5. arśonidānam · e-Mādhavanidāna

athārśonidānam | pṛthagdoṣaiḥ samastaiśca śoṇitāt sahajāni ca | arśāṃsi ṣaṭprakārāṇi vidyādgudavalitraye ||1||

atīsāragrahaṇyarśasāṃ ¹ parasparānubandhitvādatīsāragrahaṇyanantaramarśa ucyate– ² pṛthagityādi| ‘arivat prāṇān śṛṇāti hinastītyarśaḥ’ iti pṛṣodarādipāṭhānniruktimāhuḥ| sahajānīti saha śarīreṇa jātāni, gudavalyārambhakabījabhāgasya ³ doṣadūṣitatvāt| atra dvandvajāni prakṛtisamasamavāyārabdhatvānna ⁴ pṛthaggaṇitāni| uktaṃ hi suśrute– “arśaḥsu dṛśyate rūpaṃ yadā vai doṣayordvayoḥ| saṃsargaṃ taṃ vijānīyāt saṃsargaḥ ṣaḍvidhaśca saḥ||” (su. ni. a. 2) iti| ṣaḍvidhatvaṃ cātra saṃsargasya vātādibhiryugmaistrayaḥ saṃsargāḥ, taireva raktayogādapare traya iti| sannipātajaṃ ⁵ tvekaikadoṣajeṣvadṛṣṭasyāsādhyatvasya yogādvikṛtiviṣamasamavāyārabdhamiti ⁶ saṅkhyayā pṛthaggaṇitam| gudavalitraya iti ⁷ ardhapañcāṅgulamānaṃ gudaṃ, tasyāvayavabhūtāstisro valaya uparyupari vyavasthitāḥ śaṅkhāvartanibhāḥ pravāhaṇīvisarjanīsaṃvaraṇīnāmikāḥ; tatra gudauṣṭhamardhāṅgulaṃ, tadūrdhvamaṅgulamānā prathamāvalī suśrutena (su. ni. a. 2) nirdiṣṭā; bhoje'pyuktam– “romāntebhyo ⁸ yavādhyardhaṃ gudauṣṭhaṃ paricakṣate| gudauṣṭhādaṅgulaṃ caikaṃ prathamāṃ tāṃ valīṃ viduḥ|| ⁹ sārdhaikāṅgulamānena tadanye'pi prakīrtite||” iti sārdhāṅgulamānā dvitīyā tṛtīyā ceti||1||

atīsāragrahaṇyarśasāṃ parasparānubandhitvādatīsāragrahaṇyoranantaramarśa ucyate– ¹⁰ pṛthagityādi| arivat prāṇān hiṃsanti ityarśāṃsi| tāni ca ṣaṭprakārāṇi bhavanti| pṛthagdoṣairvātādibhiḥ trīṇi, samastairdoṣaiḥ ekaṃ, śoṇitena caikam, ekaṃ ¹¹ sahajamityevaṃ ṣaḍarśāṃsi| tatra sahajāni saha śarīreṇa jātāni, gudavalyārambhakabījabhāgasya ¹² doṣadūṣitatvāt, kulajānītyarthaḥ| atra dvandvajāni ¹³ prakṛtisamasamavāyārabdhatvānna pṛthaggaṇitāni| uktaṃ hi suśrute– “arśaḥsu dṛśyate rūpaṃ yadā vai doṣayordvayoḥ| ¹⁴ saṃsargaṃ ¹⁵ taṃ vijānīyāt saṃsargaḥ ṣaḍvidhaśca saḥ” iti| ṣaḍvidhatvaṃ cātra saṃsargasya vātādiyugmaistrayaḥ saṃsargāḥ, taireva raktayogādapare traya iti| tridoṣajaṃ tu ¹⁶ vikṛtiviṣamasamavāyārabdhatvenāsādhyatvātsaṅkhyayā pṛthaggaṇitam| gudavalitraya iti ardhapañcāṅgulamānaṃ gudaṃ, tasyāvayavabhūtāstisro valaya uparyupari vyavasthitāḥ śaṅkhāvartanibhāḥ pravāhaṇīvisarjanīsaṃvaraṇīnāmikāḥ, tatra gudoṣṭhamardhāṅgulaṃ, tadūrdhvamaṅguladvayapramāṇā prathamāvali, dvitīyā sārdhaikāṅgulā, tṛtīyā'pi sārdhaikāṅgulā, evaṃ sārdhapañcāṅgulagudaṃ suśrutena nirdiṣṭam| bhojenāpyuktam– “romāntebhyo yavādhyardhaṃ gudauṣṭhaṃ paricakṣate| gudauṣṭhādaṅgulaṃ caikaṃ prathamāṃ tāṃ valīṃ viduḥ” iti| sārdhāṅgulamānā dvitīyā tṛtīyā ceti||1||

doṣāstvaṅmāṃsamedāṃsi sandūṣya vividhākṛtīn | māṃsāṅkurānapānādau kurvantyarśāṃsi tān jaguḥ ||2|| (vā. ni. a. 7) |

samprāptipūrvakamarśaḥsvarūpamāha– doṣā ityādi| tvaṅmāṃsagrahaṇena tvaṅmāṃsāśritaṃ raktamapi gṛhyate, cikitsāyāṃ raktasrāvaṇopadeśāt| apānaṃ gudam, ādiśabdena nāsikādīnāṃ grahaṇam| kāyacikitsakāstu gudajasyaivārśastvamicchanti, nāsādijānāṃ tvadhimāṃsatvaṃ, teṣu “pañcātmā mārutaḥ” ityādisamprāpterabhāvāt, viṣṭambha ityādipūrvarūpasya cāsambhavāt; yadāha carakaḥ– ‘śiśna’ ityārabhya yāvat “adhimāṃsavyapadeśa eva” (ca. ci. a. 14) iti| suśrutena tu māṃsāṅkuratvasādharmyāt śastrakṣārāgnisādhyatvācca teṣvarśaḥśabdaprayogaḥ kṛtaḥ, sārṣapādisnehe tailavyapadeśavat; suśrutārthavādino vāgbhaṭasyāpyayamevābhiprāya iti||2||

samprāptipūrvakamarśaḥsvarūpamāha– ¹⁷ doṣā ityādi| doṣā vātādayastvaṅmāṃsamedāṃsi sandūṣya apānādau ¹⁸ yān māṃsāṅkurān kurvanti bhiṣajastānmāṃsāṅkurānarśāṃsi jaguḥ kathayanti| tvaṅmāṃsagrahaṇena tvaṅmāṃsāśritaṃ raktamapi gṛhyate, yasmāt cikitsāyāṃ raktasrāvakaraṇopadeśaḥ| apānaṃ gudam| ādiśabdena ¹⁹ nāsikāśravaṇacakṣurmeḍhranābhiprabhṛtayo gṛhyante| eṣāṃ lakṣaṇāni suśrute paṭhitāni| kāyacikitsakāstu gudajasyaivārśastvamicchanti nāsikādijātānāṃ tvadhimāṃsatvaṃ, teṣu ‘pañcātmā mārutaḥ pittam’ ityādisamprāpterabhāvāt, tathā viṣṭambhetyādisarvapūrvarūpasya cāsambhavāt| yadāha carakaḥ– “śiśnetyārabhya yāvadadhimāṃsavyapadeśa eva” iti| suśrutena tu māṃsāṅkuratvasādharmyācchastrakṣārāgnisādhyatvācca teṣvarśaḥśabdaprayogaḥ kṛtaḥ, sarṣapādisnehe tailavyapadeśavat| suśrutanuvādino vāgbhaṭasyāyamevābhiprāyaḥ pratibhāti||2||

kaṣāyakaṭutiktāni rūkṣaśītalaghūni ca | pramitālpāśanaṃ tīkṣṇaṃ madyaṃ maithunasevanam ||3|| laṅghanaṃ deśakālau ca śītau vyāyāmakarma ca | śoko vātātapasparśo heturvātārśasāṃ mataḥ ||4|| (ca. ci. a. 14) |

vātārśaso nidānamāha– kaṣāyetyādi| pramitam alpatamam, alpaṃ mātrāhīnamaśanaṃ, jejjaṭastvāha– ‘pramitamatītakālabhojanam’| ‘pramṛta’ iti pāṭhe tu naṣṭaśaktikaṃ dhānyādikamāhuḥ| ‘pramitāśanamekarasābhyāsaḥ’ ²⁰ ityanye| tannātiyuktam; ekarasābhyāsaḥ kiṃ vātaprakopakasya ²¹ kaṭvādeḥ, kaphaprakopakasya madhurādervā? nādyaḥ, ²² kaṭvāderatraivopāttatvāt; ²³ dvitīye madhurādīnāṃ ²⁴ tvabhyāso vātaśāmaka eva, ekarasābhyāsācca daurbalyamuktaṃ natu vātavṛddhiriti cintyametat| tīkṣṇamiti madyaviśeṣaṇaṃ, paiṣṭikādimṛdumadyasya ²⁵ vātapraśamakatvāt| śīto deśa ānūpaḥ, kālo hemantādiḥ| ²⁶ ātapasya uṣṇam, ātapasyoṣṇaguṇasyāpyudbhūtaraukṣyādvātaprakopakatvamiti||3-4||

atha vātārśonidānamāha– kaṣāyetyādi| etatsarvaṃ vātārśasāṃ hetuḥ kāraṇam| pramitamalpatamam, alpaṃ mātrāhīnam, anye pramitasthāne atītamiti paṭhanti, tatrātītakālabhojanam| anye pramṛtālpāśanamiti paṭhanti| tatra pramṛtaṃ naṣṭaśaktikaṃ dhānyādikamāhuḥ| tīkṣṇamiti madyaviśeṣaṇaṃ, ²⁷ paiṣṭyādimṛdumadyasya vātapraśamakatvāt| śīto deśa ²⁸ ānūpaḥ, kālo hemantādiḥ| ²⁹ ātapasyoṣṇaguṇasyāpi udbhūtarūkṣatvāt vātaprakopakatvameva| anyatsubodham||3-4||

kaṭvamlalavaṇoṣṇāni ³⁰ vyāyāmāgnyātapaprabhāḥ | deśakālāvaśiśirau krodho madyamasūyanam ||5|| vidāhi tīkṣṇamuṣṇaṃ ca sarvaṃ pānānnabheṣajam | pittolbaṇānāṃ vijñeyaḥ prakope heturarśasām ||6|| (ca. ci. a. 14) |

pittārśonidānamāha– kaṭvamletyādi| deśakālāvaśiśirāviti uṣṇo deśo maruḥ, uṣṇaḥ kālaḥ śarad grīṣmaśca| asūyanaṃ parasampattau dveṣaḥ, sa krodhaviśeṣa eva| pittolbaṇānāmityanena sarveṣāmarśasāṃ tridoṣajatvam, adhikena tu vyapadeśa iti darśitaṃ carakeṇa| yadāha sa eva– “arśāṃsi nāma jāyante nā'sannipatitaistribhiḥ| doṣairdoṣaviśeṣāttu viśeṣaḥ kathyate'rśasām||” (ca. ci. a. 14) iti||5-6||

atha ³¹ pittārśonidānamāha– kaṭvityādi| kaṭvamletyādiko heturjñeyaḥ| deśakālāvaśiśirāviti deśo marudeśaḥ, uṣṇaśca kālo grīṣmaḥ śaracca, asūyanaṃ parasampattau dveṣaḥ, sa ca krodhaviśeṣa eva| pittolbaṇānāmityanena sarveṣāmarśasāṃ tridoṣajatvam, adhikena tu vyapadeśa iti darśitaṃ carakeṇa, yadāha sa eva “arśāṃsi nāmajāyante nā''sannipatitaisribhiḥ| doṣairdoṣaviśeṣāttu viśeṣaḥ kathyate'rśasām” iti| śeṣaṃ sugamam||5-6||

madhurasnigdhaśītāni lavaṇāmlagurūṇi ca | avyāyāmo divāsvapnaḥ śayyāsanasukhe ratiḥ ||7|| prāgvātasevā śītau ca deśakālāvacintanam | ³² ślaiṣmikāṇāṃ samuddiṣṭametat kāraṇamarśasām ||8|| (ca. ci. a. 14) |

śleṣmārśonidānamāha– madhuretyādi| śayyāsanasukhe ratiriti sukhaśayyāsane ratirāsaktiḥ| prāgvātasevā purovātasevanam| acintanaṃ niścintatā||7-8||

atha ³³ śleṣmārśonidānamāha– ³⁴ madhuretyādi| śleṣmotkaṭānāmarśasāṃ samutpattāvetanmadhurasnigdhetyādikāraṇamuktam| śayyāsanasukhe ratistatrāsaktiḥ| prāgvātasevā purovātasevanam| acintanaṃ niścintatā| anyatsubodham||7||8||

hetulakṣaṇasaṃsargādvidyāddvandvolbaṇāni ca |9|

dvandvajārśonidānādikamāha– hetvityādi| hetulakṣaṇasaṃsargāditi doṣadvayasya ³⁵ nidānamelakena lakṣaṇamelakena ca dvandvolbaṇāni dvandvajāni vidyāt|9|–

doṣāṇāṃ hetulakṣaṇaireva dvandvolbaṇamāha– ³⁶ hetvityādi| doṣadvayasya nidānamelake lakṣaṇamelake ca dvandvolbaṇāni dvandvajāni vidyāt jānīyāt|9|–

sarvo hetustridoṣāṇāṃ sahajairlakṣaṇaṃ samam ||9|| (ca. ci. a. 14) |

tridoṣajārśonidānamāha– sarva ityādi| sarvo heturiti ekaikaśo vātādyarśasāṃ yo heturuktaḥ sa tridoṣajānāṃ bhavati, trayo doṣā janakatvenaiṣāṃ santīti tridoṣajāni| sahajairlakṣaṇaṃ samamiti teṣāṃ lakṣaṇaṃ sahajairarśobhiḥ saha samaṃ sadṛśaṃ, sahajānāṃ yallakṣaṇaṃ tattridoṣajānāmityarthaḥ| ‘sahajairlakṣaṇaiḥ samam’ iti pāṭhāntare ³⁷ tu sahajaiḥ sahajārśobhavairlakṣaṇaiḥ samaṃ ³⁸ saha sarvo hetustridoṣāṇāmiti yojyam| sahajārśolakṣaṇaṃ cātra saṅgraheṇoktaṃ ³⁹ tantrāntarādanusmartavyaṃ; yadāha suśrutaḥ– “durdarśanāni paruṣāruṇapāṇḍūni dāruṇāntarmukhāni, tairupadrutaḥ kṛśo'lpabhuk ⁴⁰ sirāsantatagātro'lpaprajaḥ kṣīṇaretāḥ kṣāmasvaraḥ krodhano'lpāgnirghrāṇaśiro'kṣiśravaṇarogavān, satatamantrakūjanāṭopahṛdayopalepārocakaprabhṛtibhiḥ pīḍyate||” (su. ni. a. 2) iti; carake ca– ⁴¹ ‘kānicidaṇūni’ (ca. ci. a. 14) ityādinā prabhūtataraṃ lakṣaṇamuktam| nanu, tridoṣajānīti viśeṣābhidhānamanupapannaṃ, sarveṣāmeva rogāṇāṃ tridoṣajatvāt| yaduktam– “dravyamekarasaṃ nāsti na rogo'pyekadoṣajaḥ| yo'dhikastena nirdeśaḥ kriyate rasadoṣayoḥ||” iti| naivaṃ; “sarvadehacarāstu vātapittaśleṣmāṇaḥ” iti vacanādekasmin dhātvādau doṣeṇa dūṣite ⁴² sati tadgatetaradoṣe'pyavaśyambhāvinī kācidduṣṭiḥ, duṣṭadoṣasambandhāt| kiñca svakāraṇāt vṛddho vāyuḥ śaityācchītasya śleṣmaṇo balamādadhāti, lāghavāttejorūpasya pittasya; pittaṃ ca kaṭutvādvātasya, dravatvāt śleṣmaṇaḥ; kaphaśca śaityādvāyoḥ, dravatvāt pittasyeti| ata evoktam– “na rogo'pyekadoṣajaḥ” iti| anenaivābhiprāyeṇoktam– “ekaḥ prakupito doṣaḥ sarvāneva prakopayet|” iti| yatra tu svakāraṇāttrayo'pi kupitāstatra tridoṣavyapadeśa iti siddhāntaḥ; evaṃ sarvatra||9||

tridoṣajamāha– ⁴³ sarva ityādi| ekaikaśo vātādyarśasāṃ yo heturuktaḥ sa tridoṣajānāṃ bhavati| trayo doṣā janakatvenaiṣāṃ santīti tridoṣajāni| teṣāṃ lakṣaṇaṃ sahajairarśobhiḥ saha samaṃ sadṛśaṃ sahajānāṃ yallakṣaṇaṃ bhavati tattridoṣajānāṃ bhavatītyarthaḥ| sahajārśolakṣaṇaṃ cātra saṅgrahe noktaṃ tantrāntarādanusartavyam| yadāha suśrutaḥ– “durdarśanāni paruṣāruṇapāṇḍurāṇi dāruṇāntarmukhāni ⁴⁴ ca, tairupadrutaḥ kṛśo'lpabhuk ⁴⁵ sirāsantatagātro'lpaprajaḥ kṣīṇaretāśca bhavati, kṣāmasvaraḥ krodhano'lpāgnirghrāṇaśirokṣiśravaṇarogī ⁴⁶ santatamantrakūjāṭopahṛdayopalepārocakaprabhṛtibhiḥ pīḍyate” iti sahajānāṃ lakṣaṇam ⁴⁷||9||

gudāṅkurā bahvanilāḥ śuṣkāścimacimānvitāḥ | mlānāḥ śyāvāruṇāḥ stabdhā viśadāḥ paruṣāḥ kharāḥ ||10|| mitho visadṛśā vakrāstīkṣṇā visphuṭitānanāḥ | bimbīkharjūrakarkandhūkārpāsīphalasannibhāḥ ||11|| kecit kadambapuṣpābhāḥ kecit siddhārthakopamāḥ | śiraḥpārśvāṃsakaṭyūruvaṅkṣaṇādyadhikavyathāḥ ||12|| ⁴⁸ kṣavathūdgāraviṣṭambhahṛdgrahārocakapradāḥ | kāsaśvāsāgnivaiṣamyakarṇanādabhramāvahāḥ ||13|| tairārto grathitaṃ stokaṃ saśabdaṃ sapravāhikam | rukphenapicchānugataṃ vibaddhamupaveśyate ||14|| kṛṣṇatvaṅnakhaviṇmūtranetravaktraśca jāyate | gulmaplīhodarāṣṭhīlāsambhavastata eva ca ||15|| (vā. ni. a. 7) |

pūrvaṃ nidānamuktaṃ, samprati vātādibhedenārśasāṃ lakṣaṇānyucyante, tatra prathamaṃ vātārśolakṣaṇamāha– gudetyādi| gudāṅkurā gude aṅkurākārāḥ māṃsaprarohāḥ, ⁴⁹ ta eva arśāṃsi| bahvanilā vātolbaṇāḥ| śuṣkāḥ srāvarahitāḥ| cimacimā vedanāviśeṣaḥ| mlānā anupacitāḥ| stabdhāḥ kāṭhinyāt| viśadā apicchilāḥ, dhūlisparśavat| paruṣāḥ karkaśāḥ, ⁵⁰ gojihvāsparśavat| kharāḥ karkoṭaphalavat sūkṣmānekakaṇṭakācitāḥ| eṣu vikalpeṣu vakṣyamāṇaṃ keciditi padaṃ sambandhanīyam| mithovisadṛśāḥ parasparabhinnarūpāḥ| ⁵¹ vakrā dhanuḥkāṣṭhādivat| tīkṣṇāḥ sūkṣmāgrāḥ| phalasannibhā iti bimbyādibhiḥ sambadhyate, bimbyādisannibhatvaṃ cākṛtyā jñeyam| bimbī oṣṭhopamaphalā ‘telākucā’ iti loke khyātā, kārpāsī vanakārpāsī, kadambapuṣpābhāḥ sthūlā anekasūkṣmaśikharāḥ| siddhārthakopamāḥ sūkṣmapiḍakārūpāḥ| hṛdayaṃ gṛhītamiveti vedanā hṛdgrahaḥ| grathitaṃ granthilaṃ pāṣāṇavat| ruk śūlam| picchā picchilo dravabhāgaḥ| upaveśyate varcastyājyate| kṛṣṇaśabdastvagādibhiḥ vaktrāntaiḥ pratyekaṃ sambadhyate| asyopadravamāha– gulmetyādi| aṣṭhīlā vātarogaviśeṣaḥ||10-15||

pūrvaṃ nidānamuktaṃ, samprati vātādibhedenārśasāṃ lakṣaṇamāha– ⁵² gudāṅkurā ityādi| bahvanilāḥ vātolbaṇāḥ| gudāṅkurāḥ gude'ṅkurāḥ māṃsaprarohāḥ arśāṃsi| śuṣkāḥ srāvarahitāḥ| cimicimā vedanāviśeṣastenānvitāḥ; sarṣapakalkaliptā iveti yāvat| mlānā anupacitāḥ| śyāvāruṇā varṇataḥ| stabdhāḥ kaṭhināḥ kīlavat| viśadā apicchilāḥ dhūlīsparśavat| viṣamā iti pāṭhe viṣamā nimnonnatāḥ| paruṣāḥ karkaśāḥ gojihvāsparśavat| kharāḥ karkoṭakaphalavat sūkṣmānekakaṇṭakacitāḥ| eṣu ⁵³ vikalpe vakṣyamāṇaṃ keciditi padaṃ sambandhanīyam| ⁵⁴ mitha iti mithovisadṛśāḥ parasparaṃ vibhinnarūpāḥ| vakrā ⁵⁵ dhanurvatkuṭilāḥ| tīkṣṇā darbhāṅkuravatsūkṣmāgrāḥ| visphuṭitānanāḥ kesarādivadānanaṃ yeṣāṃ teṣāṃ vidīrṇamukhā ityarthaḥ| ⁵⁶ bimbādiphalavat sadṛśatvamākṛtyā, ⁵⁷ bimbī oṣṭhopamaphalā, ⁵⁸ karkandhuḥ kolabadarī, kārpāsī vanakārpāsī| keciditi kecitkadambapuṣpābhāḥ sthūlāḥ, kecitsiddhārthakopamāḥ sarṣapavatsūkṣmāḥ| śiraḥprabhṛtīnāmabhyadhikavyathā ativedanā| ⁵⁹ kṣavathviti kṣavathuḥ chikkā| viṣṭambho malasya ⁶⁰ tṛḍgrahaḥ| hṛdgrahaḥ hṛdayaṃ gṛhītamiveti vedanā hṛdgrahaḥ| ⁶¹ tairiti ⁶² tairgudāṅkurairarśobhiḥ pīḍitaḥ puruṣaḥ ⁶³ grathilaṃ grathitaṃ pāṣāṇavat, stokamalpaṃ, sapravāhikaṃ vātapravāhikālakṣaṇopetaṃ; ruk śūlaṃ, picchā picchilo dravabhāgastenānugatam, īdṛgvarcaḥ upaveśyate tyājyate, gudeneti śeṣaḥ| kṛṣṇaśabdastvagādibhirvaktrāntaiḥ pratyekaṃ sambadhyate| asyopadravamāha– gulmetyādi| tato vātārśobhya upadravarūpāṇāmeṣāṃ sambhava utpattiḥ| aṣṭhīlā nābheradhobhāge pāṣāṇapiṇḍikāvadvātarogaviśeṣaḥ||10-15||

pittottarā nīlamukhā raktapītāsitaprabhāḥ | tanvasrasrāviṇo visrāstanavo mṛdavaḥ ślathāḥ ||16|| śukajihvāyakṛtkhaṇḍajalaukovaktrasannibhāḥ | ⁶⁴ dāhapākajvarasvedatṛṇmūrchārucimohadāḥ ||17|| soṣmāṇo dravanīloṣṇapītaraktāmavarcasaḥ | yavamadhyā haritpītahāridratvaṅnakhādayaḥ ||18|| (vā. ni. a. 7) |

pittārśolakṣaṇamāha– pittottarā ityādi| nīlamukhā nīlāgrāḥ| tanvasraṃ ⁶⁵ tanvasraṃ tanu aghanam, asraṃ raktaṃ sravantīti tanvasrasrāviṇaḥ| visrāḥ āmagandhinaḥ| tanavaḥ svalpāḥ| mṛdavaḥ komalāḥ| ślathāḥ lambanaśīlāḥ| yavamadhyāḥ ⁶⁶ yavavanmadhye sthūlāḥ| ⁶⁷ harit haritpatravarṇaṃ, pītaṃ haritālābhaṃ, hāridraṃ haridrāvarṇam; ādiśabdādviṇmūtranetravaktrāṇāṃ grahaṇam||16-18||

paittikānyāha– pittottarā ⁶⁸ ityādi| pittottarāḥ pittolbaṇā gudāṅkurā īdṛśā jñeyāḥ| nīlamukhāḥ nīlāgrāḥ| tanu aghanamasraṃ raktaṃ sravantīti tanvasrasrāviṇaḥ, visrāḥ visragandhinaḥ, tanavaḥ svalpāḥ, mṛdavaḥ komalāḥ anye ‘mṛdulambina’ iti paṭhanti, tatra lambino lambanaśīlāḥ| ākṛtyā ca śukajihvāyakṛtkhaṇḍajalaukomukhasannibhāḥ sadṛśāḥ| upadravānāha– dāhetyādi| dāhādimohāntopadravadāyinaḥ| soṣmāṇaḥ uṣṇasparśāḥ| dravaṃ nīlaṃ uṣṇaṃ pītaraktam, āmamapakvaṃ varcaḥ upaveśayanti| yavamadhyeti yavavat madhye sthūlāḥ prānte sūkṣmāḥ| haritaṃ haritapatravarṇaṃ, pītaṃ haritālābhaṃ, hāridravarṇaṃ tadvat tvagādi yeṣāṃ te| evamādiśabdācca cakṣurnetrādayo gṛhyante||16-18||

śleṣmolbaṇā mahāmūlā ghanā mandarujaḥ sitāḥ | utsannopacitasnigdhastabdhavṛttagurusthirāḥ ||19|| picchilāḥ stimitāḥ ślakṣṇāḥ kaṇḍvāḍhyāḥ sparśanapriyāḥ | karīrapanasāsthyābhāstathā gostanasannibhāḥ ||20|| vaṅkṣaṇānāhinaḥ pāyubastinābhivikarṣiṇaḥ | saśvāsakāsahṛllāsaprasekārucipīnasāḥ ||21|| mehakṛcchraśirojāḍyaśiśirajvarakāriṇaḥ | klaibyāgnimārdavacchardirāmaprāyavikāradāḥ ||22|| ⁶⁹ vasābhasakaphaprāyapurīṣāḥ sapravāhikāḥ | na sravanti na bhidyante pāṇḍusnigdhatvagādayaḥ ||23|| (vā. ni. a. 7) |

śleṣmārśolakṣaṇamāha– śleṣmolbaṇe ityādi| ⁷⁰ atra ‘gudāṅkurā’ ityanuvartate| mahāmūlā ⁷¹ dūravāstvavagāhinaḥ| ghanā nibiḍāvayavāḥ| utsannā dairghyeṇodgatāḥ, upacitāḥ pariṇāhena sthūlāḥ, stabdhā anamrāḥ, vṛttāḥ pariṇāhena vartulāḥ, guravo gurudravyākrāntamiva gudaṃ kurvate, sthirā acañcalāḥ| ślakṣṇā maṇivanmasṛṇāḥ| kaṇḍvāḍhyāḥ kaṇḍūbahulāḥ; kaṇḍūvyapagamārthaṃ spṛśyamānāḥ ⁷² prīṇayantyarśasamiti sparśanapriyāḥ| karīro marujadrumaḥ, panasaḥ kaṇṭakiphalaṃ, tayorasthyābhāḥ, athavā karīro vaṃśāṅkuraḥ; tena karīrābhāḥ, panasāsthyābhāścetyarthaḥ| ⁷³ tathā gostanasannibhāḥ gostanasadṛśā ityarthaḥ| vaṅkṣaṇau ⁷⁴ ānāhitumābaddhumiva śīlaṃ yeṣāṃ te tathā; gudapratyāsattyā vaṅkṣaṇayoḥ preraṇādyasāmarthyakāriṇa ityarthaḥ| pāyubastinābhivikarṣiṇa iti pāyvādiṣvākarṣavatpīḍākāriṇaḥ| praseko mukhasya gudasya vā; kṛcchraṃ mūtrakṛcchraṃ, śirojāḍyaṃ śiraḥstimitatā, śiśirajvarakāriṇaḥ śītajvarakāriṇaḥ| klaibyaṃ strīṣvanutsāhaḥ, ⁷⁵ agnimārdavaṃ vahnimāndyaṃ, chardirvamiḥ| āmaprāyavikāradāḥ āmabahulā ye rogāḥ atīsāragrahaṇyādayastatpradāḥ| prāyasthāne ‘prājya’ iti pāṭhāntare sa evārthaḥ; prāyaprājyaśabdayoḥ pracurārthatvāt| vasābhaṃ ca sakaphaṃ ca prājyaṃ ca purīṣaṃ yeṣāṃ te tathā| na sravanti ‘kledaraktādikam’ iti śeṣaḥ| na bhidyante gāḍhaviṭkaprapīḍitā api na vidīryanta iti||19-23||

ślaiṣmikānyāha– śleṣmolbaṇā ityādi| atrādau gudāṅkurā ityanuvartate| mahāmūlā dūradhātvavagāhanāḥ| ghanā nibiḍāvayavāḥ| mandarujaḥ svalpapīḍāḥ| sitāḥ śuklavarṇāḥ| utsannā dairghyeṇodgatāḥ| ucchūnā iti pāṭhe śvayathumantaḥ| pariṇāhena sthūlāḥ, stabdhāḥ anamrāḥ| vṛttāḥ pariṇāhena vartulāḥ| guravaḥ gurudravyākrāntamiva gudaṃ kurvate| sthirā niścalāḥ| picchilā aviśadāḥ| stimitā mandāḥ| ślakṣṇā maṇivanmasṛṇāḥ| kaṇḍvāḍhyāḥ kaṇḍūbahulāḥ| kaṇḍūvyapagamārthamupaspṛśyamānāḥ prīṇayantyarśasamiti sparśanapriyāḥ| ākṛtyā tu karīro marudeśodbhavo drumaḥ, panasaḥ ⁷⁶ kaṇṭakiphalaṃ, tayorasthivadābhāḥ| athavā karīro vaṃśāṅkuraḥ, tena karīrābhāḥ, panasāsthyābhāścetyarthaḥ| tathā gostanasannibhāstatsadṛśāḥ| vaṅkṣaṇāvānāhitumābaddhumiva śīlaṃ yeṣāṃ te tathā| gudapratyāsattyā vaṅkṣaṇayoḥ preraṇādyasāmarthyakāriṇaḥ| ⁷⁷ pāyuvastinābhivikarṣiṇaḥ pāyvādiṣu ākarṣaṇavat pīḍākāriṇaḥ| bastiḥ mūtrakośaḥ| upadravānāha– kāsetyādi| hṛllāsaḥ upasthitavamanamiva, praseko mukhasya gudasya vā| kṛcchraṃ mūtrakṛcchraṃ, śirojāḍyaṃ śirastimitatā, śiśirajvarakāriṇaḥ śītajvarakāriṇaḥ| klaibyaṃ strīṣvanutsāhaḥ| āmaprāyavikāradāḥ āmabahulā ye rogā atīsāragrahaṇyādayastatpradāḥ| prāyaḥsthāne ‘prājya’ iti pāṭhe sa evārthaḥ, prāyaḥ prājyaśabdayoḥ pracurārthatvāt| vasābhaṃ ca, sakaphaṃ, prājyaṃ prabhūtaṃ purīṣaṃ yeṣāṃ te tathā| sapravāhikāḥ ślaiṣmikapravāhayuktāḥ| na sravanti kledaraktādikamiti śeṣaḥ| na bhidyante gāḍhaviṭkanipīḍitā api na vidīryanta iti| pāṇḍusnigdhāstvagādayaḥ tvaṅnakhanayanavadanāni yatra puruṣāṇāṃ bhavanti||19-23||

sarvaiḥ sarvātmakānyāhurlakṣaṇaiḥ sahajāni ca |24|

sannipātārśasaḥ sahajārśasaśca lakṣaṇamāha– sarvairityādi| sarvairvātajādyarśobhavairlakṣaṇaiḥ, sarvātmakāni tridoṣajāni; tathā taireva lakṣaṇaiḥ sahajānyapyāhuḥ, teṣāmapi tridoṣajatvāt||–

sannipātārśasaḥ sahajārśasaśca lakṣaṇamāha– sarvairityādi| sarvairvātajādyarśobhavairlakṣaṇaiḥ sarvātmakāni tridoṣajāni tathā taireva lakṣaṇaiḥ ⁷⁸ sahajānyapyāhuḥ, teṣāmapi tridoṣajatvāt||–

raktolbaṇā gudekīlāḥ pittākṛtisamanvitāḥ ||24|| vaṭaprarohasadṛśā guñjāvidrumasannibhāḥ | te'tyarthaṃ duṣṭamuṣṇaṃ ca gāḍhaviṭkaprapīḍitāḥ ||25|| sravanti sahasā raktaṃ tasya cātipravṛttitaḥ | bhekābhaḥ pīḍyate duḥkhaiḥ śoṇitakṣayasambhavaiḥ ||26|| hīnavarṇabalotsāho hataujāḥ kaluṣendriyaḥ | (vā. ni. a. 7) | viṭ śyāvaṃ kaṭhinaṃ rūkṣamadhovāyurna vartate ||27||

raktārśolakṣaṇamāha– raktolbaṇā ityādi| gudekīlāḥ kīlavat kīlāḥ arśāṃsi, “haladantāt saptamyāḥ sañjñāyām” (pā. a. 6 pā. 3 sū. 1) ityaluksamāsaḥ| pittākṛtisamanvitāḥ paittikārśolakṣaṇayuktāḥ| vidrumasannibhāḥ pravālamaṇivallohitā ityarthaḥ| te gāḍhaviṭkaprapīḍitāḥ kaṭhinapurīṣayantritāḥ, duṣṭam ⁷⁹ āvilam, ⁸⁰ uṣṇaṃ ca raktaṃ sravanti| tasyeti raktasya, atipravṛttitaḥ atikṣayāt, bhekābhaḥ prāvṛṣeṇyavarṣābhvābhaḥ pītacchaviḥ, ‘puruṣaḥ’ iti śeṣaḥ| duḥkhaiḥ rogaiḥ| śoṇitakṣayasambhavairiti ⁸¹ tvakpāruṣyāmlaśītaprārthanāsirāśaithilyaiḥ (su. sū. a. 15) suśrutoktaiḥ| balaṃ sthaulyam, utsāho harṣaḥ| hataujā hataśaktiḥ| kaluṣendriya āvilacakṣuḥ, vyākulasarvendriyo vā| viṭ śyāvamiti viṭśabdo napuṃsako'pyasti, etannirdeśādeva| kāśmīrāstu carake– “viṭ śyāvā kaṭhinā rūkṣā” ityeva paṭhanti| adhovāyurna vartate gudena, pratilomagatvāt||24-27||

raktajānyāha– raktolbaṇā ityādi| gudekīlāḥ kīlavat kīlā arśāṃsi, ⁸² teṣāṃ lakṣaṇamīdṛśam– pittākṛtisamanvitāḥ paittikārśolakṣaṇayuktāḥ| ākṛtyā ca guñjā raktaguñjā, vidrumaḥ pravālamaṇistatsadṛśalohitā ityarthaḥ| te gāḍhaviṭkaprapīḍitāḥ kaṭhinapurīṣayantritāḥ| atiśayena duṣṭaṃ raktamuṣṇaṃ ca sravanti| sahasā akasmāt| tasyeti ⁸³ raktasyātipravṛttitaḥ pravartanādbhekābhaḥ prāvṛṣeṇyavarṣābhvābhaḥ pītacchaviḥ puruṣaḥ| duḥkhaiḥ rogaiḥ, śoṇitakṣayasambhavairiti śoṇitakṣaye ⁸⁴ tvakpāruṣyāmlaśītaprārthanāsirāśaithilyaiḥ suśrutoktaiḥ| balaṃ sthaulyam| utsāho harṣaḥ| hataujā hataśaktiḥ, kaluṣendriyo vyākulasarvendriyaḥ| adhovāyurna pravartate gudena, pratilomatvāt||24-27||

tanu cāruṇavarṇaṃ ca phenilaṃ cāsṛgarśasām | kaṭyūrugudaśūlaṃ ca daurbalyaṃ yadi cādhikam ||28|| tatrānubandho vātasya heturyadi ca rūkṣaṇam | śithilaṃ śvetapītaṃ ca viṭ snigdhaṃ guru śītalam ||29|| yadyarśasāṃ ghanaṃ cāsṛk tantumat pāṇḍu picchilam | gudaṃ sapicchaṃ stimitaṃ guru snigdhaṃ ca kāraṇam | śleṣmānubandho vijñeyastatra raktārśasāṃ budhaiḥ ||30|| (ca. ci. a. 14) |

idānīṃ tasyaiva raktārśaso nidānasya raktasya vātādibhedena lakṣaṇamāha– tanvityādi| ⁸⁵ tatrānubandho vātasyeti vātādiduṣṭasyaiva raktasyārambhakatvānnatu kevalasya, doṣatvābhāvāt| śithilamityādinā kaphānubandhasya| nanu, pittānubandhaḥ kuto nokta iti? ucyate, raktapittayoḥ prāyaḥ samānaliṅgatvāt| uktaṃ ca pūrvaṃ “raktolbaṇā gudekīlāḥ pittākṛtisamanvitāḥ|” iti||28-30||

idānīmasyaiva raktārśonidānasya vātādibhedena lakṣaṇamāha– tanvityādi| raktolbaṇānāmarśasāmasṛgyadīdṛśaṃ bhavati– tanu alpaṃ, kaṭyādiṣu śūlam, adhikaṃ ca daurbalyaṃ, tatra raktārśasi vātasyānubandho jñeyaḥ| yadi ca rūkṣaṇaṃ rūkṣadravyādi hetuḥ kāraṇam| śleṣmānubandhalakṣaṇamāha– raktolbaṇānāmarśasāṃ yadi śithilaṃ śvetapītaṃ ca viṭ pravartate, yadi ca snigdhaṃ guru śītalaṃ tantumatpāṇḍu picchilaṃ ⁸⁶ ca asṛkpravartate, tantumatsūtrākāraṃ, gudamapi picchilārdrastimitaṃ niścalaṃ bhavati, tasmin raktārśasi śleṣmānubandho vijñeyaḥ| guru snigdhaṃ ca tatra kāraṇaṃ hetuḥ| nanu pittānubandhaḥ kuto noktaḥ ⁸⁷ iti tat ucyate, raktapittayoḥ prāyaḥ samānaliṅgatvāt| pūrvamuktaṃ ca ``raktolbaṇā gudekīlāḥ pittākṛtisamanvitāḥ'' iti||28-30||

viṣṭambho'nnasya daurbalyaṃ kukṣerāṭopa eva ca | kārśyamudgārabāhulyaṃ sakthisādo'lpaviṭkatā ||31|| grahaṇīdoṣapāṇḍvarterāśaṅkā codarasya ca | pūrvarūpāṇi nirdiṣṭānyarśasāmabhivṛddhaye ||32|| (ca. ci. a. 14) |

pūrvarūpamāha– viṣṭambha ityādi| viṣṭambho'nnasyeti viṣṭabhyānnasyājīrṇatāgamanam āhāro vā ⁸⁸ vā viṣṭabdhaḥ āmāśaya evāvatiṣṭhate, vātavaiguṇyāt| daurbalyaṃ hīnaśaktitā| ‘viṣṭambho'ṅgasya’ iti pāṭhāntare viṣṭambho ⁸⁹ malasya, aṅgasya daurbalyam| yadyapi nidānānantaraṃ pūrvarūpaṃ vaktavyaṃ bhavati, tathā'pi nidānalakṣaṇānantaramatra pūrvarūpaṃ; nidānaliṅgayościkitsāṅgatamatvapratipādanārthaṃ tayoḥ pūrvamabhidhānam; athavā'vaśyavaktavyānāṃ kāmacārādabhidhānamiti| evamanyatrāpi vyatikrame draṣṭavyam| kukṣerāṭopo ‘guḍaguḍāśabdaḥ’ iti cakraḥ, ⁹⁰ ‘tanatanī’ iti guṇākaraḥ; ‘rujāpūrvakaḥ kṣobhaḥ’ iti gadādharaḥ, purīṣavṛddhilakṣaṇe ca ‘āṭopam ādhmānam’ iti vivṛtavān; etacca na sarvatra, gulmapūrvarūpe āṭopādhmānayorubhayorapi pāṭhāt| udgārabāhulyamadhoniruddhasya ⁹¹ vāyorūrdhvagamanāt| sakthisādo jaṅghāvasādaḥ| grahaṇīdoṣapāṇḍvarteḥ grahaṇīdoṣayuktapāṇḍurogasya udarasya cāśaṅkā, teṣāṃ lakṣaṇadarśanāt| ‘grahaṇīdoṣapāṇḍvartiḥ’ iti pāṭhāntare grahaṇīdoṣasya pāṇḍoḥ pāṇḍurogasya cārtiḥ pīḍā syāt| abhivṛddhaye utpattyarthamiti||31-32||

viṣṭambho'nnasyetyādi| viṣṭambho'nnasya ajīrṇatāgamanam, āhāro vā viṣṭabdha āmāśaya evāvatiṣṭhate, vātavaiguṇyāt| daurbalyaṃ hīnaśaktitā| viṣṭambho'ṅgasyeti pāṭhāntare viṣṭambho malasya, aṅgasya daurbalyam| kukṣerāṭopaḥ guḍaguḍāśabda iti cakraḥ, talatala iti guṇākaraḥ, rujāpūrvakaḥ kṣobha iti gadādharaḥ, ⁹² purīṣavṛddhilakṣaṇe āṭopaḥ ādhmānamiti mādhavaḥ| udgārabāhulyaṃ adhoniruddhasya vāyorūrdhvagatatvāt| sakthisādo jaṅghāvasādaḥ, alpaviṭkatā alpapurīṣatvam| grahaṇīrogapāṇḍvarterāśaṅketi grahaṇīrogayuktasya pāṇḍurogodarasya cāśaṅkā, eteṣāṃ lakṣaṇadarśanāt| grahaṇīrogapāṇḍvartiriti pāṭhāntare grahaṇīrogasya pāṇḍoḥ pāṇḍurogasya cārtiḥ pīḍā syāditi||31-32||

pañcātmā mārutaḥ pittaṃ kapho gudavalitrayam | sarva eva prakupyanti gudajānāṃ samudbhave ||33|| tasmādarśāṃsi duḥkhāni bahuvyādhikarāṇi ca | sarvadehopatāpīni prāyaḥ kṛcchratamāni ca ||34|| (ca. ci. a. 14) |

nanu, gudadeśaduṣṭyā ⁹³ gudajasyotpādāt kathaṃ sarvadehe kṛśatvakṛṣṇatvādirūpā duṣṭirityata āha– pañcātmetyādi| pañcātmā pañcasvarūpaḥ, ⁹⁴ prāṇāpānasamānodānavyānabhedāt; ⁹⁵ iti teṣāṃ sthānāni| evaṃ liṅgavipariṇāmāt pañcātmakatvaṃ pitte'pi yojyaṃ, pittaṃ ⁹⁶ hyālocakarañjakasādhakapācakabhrājakabhedādbhinnam| evaṃ kapho'pi pañcātmā, hṛdayāmāśayajihvāśiraḥsandhiṣu krameṇāvalambakakledakabodhakatarpakaśleṣmakabhedāt| yadāha gautamaḥ– “śleṣmā tu ⁹⁷ pañcavidhoraḥsthaḥ ⁹⁸ kledakādisvakarmaṇā| kaphadhāmnāṃ ca sarveṣāṃ yat karotyavalambanam|| ato'valambakaḥ, śleṣmā yastvāmāśayasaṃśritaḥ| kledakaḥ so'nnasaṅghātakledanād, rasabodhanāt|| bodhako rasanāsthastu, ⁹⁹ śiraḥsaṃstho'kṣitarpaṇāt| tarpakaḥ, śleṣmakaḥ samyak śleṣaṇāt sandhiṣu sthitaḥ||” iti| ¹⁰⁰ gudavalītrayasya ca prakopo vikṛtatvaṃ, sannidhānasyāpyabhāvāt, valīduṣṭeraprāpteśca| sarva eveti uktamārutādaya eveti| ¹⁰¹ tasmādityādi| bahuvyādhikarāṇīti jaṭharāgnimāndyādyupadravakarāṇi| prāyaḥ kṛcchratamānīti prāyograhaṇādasādhyāni sukhasādhyānyapi||33-34||

nanu, gudadeśaduṣṭyā gudajasyotpādāt kathaṃ sarvadehe kṛśatvādirūpā duṣṭirityāha– pañcātmetyādi| gudajānāṃ samudbhave sambhave ete sarva evoktasvarūpā vātādayaḥ prakupyanti| pañcātmā pañcasvarūpaḥ, prāṇāpānasamānodānavyānabhedāt| teṣāṃ sthānāni– “hṛdi prāṇo gude'pānaḥ samāno nābhisaṃsthitaḥ| udānaḥ kaṇṭhadeśe ca vyānaḥ sarvaśarīragaḥ”iti| evaṃ pañcātmā vāyuḥ kathyate “yo'nilo vaktrasañcārī sa prāṇo nāma dehadhṛk| so'nnaṃ praveśayatyantaḥ prāṇāṃścaivāvalambate|| kupitaḥ kurute cāpi hikkāśvāsādikān gadān| udāno nāma yastūrdhvamupaiti pavanottamaḥ|| tena bhāṣitagītādiviśeṣaścābhivartate| ūrdhvajatrugatān rogān karoti kupitaśca saḥ|| āmapakvāśayacaraḥ samāno'gnisahāyavān| annaṃ pacati tajjāṃśca vikārān pravyanakti saḥ|| ¹⁰² gulmāgnisādātīsārānpraduṣṭaśca karoti saḥ| pakvāśayāśrayo'pānaḥ kāle karṣati cāpyadhaḥ| vātamūtrapurīṣāṇi śukragarbhārtavāni ca| krudghaśca kurute rogān ghorānvastigudāśrayān|| sarvadehasaro vyāno rasasaṃvāhanodyataḥ| svedāsṛksrāvaṇaścāpi pañcadhā ceṣṭayatyapi|| kruddhaśca kurute rogān prāyaśaḥ sarvadehagān| śukradoṣāḥ pramehāśca vyānāpānaprakopajāḥ|| yugapat kupitāścāmī dehaṃ bhindyurasaṃśayam”iti| pañcātmā vāyuḥ ‘rajoguṇamayaḥ sūkṣmaḥ śīto rūkṣo laghuścalaḥ’ iti| evaṃ pañcātmakatvaṃ pitte yojyam, ālocakarañjakasādhakapācakabhrājakabhedāt;”pācakaṃ bhrājakaṃ caiva rañjakālocake tathā| sādhakaṃ ceti pañcaiva pittanāmānyanukramāt|| svāśaye pācakaṃ pittamagnirūpaṃ tilonmitam| bhrājakaṃ kāntidaṃ yattu lepābhyaṅgādipācakam|| rañjakaṃ tu ¹⁰³ yakṛtplīhostadrasaṃ śoṇitaṃ vrajet| ¹⁰⁴ ālocakaṃ sthitaṃ netre rūpadarśanakāri tat|| sādhakaṃ hṛdaye tiṣṭhenmedhāprajñākaraṃ ca tat| pittamuṣṇaṃ dravaṃ pītaṃ nīlaṃ sattvaguṇottaram|| kaṭutiktarasaṃ jñeyaṃ vidagdhaṃ cāmlatāṃ vrajet” iti| teṣāṃ sthānāni ālocakaṃ netrayoḥ, rañjakaṃ yakṛtplīhnoḥ, sādhakaṃ hṛdi, pācakaṃ pakvāmāśayayormadhye, bhrājakaṃ tvaci| evaṃ kapho'pi pañcātmā, ālambakakledakabodhakatarpakaśleṣmakabhedāt| teṣāṃ sthānāni| yadāha gautamaḥ– “śleṣmā ¹⁰⁵ pañcavidhastatra trikasaṃsthaḥ svavīryataḥ| ¹⁰⁶ hṛdayasthaḥ svavīryācca tata ¹⁰⁷ evāmbukarmaṇā|| kaphadhāmnāmaśeṣāṇāṃ yatkarotyavalambanam| ato'valambakaḥ śleṣmā yastvāmāśayasaṃsthitaḥ|| kledakaḥ so'nnasaṅghātakledanādrasabodhanāt| bodhako ¹⁰⁸ rasanāsyastu ¹⁰⁹ śiraḥsaṃstho'kṣitarpaṇāt|| tarpakaḥ ¹¹⁰ śleṣmakaḥ sandheḥ śleṣaṇātsandhisaṃsthitaḥ| uraḥkaṇṭhaḥśiraḥsandhiparvāṇyāmāśayo rasaḥ| medo ghrāṇaṃ ca jihvā ca kaphasthānamuro bhṛśam”iti| evaṃ doṣatrayāṇāṃ pañcātmakatvaṃ siddham| pañcātmāno doṣāstrayaḥ ¹¹¹ gudavalitrayaṃ ca gudajānāṃ samudbhave ¹¹² sarva eva prakupyanti, gudavalitrayasya prakopo vikṛtatvaṃ pravahaṇādisvakāryākartṛtvam| anye tu gudavalītraya iti paṭhanti vyākhyānayanti ca– sarve doṣā gudavalītraye kupyanti| tannātiyuktaṃ, prāṇodānayostatrāsannidhānāt| anye vyākhyānayanti– gudavalītraye gudajānāṃ samudbhave utpattau sati sarva eva doṣāḥ prakupyantīti| tasmādarśāṃsi duḥkhapradāni ¹¹³ bahuvyādhikarāṇi jaṭharāgnimāndyādyupadravakarāṇi| ataḥ sarvaśarīratāpīni| prāyaḥ kṛcchratamānīti prāyograhaṇādasādhyāni| suśrutastu– “sarvāḥ syurvalayo yeṣāṃ durnāmabhirupadrutāḥ| tābhistu prahito vāyurapānaḥ sannivartate|| tato ¹¹⁴ vyānena saṅgamya jyotirgṛhṇāti dehinām|” iti||33-34||

bāhyāyāṃ tu valau jātānyekadoṣolbaṇāni ca | arśāṃsi sukhasādhyāni na cirotpatitāni ca ||35|| dvandvajāni dvitīyāyāṃ valau yānyāśritāni ca | kṛcchrasādhyāni tānyāhuḥ parisaṃvatsarāṇi ca ||36|| sahajāni tridoṣāṇi yāni cābhyantarāṃ valim | jāyante'rśāṃsi saṃśritya tānyasādhyāni nirdiśet ||37|| (ca. ci. a. 14) |

uktavātādyarśasāṃ sādhyatvādikamāha– ¹¹⁵ bāhyāyāmityādi| na cirotpatitānīti anatikrāntasaṃvatsarāṇi| parisaṃvatsarāṇīti parigato'tikrāntaḥ saṃvatsaro yaistāni tathā| yāni tu bāhyavalijātāni dvidoṣolbaṇāni tāni kṛcchrāṇi, tridoṣajāni yāpyānītyuktam; evaṃ dvitīyāyāmekadoṣolbaṇāni kṛcchrāṇi, dvidoṣolbaṇāni yāpyāni, tridoṣolbaṇānyasādhyāni; evaṃ tṛtīyāyāmekadoṣolbaṇāni yāpyāni, śeṣāṇyasādhyāni| yadyāpyaṃ pratyākhyeyaṃ vā ¹¹⁶ taddoṣavalibhede'pyasādhyameva; yaduktaṃ carakeṇa– “nāsādhyaḥ sādhyatāṃ yāti sādhyo yāti tvasādhyatām|” (ca. ni. a. 8) iti||35-37||

sukhasādhyānyāha– bāhyāyāmityādi| ¹¹⁷ na cirotpatitānīti anatikrāntasaṃvatsarāṇi| kṛcchrasādhyānyāha– ¹¹⁸ dvandvajāni dvitīyāyāṃ valau yānyarśāṃsi kṛcchrasādhyāni tānyāhuḥ| parisaṃvatsarāṇi ca parigato'tikrāntaḥ saṃvatsaro yaistāni kṛcchrasādhyāni yāpyānītyarthaḥ| asādhyānyāha– sahajānītyādi| yāni sahajāni tānyasādhyāni, ¹¹⁹ tathā tridoṣajānyuttarakālajānyapi, ¹²⁰ yānyabhyantaraṃ valiṃ saṃśritya ¹²¹ jāyanta” ityanvayaḥ| tatrāpi viśeṣaḥ kathyate– yāni tu bāhyavalijātāni dvidoṣolbaṇāni tāni kṛcchrāṇi, tridoṣāṇi yāpyānītyuktam; evaṃ dvitīyāyāmekadoṣolbaṇāni kṛcchrāṇi tridoṣolbaṇāni asādhyāni; evaṃ tṛtīyāyāṃ ekadoṣolbaṇāni yāpyāni śeṣāṇyasādhyāni||35-37||

śeṣatvādāyuṣastāni catuṣpādasamanvite | yāpyante dīptakāyāgneḥ pratyākhyeyānyato'nyathā ||38|| (ca. ci. a. 14) |

asādhyo ¹²² hi ¹²³ dvividho yāpyapratyākhyeyabhedāt, tatra yadyāyuḥśeṣo'sti catuṣpādasampattiśca tadā yāpyatvamanyathā pratyākhyeyatvamityāha– śeṣatvādityādi| catuṣpādasamanvite ‘arśorogiṇi’ iti śeṣaḥ| samanvita iti bhāve ktaḥ, tena ‘catuṣpādasamanvaye sati’ iti cakraḥ||38||

asādhyasya yāpyapratyākhyeyabhedena dvaividhyamāha– śeṣatvādityādi| ¹²⁴ yadyāyuṣaḥ śeṣo'sti tadā catuṣpādasamanvite tānyarśāṃsi yāpyante ‘ ¹²⁵ rogiṇam’ iti śeṣaḥ| kīdṛśe rogiṇi? dīptakāyāgnau, punaḥ kīdṛśe? catuṣpādasamanvite; ato'nyathā viparītāni pratyākhyeyāni asādhyāni| pādacatuṣṭayaṃ yathā– rogī bhiṣak, paricāraka auṣadhaṃ ca| yadā rogī bhiṣagvākyakṛdāḍhyo jitendriyaḥ, vaidyaḥ śāstre karmaṇi kuśalo nirlobhaḥ ¹²⁶ satyadharmaparaśca, paricāraka āptaḥ kulīno'nalasaḥ āturacchandānuvartī ca, auṣadhaṃ navaṃ rasavīryādisampannaṃ ca| taduktam– “vaidyo vyādhyupasṛṣṭaśca bheṣajaṃ paricārakaḥ| ete pādāścikitsāyāḥ karmasādhanahetavaḥ| tattvādhigataśāstrārtho dṛṣṭakarmā svayaṅkṛtī| laghuhastaḥ śuciḥ śūraḥ sajjopaskṛtabheṣajaḥ|| pratyutpannamatirdhīmān vyavasāyī viśāradaḥ| satyadharmaparo yaśca sa bhiṣakpāda ucyate|| āyuṣmān sattvavān sādhyo dravyavānātmavānapi| ucyate vyādhitaḥ ¹²⁷ pādo vaidyavākyakṛdāstikaḥ|| praśastadeśasambhūtaṃ praśaste'hani coddhṛtam| alpamātraṃ mahāvīryaṃ gandhavarṇarasānvitam|| doṣaghnamaglānikaramavikāri viparyaye| samīkṣya kāle dattaṃ ca bheṣajaṃ pāda ucyate|| snigdho'jugupsurbalavān yukto vyādhitarakṣaṇe| vaidyavākyakṛdaśrāntaḥ pādaḥ paricaraḥ smṛtaḥ” iti| ¹²⁸ eṣā catuṣpādasampattiḥ sā cāyuṣaḥ śeṣatvādghaṭate||38||

haste pāde mukhe nābhyāṃ gude vṛṣaṇayostathā | śotho hṛtpārśvaśūlaṃ ca yasyāsādhyo'rśaso hi saḥ ||39|| hṛtpārśvaśūlaṃ sammohaśchardiraṅgasya rugjvaraḥ | tṛṣṇā gudasya pākaśca nihanyurgudajāturam ||40|| (ca. ci. a. 14) | tṛṣṇā arocakaśūlārtamatiprasrutaśoṇitam | śothātisārasaṃyuktamarśāṃsi kṣapayanti hi ||41|| (su. sū. a. 33) |

upadravādasādhyatvamāha– haste ityādi| hastapādādiśotho milito'sādhyalakṣaṇam| atra hṛtpārśvaśūlasammohādi vyastaṃ samastaṃ ¹²⁹ vā||39-41||

athopadravādasādhyatvamāha– hasta ityādi| yasya hastapādādiṣu śvayathuḥ syāt hṛtpārśvaśūlaṃ ca sa arśaso'rśorogī asādhyaḥ| asādhyasya lakṣaṇamāha– hṛdityādi| hṛtpārśvaśūlaṃ sammohaśca; tathā hṛtpārśvādi samastaṃ vyastaṃ ca, aṅgasya ruk pīḍā, gudamuṣkayoḥ pākaśca, gudajāni arśāṃsi, taṃ naraṃ ghnantītyarthaḥ| raktārśo'sādhyatvamāha– ¹³⁰ tṛṣṇetyādi| ¹³¹ atiprasrutaśoṇitaṃ tṛṣṇārocakādyupadravayuktaṃ puruṣamarśāṃsi ¹³² kṣapayanti nāśayanti, hi pādapūraṇe||39-41||

meḍhrādiṣvapi vakṣyante yathāsvaṃ, nābhijāni ca | gaṇḍūpadāsyarūpāṇi ¹³³ picchilāni mṛdūni ca ||42|| (vā. ni. a. 7) |

atha meḍhrajādīnāṃ svarūpamāha– ¹³⁴ meḍhrādiṣvityādi| meḍhrādiṣvapi vakṣyante yathāsvamityantena chedaḥ| tena ‘nāsārśa’ ityādivyapadeśaḥ| gaṇḍūpadāsyarūpāṇi ¹³⁵ kiñculakamukhasadṛśāni||42|| ¹³⁶

sthānāntareṣvanyānyapyarśāṃsyāha– meḍhrādiṣvityādi| māṃsāṅkuratvādeṣāmarśasāṃ vyapadeśaḥ, sarṣapādiṣu sneheṣu tailavyapadeśavat| meḍhraḥ śephaḥ, ādiśabdāccakṣurnāsādīni| yathāsvaṃ yathāsthānam| nābhijāni tu gaṇḍūpadāsyarūpāṇi kiñculamukhasadṛśāni ākṛtyetyarthaḥ| tāni picchilāni mṛdūni ca bhavanti||42||

vyāno gṛhītvā śleṣmāṇaṃ karotyarśastvaco bahiḥ | kīlopamaṃ sthirakharaṃ carmakīlaṃ tu tadviduḥ ||43|| (vā. ni. a. 7) |

carmakīlasamprāptimāha– vyāna ityādi| vyāno vāyuḥ, “etacca gudauṣṭhadeśa eva nānyatra iti kārtikakuṇḍādayaḥ”||43||

carmakīlasamprāptimāha– vyāna ityādi| vyāno vāyuḥ, kaphaṃ gṛhītvā saṅgṛhya, tvaco bahiḥ kīlasadṛśamarśaḥ kuryāt, sthiraṃ niścalaṃ, taṃ carmakīlaṃ prāhuḥ| tvaco bahiriti gudauṣṭhaṃ parityajyetyarthaḥ, tatra tvarśasāmeva sambhavatvāt; etacca gudoṣṭhadeśa eva nānyatreti kārtikakuṇḍādayaḥ||43||

vātena todapāruṣyaṃ pittādasitavaktratā | śleṣmaṇā snigdhatā ¹³⁷ cāsya grathitatvaṃ savarṇatā ||44|| (vā. ni. a. 7) |

tasyaiva vātādibhedena lakṣaṇamāha– vātenetyādi| savarṇatā gātrasavarṇatā|44||

tasyaiva vātādilakṣaṇamāha– vātenetyādi| vātena todaḥ pīḍāviśeṣaḥ, pāruṣyaṃ paruṣatā; pittāt asitaṃ kiñcitkṛṣṇaṃ ¹³⁸ vaktraṃ ca; śleṣmaṇā snigdhatā, granthisādṛśyaṃ savarṇatā gātrasamānavarṇatā| doṣāḥ prakupitā meḍhramāṃsaśoṇite pradūṣya kaṇḍūḥ kurvanti, tataḥ kaṇḍūyatāṃ kṣatam| “tasmin kṣate prarohāḥ syurmāṃsajā rudhirasravāḥ| vināśayanti śephaṃ te ghnanti puṃstvaṃ ca satvaram” iti| śepho meḍhraṃ, puṃstvaṃ śukram| “tathā yonau ca te ¹³⁹ duṣṭā gaṇḍūpadamukhākṛtīn|| durgandhānsukumārāṃśca picchilān janayanti hi”iti| māṃsāṅkurāniti śeṣaḥ| cakārādyonerārtavaṃ ca ghnanti| “tairevordhvagatairdoṣaiḥ karṇajārśastu jāyate| bādhiryaṃ śūlamatyugraṃ satataṃ karṇapūtitā|| netrajeṣu ¹⁴⁰ jalasrāvo vedanā cāpyadarśanam| aśrūṇāṃ jāyate vartmā'varodho'rśassu santatam|| ghrāṇajeṣu pratiśyāyaḥ kṛcchrocchvāsaḥ śirovyathā| kṣavathuḥ pūtivaktraṃ ca vākyaṃ syādanunāsikam|| mukhārśassu ca kaṇṭhauṣṭhatālumadhyaikajanmasu| ¹⁴¹ syāddhi gadgadavākyatvaṃ rasājñānaṃ mukhāmayāḥ||” iti||44||

iti śrīmādhavakaraviracite mādhavanidāne'rśonidānaṃ samāptam ||5||

iti śrīvijarakṣitakṛtāyāṃ madhukośavyākhyāyāmarśonidānaṃ samāptam||5|| ¹⁴²

iti śrīvaidyavācaspatikṛte ātaṅkadarpaṇe rugviniścayavyākhyāyāmarśonidānam||5||

pāṭhāntarāḥ

1 . ‘parasparasambandhā ... ’ iti pā.| ↩
2 . ‘pṛthagityādi’ iti pāṭhaḥ kvacitpustake nopalabhyate | ↩
3 . ‘dūṣitatvāt’ iti pā.| ↩
4 . ‘gaṇitāni’ iti pā.| ↩
5 . ‘ekadoṣajanitanirdiṣṭasya sādhyatvasyāyogāt’ iti pā.| ↩
6 . ‘saṅkhyāyām’ iti pā.| ↩
7 . ardhapañcamamaṅgulaṃ yasmin tattathā; etena sārdhacaturaṅgulapramāṇaṃ gudamityarthaḥ| ↩
8 . yavādhyardhaṃ sārdhayavam, ardhāṅgulapramāṇamityarthaḥ; aṅgulasya triyavapramāṇatvāt|| ↩
9 . ‘sārdhaikāṅgulamānena tadanye'pi prakīrtite||’ iti pāṭhaḥ kvacitpustake nopalabhyate | ↩
10 . ‘pṛthagityādi’ iti pāṭhaḥ kvacitpustake nopalabhyate | ↩
11 . ‘sahajāniti evam’ iti pā.| ↩
12 . ‘doṣapoṣitatvāt’ iti pā.| ↩
13 . ‘ ... rabdhatvāt’ iti pā.| ↩
14 . ‘saṃsargajam’ iti pā.| ↩
15 . ‘tam’ iti pāṭhaḥ kvacitpustake nopalabhyate | ↩
16 . ‘vikṛtisamavāyā ... ’ iti pā.| ↩
17 . ‘doṣā ityādi’ iti pāṭhaḥ kvacitpustake nopalabhyate | ↩
18 . ‘yat’ iti pā.| ↩
19 . ‘nāsikācakṣu ... ’ iti pā.| ↩
20 . ‘ityeke’ iti pā.| ↩
21 . ‘kaṭādeḥ’ iti pā.| ↩
22 . ‘kaṭāde ... ’ iti pā.| ↩
23 . ‘dvitīye’ iti pāṭhaḥ kvacitpustake nopalabhyate | ↩
24 . ‘cābhyāso’ iti pā.| ↩
25 . ‘vātaśamanatvapāṭhāt’ iti pā.| ↩
26 . atra ‘ātapasya uṣṇam’ iti kvacitpustake adhikaḥ pā.| ↩
27 . ‘paiṣṭyādimadyasya’ iti pā.| ↩
28 . ‘kāmarūpa’ iti pā.| ↩
29 . ‘ātapasyoṣṇaguṇasyāpi udbhūtarūkṣatvāt vātaprakopakatvameva| anyatsubodham’ iti pāṭhaḥ kvacitpustake nopalabhyate | ↩
30 . ‘vyāyāmāgnyātapaśramāḥ’ iti pā. | ↩
31 . ‘pittārśaso nidānamāha’ iti pā.| ↩
32 . ‘śleṣmolbaṇānāmuddiṣṭametat’ iti pā. | ↩
33 . ‘śleṣmārśasāṃ nidānamāha’ iti pā.| ↩
34 . ‘madhuretyādi’ iti pāṭhaḥ kvacitpustake nopalabhyate | ↩
35 . ‘nidānamelakena lakṣaṇamelakena’ ityasya sthāne ‘nidānamelake lakṣaṇamelake ’ iti pā.| ↩
36 . ‘hetvityādi’ iti pāṭhaḥ kvacitpustake nopalabhyate | ↩
37 . ‘tu’ iti pāṭhaḥ kvacitpustake nopalabhyate | ↩
38 . ‘saha’ iti pāṭhaḥ kvacitpustake nopalabhyate | ↩
39 . ‘tantre'nusmartavyam’ iti pā.| ↩
40 . ‘śirā ... ’ iti pā.| ↩
41 . ‘‘kānicit’’ iti pā.| ↩
42 . ‘sati’ iti pāṭhaḥ kvacitpustake nopalabhyate | ↩
43 . ‘sarva ityādi’ iti pāṭhaḥ kvacitpustake nopalabhyate | ↩
44 . ‘ca’ iti pāṭhaḥ kvacitpustake nopalabhyate | ↩
45 . ‘śirā ... ’ iti pā.| ↩
46 . ‘ ... hṛdayālepāsekaprabhṛtibhiḥ’ iti pā.| ↩
47 . atra ‘arśāsāmpūrvarūpamāha– arśasāmabhivṛddhaye utpatyarthametāni pūrvarūpāni nirdiṣṭāni’ iti kvacitpustake adhikaḥ pā.| ↩
48 . ‘ ... hṛdrogā ... ’ iti pā. | ↩
49 . ‘ta eva’ iti pāṭhaḥ kvacitpustake nopalabhyate | ↩
50 . ‘gojihvasparśavat’ iti pā.| ↩
51 . ‘vakrā dhanuḥkāṣṭhādivat’ iti pāṭhaḥ kvacitpustake nopalabhyate | ↩
52 . ‘gudāṅkurā ityādi’ iti pāṭhaḥ kvacitpustake nopalabhyate | ↩
53 . ‘vikalpe vakṣyamāṇam’ ityasya sthāne ‘vikalpeṣu vakṣyamāṇeṣu’ iti pā.| ↩
54 . ‘mitha iti’ iti pāṭhaḥ kvacitpustake nopalabhyate | ↩
55 . ‘dhanurvat’ iti pā.| ↩
56 . ‘vimvādiphalavat’ iti pā.| ↩
57 . ‘vimvī’ iti pā.| ↩
58 . ‘karkandhuḥ kolabadarī, kārpāsī vanakārpāsī| keciditi kecitkadambapuṣpābhāḥ sthūlāḥ, kecitsiddhārthakopamāḥ sarṣapavatsūkṣmāḥ’ iti pāṭhaḥ kvacitpustake nopalabhyate | ↩
59 . ‘kṣavathviti’ iti pāṭhaḥ kvacitpustake nopalabhyate | ↩
60 . atra ‘tṛḍgrahaḥ’ iti kvacitpustake adhikaḥ pā.| ↩
61 . atra ‘tairiti’ iti kvacitpustake adhikaḥ pā.| ↩
62 . ‘tairgudāṅkuraiḥ’ iti pā.| ↩
63 . ‘grathilaṃ grathitaṃ pāṣāṇavat, stokamalpaṃ, sapravāhikaṃ vātapravāhikālakṣaṇopetaṃ; ruk śūlaṃ, picchā picchilo dravabhāgastenānugatam’ iti pāṭhaḥ kvacitpustake ‘īdṛgvarcaḥ upaveśyate tyājyate, gudeneti śeṣaḥ|’ etatpaścādupalabhyate | ↩
64 . ‘ ... ratimohadāḥ’ iti pā. | ↩
65 . atra ‘tanvasram’ iti kvacitpustake adhikaḥ pā.| ↩
66 . ‘yavāvayavavat madhya’ iti pā.| ↩
67 . ‘harit’ iti pāṭhaḥ kvacitpustake nopalabhyate | ↩
68 . ‘ityādi| pittottarāḥ’ iti pāṭhaḥ kvacitpustake nopalabhyate | ↩
69 . ‘vasābhasakaphaprājyapurīṣāḥ’ iti pā. | ↩
70 . ‘śleṣmolbaṇā ityādau’ iti pā.| ↩
71 . ‘dūradhātvavagāhinaḥ’ iti pā.| ↩
72 . ‘prīṇayantyarśāṃsīti’ iti pā.| ↩
73 . ‘tathā gostanasannibhāḥ gostanasadṛśā ityarthaḥ’ iti pāṭhaḥ kvacitpustake nopalabhyate | ↩
74 . ‘ānaddhubaddhumiva’ iti pā.| ↩
75 . ‘agnimārdavaṃ vahnimāndyaṃ, chardirvamiḥ’ iti pāṭhaḥ kvacitpustake nopalabhyate | ↩
76 . ‘kaṇṭakīphalam’ iti pā.| ↩
77 . ‘ ... nābhyavakarṣiṇaḥ’ iti pā.| ↩
78 . ‘sahajānyāhuḥ’ iti pā.| ↩
79 . ‘āvilam’ iti pāṭhaḥ kvacitpustake nopalabhyate | ↩
80 . ‘uṣṇaṃ ca raktam’ ityasya sthāne ‘raktamuṣṇaṃ ca’ iti pā.| ↩
81 . ‘ ... śirāśaithilyaiḥ’ iti pā.| ↩
82 . ‘teṣāṃ lakṣaṇamīdṛśam’ iti pāṭhaḥ kvacitpustake nopalabhyate | ↩
83 . ‘raktasyātipravṛttitaḥ pravartanādbhekābhaḥ’ ityasya sthāne ‘raktasyātipravartanādbhekābhaḥ’ iti pā.| ↩
84 . ‘tvacipāruṣyā ... śirāśaithilyaiḥ’ iti pā.| ↩
85 . ‘tatrānubandho vātasyeti’ iti pāṭhaḥ kvacitpustake nopalabhyate | ↩
86 . ‘ca’ iti pāṭhaḥ kvacitpustake nopalabhyate | ↩
87 . atra ‘iti tat’ iti kvacitpustake adhikaḥ pā.| ↩
88 . atra ‘vā’ iti kvacitpustake adhikaḥ pā.| ↩
89 . ‘ālasyam’ iti pā.| ↩
90 . ‘talatalamiti’ iti pā.| ↩
91 . ‘rūrdhvagatvāt’ iti pā.| ↩
92 . ‘purīṣavṛddhilakṣaṇotrāṭopaḥ’ iti pā.| ↩
93 . ‘gudajaṃ syāt, gudasyopādānātkatham’ iti pā.| ↩
94 . ‘“hṛdi prāṇo gude'pānaḥ samāno nābhisaṃsthitaḥ|| udānaḥ kaṇṭhadeśe syādvyānaḥ sarvaśarīragaḥ||’ iti pā.| ↩
95 . atra ‘iti teṣāṃ sthānāni|’ iti kvacitpustake adhikaḥ pā.| ↩
96 . ‘ālocakaṃ netrayoḥ, rañjakaṃ yakṛtplīhnoḥ, sādhakaṃ hṛdi, pācakaṃ pakvāmāśayayormadhye, bhrājakaṃ tvacīti|’ iti pā.| ↩
97 . ‘pañcadhoraḥsthaḥ’ iti pā.| ↩
98 . ‘śleṣmakādi ... ’ iti pā.| ↩
99 . ‘śiraḥsaṃstho'kṣatarpaṇāt’ iti pā.| ↩
100 . kvacitpustake ‘gudavalītrayasya ca prakopo vikṛtatvam’ ityasya sthāne ‘gudavalitraye pravāhaṇādiṣu svakāryākartṛtvaṃ ca| iti pāṭhāntaraṃ na yuktaṃ, tatra prāṇodānayoḥ’ iti pā.| ↩
101 . ‘tasmādityādi’ iti pāṭhaḥ kvacitpustake nopalabhyate | ↩
102 . ‘gulmāgnisaṅgātīsārānpranaṣṭāśca’ iti pā.| ↩
103 . ‘yakṛtplīhostadvasam’ iti pā.| ↩
104 . ‘ālocakaṃ sthitam’ ityasya sthāne ‘ālocakamubhau’ iti pā.| ↩
105 . ‘pañcavidhorastha’ iti pā.| ↩
106 . ‘hṛdayasthaḥ svavīryācca’ ityasya sthāne ‘hṛdayasthānnavīryācca’ iti pā.| ↩
107 . ‘evāmla ... ’ iti pā.| ↩
108 . ‘rasanāsthastu’ iti pā.| ↩
109 . ‘śiraḥsaṃstho'kṣatarpaṇāt’ iti pā.| ↩
110 . ‘śleṣmakaḥ’ iti pāṭhaḥ kvacitpustake nopalabhyate | ↩
111 . ‘gudavalitraye’ iti pā.| ↩
112 . ‘siddha’ iti pā.| ↩
113 . ‘bahuvyādhikarāṇi jaṭharāgnimāndyādyupadravakarāṇi’ ityasya sthāne ‘bahuvyādhikaratvājjaṭharāgnimāndyādyupakaraṇāni’ iti pā.| ↩
114 . ‘vyānenāpi ca’ iti pā.| ↩
115 . ‘bāhyāyāṃ tvityādi’ iti pā.| ↩
116 . ‘tridoṣaṃ tṛtīyavalau tvasādhyameva’ iti pā.| ↩
117 . atra ‘sukhasādhyānyapi’ iti kvacitpustake adhikaḥ pā.| ↩
118 . ‘dvandvajāni dvitīyāyāṃ valau yānyarśāṃsi kṛcchrasādhyāni tānyāhuḥ| parisaṃvatsarāṇi ca’ iti pāṭhaḥ kvacitpustake nopalabhyate | ↩
119 . ‘tadā’ iti pā.| ↩
120 . ‘yānyabhyantarāvalim’ iti pā.| ↩
121 . ‘jāyanta” ityanvayaḥ| tatrāpi viśeṣaḥ kathyate’ ityasya sthāne ‘jātāni ekadoṣajātāni tānyapyasādhyāni tathā’ iti pā.| ↩
122 . atra ‘hi ’ iti kvacitpustake adhikaḥ pā.| ↩
123 . ‘dvidhā’ iti pā.| ↩
124 . ‘yadāyuṣaḥ’ iti pā.| ↩
125 . ‘rogiṇīti’ iti pā.| ↩
126 . ‘satyadharmaśca’ iti pā.| ↩
127 . ‘pādau’ iti pā.| ↩
128 . ‘eṣā catuṣpādasampattiḥ’ iti pāṭhaḥ kvacitpustake nopalabhyate | ↩
129 . ‘ca’ iti pā.| ↩
130 . ‘tṛṣṇetyādi’ iti pāṭhaḥ kvacitpustake nopalabhyate | ↩
131 . ‘atiprastutaśoṇitam’ iti pā.| ↩
132 . ‘kṣapayanti nāśayanti’ ityasya sthāne ‘nihanti’ iti pā.| ↩
133 . ‘picchalāni’ iti pā. | ↩
134 . ‘meḍhrādiṣvapītyādi’ iti pā.| ↩
135 . ‘kiñculi(lu)ka ... ’ iti pā.| ↩
136 . ‘sthānāntarāṇyarśasāmāha’ iti pā.| ↩
137 . ‘tasya’ iti pā. | ↩
138 . ‘raktatvam’ iti pā.| ↩
139 . ‘duṣṭān’ iti pā.| ↩
140 . ‘jalasrāvī’ iti pā.| ↩
141 . ‘syāt’ iti pā.| ↩
142 . ‘ityātaṅkadarpaṇe nidānavyākhyāyāmarśonidānam||5||’ iti pā.| ↩