20. unmādanidānam · e-Mādhavanidāna

athonmādanidānam | madayantyudgatā doṣā ¹ yasmādunmārgamāgatāḥ | mānaso'yamato vyādhirunmāda iti kīrtitaḥ ||1|| (su. u. taṃ. a. 62) |

madātyaye ‘unmādamiva cāparam’ ityanena unmādasaṅkīrtanamunmādasādṛśyaṃ coktaṃ, tathā madātyaye'pi dāho bhavatīti ² svalpavaktavyatayā dāhamabhidhāyonmādārambhaḥ, tasya niruktimāha– madayantītyādi| madayanti manovibhramaṃ kurvanti, ³ unmārgamāgatā vimārgamāgatā manovahādhamanīranuprāptāḥ| udgatā vṛddhāḥ, athavā ūrdhvaṃ hṛdayaṃ gatāḥ, ⁴ etenotpūrveṇaiva doṣāṇāṃ vṛddhatvaṃ vimārgagatvaṃ ca darśitam||1||

madātyaye ‘unmādamiva cāparam’ ⁵ ityanenonmādasaṅkīrtanamunmādasādṛśyaṃ coktaṃ, tathā madātyaye dāho bhavatīti tulyalakṣaṇatayā dāhamabhidhāyonmādārambhaḥ, tasya niruktimāha– madayantītyādi| yasmāddoṣā madayanti manovibhramaṃ kurvanti, ato'yaṃ mānaso vyādhirunmāda iti kīrtyata iti sambandhaḥ| kīdṛśāḥ? udgatā vṛddhāḥ, athavā ūrdhvaṃ hṛdayaṃ gatāḥ, unmārgamāgatā vimārgagāḥ, manovahadhamanīranuprāptāḥ, tena tataḥ pūrveṇaiva doṣāṇāṃ vṛddhatvaṃ vimārgagatvaṃ ca darśitam||1||

ekaikaśaḥ sarvaśaśca doṣairatyarthamūrchitaiḥ | mānasena ca duḥkhena sa ca pañcavidho mataḥ ||2|| viṣādbhavati ṣaṣṭhaśca yathāsvaṃ tatra bheṣajam | sa cāpravṛddhastaruṇo madasañjñāṃ bibharti ca ||3|| (su. u. taṃ. a. 62) |

prakārabhedamāha– ekaikaśa ityādi| mānasena ca duḥkheneti śokādinā| sa ceti ṣaḍvidho'pi| atrāpravṛddhapadamupādāyāpi taruṇapadaprayogaṃ kurvatā suśrutena svatantro'pi doṣajanito mado bhavatīti darśitam| ata eva carake vidhiśoṇitīyādhyāye (ca. sū. a. 24) unmādāt pṛthageva paṭhitaḥ sanidānacikitsita iti||2-3||

tasya saṅkhyāmāha– ekaikaśa ityādi| vātena pittena śleṣmaṇā sarvaśa iti sannipātena, atyarthamūrchitaiḥ atipravṛddhaiḥ, mānasena tu duḥkheneti śokādinā, viṣāt ṣaṣṭho bhavati| sa cāpravṛddha iti sa ca vikāraḥ, yāvat pravṛddho vṛddhiṃ gato na bhavati, yāvacca taruṇastāvanmada iti sañjñāṃ bibharti, mada iti kathyata ityarthaḥ| suśrute svatantro'pi doṣajanito mado bhavatīti vyākhyātam| ata eva carake vidhiśoṇitīyādhyāye unmādātpṛthageva paṭhitaḥ sa nidānacikitsita iti||2-3||

viruddhaduṣṭāśucibhojanani pradharṣaṇaṃ devagurudvijānām | unmādaheturbhayaharṣapūrvo mano'bhighāto viṣamāśca ceṣṭāḥ ||4|| (ca. ci. a. 9) |

sāmānyahetumāha– viruddhetyādi| duṣṭaṃ garasahitamannādi| pradharṣaṇaṃ ‘dhṛṣa’ pradharṣaṇe, ityasmāt pradharṣaṇamabhibhavaḥ| bhayaharṣapūrvo mano'bhighāta iti bhayaharṣābhyāṃ manaso'bhibhavaḥ; bhayaharṣapūrva iti bhayaṃ harṣo ⁶ dvau vā pūrvaṃ yasya sa tathā; pūrvaśabdo'tra kāraṇavācī, cakāro'tra luptanirdiṣṭo draṣṭavyaḥ, tena kāmakrodhalobhādayo'pi kāraṇamiti jejjaṭaḥ; anye tvāhuḥ– krodhādibhirapi bhayaharṣapūrvaka eva bhavatīti tena tau nirdiṣṭau| viṣamāśca ceṣṭā iti viṣamāṅganyāsabalavadvigrahādaya unmādahetava iti yojyam||4||

tasya sāmānyahetumāha– viruddhetyādi| duṣṭaṃ garaduṣṭamannādi, aśuci bhojanaṃ cāṇḍālādispṛṣṭaṃ, pradharṣaṇaṃ nindādyabhibhavanaṃ, manobhighāta iti bhayaharṣābhyāṃ manobhibhavaḥ, bhayaharṣapūrva iti bhayaharṣau pūrvau yasva sa tathā| pūrvaśabdo'tra kāraṇavācī, cakāro'tra luptanirdiṣṭo draṣṭavyaḥ, tena kāmakrodhalobhādayo'pi kāraṇamiti jejjaṭaḥ| anye tvāhuḥ– krodhādibhirapi bhayaharṣapūrvaka eva bhavatīti, tena tau nirdiṣṭāviti| viṣamāśceṣṭā iti viṣamāṅganyāsabalavadvigrahādayaḥ, unmādaheturiti yojyam||4||

tairalpasattvasya malāḥ praduṣṭā buddhernivāsaṃ hṛdayaṃ pradūṣya | srotāṃsyadhiṣṭhāya manovahāni pramohayantyāśu narasya cetaḥ ||5|| (ca. ci. a. 1) |

samprāptimāha– tairityādi| tairuktahetubhiḥ| alpasattvasya alpasattvaguṇasyeti cakraḥ; jejjaṭastvāha– sattvaṃ manaḥ, tasya cālpatvaṃ rajastamobhyāmāvṛtatvenālpajñānajanakatvāt| malā vātādayaḥ| buddhernivāsaṃ hṛdayamityanena hṛdayasyāśrayasya duṣṭyā tadāśritajñānasyāpi duṣṭirbhavatīti darśayati| srotāṃsi manovahānīti hṛdayāśritā daśa dhamanyaḥ; etacca viśeṣeṇa bodhyaṃ, nikhiladehasrotasāmeva mano'dhiṣṭhānatvena carake darśitatvāt| adhiṣṭhāya vyāpyetyarthaḥ||5||

samprāptimāha– tairityādi| tairuktahetubhiralpasattvasya narasya malā vātādayaḥ praduṣṭāḥ santo buddhernivāsaṃ hṛdayaṃ pradūṣya manovahāni srotāṃsi adhiṣṭhāya vyāpya āśu cetaḥ pramohayanti| alpasattvasyālpasatvaguṇasyeti cakraḥ; jejjaṭastvāha– sattvaṃ manaḥ, tasya cālpatvaṃ rajastamobhibhūtatvenālpajñānajanakatvāt| buddhernivāsaṃ hṛdayamityanena hṛdayamāśritā dhamanyaḥ, etacca viśeṣeṇa bodhyaṃ, nikhiladehasrotasāmeva manodhiṣṭhānatvena carake darśitatvāt| adhiṣṭhāya vyāpya||5||

dhīvibhramaḥ sattvapariplavaśca paryākulā dṛṣṭiradhīratā ca | abaddhavāktvaṃ hṛdayaṃ ca śūnyaṃ sāmānyamunmādagadasya liṅgam ||6|| (ca. ci. a. 9) |

sāmānyarūpamāha– dhīvibhrama ityādi| etat sāmānyaṃ pūrvarūpamiti jejjaṭaḥ, sāmānyarūpamiti cakraḥ| dhīvibhramo bhrāntajñānatvam| sattvapariplavo manasaścañcalatvam| adhīratā kātaratvam| abaddhavāktvamasambaddhavacanatvam| liṅgyate'neneti liṅga, tena pūrvarūpaṃ rūpaṃ ceti vyākhyātam||6||

pūrvarūpamāha– dhītyādi| dhīvibhramo bhrāntajñānatvaṃ, sattvapariplavo manasaścañcalatvam| anye sattvaguṇasyeti| paryākulā dṛṣṭiriti ākulābalokanam| adhīratā kātaratvam| abaddhavāktvaṃ asambaddhavacanatvam| hṛdayaṃ śūnyamityantaṃ dhīvibhramatvādi sāmānyalakṣaṇamevāha||6||

rūkṣālpaśītānnavirekadhātukṣayopavāsairanilo'tivṛddhaḥ | cintādiduṣṭaṃ hṛdayaṃ pradūṣya buddhiṃ smṛtiṃ cāpyupahanti śīghram ||7|| ⁷ asthānahāsasmitanṛtyagītavāgaṅgavikṣepaṇarodanāni | pāruṣyakārśyāruṇavarṇatāśca jīrṇe balaṃ cānilajasya rūpam ||8|| (ca. ci. a. 9) |

vātajamāha– rūkṣetyādi| ⁸ virekaśabdenātra vāntirapyabhidhīyate, virecayati dehānmalaṃ pṛthakkarotīti vyutpattyā| asthānahāsetyādi asthāne'viṣaye ⁹ hāso'sthānahāsaḥ; evamasthānaśabdaḥ smitādiṣu prayojyaḥ| smitamīṣaddhāsaḥ| aṅgavikṣepo viruddhaceṣṭā| jīrṇe balamiti jīrṇe āhāre vyādherbalaṃ bhavati||7-8||

vātikamāha– rūkṣetyādi| etadvātikonmādalakṣaṇam| rūkṣālpaśītānnairbhojyaiḥ| virekaśabdenātra vāntirapyabhidhīyate, virecayati dehānmalaṃ pṛthak karotīti vyākhyānāt| dhātukṣayo rasādidhātukṣayaḥ| etairduṣṭo vāyuścintāśokādiduṣṭaṃ hṛdayaṃ manaḥ praviśya buddhiṃ smṛtiṃ ca śīghramupahanti| anubhūtārthasmaraṇaṃ smṛtiḥ| asthānahāsyaṃ aviṣaye hāsyam| evamasthānaśabdaḥ smitādiṣu yojyaḥ| smitamīṣaddhāsaḥ, aṅgavikṣepaṇaṃ viruddhaceṣṭā, pāruṣyaṃ raukṣyaṃ, kārśyaṃ kṛśatā, aruṇavarṇatā īṣadraktavarṇatā, jīrṇe balamiti jīrṇe āhāre vyādherbalaṃ bhavatītyarthaḥ||7-8||

ajīrṇakaṭvamlavidāhyaśītairbhojyaiścitaṃ pittamudīrṇavegam | unmādamatyugramanātmakasya hṛdi sthitaṃ pūrvavadāśu kuryāt ||9|| amarṣasaṃrambhavinagnabhāvāḥ santarjanātidravaṇauṣṇyaroṣāḥ | pracchāyaśītānnajalābhilāṣaḥ pītā ca bhāḥ pittakṛtasya liṅgam ||10|| (ca. ci. a. 9) |

pittajamāha– ajīrṇetyādi| aśītairiti uṣṇaiḥ| unmādamatyugramiti atyugraṃ tīvravegam, ‘unmādayatyugram’ iti pāṭhāntare ugraṃ yathā bhavati tathā unmādaṃ janayati| anātmakasya anātmavataḥ| pūrvavaditi cintādiduṣṭahṛdayasya buddhyādikamupahatyetyādisamprāptyā| kuryāditi vakṣyamāṇaṃ liṅgamiti śeṣaḥ| atra pakṣe kiṃ talliṅgamityāha– amarṣetyādi– amarṣo'sahiṣṇutvaṃ, na tu roṣaḥ; tasya vakṣyamāṇatvāt| saṃrambha ārabhaṭī; vinagnabhāvo nagnatvam| santarjanaṃ ¹⁰ paritrāsanam, atidravaṇaṃ palāyanam, auṣṇyaṃ gātrasya; ‘auṣṭhyam iti pāṭhāntare vikṛtauṣṭhatvam| pracchāyaśītānnajalābhilāṣa iti chāyāyāṃ śītayorannajalayorabhilāṣaḥ||9-10||

paittikamāha– ajīrṇetyādi| ajīrṇādibhiścitaṃ sañcayatāṃ gatam| udīrṇavegaṃ pittaṃ pūrvavat cintādiduṣṭahṛdayasya buddhyādikamupahanti| ajīrṇamavidagdham, aśītaiḥ uṣṇaiḥ, ugraṃ tīvraṃ ¹¹ yathā bhavati ¹² tathā unmādaṃ janayati| anātmakasya anātmavataḥ| amarṣaṃ asahiṣṇutvaṃ, saṃrambha ārabhaṭī, hastapādādivikṣepaṇamityanye| vinagnabhāvo vastrādityāgaḥ| santarjanaṃ paritrāsanaṃ bhartsanamaparasyetyarthaḥ| abhidravaṇaṃ palāyanam| auṣṇyaṃ gātrasya, ‘auṣṭhyam’ iti pāṭhāntaraṃ, tatra vikṛtauṣṭhatvam| coṣo dāhaviśeṣaḥ| pracchāyetyādi chāyāyāḥ śītayoścānnajalayorabhilāṣaḥ| pītā ca bhāḥ pītavarṇatā||9-10||

sampūraṇairmandaviceṣṭitasya soṣmā kapho marmaṇi sampraduṣṭaḥ | buddhiṃ smṛtiṃ cāpyupahatya cittaṃ pramohayan sañjanayedvikāram ||11|| vākceṣṭitaṃ mandamarocakaśca nārīviviktapriyatā'tinidrā | chardiśca lālā ca balaṃ ca ¹³ bhukte nakhādiśauklyaṃ ca kaphātmake syāt | (ca. ci. a. 9) ||12||

kaphajamāha– sampūraṇairityādi| mandaviceṣṭitasya āyāsaśūnyasya| sampūraṇairbhojanādibhiḥ, kapho duṣṭa iti sambandhaḥ| soṣmā sapittaḥ| kaphenāpi kriyamāṇa unmādo'vaśyaṃ sapittena kriyate vyādhimahimnā, yathā mūrchā| anye tvāhuḥ– kevalakaphenāpi kriyate, soṣmapadena tu dvandvajo'pi bhavatīti sūcyate| anye tvāhuḥ– ūṣmaśabdena śaktirucyate, tenotkṛṣṭaśaktikaḥ kapha ityarthaḥ| marmaṇīti hṛdaye| vikāramunmādam| ¹⁴ vāgityādi nārīviviktapriyateti nārīpriyatā vijanapriyatā ca| balaṃ ca ¹⁵ bhukte iti ‘vyādheḥ’ iti śeṣaḥ| nakhādītyādiśabdena tvaṅmūtranetrādīnāṃ grahaṇam||11-12||

ślaiṣmikamāha– sampūraṇairityādi| mandaviceṣṭitasya āyāsaśūnyasya; sampūraṇairatibhojanādibhiḥ kapho duṣṭa iti sambandhaḥ| soṣmā sapittaḥ| kaphenāpi kriyamāṇa unmādo'vaśyaṃ sapittena kriyate vyādhimahimnā, yathā mūrchā| anye tvāhuḥ– kevalenāpi kaphena sa kriyate, soṣmapadena tu dvandvajo'pi bhavatīti sūcyate| anye tvāhuḥ– ūṣmaśabdena śaktirucyate, tenotkṛṣṭaśaktikaḥ kapha ityarthaḥ| marmaṇi hṛdaye| cittaṃ pramohayan buddhiṃ smṛtiṃ copahatya vikāramunmādam| vākceṣṭitaṃ mandam| alpam ¹⁶ arocakatā| nārīviviktapriyatā nārīpriyatā, vijanapriyatā ca| nidrābāhulyaṃ tathā chardiḥ, lālāsrāvaśca balaṃ ca bhuṅkte ¹⁷ nāśayati, ‘vyādheḥ’ iti śeṣaḥ| nakhanetrādīnāṃ śauklyam||11-12||

yaḥ sannipātaprabhavo'tighoraḥ sarvaiḥ samastaiḥ sa ca hetubhiḥ syāt | sarvāṇi rūpāṇi bibharti tādṛgviruddhabhaiṣajyavidhirvivarjyaḥ ||13|| (ca. ci. a. 9) |

sānnipātikamāha– ya ityādi| sarvaiḥ samastairiti sarvairiti ¹⁸ kṛtvā'pi yat samastairiti karoti tenaivaṃ bodhayati– vātādayo'nekaiḥ svanidānaiḥ kupitā unmādaṃ janayanti, natu pratyekamekanidānakupitāḥ| viruddhabhaiṣajyavidhirvivarjya iti ayamabhisandhiḥ– tridoṣaje pratyekaṃ ¹⁹ vātādipratyanīkā kriyā kāryā, sā ca parasparavirodhinī, tridoṣaharaṃ ca kiñcideva dravyamāmalakyādi, tattu nātra yaugikaṃ “na hi sarvāṇi sarvatra yaugikāni bhavanti” iti vacanāt| nanu, yadyevaṃ tadā sarva eva hi tridoṣajavikārā asādhyāḥ bhaveyurityata uktam– tādṛgiti| ko'pyayaṃ samprāptiviśeṣo rogaviśeṣo vā, yenāyaṃ viruddhabhaiṣajyavidhirna ²⁰ tu sarva ityarthaḥ| anye tvāhuḥ– sarvaiḥ samastairhetubhiryaiḥ kṛtaḥ sa evāsādhyaḥ, na tvalpahetukṛta iti||13||

sānnipātikamāha– ya ityādi| sannipātagrahaṇenaiva sarvātmakatvaṃ labdhaṃ punaḥ sarvairiti yadgrahaṇaṃ kṛtaṃ tadrajastamograhaṇārthaṃ, tena rajastamomilitairityarthaḥ; tena vātādayo rajastamobhiḥ manodoṣairmilitāḥ samastaiśca nidānaiḥ kupitā unmādaṃ janayanti| sarvāṇi rūpāṇi sarvadoṣalakṣaṇāni bibharti| tādṛgiti tādṛśaḥ| ko'pyeṣa tridoṣasamprāptiviśeṣo rogaviśeṣo vā, yenāyaṃ viruddhabhaiṣajyavidhirvivarjyaḥ; viruddhabhaiṣajyavidhiriti ko'rthaḥ? tridoṣaje pratyekaṃ vātādipratyanīkā kriyā kāryā, sā ca parasparavirodhinī, tridoṣaharaṃ ca kiñcideva dravyamāmalakādi, tacca nātra yaugikamityarthaḥ||13|| ²¹

corairnarendrapuruṣairaribhistathā'nyairvitrāsitasya dhanabāndhavasaṅkṣayādvā | gāḍhaṃ kṣate manasi ca priyayā riraṃsorjāyeta cotkaṭatamo manaso vikāraḥ ||14|| citraṃ bravīti ca mano'nugataṃ visañjño gāyatyatho hasati roditi cāpi mūḍhaḥ | (su. u. taṃ. a. 62) |

śokādijamāha– ²² corairityādi| kṣate ²³ upahate, ²⁴ priyayā riraṃsoḥ kāmukasya aprāptayā priyayā kṣate manasīti sambandhaḥ| tasya lakṣaṇamāha– citramityādi| citraṃ vividham| mano'nugataṃ gopyamapi| visañjño viparītajñānaḥ, ata eva mūḍhaḥ||14||–

manoduḥkhajamāha– ²⁵ caurairityādi| narendrapuruṣaiḥ nṛpādhikāribhiḥ, aribhiḥ, anyairiti siṃhagajādibhiḥ, vitrāsitasya krodhaśastrādibhiḥ; dravyavināśāt putrādimaraṇādvā, tathā riraṃsoḥ kāmukasya priyāyā aprāptyā, gāḍhaṃ kṣate manasīti sambandhaḥ| tasya rūpamāha– citramityādinā| citraṃ vividhaṃ mano'nugataṃ gopyamapi bravīti| visañjño viparītajñānaḥ, ata eva mūḍhaḥ||14||–

raktekṣaṇo hatabalendriyabhāḥ sudīnaḥ śyāvānano viṣakṛte'tha bhavedvisañjñaḥ ||15|| (su. u. taṃ. a. 62) |

viṣajamāha– raktekṣaṇa ityādi| hatabalendriyabhā iti hataṃ balamindriyāṇi bhāśca yasya sa tathā| bhā dīptiḥ||15|| ²⁶

raktekṣaṇa ityādi| hataṃ balamindriyāṇi bhāḥ śarīradīptiśca yasya sa tathā| śyāvānanaḥ kṛṣṇamukhaḥ viṣajanitonmādena||15|| ²⁷

avāñcī vā'pyudañcī vā kṣīṇamāṃsabalo naraḥ | jāgarūko hyasandehamunmādena vinaśyati ||16|| (su. u. taṃ. a. 62) |

asādhyalakṣaṇamāha– avāñcītyādi| avāñcī adhomukhaḥ, udañcī ūrdhvamukhaḥ, ata evānye ‘avāṅmukhastūnmukho vā’ iti paṭhanti| jāgarūko'nidraḥ||16||

asādhyalakṣaṇamāha– avāñcītyādi| avāñcī avāṅmukhaḥ, udañcī ūrdhvamukhaḥ| ‘avāṅmukhastūnmukho vā’ iti kecitpaṭhanti| kṣīṇaṃ māṃsaṃ ²⁸ balamojaśca yasya sa tathā| jāgarūkaḥ gatanidraḥ||16||

amartyavāgvikramavīryaceṣṭo jñānādivijñānabalādibhiryaḥ | unmādakālo'niyataśca ²⁹ tasya bhūtotthamunmādamudāharettam ||17|| (ca. ci. a. 9) |

bhautikonmādasya sāmānyalakṣaṇamāha– amartyavāgityādi| amartyā amanuṣyā anucitā vā vāgādayo yasya sa tathā| vikramaḥ parākramaḥ, vīryaṃ śaktiḥ, ceṣṭā śārīrikī kriyā| jñānādivijñānabalādibhiriti upalakṣaṇe tṛtīyā| jñānaṃ tattvajñānaṃ, vijñānaṃ śilpādijñānaṃ; kiṃvā jñānaṃ ³⁰ śāstrajñānaṃ, vijñānaṃ tadarthaniścayaḥ; ādiśabdena smṛtyādīnāṃ grahaṇaṃ, teṣāṃ balam| aniyata iti na vātajādivadāhārajīrṇādikālavat ³¹ kālaniyamaḥ| niyata iti pāṭhe tu vakṣyamāṇaniyatatithyādīnāṃ grahaṇaṃ ³² “devagrahāḥ paurṇamāsyāṃ” ityādi| bhūtaśabdenātra sarva eva vakṣyamāṇā devadayo'bhidhīyante||17||

bhūtajamunmādamāha– amartyavāgityādi| amartyānāmamanuṣyāṇāmanucitā vāgādayo yasya sa tathā| vikramaḥ parākramaḥ, vīryaṃ śaktiḥ, ceṣṭā śarīrakriyā| jñānādivijñānabalādibhiriti upalakṣaṇe tṛtīyā| jñānaṃ tatvajñānaṃ, vijñānaṃ śilpādijñānaṃ, kiṃvā jñānaṃ śāstraṃ, vijñānaṃ tadarthaniścayaḥ| ādiśabdena smṛtyādīnāṃ grahaṇaṃ, teṣāṃ balam| aniyata iti kadācinmadhyāhne, kadācitpradoṣe, na tu vātādijavadāhārajīrṇādikālaniyamaḥ, taṃ bhūtotthamunmādaṃ kathayet| ‘niyatā’ iti pāṭhe tu vakṣyamāṇaniyatatithyādīnāṃ grahaṇaṃ, devagrahāḥ paurṇamāsyāmityādi| bhūtaśabdenātra sarve vakṣyamāṇā devādayo'bhidhīyante||17||

santuṣṭaḥ śuciratidivyamālyagandho nistandrīravitathasaṃskṛtaprabhāṣī | tejasvī sthiranayano varapradātā brahmaṇyo bhavati naraḥ sa devajuṣṭaḥ ||18|| (su. u. taṃ. a. 60) |

devajuṣṭamāha– santuṣṭa ityādi| atidivyamālyagandha iti atimātro divyamālyasyeva gandho yasya sa tathā| nistandrīḥ anidraḥ| avitathaṃ satyam| videhe'pi “niḥsvapnaṃ satyasaṃskṛtabhāṣiṇam” iti paṭhitam| brahmaṇyo brāhmaṇānuraktaḥ| devajuṣṭo devagrahapīḍitaḥ| devagrahaṇena gaṇamātṛkādayo'pi grāhyāḥ| videhe'pi paṭhyate “krodhanaḥ srastasarvāṅgo lālāphenāvilānanaḥ| nidrāluḥ kampano mūko gaṇamātṛbhirarditaḥ||” iti||18||

devajuṣṭamāha– santuṣṭa ityādi| santuṣṭaḥ santoṣavān| śuciḥ snānācamanādinā| atimātraṃ divyamālyasyeva gandho yasya sa tathā| nistandrīḥ nidrārahitaḥ, avitathaṃ satyaṃ saṃskṛtaṃ ca prabhāṣata iti| videhe'pyuktam– “niḥsvapnaṃ satyasaṃskṛtabhāṣaṇam” iti| tejasvī tejoyuktaḥ, sthiranayanaḥ nimeṣarahitaḥ, varadātā yataḥ brahmaṇyaḥ brāhmaṇānuraktaḥ| devabhūtajuṣṭaḥ devagrahapīḍitaḥ| devagrahaṇena gaṇamātṛkādayo grāhyāḥ| yaduktaṃ videhe– “krodhanaḥ stabdhasarvāṅgo lālāphenāvilānanaḥ| nidrāluḥ kampano mūko gaṇamātṛbhirarditaḥ” iti||18||

saṃsvedī dvijagurudevadoṣavaktā jihmākṣo vigatabhayo vimārgadṛṣṭiḥ | santuṣṭo na bhavati cānnapānajātairduṣṭātmā bhavati sa devaśatrujuṣṭaḥ ||19|| (su. u. taṃ. a. 60) |

devaśatrujuṣṭamāha– saṃsvedītyādi||19||

asurajuṣṭamāha– saṃsvedītyādi| yaḥ saṃsvedī svedavān, brāhmaṇagurudevānāṃ nindakaḥ, jihmākṣaḥ kuṭiladṛṣṭiḥ, vimārgadṛṣṭiḥ, śrutidharmanindakaḥ; annaṃ śālimāṃsādi, pānaṃ kṣīramadyādi, taiḥ santuṣṭo na bhavati| duṣṭātmā pāpabuddhiḥ| evaṃvidho devaśatrujuṣṭo bhavati||19||

hṛṣṭātmā pulinavanāntaropasevī svācāraḥ priyaparigītagandhamālyaḥ | nṛtyan vai prahasati cāru cālpaśabdaṃ gandharvagrahaparipīḍito manuṣyaḥ ||20|| (su. u. taṃ. a. 60) |

gandharvāviṣṭamāha– hṛṣṭetyādi| pulinaṃ ³³ toyojjhitaṃ taṭam, antaraṃ madhyaṃ viśeṣo vā| svācāro'ninditācāraḥ| priyetyādi priyāṇi pari sarvato gītagandhamālyāni yasya sa tathā| nṛtyannityādi cāru (yathā bhavati tathā) nṛtyannalpaśabdaṃ ³⁴ yathā bhavati tathā prahasatīti yojyam||20|| ³⁵

gandharvāviṣṭamāha– hṛṣṭātmetyādi| hṛṣṭātmā cintādirahitaḥ santuṣṭātmā| pulinaṃ ³⁶ nadyāditaṭaṃ, vanamudyānaṃ, tayorantaraṃ madhyaṃ, tadviśeṣāt sevata iti| svācāraḥ aninditācāraḥ| priyāṇi pari samantatobhāvena gītagandhamālyāni yasya sa tathā| nṛtyannityādi cāru yathā bhavati tathā nṛtyan; alpaśabdo yathā bhavati tathā prahasanniti yojyam||20||

tāmrākṣaḥ priyatanuraktavastradhārī gambhīro drutagatiralpavāksahiṣṇuḥ | tejasvī vadati ca kiṃ dadāmi kasmai yo yakṣagrahaparipīḍito manuṣyaḥ ||21|| (su. u. taṃ. a. 60) |

yakṣāviṣṭamāha– tāmrākṣa ityādi| priyetyādi priyaṃ śobhanaṃ, tanu sūkṣmaṃ raktaṃ ca vastraṃ dhartuṃ śīlaṃ yasya sa tathā||21||

yakṣajuṣṭamāha– tāmrākṣa ityādi| tāmrākṣo raktanetraḥ| priyaṃ śobhanaṃ tanu sūkṣmaṃ raktavastraṃ dhartuṃ śīlaṃ yasya sa tathā| gambhīraḥ anākulitāntaḥkaraṇaḥ, drutagatiḥ uttālagatiḥ; alpavāk alpabhāṣī, sahiṣṇuḥ sahanaśīlaḥ| kasmai kiṃ dadāmītyevaṃ vadati||21||

pretānāṃ sa diśati saṃstareṣu piṇḍān śāntātmā jalamapi cāpasavyavastraḥ | māṃsepsustilaguḍapāyasābhikāmastadbhakto bhavati pitṛgrahābhijuṣṭaḥ ||22|| (su. u. taṃ. a. 60) |

pitṛjuṣṭamāha– pretānāmityādi| pretānāṃ ³⁷ mṛtapitṝṇāṃ, ³⁸ sambandhamātravivakṣayā na caturthī| diśati dadāti| saṃstareṣu kuśapatrādiracitāstaraṇeṣu| apasavyavastro vāmottarīyaḥ| māṃsepsurityādi| etadabhidhānaprayojanaṃ yasmin yasyecchā bhavati tasya tenaiva balirdātavyaḥ; evamanyatrāpi draṣṭavyam| tadbhaktaḥ pitṛbhaktaḥ||22||

pitṛgrahajuṣṭamāha– pretānāmityādi| pretānāṃ pitṝṇāṃ, sambandhamātrasya vivakṣitatvānna caturthī| diśati dadāti, saṃstareṣu kuśapatrādiracitasaṃstaraṇeṣu, piṇḍān annamayān, śāntātmā śāntasvabhāvaḥ, jalamapi ceti na paraṃ darbhasaṃstareṣu piṇḍān apasavyavastro vāmottarīyo dadāti kintu jalamapi cetyarthaḥ| ‘apasavyahastaḥ’ iti pāṭhe dakṣiṇahastaḥ| māṃsepsurityādi etadabhidhānaprayojanaṃ yasya yatrecchā bhavati tasya tenaiva balirdātavyaḥ| evamanyatrāpi draṣṭavyam| pāyasaḥ kṣīrasiddhāstaṇḍulāḥ, abhikāmo'bhilāṣukaḥ| tadbhaktaḥ pitṛbhaktaḥ; tadbhaktaḥ tilādibhojana iti ḍalhaṇaḥ||22||

yastūrvyāṃ prasarati sarpavat kadācit sṛkkaṇyau vilihati jihvayā tathaiva | krodhālurguḍamadhudugdhapāyasepsurjñātavyo bhavati bhujaṅgamena juṣṭaḥ ||23|| (su. u. taṃ. a. 60) |

nāgāviṣṭamāha– yastvityādi| prasarati sarpavaditi urasā gacchati| sṛkkaṇyau oṣṭhaprāntau| sṛkkaṇīśabda īkārānto'pyastītyunneyam||23||

sarpagrahajuṣṭamāha– ya ityādi| urvyāṃ bhūmau sarpavadurasā gacchati, ³⁹ sṛkkaṇyau oṣṭhaprāntau jihvayā vilihati| krodhāluḥ kopanaḥ, guḍādipriyaḥ, bhujaṅgamagraheṇa juṣṭo jñeyaḥ||23||

māṃsāsṛgvividhasurāvikāralipsurnirlajjo bhṛśamatiniṣṭhuro'tiśūraḥ | krodhālurvipulabalo niśāvihārī śaucadviḍ bhavati sa rākṣasairgṛhītaḥ ||24|| (su. u. taṃ. a. 60) |

rākṣasāviṣṭamāha– māṃsetyādi| niśāvihārī niśāyāmeva bhramaṇaśīlaḥ| rākṣasaśabdena brahmarākṣasādayo'pi grāhyāḥ| tathā ⁴⁰ rākṣasānantaraṃ videho'pi paṭhati– “devavipragurudveṣī ⁴¹ vedavedāṅganindakaḥ| ātmapīḍākaro hāsī brahmarākṣasasevitaḥ||” iti||24||

rākṣasajuṣṭamāha– māṃsetyādi| vividhasurāvikārāḥ paiṣṭīprabhṛtayaḥ, bhṛśamatiśayena lajjārahitaḥ, atiniṣṭhuraḥ dayārahitaḥ, vipulabalaḥ annādvinā'pi prabhūtabalaḥ, niśāvihārī niśāyāmeva bhramaṇaśīlaḥ, śaucadviṭ aśuciḥ| rākṣasagrahaṇena brahmarākṣasādayo'pi gṛhyante| yato rākṣasānantaraṃ videhe paṭhyate– “devavipragurudveṣī vedavedāṅganindakaḥ| ātmapīḍākaro hāsī brahmarākṣasasevitaḥ” iti||24||

uddhastaḥ kṛśaparuṣo ⁴² acirapralāpī durgandho bhṛśamaśucistathā'tilolaḥ | bahvāśī ⁴³ vijanavanāntaropasevī ⁴⁴ vyāceṣṭan bhramati rudan piśācajuṣṭaḥ ||25|| (su. u. taṃ. a. 60) |

piśācāviṣṭamāha– uddhasta ityādi| uddhasta ⁴⁵ ūrdhvabāhuḥ; ‘udvastra’ iti pāṭhāntaraṃ nyāyyaṃ, videhe'pi digambarapāṭhāt; udvastro ⁴⁶ nagnaḥ| paruṣo rūkṣaḥ| lolaḥ sarvasminnanne pāne ca ⁴⁷ satṛṣṇaḥ| ‘loluḥ’ iti pāṭhāntare sa evārthaḥ| vyāceṣṭanniti viruddhamāceṣṭan||25||

piśācajuṣṭamāha– uddhasta ityādi| uddhasta ūrdhvabāhuḥ| ‘udvastraḥ’ iti pāṭhe udvastro nagnaḥ, videhe'pi digambara iti pāṭhāt| kṛśo nirmāṃsaḥ, paruṣo rūkṣaḥ, viruddhalāpī viruddhabhāṣī| ‘acirapralāpī’ iti pāṭhāntaram| durgandhaḥ, atilolaḥ sarvasminnannapāne satṛṣṇaḥ, aticapala ityanye; ‘atiloluḥ’ iti pāṭhāntare aśanalolupa ityarthaḥ| bahvāśī pracurabhoktā| vijanaṃ nirjanasthānaṃ, ⁴⁸ himāmbu śītāmbu, tayoḥ sevī, rātreḥ sevī rātrivicārītyarthaḥ| ‘vijanavanāntaropasevī’ iti pāṭhāntaram| vyāceṣṭan vividhaṃ ceṣṭan; ‘vyāceṣṭam’ iti pāṭhāntare viruddhaceṣṭaṃ yathā bhavati tathā bhramati||25||

sthūlākṣo drutamaṭanaḥ sa phenalehī nidrāluḥ patati ca kampate ca yo hi | yaścādridviradanagādivicyutaḥ syāt so'sādhyo bhavati tathā trayodaśābde ||26|| (su. u. taṃ. a. 60) |

trividhaṃ hi hiṃsākrīḍāpūjārthaṃ grahā gṛhṇanti| yaduktam– “aśuciṃ bhinnamaryādaṃ kṣataṃ vā yadi vā'kṣatam| hiṃsyurhiṃsāvihārārthaṃ satkārārthamathāpi ca||” (su. u. taṃ. a. 60) iti| tatra hiṃsārthaṃ gṛhīto'sādhyo bhavati, tasya ślokārdhadvayena lakṣaṇamāha– sthūlākṣa ityādi| sthūlākṣo ⁴⁹ vikṛtanetra iti jejjaṭaḥ| drutamaṭano drutagatiḥ, ata eva ‘tvaritagatiḥ’ iti jejjaṭena paṭhitam| yaścetyādi| parvatādipatitaḥ san yo gṛhyate so'pyasādhyaḥ, nago vṛkṣaḥ| sarva evonmādī trayodaśe'bde devatādigṛhīto'pyasādhyaḥ| videhe'dhikamapyasādhyalakṣaṇaṃ paṭhyate– “meḍhrapravṛttaḥ kṣatajaḥ sāsrākṣaḥ srutanāsikaḥ| rūkṣajihvaḥ pūtigarbho hatavāgatidurbalaḥ||” ityādi||26||

trividhaṃ hi hiṃsākrīḍāpūjārthaṃ grahā gṛhṇanti| yaduktam– “aśuciṃ bhinnamaryādaṃ kṣataṃ vā yadi vā'kṣatam| hiṃsyurhiṃsāvihārārthaṃ satkārārthamathāpi ca” iti| asyārthaḥ bhinnamaryādaṃ śrutismṛtyuditakarmaṇo'nyatra karmaṇi pravṛttaṃ abhakṣyāgamyāhiṃsādipravṛttatvāt| kṣataṃ savraṇaṃ, māṃsaśoṇitapriyatvāt| akṣatamapi śaucādirahitam| atra vihāraśabdena ratirabhidhīyate| satkāraḥ pūjā| tatra hiṃsārthaṃ gṛhīto'sādhyo bhavati| tasya lakṣaṇamāha– sthūlākṣa ityādi| sthūlākṣo vivṛtanetraḥ, vidrutagatiḥ, ⁵⁰ yaścātikampate so'sādhyaḥ| yaścaitebhyaḥ patitaḥ syāt so'pyasādhyaḥ| adriḥ parvataḥ, dvirado gajaḥ, nago vṛkṣaḥ| ādigrahaṇāt taṭaprāsādādayo gṛhyante ⁵¹ sarvatronmādāditi śeṣaḥ| etebhyaḥ patitaḥ syādityarthaḥ| trayodaśe varṣe devādigṛhīto'pyasādhyaḥ| videhe'dhikamapyasādhyalakṣaṇaṃ paṭhitaṃ yathā– “meḍhrapravṛttaḥ kṣatajaḥ sāsrākṣaḥ srutanāsikaḥ| rūkṣajihvaḥ pūtigarbho hatavāgatidurbalaḥ” ityādi||26||

devagrahāḥ paurṇamāsyāmasurāḥ sandhyayorapi | gandharvāḥ prāyaśo'ṣṭamyāṃ, yakṣāśca pratipadyatha ||27|| pitryāḥ kṛṣṇakṣaye hiṃsyuḥ, pañcamyāmapi coragāḥ | rakṣāṃsi rātrau, paiśācāścaturdaśyāṃ viśanti hi ||28|| (su. u. taṃ. a. 60) |

devādīnāṃ grahaṇakālamāha– devagrahāḥ ityādi| paurṇamāsyāṃ pūrṇimāyām| kṛṣṇakṣaye'māvāsyāyām| prāyograhaṇādanyatrāpi| tithyabhidhānaprayojanaṃ lakṣaṇārthaṃ, tattithau balidānārthaṃ ca||27-28||

idānīṃ devagrahāṇāṃ grahaṇakālamāha– devagrahā ityādi| devagrahāḥ paurṇamāsyāṃ pūrṇimāyāṃ viśanti anupraveśaṃ kurvanti| asurā asuragrahāḥ| sandhyayorapītyapiśabdaḥ pādapūraṇe; anye apiśabdāt paurṇamāsyāmapi gṛhṇantīti varṇayanti| prāyaśo'ṣṭamyāmiti prāyaḥśabdāt sandhyayorapi gandharvā viśantīti labhyate| pitryāḥ pitṛgrahāḥ| kṛṣṇakṣaye kṛṣṇapakṣakṣaye, amāvāsyāyāmityarthaḥ| prāyograhaṇādanyatrāpi| pañcamyāmapītyapiśabdāt kṛṣṇakṣaye'pi| uragā nāgagrahāḥ| tithyabhidhānaprayojanaṃ lakṣaṇārthaṃ, teṣāṃ tithau balidānārthaṃ ca| tathā coktam– “grahā gṛhṇanti ye yeṣu teṣāṃ teṣu viśeṣataḥ| dineṣu balihomādīn prayuñjīta cikitsakaḥ||” iti||27-28||

darpaṇādīn yathā chāyā śītoṣṇaṃ prāṇino yathā | svamaṇiṃ bhāskarārciśca yathā dehaṃ ca dehadhṛk | viśanti ca na dṛśyante grahāstadvaccharīriṇaḥ ||29|| (su. u. taṃ. a. 60) | praviśyāśu śarīraṃ hi pīḍāṃ kurvanti duḥsahām ||30||

nanu, yadi grahāviṣṭānāṃ puṃsāmunmādaḥ syāt, tadā viśanto grahāḥ kuto ⁵² na lakṣyante? ⁵³ ityata āha– darpaṇādīnityādi| asmadādidarśanāyogyatvānna dṛśyanta ityarthaḥ| ādiśabdena prakāravācināṃ jalatailādīnāṃ grahaṇam| chāyā pratikṛtiḥ| śītoṣṇamiti kartṛpadaṃ, prāṇina iti karmapadam| svamaṇimiti sūryakāntam| dehadhṛk ātmā, mana iti jejjaṭaḥ| anekadṛṣṭāntaprayojanaṃ jejjaṭalikhitaṃ taccātrānupayuktatvena vistarabhayānna likhitam| devaśabdena cātra ⁵⁴ devasyānucarā devasadharmāṇo gṛhyante, devānāṃ manuṣyaśarīreṇāśucinā sambandhābhāvāt| yadāha suśrutaḥ– “na te manuṣyaiḥ saha saṃviśanti na te manuṣyān kvacidāviśanti| ye tvāviśantīti vadanti mohātte bhūtavidyāviṣayādapetāḥ||” (su. u. taṃ. a. 60) iti||29-30||

nanu, yadi grahāviṣṭānāṃ puṃsāmunmādaḥ syāt, tadā viśanto grahāḥ kuto na lakṣyante? ityata āha– darpaṇādīnityādi| asmadādidarśanāyogyatvānna dṛśyante| ādiśabdena prakāravācinā jalatailādīnāṃ grahaṇam| chāyā pratikṛtiḥ| śītoṣṇamiti kartṛpadaṃ, prāṇina iti karmapadam| svamaṇimiti sūryakāntam| dehadhṛk atmā, mana iti jejjaṭaḥ| anekadṛṣṭāntaprayojanaṃ jejjaṭena niścitaṃ, ⁵⁵ taccātrānupayuktatvena likhitaṃ vistarabhayācca| nanu bhūtaiḥ śarīre'nupraveśaḥ kriyate na tu śarīriṇi, tatkathaṃ śarīriṇa ityabhidhānaṃ na virudhyate? ucyate– śarīriśabdenātra śarīramabhipretaṃ, sthānini sthānopacārāt; yathā– mañcāḥ krośantīti| yathā chāyāśītoṣṇādayo darpaṇaprāṇiprabhṛtīn viśanto na dṛśyante tadvadgrahā ityarthaḥ| devādiśabdenātra devasyānucarā devasadharmāṇo gṛhyante, devādīnāṃ manuṣyaśarīreṇāśucinā sambandhābhāvāt| yadāha suśrutaḥ– “na te manuṣyaiḥ saha” ityādi||29-30||

tapāṃsi tīvrāṇi tathaiva dānaṃ vratāni dharmo niyamaśca satyam | guṇāstathā'ṣṭāvapi teṣu nityā vyastāḥ samastāśca yathāprabhāvam ||31|| na te manuṣyaiḥ saha saṃviśanti na vā manuṣyān kvacidāviśanti | ye tvāviśantīti vadanti mohātte bhūtavidyāviṣayādapohyāḥ ||32|| teṣāṃ grahāṇāṃ paricārakā ye koṭīsahasrāyutapadmasaṅkhyāḥ | asṛgvasāmāṃsabhujaḥ subhīmā niśāvihārāśca tathā''viśanti ||33||

idānīṃ grahāṇāṃ ⁵⁶ tīvratapādi yamādiyuktāṃ prabhāvavattāṃ suśrutoktena ślokatrayeṇa darśayitumāha– tapāṃsītyādi| tapastāpanalakṣaṇamupavāsādi, vratāni śāstroditavidhinā bhojanādiniyamanāni, ⁵⁷ karma kāyavāṅmanasāṃ sucaritam| guṇāstathāṣṭāviti aṇimā 1, mahimā 2, laghimā 3, prākāmyaṃ 4, prākāśyam 5, īśitvaṃ 6, vaśitvaṃ 7, yatra kāmāvasāyitvaṃ 8, ceti| anye tu– “āveśaścetaso jñānamarthānāṃ śabdanakriyā| dṛṣṭiḥ śrotraṃ smṛtiḥ kāntiriṣṭataścāpyadarśanam||” ityaṣṭavidhamaiśvaryamāhuḥ| teṣu graheṣu ete guṇā nityāḥ, na kādācitkāḥ, vyastā dvitricatvāra ityādi; samastāḥ sarve; yo yasya prabhāva iti yathāprabhāvaṃ; tatra vyastā guṇā asurādigrahāṇāṃ, samastā devagrahāṇām| atha te niyamādiyuktāścet kathamaśuciṃ dehamāviśanti, na kathañcana, ata evāha– netyādi| te devādayo manuṣyaiḥ saha na viśanti na ekībhavantītyarthaḥ| na vā manuṣyān mānuṣadehān, kvacidapyanupraviśantītyarthaḥ| ye punarvaidyā ‘āviśanti’ iti mohādajñānāt pravadanti, te vaidyā bhūtavidyāviṣayāttajjñānādapohyā apasāraṇīyāstyājyā ityarthaḥ| ke tarhi gṛhṇantītyāha– ⁵⁸ teṣāmiti teṣāṃ devādīnāṃ paricārakāḥ preṣyāḥ, karmakarā ityarthaḥ| koṭyaḥ śatalakṣapramāṇāḥ, ayutaṃ daśasahasram, etena koṭighnaṃ śatalakṣapramāṇaguṇitaṃ yat sahasraṃ tādṛśaiḥ daśabhiḥ sahasrairatrāyutaṃ boddhavyaṃ; teṣāṃ padmaṃ, padmaṃ caturdaśabindukaṃ, tadeva saṅkhyā yeṣāṃ te tathā| subhīmā atyarthaṃ bhayānakāḥ| niśāvihārā rātrau bhramaṇaśīlāḥ||31-33||

iti śrīmādhavakaraviracite mādhavanidāna unmādanidānaṃ samāptam||20|| ||20||

iti śrīvijayarakṣitakṛtāyāṃ madhukośavyākhyāyāmunmādanidānaṃ samāptam||20|| ⁵⁹

iti śrīvācaspativaidyaviracitāyāṃ mādhavanidānavyākhyāyāmātaṅkadarpaṇākhyāyāmunmādanidānam||20||

pāṭhāntarāḥ

1 . ‘ ... unmārgamāśritāḥ’ iti pā. | ↩
2 . ‘alpavaktavyatayā’ iti pā.| ↩
3 . ‘manovahādhamanīranuprāptāḥ unmārgamāgatā vimārgamāgatā|’ iti pā.| ↩
4 . ‘tena tataḥ pūrveṇaiva’ iti pā.| ↩
5 . ‘ityanyenonmāda ... ’ iti pā.| ↩
6 . atra ‘dvau’ iti kvacitpustake adhikaḥ pā.| ↩
7 . ‘asthānahāsyasmita ... ’ iti pā. | ↩
8 . agrimapaṅktiḥ kvacitpustake nopalabhyate | ↩
9 . ‘hāsyo'sthānahāsyaḥ’ iti pā.| ↩
10 . ‘paratrāsanam’ iti pā.| ↩
11 . ‘yadā’ iti pā.| ↩
12 . ‘tadā’ iti pā.| ↩
13 . ‘bhuṅkte’ iti pā. | ↩
14 . ‘vāgityādi’ iti pāṭhaḥ kvacitpustake nopalabhyate | ↩
15 . ‘bhuṅkte’ iti pā.| ↩
16 . ‘arocakatā’ iti pāṭhaḥ kvacitpustake nopalabhyate | ↩
17 . ‘nāśayati’ iti pāṭhaḥ kvacitpustake nopalabhyate | ↩
18 . ‘kṛtvā’ iti pā.| ↩
19 . ‘vātātipratyanīkā’ iti pā.| ↩
20 . atra ‘tu’ iti kvacitpustake adhikaḥ pā.| ↩
21 . ‘cauraiḥ ... ’ iti pā. | ↩
22 . ‘cauraiḥ ... ’ iti pā.| ↩
23 . ‘copahate’ iti pā.| ↩
24 . ‘tathā’ iti pā.| ↩
25 . ‘coraiḥ ... ’ iti pā.| ↩
26 . atra ‘raktekṣaṇa ityādi’ iti kvacitpustake adhikaḥ pā.| ↩
27 . ‘avāṅmukhastūnmukho vā’ iti pā. | ↩
28 . ‘balamojo’ iti pā.| ↩
29 . ‘yasya’ iti pā. | ↩
30 . ‘śāstram’ iti pā.| ↩
31 . ‘kālaniścayaḥ’ iti pā.| ↩
32 . ‘devagrahāḥ paurṇamāsyām’ ityasya sthāne ‘devagrahā paurṇamāsyādi’ iti pā.| ↩
33 . ‘toyotthitataṭam’ iti pā.| ↩
34 . ‘yathā bhavati tathā’ etadagrimapaṅktiḥ kvacitpustake nopalabhyate | ↩
35 . ‘gandharvajuṣṭamāha’ iti pā.| ↩
36 . ‘toyojjhitaṃ taṭam’ iti pā.| ↩
37 . ‘pitṝṇām’ iti pā.| ↩
38 . ‘sambandhavivakṣitatvāt’ iti pā.| ↩
39 . ‘sṛkkiṇyau’ iti pā.| ↩
40 . ‘rākṣasāntaram’ iti pā.| ↩
41 . ‘ ... vicchuciḥ’ iti pā.| ↩
42 . ‘ ... viruddhalāpi’ iti pā. | ↩
43 . ‘vijanavanāmburātrisevī’ iti pā. | ↩
44 . ‘vyāceṣṭanan’ iti pā. | ↩
45 . ‘udbāhuḥ’ iti pā.| ↩
46 . atra ‘nagnaḥ’ iti kvacitpustake adhikaḥ pā.| ↩
47 . ‘salobhaḥ’ iti pā.| ↩
48 . etacca– ‘vijanahimāmburātrisevī’ iti pā.|| ↩
49 . ‘vivṛtanetra’ iti pā.| ↩
50 . ‘yaścātikampate so'sādhyaḥ’ ityasya sthāne ‘kampate ca yo'ti’ iti pā.| ↩
51 . atra ‘sarvatronmādāditi śeṣaḥ’ iti kvacitpustake adhikaḥ pā.| ↩
52 . ‘nopalabhyante’ iti pā.| ↩
53 . ‘ataḥ’ iti pā.| ↩
54 . ‘devādyanucarā’ iti pā.| ↩
55 . ‘taccātrānupayogitvānna’ iti pā.| ↩
56 . ‘tīvratamāni’ iti pā.| ↩
57 . ‘dharmaḥ’ iti pā.| ↩
58 . atra ‘teṣāmiti’ iti kvacitpustake adhikaḥ pā.| ↩
59 . ‘ityātaṅkadarpaṇe nidānavyākhyāyāmunmādanidānam||20||’ iti pā.| ↩