14. arocakanidānam · e-Mādhavanidāna

ūrdhvagavikārasādharmyādarocakamāha– vātādibhirityādi| ekaikaśo vātādibhistrayaḥ, sannipātenaikaḥ, ¹ śokādinā gandhāntenāgantureka eva gaṇanīyaḥ, yataḥ pañcānāmekaṃ lakṣaṇaṃ vakṣyati; suśrute coktam– “bhaktopaghātamiha pañcavidhaṃ vadanti|” (su. u. taṃ. a. 57) iti| śokādijastu yadyapi ² vātādijaḥ, tathā'pi hetupratyanīkacikitsākaraṇārthaṃ pṛthaguktaḥ| atilobho'trāhitasya satatopayogahetutayā doṣaprakopaka iti darśayati| arocakāḥ syuriti chedaḥ|1|–

ūrdhvagavikārasādharmyādarocakamāha– vātādibhiriti| ekaikaśo vātādibhistrayaḥ, sannipātenaikaḥ, śokabhayādinā''gantureka eva gaṇanīyaḥ, yataḥ pañcānāmapi lakṣaṇaṃ vakṣyati; suśrute coktam– “bhaktopaghātamiha pañcavidhaṃ vadanti” iti| tantrāntare'pi– “arocako bhaveddoṣaireko hṛdayasaṃśrayaiḥ| sannipātena manasaḥ santāpena ca pañcamaḥ” iti| śokādijo yadyapi vātajastathā'pi hetupratyanīkacikitsārthaṃ pṛthaguktaḥ| etairhetubhirarocakā bhavanti| manoghnāśanamucchiṣṭakṛmiklinnādirūpaṃ śarīraśvayathugataṃ, gandhaḥ pūtiḥ, taiḥ|1|–

... parihṛṣṭadantaḥ kaṣāyavaktraśca mato'nilena ||1|| (ca. ci. a. 26) |

vātikalakṣaṇamāha– parītyādi| parihṛṣṭadanta iti amlabhakṣaṇeneva||1||

vātikamāha– parihṛṣṭadanta iti amlabhakṣaṇeneva, kaṣāyavaktra iti lodhracarvitasyeva||1||

kaṭvamlamuṣṇaṃ virasaṃ ca pūti pittena vidyāt ... |2| (ca. ci. a. 26) |

paittikalakṣaṇamāha– kaṭvityādi| kaṭuśabdo'tra tiktavācī| yadāha videhaḥ– “pittena tiktāsyavidāhakṛt syāt, svādvāsyahṛllāsakaraḥ kaphena|” iti|2|–

... lavaṇaṃ ca vaktram | mādhuryapaicchilyagurutvaśaityavibaddhasambaddhayutaṃ kaphena ||2|| (ca. ci. a. 26) |

ślaiṣmikalakṣaṇamāha– lavaṇamityādi| lavaṇaṃ vaktramiti vidagdhasya śleṣmaṇo lavaṇarasatvāt| uktaṃ hi suśrute– “śleṣmā vidagdho lavaṇaḥ smṛtaḥ, pittaṃ vidagdhamamlam|” (su. sū. a. 40) iti| vibaddhasambaddhayutamiti vibaddhaṃ ca tat sambaddhayutaṃ ceti vibaddhasambaddhayutam| atra vibaddhaṃ baddhamiva, bhakṣaṇādyasāmarthyāt; sambaddhayutaṃ ‘kaphasya’ iti śeṣaḥ; bhāve ktaḥ, kaphaliptamityarthaḥ| ‘vidagdhasambaddhayutam’ iti pāṭhāntaraṃ sugamam| ‘vibaddhasannaddhayutam’ iti pāṭhe vibaddhaḥ sannaddhaḥ sa ca prakṛtatvāt kaphasya, sannaddho baddhaḥ; ‘ṇaha’ bandhane ityasmāddhātoḥ pūrvavat ktādi| ‘vibaddhasaṃstambhayutam’ iti kāśmīrāḥ||2||

kaphajamāha– ³ lavaṇamityādi| kaphena lavaṇaṃ ca vaktramiti yojyaṃ, mādhuryādiyutamiti vaktreṇaiva| vibaddhasambaddhayutamiti nibaddhaṃ ca tatsambaddhayutaṃ ca tattathā; ⁴ vibaddhamiva bhakṣaṇākṣamaṃ, sambaddhayutaṃ kaphasyeti śeṣaḥ, ⁵ kaphaliptamityarthaḥ| anye vibaddhasannaddhayutamiti paṭhanti, vibaddhaḥ sannaddhaḥ sa ca prakṛtatvāt kaphasya; sannaddho baddhaḥ, ‘ṇaha’ bandhane, ityasya dhātoḥ prayogaḥ||2||

arocake śokabhayātilobhakrodhādyahṛdyāśucigandhaje syāt | svābhāvikaṃ cāsyamathāruciśca ... |3| (ca. ci. a. 26) |

āgantujamāha– arocaka ityādi| ahṛdyagandho ⁶ ghrāṇodvejako gandhaḥ| svābhāvikaṃ cāsyamiti avikṛtamukharasatvaṃ, na tu vātādivat kaṣāyatvādi|3|– ⁷

āgantujamāha– ahṛdyaḥ prāṇodvejako gandhaḥ, aśuciḥ ucchiṣṭaṃ, svābhāvikaṃ cāsyamiti avikṛtamukharasatvaṃ na tu vātādivadvaktrakaṣāyatvādikam, atha ⁸ aruciriti viśeṣatvam|3|–

... tridoṣaje naikarasaṃ bhavettu ||3|| (ca. ci. a. 26) |

tridoṣajamāha– tridoṣaja ityādi| tridoṣaje naikarasamiti vātajādyuktakaṣāyādyanekarasatvam||3||

tridoṣajamāha– ⁹ anekarasamāsyamityarthaḥ||3||

hṛcchūlapīḍanayutaṃ pavanena, pittāttṛḍdāhacoṣabahulaṃ, sakaphaprasekam | śleṣmātmakaṃ, bahurujaṃ bahubhiśca vidyādvaiguṇyamohajaḍatābhirathāparaṃ ca ||4|| (ca. ci. a. 26) |

vātajādibhedena mukhavikṛtimabhidhāyānyadeśavikṛtimāha– ¹⁰ hṛcchūletyādi| hṛdi śūlena pīḍanam ¹¹| coṣaścūṣaṇavat pīḍā| bahubhiriti tridoṣaiḥ| vaiguṇyamohajaḍatābhirathāparamiti upalakṣaṇe tṛtīyā, vaiguṇyaṃ manaso vyākulatvam| aparamiti ¹² doṣajādanyamāgantujamityarthaḥ| ¹³ satyāmapi bubhukṣāyāmabhyavahārāsāmarthyamaruciḥ, abhilaṣitamapyannaṃ dīyamānaṃ nābhyavaharatītyannānabhinandanam, annasya śravaṇasmaraṇadarśanagandhasparśanairyatrodvijate sa bhaktadveṣaḥ; evaṃ trividho'pi rogaścarakasuśrutābhyāmarocakaśabdena saṅgṛhītaḥ| uktaṃ hi vṛddhabhojena– “prakṣiptaṃ tu mukhe cānnaṃ jantorna svadate muhuḥ| arocakaḥ sa vijñeyo, bhaktadveṣamataḥ śṛṇu|| cintayitvā tu manasā dṛṣṭvā śrutvā'pi bhojanam| dveṣamāyāti yo janturbhaktadveṣaḥ sa ucyate|| kupitasya bhayārtasya yaśca bhaktanirodhajaḥ” ¹⁴ iti||4||

vātādibhedena mukhe vikṛtimabhidhāyānyadeśavikṛtimāha– hṛcchūletyādi| hṛdi śūlena pīḍanaṃ hṝcchūlapīḍanaṃ tena yuktaṃ, coṣaḥ cūṣaṇavatpīḍā| arocakamiti śeṣaḥ| śleṣmātmakaṃ sakaphaprasekaṃ syāt| bahubhiriti tridoṣaiḥ, bahurujamanekapīḍākaram| vaiguṇyamohajaḍatābhirathāparaṃ ceti upalakṣaṇe tṛtīyā, vaiguṇyaṃ manaso vyākulatvam, aparamiti ¹⁵ doṣajādanyat āgantujamityarthaḥ| arocakalakṣaṇam– satyāṃ bubhukṣāyāmabhyavahārāsāmarthyamiti aruciḥ, abhilaṣitamapyannaṃ dīyamānaṃ nābhyavaharatīti nānnābhinandanam, annasya śravaṇasmaraṇadarśanasparśanagandhairyatrodvijate sa bhaktadveṣaḥ| evaṃ trividho'pi rogaścarakasuśrutābhyāmarocakaśabdena saṅgṛhītaḥ| uktaṃ hi vṛddhabhojena– “prakṣiptaṃ tu mukhe cānnaṃ jantorna svadate muhuḥ| arocakaḥ sa vijñeyo bhaktadveṣamataḥ śṛṇu|| cintayitvā tu manasā dṛṣṭvā śrutvā ca bhojanam| dveṣamāyāti yo janturbhaktadveṣaḥ sa ucyate|| kupitasya bhayārtasya abhicārābhibhūtaye| yasyānne na bhavecchraddhā sa bhaktadveṣa ucyate” iti||4||

iti śrīmādhavakaraviracite mādhavanidāne arocakanidānaṃ samāptam ||14||

iti śrīvijayarakṣitakṛtāyāṃ madhukośavyākhyāyāmarocakanidānaṃ samāptam||14|| ¹⁶

iti śrīvācaspativaidyaviracitāyāṃ mādhavanidānaṭīkāyāmātaṅkadarpaṇākhyāmarocakanidānam||14||

pāṭhāntarāḥ

1 . ‘śokādīnāmāgantutvena’ iti pā.| ↩
2 . ‘vātajaḥ’ iti pā.| ↩
3 . ‘mādhuryeti’ iti pā.| ↩
4 . atra ‘vibaddham’ iti kvacitpustake adhikaḥ pā.| ↩
5 . ‘liptamityarthaḥ’ iti pā.| ↩
6 . ‘prāṇodvejakaḥ’ ityātaṅkadarpaṇe pāṭhaḥ| ↩
7 . ‘śokajamāha’ iti pā.| ↩
8 . ‘aruciriva śeṣatvam’ iti pā.| ↩
9 . atra ‘tridoṣaje ityādi| naikarasamiti’ iti kvacitpustake adhikaḥ pā.| ↩
10 . ‘hṛcchūlamiti’ iti pā.| ↩
11 . atra ‘hṛcchūlapīḍanam’ iti kvacitpustake adhikaḥ pā.| ↩
12 . ‘ ... danyadāgantuja ... ’ iti pā.| ↩
13 . ‘satyapi’ iti pā.| ↩
14 . atra ‘abhicārahatasya ca| yasya nānne bhavecchraddhā so'bhaktacchanda ucyate||’ iti kvacitpustake adhikaḥ pā.| ↩
15 . ‘doṣādanyat’ iti pā.| ↩
16 . ‘ityātaṅkadarpaṇe nidānavyākhyāyām arocakanidānam||14||’ iti pā.| ↩