18. triśothīyo'dhyāyaḥ

athātastriśothīyamadhyāyaṃ vyākhyāsyāmaḥ||1|| iti ha smāha bhagavānātreyaḥ||2||

pūrvādhyāye piḍakā uktāḥ, tāśca śotharūpāḥ, ataḥ śothādhikārāt triśothīyo'bhidhīyate||1-2||

trayaḥ śothā bhavanti vātapittaśleṣmanimittāḥ, te punardvividhā nijāgantubhedena||3||

vakṣyamāṇadvividhādibhede vidyamāne'pi vātādikṛtatritvābhidhānamagre vātādikṛtasyaiva prādhānyakhyāpanārtham||3||

tatrāgantavaśchedanabhedanakṣaṇanabhañjanapicchanotpeṣaṇaprahāravadhabandhanaveṣṭanavyadhanapīḍanādibhirvā bhallātakapuṣpaphalarasātmaguptāśūkakrimiśūkāhitapatralatāgulmasaṃsparśanairvā svedanaparisarpaṇāvamūtraṇairvā viṣiṇāṃ saviṣaprāṇidaṃṣṭrādantaviṣāṇanakhanipātairvā sāgaraviṣavātahimadahanasaṃsparśanairvā śothāḥ samupajāyante||4||

bhedanam āśayavidāraṇaṃ, kṣaṇanam asthicūrṇanaṃ, bhañjanaṃ jarjarīkaraṇaṃ, picchnam atyarthapīḍanam, utpeṣaṇaṃ śilotpeṣaṇamiva, veṣṭanam agranthibandhanaṃ sarpādibhiḥ| śūkavatāṃ krimīṇāṃ śūkaḥ śūkakrimiśūkaḥ| svedanādibhirviṣiṇāmiti yojyam||4||

te punaryathāsvaṃ hetuvyañjanairādāvupalabhyante nijavyañjanaikadeśaviparītaiḥ; bandhamantrāgadapralepapratāpanirvāpaṇādibhiścopakramairupakramyamāṇāḥ praśāntimāpadyante||5||

ādāvupalabhyanta iti vacanāduttarakālamāgantorapi nijatulyatāṃ brūte| yaduktam- “āganturanveti nijaṃ vikāraṃ” (sū.a.19) iti| nijavyañjanaikadeśaviparītairiti nijalakṣaṇebhya āgantūnāmekadeśo viparīto bhavati, sa ca vātādijanyaśyāvādivarṇavikāratvājjñeyaḥ; kiṃvā āganturvyathāpūrvo bhavati paścādvātādibhiranubadhyate, nijastu pūrvaṃ vātādilakṣaṇairyujyate paścādvedanāvān bhavatītyekadeśavaiparītyam| bandhaḥ ariṣṭābandho vraṇabandhaśca| bandhādayaśca yathāyogyatayā boddhavyāḥ||5||

nijāḥ punaḥ snehasvedavamanavirecanāsthāpanānuvāsanaśirovirecanānāmayathāvatprayogānmithyāsaṃsarjanādvā chardyalasakavisūcikāśvāsakāsātisāraśoṣapāṇḍurogodarajvarapradarabhagandarārśovikārātikarśanairvā kuṣṭhakaṇḍūpiḍakādibhirvā chardikṣavathūdgāraśukravātamūtrapurīṣavegadhāraṇairvā karmarogopavāsādhvakarśitasya vā sahasā'tigurvamlalavaṇapiṣṭānnaphalaśākarāgadadhiharitakamadyamandakavirūḍhanavaśūkaśamīdhānyānūpaudaka- piśitopayogānmṛtpaṅkaloṣṭabhakṣaṇāllavaṇātibhakṣaṇādgarbhasampīḍanādāmagarbhaprapatanāt prajātānāṃ ca mithyopacārādudīrṇadoṣatvācca śophāḥ prādurbhavanti; ityuktaḥ sāmānyo hetuḥ||6||

chardyādayaḥ svarūpata eva śothahetavaḥ| karmādyatikarśitasya tu sahasā'tigurvādisevanaṃ śothahetuḥ; karmeti pañcakarma| virūḍhanavaśabdau śūkaśamīdhānyaviśeṣaṇau| prajātānāmiti aciraprasūtānām||6||

ayaṃ tvatra viśeṣaḥ- śītarūkṣalaghuviśadaśramopavāsātikarśanakṣapaṇādibhirvāyuḥ ¹ prakupitastvaṅmāṃsaśoṇitādīnyabhibhūya śophaṃ janayati; sa kṣiprotthānapraśamo bhavati, tathā śyāmāruṇavarṇaḥ prakṛtivarṇo vā, calaḥ spandanaḥ kharaparuṣabhinnatvagromā chidyata iva bhidyata iva pīḍyata iva sūcībhiriva tudyate pipīlikābhiriva saṃsṛpyate sarṣapakalkāvalipta iva cimicimāyate saṅkucyata āyamyata iveti vātaśothaḥ (1); uṣṇatīkṣṇakaṭukakṣāralavaṇāmlājīrṇabhojanairagnyātapapratāpaiśca pittaṃ prakupitaṃ tvaṅmāṃsaśoṇitānyabhibhūya śothaṃ janayati; sa kṣiprotthānapraśamo bhavati, kṛṣṇapītanīlatāmrāvabhāsa uṣṇo mṛduḥ kapilatāmraromā ² uṣyate dūyate dhūpyate ūṣmāyate svidyate klidyate na ca sparśamuṣṇaṃ ca suṣūyata ³ iti pittaśothaḥ (2); gurumadhuraśītasnigdhairatisvapnāvyāyāmādibhiśca śleṣmā prakupitastvaṅmāṃsaśoṇitādīnyabhibhūya śothaṃ janayati; sa kṛcchrotthānapraśamo bhavati, pāṇḍuśvetāvabhāso guruḥ snigdhaḥ ślakṣṇaḥ sthiraḥ styānaḥ śuklāgraromā sparśoṣṇasahaśceti śleṣmaśothaḥ (3); yathāsvakāraṇākṛtisaṃsargāddvidoṣajāstrayaḥ śothā bhavanti; yathāsvakāraṇākṛtisannipātāt sānnipātika ekaḥ; evaṃ ⁴ saptavidho bhedaḥ||7|| prakṛtibhistābhistābhirbhidyamāno ⁵ dvividhastrividhaścaturvidhaḥ saptavidho'ṣṭavidhaśca śotha upalabhyate, punaścaika ⁶ evotsedhasāmānyāt||8||

kṣapaṇaṃ vamanādibhiḥ| prakṛtivarṇaḥ dehasamānavarṇaḥ| calaḥ saṅkramaṇavān| spandanaḥ kampanaḥ| uṣyate pārśvastheneva vahninā dahyate| dhūpyate dhūmamivodvamati| ūṣmāyate ⁷ bahiḥ parairapyuṣṇatvenopalabhyate| svidyate svedavān bhavati| na suṣūyate na sahate; sparśanaṃ ca na sahate, uṣṇaṃ ca na sahate| sa kṛcchrotthānapraśama iti cirotthānapraśamaḥ| prakṛtibhiriti kāraṇaiḥ| utsedha unnatatvam||7-8||

bhavanti cātra- śūyante yasya gātrāṇi svapantīva ⁸ rujanti ca| pīḍitānyunnamantyāśu vātaśothaṃ tamādiśet||9|| yaścāpyaruṇavarṇābhaḥ śotho naktaṃ praṇaśyati| snehoṣṇamardanābhyāṃ ca praṇaśyet sa ca vātikaḥ||10|| yaḥ pipāsājvarārtasya dūyate'tha vidahyate| svidyati klidyate gandhī sa paittaḥ svayathuḥ smṛtaḥ||11|| yaḥ pītanetravaktratvak ⁹ pūrvaṃ madhyāt praśūyate| tanutvak cātisārī ca pittaśothaḥ sa ucyate||12|| śītaḥ ¹⁰ saktagatiryastu kaṇḍūmān pāṇḍureva ca| nipīḍito nonnamati ¹¹ śvayathuḥ sa kaphātmakaḥ||13|| yasya śastrakuśacchinnācchoṇitaṃ ¹² na pravartate| kṛcchreṇa picchā sravati sa cāpi kaphasambhavaḥ||14|| nidānākṛtisaṃsargācchvayathuḥ syāddvidoṣajaḥ| sarvākṛtiḥ sannipātācchotho vyāmiśrahetujaḥ||15||

śūyanta ityādi| punaḥ ślokena lakṣaṇābhidhānaṃ prāyobhāvilakṣaṇadarśanārtham| svapantīveti nirvedanaḥ| etena ¹³ vāyoścalatvena kṣaṇācca ruk, kṣaṇācca tadabhāva iti jñeyam| madhyāditi śarīramadhyāt| saktagatiḥ avisārī| śastrakuśacchinnāditi śastrakuśakṛtācchedāt||9-15||

yastu pādābhinirvṛttaḥ śothaḥ sarvāṅgago bhavet| jantoḥ sa ca sukaṣṭaḥ syāt prasṛtaḥ strīmukhācca yaḥ||16|| yaścāpi guhyaprabhavaḥ striyā vā puruṣasya vā| sa ca kaṣṭatamo jñeyo yasya ca syurupadravāḥ||17||

pādābhinirvṛttaḥ śothaḥ puruṣāṇāṃ laghāvadhodeśe jātaḥ san yadā na jīyate tadā gurumūrdhvadeśaṃ gataḥ sa na pāryate jetuṃ, yo hi laghau pradeśe jetuṃ na pāryate sa gurupradeśagato nitarāmeva na pāryate; evaṃ prasṛtaḥ strīmukhācca ya ityapi jñeyam| vacanaṃ hi- “adhobhāgo guruḥ strīṇāmūrdhvaḥ puṃsāṃ gurustathā” (su.sū.a.46) iti||16-17||

chardiḥ śvāso'rucistṛṣṇā jvaro'tīsāra eva ca| saptako'yaṃ sadaurbalyaḥ śophopadravasaṅgrahaḥ||18||

uktānupadravānāha- chardirityādi||18||

yasya śleṣmā prakupito jihvāmūle'vatiṣṭhate| āśu sañjanayecchothaṃ ¹⁴ jāyate'syopajihvikā||19|| yasya śleṣmā prakupitaḥ kākale vyavatiṣṭhate| āśu sañjanayecchophaṃ ¹⁵ karoti galaśuṇḍikām||20|| yasya śleṣmā prakupito galabāhye'vatiṣṭhate| śanaiḥ sañjanayecchophaṃ ¹⁶ galagaṇḍo'sya jāyate||21|| yasya śleṣmā prakupitastiṣṭhatyantargale sthiraḥ| āśu sañjanayecchophaṃ ¹⁷ jāyate'sya galagrahaḥ||22|| yasya pittaṃ prakupitaṃ saraktaṃ tvaci sarpati| śophaṃ sarāgaṃ janayedvisarpastasya ¹⁸ jāyate||23|| yasya pittaṃ prakupitaṃ tvaci rakte'vatiṣṭhate| śothaṃ sarāgaṃ janayet ¹⁹ piḍakā tasya jāyate||24|| yasya prakupitaṃ pittaṃ śoṇitaṃ prāpya śuṣyati| tilakā piplavo vyaṅgā nīlikā tasya jāyate||25|| yasya pittaṃ prakupitaṃ śaṅkhayoravatiṣṭhate| śvayathuḥ śaṅkhako nāma dāruṇastasya jāyate||26|| yasya pittaṃ prakupitaṃ karṇamūle'vatiṣṭhate| jvarānte durjayo'ntāya śothastasyopajāyate||27|| vātaḥ plīhānamuddhūya kupito yasya tiṣṭhati| śanaiḥ paritudan ²⁰ pārśvaṃ plīhā tasyābhivardhate||28|| yasya vāyuḥ prakupito gulmasthāne'vatiṣṭhate| śophaṃ saśūlaṃ janayan gulmastasyopajāyate||29|| yasya vāyuḥ prakupitaḥ śophaśūlakaraścaran| vaṅkṣaṇādvṛṣaṇau yāti vṛddhistasyopajāyate||30|| yasya vātaḥ prakupitastvaṅmāṃsāntaramāśritaḥ| śothaṃ sañjanayet kukṣāvudaraṃ tasya jāyate||31|| yasya vātaḥ prakupitaḥ kukṣimāśritya tiṣṭhati| nādho vrajati nāpyūrdhvamānāhastasya jāyate||32|| rogāścotsedhasāmānyadadhimāṃsārbudādayaḥ| viśiṣṭā nāmarūpābhyāṃ nirdeśyāḥ śothasaṅgrahe||33|| vātapittakaphā yasya yugapat kupitāstrayaḥ| jihvāmūle'vatiṣṭhante vidahantaḥ samucchritāḥ||34|| janayanti bhṛśaṃ śothaṃ vedanāśca pṛthagvidhāḥ| taṃ śīghrakāriṇaṃ rogaṃ rohiṇīti vinirdiśet||35|| trirātraṃ paramaṃ tasya jantorbhavati jīvitam| kuśalena tvanukrāntaḥ ²¹ kṣipraṃ sampadyate sukhī||36||

sampratyutsedhasāmānyāt prādeśikāñchothānāha- yasyetyādi| kākalaṃ tālumūlam| śanairitivacanena galagaṇḍakāriṇo doṣāścirakriyā bhavantīti darśayati; galagrahādau cāśukāriṇo doṣā bhavanti| visarpasya piḍakāyāśca tulyakāraṇatve'pi visarpe sarpaṇaśīlo doṣaḥ, piḍakāyāṃ ca sthiro jñeyaḥ; ata eva piḍakāsamprāptau ‘avatiṣṭhate’ ityuktam| yasya pittamityādau pittaṃ prāpya śoṇitaṃ kartṛ śuṣyatīti yojanīyam| piplavaḥ ‘jaṭulā’ iti prasiddhaḥ| dāruṇaḥ anupakramādāśumārakaḥ| durjayo'ntāyeti durjayo vā yathākramamupakramyamāṇaḥ ²², antāya vā mithyopakramādveti mantavyam| ayameva śotho'nyatrāpyuktaḥ- “sannipātajvarasyānte karṇamūle sudāruṇāḥ| śothaḥ sañjāyate tena kaścideva pramucyate” iti| gulmādayo vistaravaktavyā api ihotsedhasāmānyālleśata ucyante| śothasaṅgraha iti śothatvenotsedharūpeṇa saṅgrahaḥ śothasaṅgrahaḥ|| samucchritā atiriktapramāṇāḥ| bhṛśam atyarthaduḥkhakāriṇam| kṣipramityanukrānta ityanena sambadhyate, tena trirātraghātitvaṃ yasya tasya kathaṃ śīghrapraśama iti codyaṃ nottiṣṭhate; kiṃvā kṣipraṃ sampadyate sukhīti vyādhimahimnā bhavati| vyādherevaitat svarūpaṃ yacchīghraṃ hanti, śīghraṃ praśāmyatīti| yaduktaṃ- “sa śīghraṃ śīghrakāritvāt praśamaṃ yāti hanti vā” (ci. 3) iti||19-36||

santi hyevaṃvidhā rogāḥ sādhyā dāruṇasammatāḥ| ye hanyuranupakrāntā mithyācāreṇa ²³ vā punaḥ||37|| sādhyāścāpyapare ²⁴ santi vyādhayo mṛdusammatāḥ| yatnāyatnakṛtaṃ yeṣu karma sidhyatyasaṃśayam||38|| asādhyāścāpare santi vyādhayo yāpyasañjñitāḥ| susādhvapi kṛtaṃ yeṣu karma yātrākaraṃ bhavet||39|| santi cāpyapare rogā yeṣu karma na sidhyati| api yatnakṛtaṃ bālairna tān vidvānupācaret||40|| sādhyāścaivāpyasādhyāśca vyādhayo dvividhāḥ smṛtāḥ| mṛdudāruṇabhedena te bhavanti caturvidhāḥ||41||

etadeva śīghrakāritvamanyeṣvapi jvarāntakarṇaśothavalayādiṣvastītyāha- santītyādi| dāruṇā iti sammatā dāruṇasammatāḥ| dāruṇatvaprasaṅgena mṛdvādibhedānapyāha- sādhyāścetyādi| yātrākaraṃ yāpanākaram| bālaiḥ ajñaiḥ, asādhye ajñā evotsāhāt pravartanta ityarthaḥ| asādhyasya mṛdudāruṇatvaṃ yāpyapratyākhyeyabhedena, tathā sadyaḥprāṇaharakālāntaraprāṇaharatvādinā ca||37-41||

ta evāparisaṅkhyeyā bhidyamānā bhavanti hi| rujāvarṇasamutthānasthānasaṃsthānanāmabhiḥ ²⁵||42|| vyavasthākaraṇaṃ ²⁶ teṣāṃ yathāsthūleṣu saṅgrahaḥ| tathā prakṛtisāmānyaṃ vikāreṣūpadiśyate||43||

ta evetyādi| samutthānabhedā hetubhedāḥ; rūkṣabhojanarātrijāgaraṇādibhinnahetujanyo hi vāto bhinnopakramasādhyaśca bhavatīti bhāvaḥ| sthānabhedā āmāśayādayo rasādayaśca| saṃsthānam ākṛtiḥ, yathā- gulmārbudādiḥ| nāmabhedo yathā- ekasminneva rājayakṣmaṇi rājayakṣmaśoṣādisañjñā| nanvevamaparisaṅkhyeyatve kathaṃ vyavahāra ityāha- vyavasthetyādi| vyavasthākaraṇaṃ cikitsāvyavahārārthaṃ saṅkhyākathanam| yathāsthūleṣviti ye ye sthūlā udaramūtrakṛcchrādayasteṣu; saṅgrahaḥ aṣṭodarīyarogasaṅgrahe (udiśyate) ityarthaḥ| asthūleṣu vikāreṣu aṣṭodarīye sañjñayā'nukteṣu kathaṃ vyavasthākaraṇamityāha- tathetyādi| prakṛtisāmānyaṃ samānakāraṇatā; tenānukteṣu sākṣāddhyādhiṣu vātajo'yaṃ śleṣmajo'yamiti, tathā rasajo'yaṃ raktajo'yamityādikā cikitsāvyavahārārthaṃ vyavasthā kartavyeti bhāvaḥ| ata evāṣṭodarīye vakṣyati- “sarve vikārā vātapittakaphānnātivartante” (sū. 19) iti||42-43||

vikāranāmākuśalo na jihrīyāt kadācana| na hi sarvavikārāṇāṃ nāmato'sti dhruvā sthitiḥ||44|| sa eva kupito doṣaḥ samutthānaviśeṣataḥ| sthānāntaragataścaiva janayatyāmayān bahūn ²⁷||45|| tasmādvikāraprakṛtīradhiṣṭhānāntarāṇi ca| samutthānaviśeṣāṃśca buddhvā karma samācaret||46|| yo hyetattritayaṃ jñātvā karmāṇyārabhate bhiṣak| jñānapūrvaṃ yathānyāyaṃ ²⁸ sa karmasu na muhyati||47||

jvararaktapittādivannāmājñāne'pi vātādijanyatvajñānenaiva pracaritavyamityāha- vikāretyādi| sthānāntaragataścetyatra cakāra ekasthānagato'pi bahuvikāraṃ karotīti samuccinoti| yato vakṣyati- “karoti galamāśritaḥ| kaṇṭhoddhvaṃsaṃ ca kāsaṃ ca svarabhedamarocakam” (ci. 8) iti| adhiṣṭhānāntarāṇi āśayāntarāṇi| jñānapūrvamiti cikitsājñānapūrvakam| yathānyāyaṃ yathāgamam| evaṃ manyate- yadvātārabdhatvādijñānameva kāraṇaṃ rogāṇāṃ cikitsāyāmupakāri, nāmajñānaṃ tu vyavahāramātraprayojanārthaṃ na svarūpeṇa cikitsāyāmupakārīti||44-47||

nityāḥ prāṇabhṛtāṃ dehe vātapittakaphāstrayaḥ| vikṛtāḥ prakṛtisthā vā tān bubhutseta paṇḍitaḥ||48||

samprati vātādijñānena rogajñānamuddiṣṭaṃ tenopoddhātena vātādīnāṃ prakṛtisthānāmaprakṛtisthānāṃ ca lakṣaṇaṃ vaktumāha- nityā ityādi| bubhutseta jñātumicchet||48||

utsāhocchvāsaniḥ śvāsaceṣṭā dhātugatiḥ samā| samo mokṣo gatimatāṃ vāyoḥ karmāvikārajam||49|| darśanaṃ paktirūṣmā ca kṣuttṛṣṇā dehamārdavam| prabhā prasādo medhā ca pittakarmāvikārajam||50|| sneho bandhaḥ sthiratvaṃ ca gauravaṃ vṛṣatā balam| kṣamā dhṛtiralobhaśca kaphakarmāvikārajam||51||

ceṣṭeti avikṛtā ceṣṭā| dhātugatiriti rasādīnāṃ poṣyaṃ dhātuṃ prati gamanam| gatimatāmiti purīṣādīnāṃ bahirniḥsaratām| prasādaḥ manaḥprasādaḥ| bandhaḥ sandhibandhaḥ| sthiratvam aśaithilyam| gauravaṃ prākṛtaṃ śarīragauravam| kṣamā sahiṣṇutā| dhṛtiḥ manaso'cāñcalyam| kṣamādayaśca śleṣmaṇaḥ prabhāvāt kriyante; evamanyatrāpi jñeyam||49-51||

vāte pitte kaphe caiva kṣīṇe lakṣaṇamucyate| karmaṇaḥ prākṛtāddhānirvṛddhirvā'pi virodhinām||52||

kṣayalakṣaṇamāha- vāte ityādi| karmaṇaḥ prākṛtāditi vātādiprakṛtikarmatvenoktādutsāhādeḥ| hāniḥ apacayaḥ| vṛddhirvā'pi virodhināmiti uktaprākṛtalakṣaṇavirodhināṃ karmaṇāṃ vṛddhiḥ; yathā vātakṣaye utsāhavirodhino viṣādasya vṛddhiḥ, pittakṣaye'darśanāpaktyādīnāṃ, śleṣmakṣaye raukṣyādīnāṃ vṛddhiḥ| iha prākṛtakarmahānau satyāṃ nāvaśyaṃ virodhikarmavṛddhirata uktaṃ- vṛddhirvetyādi; na hyavaśyamutsāhahānāvalpamātrāyāṃ satyāṃ viṣādo vardhate, alobhanyūnatve vā manāglobho vardhate; kiṃvā, utsāhādyabhāvenābhāvamukhena jñānārthaṃ ‘karmaṇaḥ prākṛtāddhāniḥ’ ityuktaṃ, viṣādādivṛddhyā tu vidhimukhena jñānārthaṃ ‘vṛddhirvā'pi virodhinām’ ityuktam| yaducyate- vṛddhirvā'pi virodhināmiti virodhidoṣāṇāṃ, yathā- pittavṛddhau śleṣmakṣayo jāyate, ityevamādi; tanna, yato'nyadoṣavṛddhāvanyasyāvaśyaṃ na hyapāyo bhavati, tathāhi sati pittavṛddhau satyāṃ sarvadā śleṣmakṣyaḥ syāt; na ca doṣāḥ parasparaghātakā iti prāgeva pratipāditaṃ; pradeśāntare'pi doṣāṇāṃ svalakṣaṇahānireva paraṃ kṣayalakṣaṇaṃ- “kṣīṇā jahati liṅgaṃ svaṃ” (sū.a.17) ityanenoktam||52||

doṣaprakṛtivaiśeṣyaṃ niyataṃ vṛddhilakṣaṇam| doṣāṇāṃ prakṛtirhānirvṛddhiścaivaṃ parīkṣyate||53||

vṛddhilakṣaṇamāha- doṣetyādi| prakṛtiḥ svabhāvaḥ, tasya vaiśeṣyamādhikyaṃ; śleṣmaṇaḥ snehaśaityamādhuryādiryā prakṛtistasyā atisnigdhātiśaityātimādhuryādivaiśeṣyaṃ vṛddhilakṣaṇam| niyatamiti pratiniyataṃ, yadyasya prakṛtilakṣaṇaṃ tadvṛddhaṃ saptasyaiva vṛddhilakṣaṇamityarthaḥ; anye tu niścitamityāhuḥ||53||

tatra ślokāḥ- saṅkhyāṃ nimittaṃ rūpāṇi śothānāṃ sādhyatāṃ na ca| teṣāṃ teṣāṃ vikārāṇāṃ śothāṃstāṃstāṃśca pūrvajān||54|| vidhibhedaṃ vikārāṇāṃ trividhaṃ bodhyasaṅgraham| prākṛtaṃ karma doṣāṇāṃ lakṣaṇaṃ hānivṛddhiṣu||55|| vītamoharajodoṣalobhamānamadaspṛhaḥ| vyākhyātavāṃstriśothīye rogādhyāye punarvasuḥ||56||

saṅgrahe śothānāṃ sādhyatāmiti bheṣajaviśeṣasādhyatvam, upaśaya ityarthaḥ; tacca ‘snehauṣṇyamardanābhyāṃ ca praṇaśyet sa ca vātika’ ityuktaṃ jñeyam| na ceti na ca sādhyatāṃ, yathā- ‘yaśca pādābhinirvṛttaḥ’ ityādi| teṣāṃ teṣāmiti upajihvādīnām| śothān pūrvajānityabhidadhāna upajihvādiṣu pūrvaṃ śotho bhavati, paścādupajihvādirogavyaktiriti darśayati| ata eva ‘āśu sañjanayecchothaṃ’ ityuktvā ‘jāyate'syopajihvikā’ ityuktam| bodhyaḥ boddhavyo vikāraprakṛtyādiḥ| tasya trividhaṃ saṅgrahamiti ‘tasmādvikāraprakṛtīḥ’ ityādyuktaṃ trayam||54-56||

ityagniveśakṛte tantre carakapratisaṃskṛte ślokasthāne triśothīyo nāmāṣṭādaśo'dhyāyaḥ||18||

iti śrīcakrapāṇidattaviracitāyāṃ carakatātparyaṭīkāyāmāyurvedadīpikākhyāyāṃ sūtrasthāne rogacatuṣke triśothīyo nāmāṣṭādaśo'dhyāyaḥ||18||

pāṭhāntarāḥ

1 '... dhūmopavāsa...' iti pā. ↩
2 'kapilapiṅgalatāmraromā' iti pā. ↩
3 'sahate' iti pā. ↩
4 'evaṃ saptavidho bhedaḥ' iti kvacitpustake na paṭhyate ↩
5 'evaṃ bhedaprakṛtibhistābhistābhirbhidyamānaḥ' iti pā. ↩
6 'sa punaścaikaḥ' iti pā. ↩
7 'uṣṇāyate' iti pā. ↩
8 'spandantīva' iti pā. ↩
9 'pītamukhanetratvak' iti pā. ↩
10 'yaḥ śītalaḥ saktagatiḥ pāṇḍuḥ kaṇḍūyate'pi ca' iti pā. ↩
11 'pīḍito nonnamenmandaḥ' iti pā. ↩
12 'chinnādityanantaraṃ 'aṅgāt' iti śeṣaḥ' iti śivadāsasenaḥ| 'śastrakuśacchedāt' iti pā. ↩
13 'etacca' iti pā. ↩
14 'sañjanayañchothaṃ' iti pā. ↩
15 'sañjanayañchothaṃ' iti pā. ↩
16 'sañjanayañchothaṃ' iti pā. ↩
17 'sañjanayañchothaṃ' iti pā. ↩
18 'janayat' iti pā. ↩
19 'janayat' iti pā. ↩
20 'śūlaiḥ paritudan' iti pā. ↩
21 'kṣipramanukrānta iti śīghraṃ cikitsita ityarthaḥ' iti śivadāsasenaḥ ↩
22 'yathākramamanupakramyamāṇaḥ' iti pā. ↩
23 'mithyārambheṇa' iti pā. ↩
24 'sādhyāścaivāpare' iti pā. ↩
25 'nidānavedanāvarṇasthānasaṃsthānanāmabhiḥ' iti pā. ↩
26 'vyavasthākāraṇaṃ iti yogīndranāthasenasammataḥ pāṭhaḥ ↩
27 'sthānāntaragataścāpi vikārān kurute bahūn' iti pā. ↩
28 'yathāmnāyaṃ' iti pā. ↩