānmahatyeva bhavati| anena nyāyena varṣāsu daurbalyaṃ, vasantaśaradośca madhyamaṃ balaṃ boddhavyam| evaṃ kālarturasadehabalakāraṇatvamarkādīnāṃ vyavasthāpitaṃ, doṣakāraṇatvaṃ tvagre ṛtuvidhānanirdeśe'bhidhāsyate||8||

vardhamānabalaprakarṣavattayā hemantasyābhipretatvāttatsātmyamevāgre prāha- śīta ityādinā| śīte śītaguṇayukte hemante, yadyapi cānukte śīta iti viśeṣaṇe hemantaḥ śīta eva labhyate, tathā'pi na pūrvaṃ kvaciddhemante śītatvaṃ pratipāditamiti pratipādyate; yadi vā yadaiva hemante śītaṃ mahadbhavati tadaiva viśeṣeṇa vahnirbalī bhavati, nopakramamātreṇāpi, ṛtuvyāpattau śītāyoga iti ca śīta iti padena labhyate| himasambandhādviśeṣeṇa śīto'nilaḥ śītānilaḥ; viśeṣeṇa śītatvaṃ vāyoryogavāhitvācchītakālasambandhādeva labdhaṃ punarabhidhīyate'gnisaṃrodhahetutvāt ⁷| vāyurhi himasambandhādeva bahirnirgacchaccharīroṣmaṇo rodhaṃ kṛtvā kumbhakārapavanāhitapaṅkalepa ivāntarasya vahnervṛddhimāvahati| etena yaducyate- asamānācchītavātāt kathamagnivṛddhirityetadapāstam| nahyatra śīto vāto'gnitvena pariṇamate, kiṃ tarhi nirgacchattejaḥpratīpībhūtaḥ| śītānilasya sparśaḥ śarīrasambandha ityarthaḥ| balināṃ prāṇināṃ hemantasvabhāvādbalī bhavati; anena prāṇibalavattvamagnibalavattve ⁸ heturiti darśayati| uktaṃ ca hastivaidyake bālagajānāṃ nīrogatvapratipādane; yathā- “avyāhatādabhiprāyāt prītiḥ, prīterbalaṃ, balāt| agniragneśca dhātūnāṃ balaṃ ⁹, nāśastato rujām” iti| mātrayā yad guru atimātramityarthaḥ, dravyataśca dravyasvabhāvataśca yad guru navadhānyādi, tatkṣamaḥ| evambhūto balī vahniryadā yuktaṃ gurubhūtaṃ cānnaṃ na labhate, tadā dehajaṃ rasaṃ hinasti kṣayaṃ nayati; dehārthaṃ dehajātaṃ vā dehajaṃ dhāturūpaṃ rasamityarthaḥ| ata indhanābhāve sati rasadhātukṣayādvāyuḥ prakupyati hemante| hetvantaramāha vātakope- śītaḥ śīta iti; yasmādayaṃ śītaguṇo vāyuḥ, tasmācchītakāle hemantalakṣaṇe samānaṃ kāraṇamāsādya kupyatītyarthaḥ| atra vṛddho vāyurmedasvino yathā'gnivṛddhiṃ karoti, na tu vaiṣamyamanativṛddhatvāt, tathā'gnivṛddhimeva karoti| yaduktaṃ- “medasā''vṛtamārgatvādvāyuḥ koṣṭhe viśeṣataḥ| caran sandhukṣayatyagnimāhāraṃ śoṣayatyapi” (sū.a.21) ityādinā'ṣṭauninditīye| tasmāditi dehajarasakṣayabhayāt| prakaraṇalabdhe'pi tuṣārasamaya iti yat punaḥ karoti, tadviśeṣeṇa tuṣārapāte viśeṣeṇa snigdhādīnāṃ bhojanārtham| medyānāṃ medurāṇām| audakānūpamāṃsādayaśca hemantakālakaphacayasaṃvardhakā api mahātyayavātavikārapratipakṣatvena vyavāyādikaphacayapratipakṣayuktatvāccābhipretāḥ ¹⁰| audakāḥ kūrmādayo'nnapāne vakṣyamāṇāḥ, anūpāḥ sṛmarakhaḍgādayaḥ, bileśayā godhāprabhṛtayaḥ, prasahā gokharādayaḥ| bhṛtaṃ bhaṭṭitramiti prasiddham| hemante'bhyasyata iti punarhemantagrahaṇaṃ hemantaṃ vyāpyaivoṣṇodakasevopadarśanārtham| jentākaḥ svedaviśeṣo vakṣyamāṇaḥ| garbhagṛhaṃ gṛhakoṣṭhakam| hemanta ityanenārthalabdhe'pi śīte śīteṣviti padaṃ varṣākālādāvapi śītaprāptau saṃvṛtayānādisevopadarśanārtham| prāvāro guruprāvaraṇaṃ kambalādi, ajinaṃ vyāghrādicarma, kauṣeyaṃ koṣakārakīṭatantumayaṃ, praveṇī goṇīti prasiddhā, kuthakaścitrakambalaḥ| guruṇā'guruṇeti agurughanapralepenetyarthaḥ| viśālāvāyāmena, upacitau pariṇāhena| maithunasevopadeśaśceha prāṇināṃ balavattvena śītapratīkārakatvena cīyamānakaphaviruddhatvena ca; suśrute'pi hemante maithunasevoktā; yaduktaṃ- “tatrāpanītahārāśca priyā nāryaḥ svalaṅkṛtāḥ| ramayeyuryathākāmaṃ balādapi madotkaṭāḥ” iti||9-18||

śiśiravidhimāha- hemantetyādi| viśeṣaṇaṃ viśeṣaḥ; śiśirasyādānārambhatvena raukṣyaṃ, tathā meghamārutavarṣāḥ śiśire'dhikā bhavanti tajjaṃ ca śītamadhikaṃ hemantādastītyarthaḥ| tasmāditi hemantatulyatvādviśiṣṭaraukṣyaśītayuktatvācca haimantiko vidhiḥ| nivātamuṣṇaṃ tviti tuśabdaḥ pakṣāntaraparigrahārthaḥ; hemantoktanivātoṣṇagṛhācchiśire rūkṣātiśīte'dhikamuṣṇaṃ gṛhamāśrayedityabhiprāyaḥ| kecidatrāsevyapratipādakaṃ granthaṃ paṭhanti, sa tvanārṣaḥ||19-21||

vasanta ityādinā vasantavidhimāha| nicitaḥ sañcito vasantapūrvakāle, īrito vilāyito vasante| kāyāgnimiti kāyanirvartakamagniṃ jāṭharaṃ, na tu dhātvagniviśeṣamātram| tata ityatra cakāro luptanirdiṣṭo boddhavyaḥ, tena tato'gnivadhāccetyarthaḥ; yadi vā tato'gnivadhānantaram| vamanādīni vamanapradhānāni; tena, ādānamadhyatvena yadi vātapittaprakopastathāvidho bhavati tadā virecanāsthāpanānuvāsanānāmapi pravṛttirbhavati, śirovirecanaṃ tu kaphajayārthaṃ kartavyameva| vasantaśabdena vamanaṃ prati caitra eva boddhavyaḥ; yena, doṣacayādyarthaṃ pañcakarmapravṛttyarthaṃ cābhidhātavyaprāvṛḍādyṛtukrameṇa phālgunacaitrau vasanto bhavati, na vaiśākhaḥ| anenaivābhiprāyeṇa pūrvaśloke'pi sāmānyena nicita iti kṛtaṃ, na tu hemante nicita iti; hemanta ityukte hi rasotpattikramābhihitamārgaśīrṣapauṣātmake hemante prakṛtatvāddoṣacayo budhyate, sa ca nābhipretaḥ; uktastu doṣacayādikramoktapauṣamāghātmake hemante śleṣmacayaḥ| sukhāmbunā sukhoṣṇāmbunā| lāvakapiñjalaṃ māṃsamiti sambandhaḥ| bhakṣayediti cchedaḥ| anubhavediti bhāṣayā śleṣmakṣayārthaṃ stokaṃ maithunamanujānāti||22-26||

mayūkhairityādinā graiṣmavidhimāha| mayūkhaiḥ tejobhiḥ| snehaḥ sāra ityarthaḥ| pepīyate atyarthaṃ pibati| manthaḥ- “saktavaḥ sarpiṣā yuktāḥ śītavāripariplutāḥ| nātyacchā nātisāndrāśca mantha ityabhidhīyate”| madyamalpamiti ekāntamadyasātmyena; naveti madyasya svabhāvapākābhyāmamlasya grīṣmaviruddhatvena; subahūdakamiti madyasātmyasyaiva, madyasyoṣṇāmlatvādyapavādārthaṃ bahutaraṃ pānīyaṃ prakṣipya pātavyamiti darśayati; tenaitat phalati- yanmadyaṃ grīṣme na pātavyameva tāvat; madyasātmyānāṃ sātmyamadyatyāge sātmyatyāgajā rogā bhavanti, tena tasyālpaṃ vā subahūdakaṃ vā deyamityarthaḥ| muktaiva maṇirmuktāmaṇiḥ| grīṣmakāle caṇḍātape madhyāhna ityarthaḥ| maithunoparatistu divāniśaṃ boddhavyā||27-32||

varṣāvidhimāha- ādānetyādi| dehasya durbalatve paktā'pi durbalo bhavati, dehabalānuvidhāyitvādvahneḥ| etacca balināṃ balī bhavatītyatra vyutpāditam| sa durbalo vahniḥ| anilādīnāmiti anilapradhānānām| varṣāsu vātādayaḥ kutaḥ kupyantītyāha- bhūbāṣpādityādi| bhūbāṣpaḥ prabhāvādeva tridoṣakopakaḥ| meghanisyando vātaśleṣmakārakaḥ| amlapākatā jalasya varṣāsvabhāvakṛtā pittaśleṣmakarī| agnibale kṣīṇa ¹³ ityanenādānāhitamagnimāndyamapi doṣaprakopakamiti darśayati| agnimāndyaṃ cāpākavidāhābhyāṃ kaphapittakāri, dhātupoṣakarasānutpādācca dhātukṣayeṇa vātakāri| etena varṣāsu vahnimāndyena vātādikopaḥ, vātādikopena ca vahnimāndyamiti darśitam| yaduktaṃ vāgbhaṭe- “bhūbāṣpeṇāmlapākena malinena ca vāriṇā| vahninaiva ca mandena teṣvityanyo'nyadūṣiṣu|| sādhāraṇo vidhiḥ kāryastridoṣaghno'gnidīpanaḥ” (vā.sū.a.3) iti| udakapradhāno mantha udamanthaḥ| pānam udakādi, bhojanaṃ raktaśālyādi, tayoḥ saṃskārāḥ saṃskāravantyannapānānītyarthaḥ| kṣaudraṃ ca yadyapi vātaprakopi, tathā'pi vārṣikakledaśamanārthaṃ svalpamātrayā kṣaudrānvitapadena vihitam| viśeṣaśīta iti hetugarbhaviśeṣaṇaṃ; tenātyarthaśīte divase yasmānmahātyayasya vātasya kopo bhavati tatastajjayārthaṃ varṣākālaprabhāvakriyamāṇapittacayānuguṇayorapyamlalavaṇayorupayogaḥ kartavya iti darśitaṃ bhavati||33-40||

śaradvidhimāha- varṣetyādi| ucitam abhyastam, ‘uca samavāye’ ityasmāddhātoḥ; śītamucitānyaṅgāni yeṣāṃ, teṣām| sahasaiveti padenākrameṇa śaradi tīvrātapasambandhādanabhyastāt pittaprakopo nyāyya iti darśayati| ācitamiti varṣāsu| prāya ityanena varṣāsu pittacayapratikūlaṃ vidhiṃ prayatnenācarato na bhavatyapi pittacayaḥ, śaradi tu prakopo na bhavatīti darśayati; etacca sāmānyanyāyena śleṣmaṇo vātasya ca cayaprakopayorboddhavyaṃ; yadi vā, prāyaḥ pittaṃ prakupyati śleṣmā cānubalatvenetyarthaḥ| yaduktaṃ- “tasya cānubalaḥ kaphaḥ” (ci.a.3) iti| laghviti agnisandhukṣaṇārtham| atra vahneḥ samānenāpi pittena dravāṃśasambandhenāgnimāndyaṃ kriyate| yaduktaṃ grahaṇyadhyāye- “āplāvayaddhantyanalaṃ jalaṃ taptamivānalam” (ci.a.15)| utsargasiddha eva bhojanasya mātrāvattve mātrayeti vacanaṃ mātrātikrameṇeha viśeṣato bhūridoṣatvadarśanārtham| suprakāṅkṣitaiḥ sububhukṣitaiḥ| urabhro meṣaḥ| ghanātyaya iti punarvacanaṃ śaratpraveśa evaitaduktavidhikaraṇaṃ granthādhikyāt sūcayatīti vyākhyānayanti; vayaṃ tu paśyāmaḥ- paryāyaśabdānāṃ punaḥ punaḥ karaṇe yatra tātparyaṃ śāstre pratīyate tatra tadeva vācyaṃ, yatra tu tātparyāntaraṃ na pratīyate tatra vākyabhedenaiva punarabhidhānamiti| dhārādharāṇāṃ meghānāmatyayo'darśanam| tena, pravyaktāyāṃ śaradi tiktasarpiḥpānaṃ virekādi ca kāryam| kramaścātrācāryasyābhipretaḥ, tena prathamaṃ tiktasarpiṣpānaṃ, tena pittāpraśāntau virekaḥ, tenāpyaśāntau śoṇitaduṣṭau ca satyāṃ raktamokṣaṇaṃ; raktaṃ cātra kālasvabhāvāddūṣyatyeva prāyaḥ; yadāha- “śaratkālasvabhāvācca śoṇitaṃ sampradūṣyati” (sū.a.24) iti| divetyādi|- sūryāṃśutāpādeva diveti labdhe diveti sakaladinavyāptyartham| sūryataptamiti vaktavyeṃ'śugrahaṇaṃ meghāvaraṇarahitāṃśusūryagrahaṇārtham ¹⁵| santaptamityatra saṃśabdaḥ paritastāpopadarśanārthaḥ| evaṃ niśītyādi ca vyākhyeyam| candrāṃśugrahaṇena ca niśi saumyāṃśasambandhaṃ ¹⁶ lakṣayati| kāleneti śaratkālasvabhāvena| pakvamiti varṣāsvabhinavabhūmisambandhajanitapaicchilyavyamlatvādidoṣarahitam| yataḥ pakvaṃ tato nirdoṣaṃ doṣājanakamityarthaḥ| agastyenāviṣīkṛtamityagastyodayena prabhāvādvarṣāsu meghasambaddhoragalūtādisambandhātsaviṣamaviṣaṃ bhavatīti vācyam| haṃsodakamiti evambhūtodakasya sañjñā; haṃsaśabdena sūryācandramasāvabhidhīyete, tābhyāṃ śodhitamudakaṃ haṃsodakaṃ; yadi vā haṃsasevāyogyaṃ haṃsodakaṃ, haṃsāḥ kila viśuddhamevodakaṃ bhajante| avagāhaḥ ciraṃ jalāvasthānam| śāradānīti mālyaviśeṣaṇamanārtavakusumaniṣedhārtham| pradoṣa iti niśāpraveśa eva paraṃ candraraśmisevā; nopari, śiśirabhayāt| atra pūrvartusātmyaparityāgo bhaviṣyadṛtusātmyābhyāsaśca pūrvartvantasaptāhāgāmyṛtvādisaptāhayoḥ kartavyaḥ| yaduktaṃ vāgbhaṭe- “ṛtvorantyādisaptāhāvṛtusandhiriti smṛtaḥ| tatra pūrvo vidhistyājyaḥ sevanīyaḥ paraḥ kramāt” (vā.sū.a.3) iti||41-48||

upasaṃharati- ityuktamityādi| ṛtusātmyaprasaṅgenābhyāsasātmyaṃ darśayati- upaśete ityādi| upaśete sukhayati, apathyamapi sadvikāraṃ na janayati| kuta ityāha- aucityāt abhyāsādityarthaḥ; apathyamapi hi nirantarābhyāsādviṣamivāśīviṣasya nopaghātakaṃ bhavatīti bhāvaḥ||49||

deśasātmyaṃ rogasātmyaṃ ca darśayati- deśānāmityādi| deśānāmanūpādīnāṃ, guṇaiḥ snehagauravādibhiḥ saha viparītaguṇaṃ snehagauravaviparītaguṇaraukṣyalāghavayuktaṃ jāṅgalamāṃsamadhvādi; adanīyamādyaṃ, ceṣṭitaṃ ca vyāyāmādi, deśasātmyamicchantyāyurvedavida ityarthaḥ| evamāmayānāṃ ca viparītaguṇamityādi vyākhyeyam| guṇaśabdaśceha dharmamātravacanaḥ, yathocyate- dravyaguṇo dravyadharma ityarthaḥ| tena viparītaprabhāvādīnāmapi grahaṇaṃ bhavati| āmayaśabdena cāmayaheturapi gṛhītavyaḥ| tata āmayaviparītānām, āmayahetuviparītānāṃ, tathā prabhāvavaiparītyāttadviparītārthakāriṇāṃ ca grahaṇaṃ bhavati| tadudāharaṇāni yathāvasaraṃ nidāne kariṣyāmaḥ| ādyagrahaṇenauṣadhāhārayorgrahaṇaṃ, ceṣṭitagrahaṇena svapnābhyaṅgādīnāṃ grahaṇaṃ vyākhyeyam||50||

uktamadhyāyārthamupasaṃharati- ṛtāvityādi| atra hemante asevyaṃ kaṇṭharaveṇa yadyapi na pratipāditaṃ tathā'pi ‘sa yadā nendhanaṃ yuktaṃ labhate’ ityabhidhānādalpabhojanaparihāra ukta eva bhavati; tena, ṛtāvṛtāviti vīpsā kṛtā'rthavatī bhavati; yadi vā chatriṇo gacchantīti nyāyādvīpsoktā| hemantaparihāravidhivacca śiśiraparihāravidhirvyākhyeyaḥ| hetumaditi upapattimat, aucityādihetunirdeśopapannamityarthaḥ||51||

iti śrīcakrapāṇidattaviracitāyāṃ carakatātparyaṭīkāyāmāyurvedadīpikāyāṃ sūtrasthāne svasthacatuṣke tasyāśitīyo nāma ṣaṣṭho'dhyāyaḥ||6||