18. pānātyayaparamadapānājīrṇapānavibhramanidānam

atha pānātyaya-paramada-pānājīrṇa-pānavibhramanidānam | ye viṣasya guṇāḥ proktāste'pi madye pratiṣṭhitāḥ | tena mithyopayuktena bhavatyugro madātyayaḥ ||1||

‘mūrchā madyena ca viṣeṇa ca’ iti vacanānmūrchānantaraṃ madyavikārān madātyayādīnāha| nanu, kathaṃ madyaṃ mohayatītyāha– ye viṣasyetyādi| te ca viṣaguṇā mūrchādhyāye nidarśitāḥ| mithyopayukteneti ayathāvidhipītena, vidhiścāyaṃ, tadyathā– ¹ kusumitalatopagūḍhaiḥ prarūḍhanirantaranavāṅkuranikararomāñcairmadhukaramadhurajhaṅkārasītkārairmuktakaṇṭhakalakaṇṭhakūjitairdakṣiṇasamīraṇasamullasitapallavakarapracāraiḥ taruṇatarubhiḥ ² upakrāntalatābhiratiśobhaneṣu tuṣārakarakiraṇarājiparājitāśeṣatāpadoṣeṣu ³ pradeśeṣu ⁴ śṛṅgārarasasamucitālaṅkṛtikamanīyakāminīsevitaṃ lalitalalanopanīyamānaṃ surabhirucirarūparasopadaṃśaṃ kaṃ nāma parimitaṃ ⁵ parārdhamadhupānaṃ na sukhayati? carake tu vistareṇaitaduktam||1||

‘mūrchā madyena viṣeṇa ca’ iti vacanānmūrchānantaraṃ madyavikārānācaṣṭe, nanu kathaṃ ⁶ madyaṃ mohayatītyāha– ya ityādi| ye viṣasya guṇāḥ proktāḥ, te ca viṣaguṇā mūrchādhyāye nidarśitāḥ, te guṇā madye'pi kīrtitāḥ, tena madyena mithyopayuktena ayathāvidhipītenogro madātyayo bhavati| vidhiścāyaṃ; tadyathā– kusumitalatopagūḍhaiḥ ⁷ prakaṭanirantaranavāṅkuranikararomāñcaiḥ madhukaramadhurajhaṅkārasītkārairmuktakaṇṭha-kalakaṇṭhakūjitairdakṣiṇasamīraṇodvījitasamullasitapallavakara-pracāraistaruṇatarubhirupakrāntataralalatābhiratiśobhaneṣu vanopavaneṣu tuṣārakarakiraṇārañjitapradeśeṣu ⁸ śṛṅgārasarasamucitālaṅkṛtikamanīyakāminīsammitaṃ lalitalalanopanīyamānaṃ surabhirucirarasopadaṃśaṃ kaṃ nāma parimitaṃ madhupānaṃ na sukhayati| carakeṇa tu vistareṇaitaduktam| vidhiḥ prakāraḥ||1||

kintu madyaṃ svabhāvena yathaivānnaṃ tathā smṛtam | ayuktiyuktaṃ rogāya yuktiyuktaṃ yathā'mṛtam ||2|| prāṇāḥ prāṇabhṛtāmannaṃ tadayuktyā hinastyasūn | viṣaṃ prāṇaharaṃ tacca yuktiyuktaṃ rasāyanam ||3|| (ca. ci. a. 24) |

nanu, viṣasya ye guṇāste cenmadye'pi santi, tarhi viṣavanmadyamanupayojyaṃ prasajyeta? ata āha– kintvityādi| yathaivānnamiti dehadhārakasvabhāvaṃ, tadevāyuktiyuktamavidhiyuktaṃ rogāya; tasmādahitamapi viśiṣṭavidhinopayuktaṃ hitaṃ, hitamapyavidhinopayuktamanarthāya bhavatīti| atraiva dṛṣṭāntamāha– prāṇā ityādi| tadayuktyeti atimātratvādinā visūcyādikaṃ kṛtvā mārayatītyarthaḥ| yuktiyuktamiti yathā carakarasāyanaprayoge uktam– “dvau yavāvatra hemnastu tilaṃ dadyādviṣasya ca|” (ca. ci. a. 1) iti| atra tilamiti tilapramāṇam||2-3||

nanu viṣasya ye guṇāste cenmadye'pi santi tarhi viṣavanmadyamanupayojyaṃ syādityata āha– kintvityādi| madyaṃ svabhāvena prakṛtyā annavat jñeyaṃ dehadhāraṇasvabhāvaṃ, tadevānnaṃ madyaṃ vā ayuktiyuktamavidhiprayuktaṃ rogāya bhavati, yuktiyuktamamṛtavadbhavatītyarthaḥ| tasmādahitamapi viśiṣṭavidhinopayuktaṃ hitaṃ, hitamapyavidhinopayuktamanarthāya bhavati| atraiva dṛṣṭāntamāha– prāṇā iti| annaṃ prāṇabhṛtāṃ śarīriṇāṃ prāṇāḥ, śarīradhāraṇātmakatvāt| tadevānnam ayuktyā atimātratvādinā visūcyādīn kṛtvā mārayatītyarthaḥ| ⁹ prāṇaharamapi tadvadviṣaṃ yuktiyuktaṃ rasāyanaṃ bhavati, śarīraṃ dhārayatītyarthaḥ||2-3||

vidhinā mātrayā kāle hitairannairyathābalam | prahṛṣṭo yaḥ pibenmadyaṃ tasya syādamṛtopamam ||4|| (ca. ci. a. 24) | snigdhaistadannairmāṃsaiśca bhakṣyaiśca saha sevitam | bhavedāyuḥprakarṣāya balāyopacayāya ca ||5|| kāmyatā manasastuṣṭistejo vikrama eva ca | vidhivatsevyamāne tu madye sannihitā guṇāḥ ||6|| (su. u. taṃ. a. 47) |

vidhinopayuktasya phalamāha– vidhinetyādi| kāla iti nityage cāvasthike ca; tadyathā– grīṣme śītamadhuraṃ mādhvīkādi, śīte uṣṇatīkṣṇaṃ gauḍikapaiṣṭikādi; tathā vāte snigdhādi; evaṃ vayasyudāhāryam| hitairannairiti vakṣyamāṇasnigdhādibhirmadyaviparītaguṇaiḥ| snigdhairityupalakṣaṇaṃ, tenānyairapi madyaviparītaguṇairiti boddhavyam| yaduktaṃ suśrutena “madyamamlaṃ tathā tīkṣṇaṃ sūkṣmaṃ viśadameva ca| rūkṣamāśukaraṃ caiva vyavāyi ca vikāśi ca||” (su. u. taṃ. a. 47) iti| amlarasatvaṃ ¹⁰ cāsyodbhūtarasatvenoktaṃ; yaduktamanyatra– “sarveṣāmamlajātīnāṃ madyaṃ mūrdhni vyavasthitam||” iti| mūrdhni vyavasthitamutkṛṣṭam| anye'pyatra rasāḥ santi| yadāha bhojaḥ– “maireyaṃ madirā sīdhu caturthaṃ madhu cocyate| ekaikaṃ ṣaḍrasaṃ tatra ¹¹ rasato madyamīritam||” iti| annabhakṣyaśabdayorupādānena prāyo lehyaṃ dravāntarapānaṃ ca madyapānocitaṃ na bhavatīti darśayati| annabhakṣyābhyāṃ labdhe'pi māṃse māṃsagrahaṇaṃ viśeṣeṇa hitatvopadarśanārtham| balaṃ śaktiḥ, upacayaḥ sthaulyam| aparamapi vidhisevāguṇamāha– kāmyatetyādi| kāmyatā kamanīyamūrtitā, manasastuṣṭiḥ santoṣaḥ| ¹² athavā kāmyatā manasa iti kamanīyavastuni manovṛttiḥ, tuṣṭiśca manasa eveti yojyam| teja utsāhaḥ| vikramaḥ parābhibhavārthaṃ balavatī śarīraceṣṭā||4-6||

vidhinopayuktasya phalamāha– vidhinetyādi| vidhiḥ pūrvoktaḥ, tantrāntaroktaśca– “śuddhakāyaḥ pibetprātaḥ sopadaṃśaṃ paladvayam| madhyāhne dviguṇaṃ tacca snigdhāhāreṇa vai pibet, pradoṣe'ṣṭapalaṃ tadvanmātrā madye rasāyanam| ārogyaṃ dhātusāmyaṃ ca vahnikāntibalapradam|| anena vidhinā sevyaṃ madyaṃ nityamatandritaiḥ|” ¹³ iti| anye, “buddhyādayo guṇā yāvadullasanti niratyayāḥ| mātreyaṃ vihitā madye pāne rogāya cāparāḥ||” ¹⁴ kāla iti tatra kālo dvividho nityagaḥ, āvasthikaśca; tatra nityage ṛtusambandhini, yathā– grīṣme śītamadhuraṃ mādhvīkādi, śīte uṣṇatīkṣṇaṃ gauḍikapaiṣṭikādi; āvasthike kāle vāte snigdhādi, evaṃ vayasyapyudāhāryam| hitairannairiti vakṣyamāṇasnigdhatvādibhirmadyaviparītaguṇaiḥ| yathābalaṃ svaśaktyā| evaṃ hṛṣṭo harṣayukto yo madyaṃ pibettasyāmṛtopamaṃ syāt| kaiḥ saha pītaṃ balopacayāya bhavati tānāha– snigdhairityādi| etairvastubhiḥ sevyamānaṃ madyamāyuḥprakarṣāya bhavati tathā balavardhakamiti| snigdhairityupalakṣaṇaṃ, tenānyairmadyaviparītaguṇairapi boddhavyaṃ, tena tīkṣṇādidaśaguṇaviparītairmṛdvādiguṇaiḥ saha madyaṃ sevyamiti| yaduktaṃ tantrāntare– “laghutīkṣṇoṣṇasūkṣmāmlavyavāyyāśugameva ca| rukṣaṃ vikāśi viśadaṃ madyaṃ daśaguṇaṃ smṛtam” iti| tathā ca suśrute– madyamamlaṃ tathā tīkṣṇaṃ sūkṣmaṃ viśadameva ca| rūkṣamāśukaraṃ caiva vyavāyi ca vikāśi ca” iti| amlarasatvaṃ cāsyodbhūtarasatvenoktam| yaduktamanyatra “sarveṣāmamlajātīnāṃ madyaṃ mūrdhni vyavasthitam” iti| mūrdhni vyavasthitamutkṛṣṭam| anye'pyatra rasāḥ santi| yaduktaṃ tantrāntare– “madyasyāmlasvabhāvasya catvāro'nurasāḥ smṛtāḥ| madhuraśca kaṣāyaśca kaṭukastikta eva ca” iti| yadāha bhojaḥ– ṣaḍrasā iti”madirāyā rasā vyaktā madhuroṣaṇatiktakāḥ| lavaṇāmlakaṣāyāśca trayaḥ sūkṣmatarāḥ smṛtāḥ|| ¹⁵ viparyayeṇaitadevaṃ maireye kathitā rasāḥ| mādhvīke sīdhusañjñe ca vyaktau cāmlakaṭū rasau| vyaktā hi śeṣāścatvāro rasā bhojena kīrtitāḥ” iti| annairiti godhūmādibhiḥ| annabhakṣyābhyāṃ labdhe'pi ¹⁶ māṃse māṃsagrahaṇaṃ viśeṣeṇa hitatvopadarśanārtham| balaṃ śaktiḥ, upacayaḥ sthaulyam| aparamapi vidhisevāguṇamāha– kāmyatetyādi| kāmyatā kamanīyamūrtitā, manasastuṣṭiḥ santoṣaḥ, teja utsāhaḥ, vikramaḥ parābhibhavārthaṃ balavatī śarīraceṣṭā||4-6||

buddhismṛtiprītikaraḥ sukhaśca pānānnanidrārativardhanaśca | sampāṭhagītasvaravardhanaśca prokto'tiramyaḥ prathamo mado hi ||7||

uktavidhiviparyayeṇa sevyamānaṃ madyaṃ madātyayāya sampadyate; sa ca trividho bhavati– pūrvo, madhyamo'ntimaśceti; teṣāṃ krameṇalakṣaṇamāha– buddhītyādi| buddhiranubhavaḥ, smṛtiranubhūtārthānusandhānam| pānānnanidrārativardhanaśceti pānādiṣu ratiranurāgastadvardhanaḥ| sampāṭhaḥ samyak pāṭhaḥ| gayadāsastu ‘sampāṭhya’ iti paṭhitvā gītanṛtyavādyāni militāni sampāṭhyamucyate, gītaṃ tu kevalameveti vyācaṣṭe| svaro dhvaniḥ| prokto'tiramya iti| nanu manovikārakāritvāt kathamasyātiramyatā? ucyate– ¹⁷ manovikārakāritve'pi tadātvena na duḥkhāvahatvāt ata eva suśrutena mānasavikāreṣu harṣaḥ paṭhitaḥ||7||

uktavidhiviparyayeṇa sevyamānaṃ madyaṃ madātyayāya bhavati| sa ca tridhā bhavati madātyayaḥ pūrvo madhyo'ntima iti| teṣāṃ krameṇa lakṣaṇamāha– tatra prathamo yathā– buddhītyādi| buddhiranubhavaḥ, smṛtiḥ pūrvānubhūtasmaraṇaṃ, prītiḥ pareṇa maitrī| sukha iti śokādyasmaraṇena manasaḥ prasādādanupahatendriyavṛttitvāt| pānānnanidrārativardhana iti pānādiṣu viṣaye ratiranurāgaḥ, tadvardhanaḥ| sampāṭhaḥ samyakpāṭhaḥ, gītaṃ gānaṃ, svaro dhvaniḥ| prokto'tiramya iti| nanu manovikārakaratvāt kathamasyātiramyatā? ucyate– manovikārakāritve'pi ¹⁸ tadātvena duḥkhāvahatvāt| ata eva suśrutena mānasavikāreṣu harṣaḥ paṭhita iti||7||

avyaktabuddhismṛtivāgviceṣṭaḥ sonmattalīlākṛtirapraśāntaḥ | ālasyanidrābhihato muhuśca madhyena mattaḥ puruṣo madena ||8||

dvitīyamadamāha– avyaktetyādi| viceṣṭo viruddhaceṣṭaḥ| unmattasya līlākṛtibhyāṃ saha vartate iti sonmattalīlākṛtiḥ; unmattaprāya ityarthaḥ| apraśāntaḥ pracaṇḍaḥ||8||

madhyamadamāha– avyaktetyādi| unmattasya līlākṛtibhyāṃ saha vartata iti sonmattalīlākṛtiḥ unmattaprāya ityarthaḥ| apraśāntaḥ pracaṇḍaḥ| muhurvāraṃvāram, ālasyanidrābhyāmabhihataḥ pīḍitaḥ, sa caivaṃvidho'tyanupahatendriyavṛttitvāt||8||

gacchedagamyānna gurūṃśca manyet khādedabhakṣyāṇi ca naṣṭasañjñaḥ | brūyācca guhyāni hṛdi sthitāni made tṛtīye puruṣo'svatantraḥ ||9||

tṛtīyamadamāha– gacchedityādi| nanu carake dvitīyatṛtīyayormadhye madāntaraṃ paṭhitaṃ, yadāha– “madhyamaṃ madamutkramya madamaprāpya cottamam| na kiñcidaśubhaṃ kuryurnarā rājasatāmasāḥ|| ko madaṃ tādṛśaṃ gacchedunmādamiva cāparam|” (ca. ci. a. 24) iti; tat kuto'tra na paṭhitam? ucyate– dvitīyamadānte tṛtīyamadasya pūrvāvasthaivātinindanīyā, sutarāṃ tṛtīyo mada iti pratipādanārthaṃ tatpaṭhitaṃ, na tu tayoḥ paramārthato'ntarāle pṛthaṅmadāntaramasti, yathā– “kumbhamīnarkṣayormadhye yadā carati candramāḥ| nāharettṛṇakāṣṭhāni na gaccheddakṣiṇāṃ diśam||” iti| atra hi kumbhasya śeṣāṃśo mīnasya prathamāṃśa etaddvayaṃ madhyaśabdenocyate ityāhuḥ jejjaṭādayaḥ, haricandravyākhyānaṃ tu vistaratvānna likhitam| agamyān gurudārādīn duṣṭayānādīṃśca| naṣṭasañjña iti sañjñā nāmollekhena ¹⁹ jñānaṃ, tannaṣṭaṃ yasya sa tathā| guhyāni gopyāni| asvatantro madaparavaśaḥ||9||

tṛtīyaṃ madamāha– gacchedityādi| agamyān gurudārādīn| gurūn jyeṣṭhān, na manyeta avagaṇayedityarthaḥ| abhakṣyāṇi śāstraniṣiddhāni, cakārādduṣṭapānādīṃśca| sañjñā nāmollakhena sañjñājñānaṃ tannaṣṭaṃ yasya sa tathā| hṛdi sthitāni guhyāni gopyāni, brūyāt| tathā asvatantro madaparavaśaḥ| sa caivaṃvidho'tīvopahatendriyatvādbhavati||9||

caturthe tu made mūḍho bhagnadārviva niṣkriyaḥ | kāryākāryavibhāgajño mṛtādapyaparo mṛtaḥ ||10|| ko madaṃ tādṛśaṃ gacchedunmādamiva cāparam | bahudoṣamivāmūḍhaḥ kāntāraṃ svavaśaḥ kṛtī ||11||

caturthamadamāha– caturthe tvityādi| kāryākāryavibhāgajñaḥ kāryamakāryamiti buddhyā jānāti| ‘kāryākāryavibhāgajñaḥ’ iti pāṭhe kāryākāryavibhāgayorajña ityarthaḥ| mṛtādapyaparo mṛta iti mṛtamapekṣyāparo'yaṃ mṛta iva, atyantājñānasādharmyāt| ²⁰ ‘avaraḥ’ iti pāṭhāntare mṛtādapyadhama ityarthaḥ, tathāvidhāvasthāyāḥ svayaṃ kṛtatvāt| ka ityādi| kaḥ kṛtī ²¹ kuśalaḥ, sukṛtī vā, kṛtakṛtyo vā; svavaśo'parādhīnaḥ, tādṛśamuktaprakāreṇa ninditaṃ madaṃ gacchet prāpnuyāt; na kaścidevaṃvidhaṃ prāpnuyādityarthaḥ| kamivetyāha– bahudoṣamivāmūḍhaḥ kāntāramiti bahudoṣaṃ hiṃsrādiyuktaṃ, kāntāraṃ dūraśūnyamadhvanam| yaduktaṃ carake– “gacchedadhvānamasvantaṃ bahudoṣamivā'dhvagaḥ|” (ca. ci. a. 24) iti; evaṃ videhe'pi paṭhitamiti| atrāsvantamaśobhamānamaniṣṭaphalatvena| nanu, carakavidehavāgbhaṭādibhiścaturtho mado na paṭhitastatkathaṃ suśrutena paṭhitaḥ? ucyate– carake yā dvitīyatṛtīyayorantarālāvasthā paṭhitā, saiva suśrutena tṛtīyo mada iti kṛtvā paṭhitaḥ, yastu carake tṛtīyaḥ sa ca suśrute caturthaḥ paṭhita ityāvirodhaḥ| vastugatyā tu traya eva madā ²² ityupapāditam| nanu, kiṅkāraṇametattraividhyamiti cet? ucyate– madyaṃ hi vahnitulyaṃ, yathā hyagniḥ suvarṇānāmuttamamadhyamādhamānāmabhivyañjakastathā madyamapi prāṇināṃ sattvarajastamobhūyiṣṭhānāṃ ²³ krameṇābhivyañjakamiti| tathāhi carakaḥ– “pradhānādhamamadhyānāṃ rukmāṇāṃ vyaktidarśakaḥ| ²⁴ yathā'gnirevaṃ satvādyairmadyaṃ prakṛtidarśakam| tasmāt prathamadvitīyatṛtīyamadāḥ sattvarajastamobhūyiṣṭhānāṃ krameṇa bhavantītyarthaḥ||10-11||

caturthamadamāha-caturthe made puruṣo mūḍho'jñaḥ, bhagnadārviva niṣkriyo bhavati bhagnavṛkṣa iva kriyārahitaḥ, tathā kāryākāryavibhāgajñaḥ kāryamakāryaṃ buddhyā jānāti| ‘kāryākāryavibhāgajñaḥ’ iti pāṭhāntare kāryākāryavibhāgayoranabhijña ityarthaḥ| mṛtādapyaparo mṛta iti mṛtamapekṣyāparo'yaṃ mṛta iva, atyantājñānasādharmyāt| ‘avaraḥ’ iti pāṭhāntare mṛtādapyavara ityarthaḥ, tathāvidhāvasthāyāḥ svayaṃ kṛtatvāt| ka iti kaḥ kṛtī sukṛtī kṛtakṛtyo vā svavaśo'parādhīnastādṛśamuktaprakāreṇa ninditaṃ madaṃ gacchet prāpnuyāt na kaścidevaṃvidhaṃ prāpnuyādityarthaḥ| kamivetyāha– bahudoṣamivāmūḍhaḥ kāntāramiti; bahudoṣaṃ hiṃsrā iti yuktaṃ kāntāraṃ śūnyamadhvānaṃ ko mūḍho gacchedapi tu na ko'pi| yaduktaṃ carake “gacchedadhvānamasvantaṃ bahudoṣamivādhvagaḥ” iti| asvantamaśobhanamaniṣṭaphalatvena| nanu carakavidehavāgbhaṭadibhiścaturtho mado na paṭhitaḥ, tatkathaṃ na virodhaḥ? ucyate; carake yā dvitīyatṛtīyayorantarālāvasthā paṭhitā, saiva suśrutena tṛtīyo mada iti kṛtvā paṭhitaḥ| keyamantarālāvasthā? yathoktaṃ jyotiḥśāstre– “kumbhamīnarkṣayormadhye yadā carati candramāḥ| nāharettṛṇakāṣṭhāni na gaccheddakṣiṇāṃ diśam” iti| atra kumbhasya śeṣāṃśo mīnasya prathamāṃśa etaddvayaṃ madhyaśabdenocyate iti saivāntarālāvasthā| yastu carake tṛtīyaḥ suśrute sa caturthaḥ paṭhita ityavirodhaḥ| vastugatyā traya eva madā ityupapāditam| nanu, kiṃ kāraṇakamidaṃ traividhyamiti cet? ucyate– madyaṃ hi vahnitulyaṃ, yathā vahniḥ suvarṇānāmadhamamadhyamottamānāmabhivyañjakaḥ, tathā madyamapi prāṇināṃ sattvarajastamobhūyiṣṭhānāmabhivyañjakam| tathā hi carakaḥ– “pradhānādhamamadhyānāṃ rukmāṇāṃ vyaktidarśakaḥ| yathā'gnirevaṃ sattvānāṃ madyaṃ prakṛtidarśakam” iti| tasmātprathamadvitīyatṛtīyamadāḥ sattvarajastamobhūyiṣṭhānāṃ krameṇa bhavantītyarthaḥ||10-11||

nirbhaktamekāntata eva madyaṃ niṣevyamāṇaṃ manujena nityam | āpādayetkaṣṭatamānvikārānāpādayeccāpi śarīrabhedam ||12|| (sa. u. a. 47) |

avidhimadyapānasya vikārāntarahetutvamāha– nirbhaktamityādi| nanu, ayamarthaḥ snigdhaistadannairityādinā yaduktaṃ tadviparyayeṇaiva labdhaḥ, tatkathaṃ punarucyate? naivaṃ, pūrvaṃ madyapānaguṇābhidhānārthamuktam, idaṃ tu kṛcchratamavyādhikartṛtvābhidhānārthamiti bhedaḥ| yatparaḥ śabdaḥ sa śabdārtha ityabhiprāyaḥ| kaṣṭatamān vikārāniti vakṣyamāṇapānātyayādīn| bhedaṃ vināśaṃ śarīrasya||12||

avidhimadyapānasya vikārāntarahetutvamāha– nirbhaktamityādi| nirbhaktamāhārarahitam, ekāntato nairantaryeṇa sevyamānaṃ, kaṣṭatamān vakṣyamāṇān pānātyayādīn janayet| śarīrabhedaṃ śarīravināśam| nanu ‘snigdhaistadannaiḥ’ ityādīnāṃ viparyayeṇaivāyamartho labdhastatkiṃ punaḥ kathanaṃ? naivaṃ, pūrvaṃ madyapānaguṇābhidhānārthamuktam, idaṃ tu kṛcchratamavyādhikartṛtvābhidhānārthamuktamiti bhedaḥ||12||

kruddhena bhītena pipāsitena śokābhitaptena bubhukṣitena | vyāyāmabhārādhvaparikṣatena vegāvarodhābhihatena cāpi ||13|| atyambubhakṣāvatatodareṇa sājīrṇabhuktena tathā'balena | uṣṇābhitaptena ca sevyamānaṃ karoti madyaṃ vividhānvikārān ||14|| (su. u. taṃ. a. 47) |

annasahitasyāpi madyasya kruddhatvādikāraṇasahitasya vikārakāritvapradarśanārthamāha– kruddhenetyādi| parikṣatena kṣīṇena| avatataṃ vyāptam| vividhān vikārān pānātyayādīniti||13-14||

annasahitasyāpi madyasya kruddhatvādikāraṇasahitasya vikārakāritvapradarśanārthamāha– kruddhenetyādi| vyāyāmabhārādhvabhiḥ parikṣatena kṣīṇena vegāvarodhābhihatena mūtrādīnāṃ vegābhighātapīḍitena| atyambubhakṣaiḥ avatatodareṇa ²⁵ vyāptodareṇa| sājīrṇabhuktena sājīrṇaṃ bhuktaṃ yasya sa tathā tena| abalena balarahitena, balam ojaḥ| uṣṇābhitaptena gharmasantaptena| īdṛśena puruṣeṇa sevyamānaṃ vividhān nānāvidhān, vikārān pānātyayādīn karoti||13-14||

pānātyayaṃ paramadaṃ pānājīrṇamathāpi vā | pānavibhramamugraṃ ca teṣāṃ vakṣyāmi lakṣaṇam ||15|| (su. u. taṃ. a. 47) |

tāneva vivṛṇoti– pānātyayamityādi| nanu, ayamarthaḥ ‘āpādayet kaṣṭatamān vikārān’ ityanenaivoktatvāt kathaṃ punaruktaḥ? ucyate– pūrveṇa kaṣṭatamavikārakāritvamuktam, anena tu nānāvidhavikārakāritvamiti bhedaḥ||15||

tānatra vikārān vivṛṇoti– pānātyayamityādi| pānātyayamityeko vikāraḥ, pānājīrṇamityekaḥ, ²⁶ pānavibhramamiti cānyaḥ| teṣāṃ krameṇa lakṣaṇaṃ vakṣyāmi||15||

hikkāśvāsaśiraḥkampapārśvaśūlaprajāgaraiḥ | vidyādbahupralāpasya vātaprāyaṃ madātyayam ||16|| tṛṣṇādāhajvarasvedamohātīsāravibhramaiḥ | vidyāddharitavarṇasya pittaprāyaṃ madātyayam ||17|| chardyarocakahṛllāsatandrāstaimityagauravaiḥ | vidyācchītaparītasya kaphaprāyaṃ madātyayam | jñeyastridoṣajaścāpi sarvaliṅgairmadātyayaḥ ||18|| (ca. ci. a. 24) |

teṣāmuddiṣṭānāṃ lakṣaṇamāha– hikketyādi| prajāgaro nidrāvicchedaḥ| vātaprāyamityanena sarve ²⁷ vātādiprāyā madātyayāstridoṣajāḥ, udbhūtatvena vyapadeśa iti carake darśitam| yadāha– “ye viṣasya guṇāḥ proktāḥ sarvadoṣaprakopaṇāḥ|” ityārabhya yāvat “sarvaṃ madātyayaṃ vidyāttridoṣaṃ” (ca. ci. a. 24) iti| evaṃ carakasaṃvādāt suśrute'pi bodhyam| vibhramo bhramaḥ| haritavarṇasyetyanena haritavarṇatā'pi lakṣaṇam||16-18||

tatra vātikamadātyayamāha– hikketyādi| sarve madātyayāstridoṣajāḥ, ²⁸ kiṃ tu auddhatyena vyapadeśaḥ| yaduktaṃ carakeṇa– “ye viṣasya guṇāḥ proktāḥ sarvadoṣaprakopaṇāḥ” iti| tathā ca– “sarvaṃ madātyayaṃ vidyāt tridoṣajam” iti| prajāgaro nidrānāśaḥ, śeṣaṃ sugamam| paittikamāha– tṛṣṇetyādi| vibhramo vastuviparītajñānam| haritavarṇasya puruṣasyeti haritavarṇatā pittalakṣaṇaṃ, śeṣaṃ sugamam| ślaiṣmikamāha– chardītyādi| staimityaṃ niścalatā| śītaparītasya śītayuktasya| tridoṣajamāha– jñeya ityādi| sarvaliṅgaiḥ sarvadoṣalakṣaṇaiḥ||16-18||

śleṣmocchrayo'ṅgagurutā virasāsyatā ca viṇmūtrasaktiratha tandrirarocakaśca | liṅgaṃ parasya ca madasya vadanti tajjñāstṛṣṇā rujā śirasi sandhiṣu cāpi bhedaḥ ||19|| (su. u. taṃ. a. 47) |

paramadamāha– śleṣmocchraya ityādi| śleṣmocchrayaścātra nāsāsrāvādinā jñeyaḥ| saktiḥ saṅgaḥ, apravṛttiriti yāvat| tandristandrā| parasya madasyeti paramadasya; chando'nurodhādasamāsanirdeśaḥ||19||

paramadamāha– śleṣmetyādi| śleṣmocchrayo nāsāsrāvādinā jñeyaḥ| aṅgagurutā śarīragauravam| virasāsyatā mukhasya vairasyam| viṇmūtrasaktiḥ viṇmūtrayorapravṛttiḥ| tandristandrā| parasyeti ²⁹ chandonurodhādasamāsanirdeśaḥ, paramadasyeti jñeyam| śirasi rujā pīḍā, sandhiṣu bhedaḥ sphuṭanamiva||19||

ādhmānamugramatha codgiraṇaṃ vidāhaḥ pāne'jarāṃ samupagacchati lakṣaṇāni |20| (su. u. taṃ. a. 47) |

pānājīrṇamāha– ādhmānamityādi| udgiraṇaṃ vāntiḥ, udgāro vā| pāne madye, ³⁰ ajarām ajīrṇamupagacchati apakvatvamupagacchatīti pānājīrṇavikāra ityarthaḥ|20|–

pānājīrṇamāha– ādhmānamityādi| udgiraṇaṃ vāntirudgāro vā| pāne madye, ajarāmajīrṇaṃ, samupagacchati prāptavati, pānājīrṇaṃ ityarthaḥ|20|–

hṛdgātratodakaphasaṃsravakaṇṭhadhūmā mūrchāvamijvaraśirorujanapradāhāḥ ||20|| dveṣaḥ surānnavikṛteṣvapi teṣu teṣu taṃ pānavibhramamuśantyakhilena dhīrāḥ | (su. u. taṃ. a. 47) |

pānavibhramamāha– hṛdityādi| kaṇṭhadhūmaḥ kaṇṭhāddhūmanirgamavatpīḍā| śirorujanaṃ śiraḥśūlam| surānnavikṛteṣviti surāvikṛteṣu annavikṛteṣu ca; bhāve ktaḥ| teṣu teṣviti nānāvikāreṣu surāmaireyapiṣṭakalaḍḍukādiṣu| uśanti icchanti| ete ca paramadādayastrayo na carake paṭhitāḥ, sannipātaje'ntarbhūtatvāt; suśrutena tūktatridoṣajamadātyayāt pṛthagete paṭhitāḥ, vikṛtyā pūrvalakṣaṇavailakṣaṇyābhidhānārthamityāhuḥ||20||–

pānavibhramamāha– hṛdityādi| hṛdityādi| hṛdgātrayostodaḥ vyathāviśeṣaḥ, kaṇṭhadhūmaḥ kaṇṭhāddhūmanirgamavatpīḍā, śirorujanaṃ śiraḥśūlaṃ, ³¹ pradehaḥ śleṣmaliptamiva mukham| surāvikṛteṣu annavikṛteṣu ca bhāveṣu dveṣaḥ| teṣu teṣviti nānāprakāreṣu surāmaireyapiṣṭakādiṣu| akhilena lakṣaṇena pānavibhramaṃ uśanti kathayanti| ete paramadādayastrayo na carake paṭhitāḥ, sannipātaje'ntarbhūtatvāt, suśrutena tūktatridoṣajamadātyayāḥ pṛthageva paṭhitāḥ, pūrvoktalakṣaṇavailakṣaṇyāt||20||–

hīnottarauṣṭhamatiśītamamandadāhaṃ tailaprabhāsyamapi pānahataṃ tyajettu ||21|| jihvauṣṭhadantamasitaṃ tvathavā'pi nīlaṃ pīte ca yasya nayane rudhiraprabhe vā | (su. u. taṃ. a. 47) |

asādhyalakṣaṇamāha– hīnetyādi| hīnottarauṣṭhaṃ pralambamānoparitanauṣṭham| atiśītaṃ bahiḥ, ³² amandadāhamabhyantare| tailaprabhāsyaṃ tailāktamukhamiva||21||–

asādhyalakṣaṇamāha– hīnetyādi| hīnottarauṣṭhaṃ pralambamānoparitanauṣṭham| atiśītaṃ bahiḥ, amandadāhamabhyantare; athavā atiśītamamandadāhamiti vikalpena pratyetavyam, ekadaikatra viruddhadharmadvayāsambhavāt; kadācidatiśītaṃ, kadācittīvradāham| ³³ ulbaṇamiti| tailaprabhāsyamiti tailāktamukhamiva||21||–

hikkājvarau vamathuvepathupārśvaśūlāḥ kāsabhramāvapi ca pānahataṃ bhajante ||22|| (su. u. taṃ. a. 47) |

upadravānāha– hikketyādi| etaiḥ kṛcchrasādhyaṃ bhavati, na tvasādhyam; asādhyalakṣaṇebhyaḥ pṛthakpāṭhāditi jejjaṭaḥ| ³⁴ dhvaṃsakavikṣepakākhyau madyavikārau carake ³⁵ pṛthak paṭhitau; tadyathā– “vicchinnamadyaḥ sahasā yo'timadyaṃ niṣevate| dhvaṃso vikṣepakaścaiva rogastasyopajāyate|| śleṣmaprasekaḥ kaṇṭhāsyaśoṣaḥ śabdāsahiṣṇutā| tandrānidrābhiyogaśca jñeyaṃ dhvaṃsakalakṣaṇam|| hṛtkaṇṭharodhaḥ sammohaśchardiraṅgarujā jvaraḥ| tṛṣṇā kāsaḥ śiraḥśūlametadvikṣepalakṣaṇam||” (ca. ci. a. 24) iti; tau ca suśrutena “vicchinnamadyaḥ sahasā yo'timadyaṃ niṣevate| tasya pānātyayoddiṣṭā vikārāḥ sambhavanti hi||” (su. u. taṃ. a. 47) ityanena ³⁶ saṅgṛhītau boddhavyau| na vā cikitsābhedastayoruktaḥ; yataścaraka evoktavān– “tayoḥ karma cikitsā ca vātike yanmadātyaye|” (ca. ci. a. 24) iti||22||

upadravānāha– jihvetyādi| ete upadravāḥ pānahatān puruṣān bhajante| asitaṃ kṛṣṇam, athavā nīlaṃ cāṣapakṣapratimam| rudhiraprabhe atīvarakte| ³⁷ hikketyādi| vamathuśchardiḥ, vepathuḥ kampaḥ| bhramaścakrārūḍhasyeva| etaiśca kṛcchrasādhyatvaṃ bhavati na tvasādhyatvam, asādhyalakṣaṇebhyaḥ pṛthakpāṭhāditi jejjaṭaḥ| dhvaṃsakavikṣepakākhyau madyavikārau carake paṭhitau| tadyathā– “vicchinnamadyaḥ sahasā yo'ti madyaṃ niṣevate| dhvaṃso vikṣepakaścaiva rogastasyopajāyate|| śleṣmaprasekaḥ ³⁸ kaṇṭharodhaḥ sammohaśchardiraṅgarujā jvaraḥ| tṛṣṇākāsaḥ śiraḥśūlametadvikṣepalakṣaṇam” iti| na vā tayościkitsābheda uktaḥ, yataścaraka evoktavān– “tayoḥ karma cikitsā ca vātike yanmadātyaye” iti||22||

iti śrīmādhavakaraviracite mādhavanidāne pānātyayaparamadapānājīrṇapānavibhramanidānaṃ samāptam ||18||

iti śrīvijayarakṣitakṛtāyāṃ madhukośavyākhyāyāṃ pānātyayaparamadapānājīrṇapānavibhramanidānaṃ samāptam||18|| ³⁹

iti śrīvaidyavācaspatikṛte ātaṅkadarpaṇākhye rugviniścayavyākhyāne pānātyaparamadapānājīrṇapānavibhramanidānam||18||

pāṭhāntarāḥ

1 . asyāgre kvacitpustake “śuddhakāyaḥ pibet prātaḥ sopadaṃśaṃ paladvayam| madhyāhne dviguṇaṃ tacca snigdhāhāreṇa pāyayet| pradoṣe'ṣṭapalaṃ tadvanmātrā madyarasāyane|| vāme rāmā ramaṇakuśalā dakṣiṇe pānapātraṃ cāgre dhṛtvā maricalavaṇaiśchāgalaṃ bhṛṣṭamāṃsam| vīṇānādaiḥ parabhṛtakṛtaiḥ kākalīgītayuktaiḥ so'yaṃ dhanyaḥ pibati madirāṃ bhairavo yasya tuṣṭaḥ||” ityadhikaḥ pāṭha upalabhyate | | ↩
2 . ‘upakrāntaratibhi ... ’ iti pā.| ↩
3 . ‘pradoṣeṣu’ iti pā.| ↩
4 . ‘śṛṅgārasamucitā ... ’ iti pā.| ↩
5 . ‘parārdhya ... ’ iti pā.| ↩
6 . ‘viṣaṃ ’ iti pā.| ↩
7 . ‘ ... navāṅkuravikāra ... ’ iti pā.| ↩
8 . ‘śṛṅgārasamucitā ... ’ iti pā.| ↩
9 . atra ‘dṛṣṭāntamāha’ iti kvacitpustake adhikaḥ pā.| ↩
10 . ‘ ... udbhūtatvenoktam’ iti pā.| ↩
11 . ‘rasataścāmlamiṣyate’ iti pā.| ↩
12 . ‘athavā’ iti pāṭhaḥ kvacitpustake nopalabhyate | ↩
13 . ‘iti’ iti pāṭhaḥ kvacitpustake nopalabhyate | ↩
14 . ‘iti’ iti pāṭhaḥ kvacitpustake nopalabhyate | ↩
15 . ‘viparyayeṇaitat’ iti pā.| ↩
16 . ‘māṃse'pi’ iti pā.| ↩
17 . ‘manovikārakāratve'pi tadātvena duḥkhāpahatvāt’ iti pā.| ↩
18 . ‘tadanena’ iti pā.| ↩
19 . ‘sañjñājñānaṃ ’ iti pā.| ↩
20 . ‘adhama’ iti pā.| ↩
21 . agrimapaṅktiḥ kvacitpustake nopalabhyate | ↩
22 . ‘ityupapātam’ iti pā.| ↩
23 . ‘krameṇābhi ... ’ iti pāṭhaḥ kvacitpustake nopalabhyate | ↩
24 . ‘yathā'gnirevaṃ satvādyairmadyaṃ prakṛtidarśakam’ iti pāṭhaḥ kvacitpustake nopalabhyate | ↩
25 . ‘vyāmodareṇa’ iti pā.| ↩
26 . ‘pānavibhramamapi vānyaḥ’ iti pā.| ↩
27 . ‘vātādiprāyā’ iti pāṭhaḥ kvacitpustake nopalabhyate | ↩
28 . ‘kiṃ tu’ iti pāṭhaḥ kvacitpustake nopalabhyate | ↩
29 . ‘chandonirodhā ... ’ iti pā.| ↩
30 . ‘ajarām’ iti pāṭhaḥ kvacitpustake nopalabhyate | ↩
31 . etacca– ‘śirorujanapradehāḥ’ iti pā.| ↩
32 . ‘amandadāhamantare|’ iti pā.| ↩
33 . ‘ulbaṇamiti’ iti pāṭhaḥ kvacitpustake nopalabhyate | ↩
34 . ‘dhvaṃsakavikṣepakāvapi’ iti pā.| ↩
35 . ‘pṛthak’ iti pāṭhaḥ kvacitpustake nopalabhyate | ↩
36 . ‘saṅgrahītau’ iti pā.| ↩
37 . ‘hikketyādi’ iti pāṭhaḥ kvacitpustake nopalabhyate | ↩
38 . ‘kaṇṭharodhaḥ sammohaśchardiraṅgarujā jvaraḥ|’ etatsthāne ‘kaṇṭhāsyaśoṣaḥ sarvāsahiṣṇutā| nidrātandrātiyogaśca jñeyaṃ dhvaṃsakalakṣaṇam|| hṛtkaṇṭharodhaḥ sammohaḥ chardiraṅgarujā jvaraḥ|’ iti pā.| ↩
39 . ‘ityātaṅkadarpaṇe nidānavyākhyāyāṃ pānātyaparamadapānājīrṇapānavibhramanidānam||18||’ iti pā.| ↩