43. sadyovraṇanidānam · e-Mādhavanidāna

nānādhāramukhaiḥ śastrairnānāsthānanipātitaiḥ | bhavanti nānākṛtayo vraṇāstāṃstānnibodha me ||1|| chinnaṃ bhinnaṃ tathā viddhaṃ kṣataṃ piccitameva ca | ghṛṣṭamāhustathā ṣaṣṭhaṃ teṣāṃ vakṣyāmi lakṣaṇam ||2|| (su. ci. a. 2) |

śārīravraṇamabhidhāyāgantuvraṇamāha– nānādhāramukhairityādi| nānā dhārā mukhāni ca yeṣāṃ tāni tathā| sthānaviśeṣo'pi śastranipātatulyatvenākṛtiviśeṣe heturityata uktaṃ– nānāsthānanipātitairiti||1-2||

atha śārīravraṇamabhidhāyāgantumāha– nānetyādi| nānādhārāmukhaiḥ śastraiḥ, nānāsthānanipātitaiḥ, ebhirnānākṛtayo vraṇā bhavanti, me matsakāśāttān vraṇān nibodha jānīhi| tatṣāḍvidhyamāha– chinnamityādi| evaṃ chinnādibhedena āgantavaḥ ṣaḍvidhā bhavanti||1-2||

tiryak chinna ṛjurvā'pi yo vraṇastvāyato bhavet | gātrasya pātanaṃ taddhi chinnamityabhidhīyate ||3|| (su. ci. a. 2) |

chinnalakṣaṇamāha– tiryagityādi| tiryagiti tiryagvyavasthitaḥ| chinnaḥ chedasampannaḥ| ṛjuravakraḥ| gātrasya pātanamiti gātrāvayavasya tadekadeśarūpasya vā gātrasya pātanam||3||

tatra chinnalakṣaṇamāha– tiryagityādi| yo vraṇastiryak chinno'thavā ṛjuśchinnaḥ sannāyato bhavet, tiryagiti tiryagvyavasthitaḥ, chinnaḥ chedasampannaḥ| ‘tiraścīnaḥ’ iti pāṭhāntare sa evārthaḥ, ṛjuravakraḥ, anayordvayorapyāyata iti viśeṣaṇam| ¹ atra pātanaṃ nirdiśannāha– gātrasya pātanamiti gātrasyāvayavasya tadekadeśarūpasya vā gātrasya pātanam| ḍallanastu vyācaṣṭe– śastrādiprahāreṇa gātrasya hastādeḥ pātanaṃ, cakārādapātanaṃ ca||3|| ²

śaktidanteṣu khaḍgāgraviṣāṇairāśayo hataḥ | yatkiñcit prasravettaddhi bhinnalakṣaṇamucyate ||4|| (su. ci. a. 2) |

bhinnalakṣaṇamāha– śaktītyādi| viṣāṇaṃ dantaḥ śṛṅgaṃ ca| etadbhinnalakṣaṇaṃ pāribhāṣikaṃ; tena vyadha evāśayadeśe bheda ucyate, āśayadeśarahite tu vyadhaḥ| yatkiñcidityādi| yasya mūtrarudhirāderya āśayo bhinnaḥ sa tat prasravet; tena bastirbhinno mūtraṃ, rudhirāśayo rudhiramityādi||4||

bhinnalakṣaṇamāha– śaktītyādi| śaktyādibhirāśayo hataḥ san yatkiñcit prasravet, tadbhinnalakṣaṇamucyate| kunto bhallaḥ, viṣāṇaṃ dantaḥ śṛṅgaṃ ca, etadbhinnalakṣaṇaṃ pāribhāṣikaṃ, tena vyadha evāśayadeśe bheda ucyate, āśayarahite tu deśe vyadhaḥ| yatkiñcit prasravediti kimapi nirdeṣṭavyamityarthaḥ| yasya mūtrarudhirāderyaścāśayo bhinnaḥ sa tat prasravet; tena bastirbhinno mūtraṃ, udaraṃ medaḥ, purīṣāśayaḥ purīṣaṃ, rudhirāśayo rudhiramiti||4||

sthānānyāmāgnipakvānāṃ mūtrasya rudhirasya ca | hṛduṇḍukaḥ phupphusaśca koṣṭha ityabhidhīyate ||5|| tasmin bhinne raktapūrṇe jvaro dāhaśca jāyate | mūtramārgagudāsyebhyo raktaṃ ghrāṇācca gacchati ||6|| mūrchā śvāsastṛṣā''dhmānamabhaktacchanda eva ca | viṇmūtravātasaṅgaśca svedāsrāvo'kṣiraktatā ||7|| lohagandhitvamāsyasya gātradaurgandhyameva ca | hṛcchūlaṃ pārśvayoścāpi viśeṣaṃ cātra me śṛṇu ||8|| āmāśayasthe rudhire rudhiraṃ chardayatyapi | ādhmānamatimātraṃ ca śūlaṃ ca bhṛśadāruṇam ||9|| pakvāśayagate cāpi rujā gauravameva ca | adhaḥkāye viśeṣeṇa śītatā ca bhavediha ||10|| (su. ci. a. 2) |

yatra bhūyasā''māśayānāṃ sthāne bhedavyapadeśastamāha– sthānānītyādi| āmasya sthānamāmāśayaḥ agneḥ pacyamānāśayaḥ, ³ malasya pakvāśayaḥ, mūtrasya bastiḥ, rudhirasya yakṛtplīhānau, hṛt hṛdayaṃ, uṇḍuka ikṣurasapākamalavadyaḥ śoṇitamalastajja uṇḍukaḥ, sa cāntradeśe vyavasthitaḥ purīṣādhānamiti, phupphusa iti hṛdayasya vāmapārśve raktādhāraḥ ‘phupphusa’ iti khyātaḥ| mūtramārgagudāsyebhyo raktaṃ ghrāṇācca gacchatīti bastyādau bhinne mehanagudābhyāṃ raktaṃ niḥsarati, āmāśayādibhede tu mukhaghrāṇābhyāṃ raktanirgamaḥ| svedāsrāva iti svedasyātyantasrutiḥ| pārśvayoścāpīti śūlamiti sambandhaḥ| me ityavyayaṃ matta ityarthaḥ| āmāśayastha ityādi ādhmānaṃ raktāvatatatvādvāyoḥ| rujā śūlam| gauravaṃ raktabahutvāt| adhaḥkāye viśeṣeṇa śītateti vyādhiprabhāvāt||5-10||

yatra bhūyasāmāśayānāṃ ⁴ sthāne bhedavyapadeśastamāha– sthānānītyādi| sthānaśabdaḥ āmādibhiḥ pratyekaṃ sambadhyate, āmasya sthānamāmāśayaḥ, agneḥ pacyamānāśayaḥ, pakvasya pakvāśayaḥ, mūtrasya bastiḥ, rudhirasya yakṛtplīhānau, hṛt hṛdayaṃ, uṇḍuka ikṣurasapākamalavacchoṇitamalaḥ, tajja uṇḍukaḥ, sa cāntradeśe vyavasthitaḥ purīṣādhānaṃ, phupphusa iti hṛdayasya vāmapārśve ⁵ phupphusa iti khyātaḥ| āmādīnāṃ sthānāni koṣṭha ityabhidhīyate| bhinnakoṣṭhasya sāmānyaliṅgamāha– tasminnityādi| tatra bastyādau bhinne mehanagudābhyāṃ raktaṃ niḥsarati, āmāśayādibhede tu mukhaghrāṇābhyāṃ raktanirgamaḥ, jvaramūrchādaya upadravā bhavanti, viṇmūtravātānāṃ saṅgo'pravṛtiḥ, svedāsrāvaḥ svedasyāsrutiḥ| mukhasya lohagandhatā, hṛtpārśvayoḥ śūlamiti sambandhaḥ| atrāpi me matto viśeṣaṃ śṛṇu| raktapūrṇabhedalakṣaṇamāha– āmāśayastha ityādi| atimātramādhmānaṃ ādhmātabastirivodarapūrṇatā, dāruṇaṃ māraṇātmakam| pakvāśayasthitasya raktasya lakṣaṇamāha– pakvetyādi| rujā śūlam| gauravamiti nābheradho boddhavyam| adhaḥkāye viśeṣeṇa śītateti vyādhiprabhāvāt||5-10||

sūkṣmāsyaśalyābhihataṃ yadaṅgaṃ tvāśayaṃ vinā | uttuṇḍitaṃ nirgataṃ vā tadviddhamiti nirdiśet ||11|| (su. ci. a. 2) |

viddhalakṣaṇamāha– sūkṣmāsyaśalyetyādi| āśayaṃ vineti uktāmādyāśayaṃ vinā| uttuṇḍitamanirgataśalyopalakṣaṇaṃ, tenānuttuṇḍitamuttuṇḍitaṃ ca viddhaṃ gṛhyate| nirgatena ca nirgatamukhaṃ viddhaṃ sarvathā nirgataṃ ca gṛhyate; tena tantrāntare “viddhamuttuṇḍitamanuttuṇḍitaṃ bhinnaṃ nirbhinnam” iti ⁶ yaccatuṣprakāramabhihitaṃ tat sarvaṃ saṅgṛhītam||11||

viddhalakṣaṇamāha– sūkṣmetyādi| āśayaṃ vinā sūkṣmāsyena śalyena yadaṅgamabhihatam uttuṇḍitaṃ unnamitatvaṅmāṃsam īṣaddṛṣṭamukhaṃ vā, nirgataṃ nirgataśalyam, uttuṇḍitamanirgataśalyopalakṣaṇam| tenānuttuṇḍitaṃ ca viddhaṃ gṛhyate, nirgatena ca vinirgatamukhaṃ viddhaṃ sarvadā nirgataṃ ca gṛhyate, tena tantrāntare viddhamuttuṇḍitamanuttuṇḍitaṃ bhinnaṃ nirbhinnamiti catuḥprakāramabhihitaṃ tatsaṅgṛhītam||11||

nāticchinnaṃ nātibhinnamubhayorlakṣaṇānvitam | viṣamaṃ vraṇamaṅge yattat kṣataṃ tvabhidhīyate ||12|| (su. ci. a. 2) |

kṣatamāha– nāticchinnamityādi| ⁷ nāticchinnaṃ nāvagāḍhacchedam| nātibhinnamiti nātividīrṇāśayam| ubhayorlakṣaṇānvitamiti stokacchedastokāvadaraṇayogādubhayalakṣaṇayuktam| viṣamaṃ vraṇamaṅge yaditi aṅgavaiṣamyakaraṃ vraṇaṃ yattat kṣatam||12||

kṣatalakṣaṇamāha– netyādi| nāticchinnamiti nāvagāḍhacchinnaṃ, nātibhinnamiti nātividīrṇāśayam| ubhayoriti chinnabhinnayorityarthaḥ| tena stokacchedastokāvadaraṇayogādubhayalakṣaṇayuktam| viṣamaṃ vraṇamaṅge iti aṅge vaiṣamyakaraṃ vraṇaṃ yattatkṣatamiti||12||

prahārapīḍanābhyāṃ tu yadaṅgaṃ pṛthutāṃ gatam | sāsthi tat piccitaṃ vidyānmajjaraktapariplutam ||13|| (su. ci. a. 2) |

piccitalakṣaṇamāha– prahāretyādinā| prahāro mudgarādinā, pīḍanaṃ kapāṭādinā| pṛthutāmiti cippiṭatām| majjaraktapariplutamityanena vraṇabhāvāt majjaraktāgamaṃ darśayati| tena yat vraṇaṃ piccitaṃ, tadbhagnasya tathā sadyovraṇasya ca cikitsāviṣayam||13||

piccitalakṣaṇamāha– ⁸ prahāretyādi| prahāro mudgarādinā, pīḍanaṃ karādinā, pṛthutāṃ vipulatāṃ, sāsthi asthikhaṇḍānvitaṃ, majjaraktapariplutamityanena vraṇabhāvānmajjaraktāgamaṃ darśayati, tena yadvraṇaṃ piccitaṃ tadbhagnasya tathā sadyovraṇasya cikitsāviṣayam||13||

gharṣaṇādabhighātādvā yadaṅgaṃ vigatatvacam | uṣāsrāvānvitaṃ tacca ghṛṣṭamityabhidhīyate ||14|| (su. ci. a. 2) |

ghṛṣṭalakṣaṇamāha– gharṣaṇādityādi| gharṣaṇāt karkaśavastrādinā| vigatatvacamiti pāṭhaṃ tyaktvā ‘vigatatvacā’ iti pāṭhaḥ sādhuḥ, vigatatvacopalakṣitamaṅgam| uṣā ⁹ ūṣmanirgamavadvyathā||14||

ghṛṣṭalakṣaṇamāha– gharṣaṇādityādi| yadaṅgaṃ gharṣaṇāt karṣaṇāt karkaśavastrādinā abhighātādvā vigatatvacaṃ bhavati, anye ‘vigatatvacā’ iti pāṭhaṃ paṭhanti, vigatatvacā lakṣitamaṅgam| uṣā ūṣmānirgamavadvyathā||14||

śyāvaṃ saśothaṃ piḍakācitaṃ ca muhurmuhuḥ śoṇitavāhinaṃ ca | mṛdūdgataṃ budbudatulyamāṃsaṃ vraṇaṃ saśalyaṃ sarujaṃ vadanti ||15|| tvaco'tītya ¹⁰ sirādīni bhittvā vā parihṛtya vā | koṣṭhe pratiṣṭhitaṃ śalyaṃ kuryāduktānupadravān ||16|| (su. ci. a. 2) |

koṣṭhabhedamāha– tvaca ityādi| tvaca iti sapta tvacaḥ| ¹¹ sirādīnīti māṃsasnāyvasthisandhīni| parihṛtya veti parihārapakṣe'pi koṣṭhabhedasya saṅgatatvāt; ¹² sirāvyadhaliṅgaṃ cātraiva ‘surendragopapratimaṃ’ ityādinā vyaktībhaviṣyati| uktāniti pranaṣṭaśalyavijñānīye| tatra hyuktaṃ– “koṣṭhagate tvāṭopānāhau mūtrapurīṣāhāradarśanaṃ ca vraṇamukhādbhavati|” (su. sū. a. 26) iti||15-16|| ¹³

saśalyavraṇalakṣaṇamāha– śyāvamityādi| śyāvaṃ śāvavarṇam| muhurvāraṃvāraṃ, śoṇitasrāvayuktaṃ, mṛdu komalaṃ, udgataṃ tumbyākārāvasthitabudbudena sadṛśaṃ māṃsaṃ yasya taṃ, sarujaṃ pīḍāyuktam| koṣṭhabhedamāha– tvaca ityādi| sapta tvacaḥ, sirādīni ¹⁴ sirāmāṃsasnāyvasthisandhīni bhittvā, parihṛtya veti santyajya vā| uktāniti pranaṣṭaśalyavijñānīye| tatra hyuktaṃ, “koṣṭhagate tvāṭopānāhau mūtrapurīṣāhāradarśanaṃ ca vraṇamukhādbhavati” iti||15-16||

tatrāntarlohitaṃ pāṇḍuśītapādakarānanam | śītocchvāsaṃ raktanetramānaddhaṃ ca vivarjayet ||17||

asādhyakoṣṭhabhedaliṅgamāha– tatretyādi| tatra koṣṭhe| antarlohitamiti abhyantarasthitaraktam, aniḥsṛtaraktamiti yāvat| ānaddhamityānāhavantam||17||

asādhyakoṣṭhāntarbhedaliṅgamāha– tatretyādi| koṣṭhe antarlohitam abhyantarasthitaraktam, aniḥsṛtaraktamiti| pāṇḍūni śītāni pādakarānanāni yasya taṃ, tathā| ānaddhaṃ ānāhayuktam||17||

bhramaḥ pralāpaḥ patanaṃ pramoho viceṣṭanaṃ glānirathoṣṇatā ca | srastāṅgatā mūrchanamūrdhvavātastīvrā rujā vātakṛtāśca tāstāḥ ||18|| māṃsodakābhaṃ rudhiraṃ ca gacchet sarvendriyārthoparamastathaiva | daśārdhasaṅkhyeṣvatha vikṣateṣu sāmānyato marmasu liṅgamuktam ||19|| (su. sū. a. 25) |

māṃsasirāsnāyvasthisandhimarmasu pañcasu kṣateṣu sāmānyaliṅgamāha– bhrama ityādi| viceṣṭanaṃ viruddhaceṣṭanaṃ karacaraṇādikṣepādikam| glānirbalakṣayaḥ| srastāṅgatā aṅgasandhivisraṃsavadvyathā| mūrchanamindriyamohaḥ| indriyārthoparama indriyāṇāṃ svaviṣayeṣu rūpādiṣu uparamo grahaṇāśaktiḥ| daśārdhasaṅkhyeṣu pañcasu||18-19|| ¹⁵

māṃsasandhisirāsnāyvasthimarmasu pañcasu kṣateṣu sāmānyaliṅgamāha– bhrama ityādi| bhramaścakrārūḍhasyeva, patanaṃ bhūmau, pramohaḥ manomohaḥ, viceṣṭanaṃ viruddhaceṣṭanaṃ caraṇakṣepaṇādikaṃ, glāniḥ balakṣayaḥ, srastāṅgatā aṅgasandhivisraṃsavadvyathā, śarīraśaithilyaṃ vā, mūrchanamindriyasammohaḥ, pramohastu manomohaḥ, ūrdhvavāta iti udgārabāhulyaṃ, vātakṛtā rujastāstā daṇḍāpatānakākṣepakādyāḥ| sarvendriyārthoparamaḥ svaviṣayeṣu rūpādiṣu uparamo grahaṇe'śaktiḥ, daśārdhasaṅkhyeṣu pañcasu||18-19||

surendragopapratimaṃ prabhūtaṃ raktaṃ ¹⁶ sravettatkṣayajaśca vāyuḥ | karoti rogān vividhān ¹⁷ yathoktān sirāsu viddhāsvatha vā kṣatāsu ||20|| kaubjyaṃ śarīrāvayavāvasādaḥ kriyāsvaśaktistumulā rujaśca | cirādvraṇo rohati yasya cāpi taṃ snāyuviddhaṃ puruṣaṃ vyavasyet ||21|| ¹⁸ śophābhivṛddhistumulā rujaśca balakṣayaḥ sarvata eva śothaḥ | kṣateṣu sandhiṣvacalācaleṣu syāt sarvakarmoparamaśca liṅgam ||22|| ghorā rujo yasya niśādineṣu sarvāsvavasthāsu ca naiti śāntim | bhiṣagvipaścidviditārthasūtrastamasthividdhaṃ puruṣaṃ vyavasyet ||23|| (su. sū. a. 25) | ¹⁹

sirādayo marmarūpā amarmarūpāśca santi, tatra pūrvaṃ marmarahitānāṃ ²⁰ sirādīnāṃ viddhaliṅgamāha– surendragopetyādi| yathoktāniti śoṇitavarṇanīyoktān| tatra coktaṃ– “tadatipravṛttaṃ śirobhitāpamāndhyamākṣepādīṃśca karoti|” iti| viddhāsu bāṇādinā| kṣatāsu khaḍgādinā| kaubjyaṃ kubjatā| tumulā gahanāḥ| sandhiṣvacalācaleṣviti acaleṣu niśceṣṭeṣu, ²¹ caleṣu ceṣṭāvatsu; sandhayaścalācalabhedena dvividhāḥ| tathāca suśrutaḥ– “śākhāsu hanvoḥ kaṭyāṃ ca ceṣṭāvantaśca sandhayaḥ| śeṣāstu sandhayaḥ sarve vijñātavyāḥ sthirā budhaiḥ||” (su. śā. a. 5) iti||20-23|| ²²

sirādayo marmarūpā amarmarūpāśca santi, tatra ²³ marmarahitasirādividdhaliṅgamāha– surendretyādi| indragopo vārṣikaḥ kīṭaḥ, ²⁴ tatkṣayajaḥ tasya rudhirasya kṣayājjāto vāyuḥ, yathoktāniti śoṇitavarṇanīyoktān, tathā coktam– “tadatipravṛttaṃ śirobhitāpamāndhyamākṣepakādīṃśca karoti” iti| viddhāsu bāṇādinā, kṣatāsu khaḍgādinā| snāyuviddhamāha– kaubjyamityādi| yasya kaubjyādicihnaṃ bhavati, taṃ puruṣaṃ snāyuviddhaṃ vyavasyet jānīyāt| kaubjyaṃ kubjatā, tacca antarbahirāyāmajaṃ dvidhā, avayavāvasādaḥ avayavānāṃ svakarmaṇyasāmarthyaṃ, kriyāsvaśaktiḥ sarvaśarīrasyotkṣepaṇāpakṣepaṇaprasāraṇākuñcanakriyāṇāmaśaktiḥ| tumulā gahanāḥ, anye tu vātapittakaphajanitā ekatra vyākulībhūtavedanāstumulā ucyante iti vadanti| sandhividdhamāha– śophetyādi| acalācaleṣu sandhiṣu kṣateṣu satsu śophātivṛddhyādiliṅgaṃ syāt| sandhayastu calācalabhedāt dvividhāḥ| tathā coktaṃ suśrute– “śākhāsu hanvoḥ kaṭyāṃ ca ceṣṭāvantaśca sandhayaḥ| śeṣāstu sandhayaḥ sarve vijñātavyāḥ sthirā budhaiḥ” iti| karmoparamaḥ karmoparatiḥ| asthividdhamāha– ghorā ityādi| tamasthividdhaṃ jānīyāt, sarvāsvavasthāsu ²⁵ śayanāsanādikāsu, viditārthasūtraḥ adhigataśalyatantraḥ||20-23||

yathāsvametāni vibhāvayecca liṅgāni marmasvabhitāḍiteṣu |24| (su. sū. a. 25) |

marmarahitānāṃ ²⁶ sirādīnāṃ viddhalakṣaṇamabhidhāya ²⁷ sirādimarmaviddhaliṅgamatideśayannāha– yathāsvametānītyādi| vibhāvayecceti cakāro bhinnakrame; tena etāni liṅgāni tathā sāmānyaliṅgāni ca jānīyādityarthaḥ|24|–

marmarahitānāṃ ²⁸ sirādīnāṃ viddhaliṅgamabhidhāya ²⁹ sirādimarmaviddhaliṅgamatideśenāha– yathāsvamityādi| vibhāvayecceti cakāro'tra bhinnakrame, tenaitāni ³⁰ marmaviddhasirāliṅgāni tathā sāmānyaliṅgāni bhramapralāpādīni pūrvoktāni ca yathāsvaṃ jānīyādityarthaḥ|24|–

pāṇḍurvivarṇaḥ spṛśitaṃ na vetti yo māṃsamarmaṇyabhipīḍitaḥ syāt ||24|| (su. sū. a. 25) |

anuktamāṃsamarmaṇo viddhasya liṅgamāha– pāṇḍurvivarṇa ityādi| nanu, ³¹ sirādividdhaliṅgavat māṃsaviddhaliṅgamapi pūrvaṃ kuto nopadiṣṭam? ucyate– kevalamāṃsaviddhasyābahuvyāpatkaratvāt pūrvamanupādānam||24||

māṃsamarmaviddhaliṅgamāha– pāṇḍurityādi| vivarṇo vicchāyaḥ| nanu, ³² sirādividdhaliṅgavanmāṃsaviddhaliṅgamapi pūrvaṃ kuto nopadiṣṭaṃ? ucyate– kevalamāṃsaviddhasyābahuvyāpatkaratvāt pūrvamanupādānam||24||

visarpaḥ pakṣaghātaśca ³³ sirāstambho'patānakaḥ | mohonmādavraṇarujo jvarastṛṣṇā hanugrahaḥ ||25|| kāsaśchardiratīsāro hikkā śvāsaḥ savepathuḥ | ṣoḍaśopadravāḥ proktā vraṇānāṃ vraṇacintakaiḥ ||26|| (ca. ci. a. 25) |

sarvavraṇānāmupadravānāha– visarpa ityādi||25-26||

sarvavraṇānāmupadravānāha– visarpa ityādi| vraṇarujo vraṇapīḍāḥ, vepathuḥ kampaḥ||25-26||

iti śrīmādhavakaraviracite mādhavanidāne sadyovraṇanidānaṃ samāptam ||43||

iti śrīkaṇṭhadattakṛtāyāṃ madhukośavyākhyāyāṃ sadyovraṇanidānaṃ samāptam||43|| ³⁴

iti śrīvācaspativaidyaviracitāyāṃ mādhavanidānavyākhyāyāmātaṅkadarpaṇākhyāyāṃ sadyovraṇanidānam||43||

pāṭhāntarāḥ

1 . ‘atra pātanaṃ nirdiśannāha-’ iti pāṭhaḥ kvacitpustake nopalabhyate| ↩
2 . ‘śaktikunteṣu’ iti pā. ↩
3 . ‘pakvasya’ iti pā.| ↩
4 . ‘sthānabhedavyapadeśastamāha’ iti pā.| ↩
5 . ‘phusphusa’ iti pā.| ↩
6 . ‘yaccatuḥprakāramabhihitaṃ’ iti pā.| ↩
7 . ‘nāticchinnamiti’ iti pā.| ↩
8 . ‘prahāretyādi’ iti pāṭhaḥ kvacitpustake nopalabhyate| ↩
9 . ‘ūṣmānirgamavadvyathā’ iti pā.| ↩
10 . ‘śirādīni’ iti pā. ↩
11 . ‘śirādīnīti’ iti pā.| ↩
12 . ‘śirāvyadhaliṅgaṃ’ iti pā.| ↩
13 . ‘śalyavraṇalakṣaṇamāha’ iti pā.| ↩
14 . ‘śirāmāṃsasnāyvasthisandhīni’ iti pā.| ↩
15 . ‘māṃsasandhiśirāsnāyvasthimarmasu’ iti pā.| ↩
16 . ‘sravettatkṣatajaśca’ iti pā. ↩
17 . ‘yathoktāñchirāsu’ iti pā. ↩
18 . ‘śoṣābhivṛddhistumulā’ iti pā. ↩
19 . ‘śirādayo’ iti pā.| ↩
20 . ‘śirādīnāṃ’ iti pā.| ↩
21 . ‘ācaleṣu’ iti pā.| ↩
22 . ‘śirādayo’ iti pā.| ↩
23 . ‘marmarahitaśirādividdhaliṅgamāha’ iti pā.| ↩
24 . ‘tatkṣatajaḥ’ iti pā.| ↩
25 . ‘upaśayanāsanādikāsu’ iti pā.| ↩
26 . ‘śirādīnāṃ’ iti pā.| ↩
27 . ‘śirādimarmaviddhaliṅgamatideśayannāha’ iti pā.| ↩
28 . ‘śirādīnāṃ’ iti pā.| ↩
29 . ‘śirādimarmaliṅgamatideśenāha’ iti pā.| ↩
30 . ‘marmaviddhaśirāliṅgāni’ iti pā.| ↩
31 . ‘śirādividdhaliṅgavat’ iti pā.| ↩
32 . ‘śirādividdhaliṅgavanmāṃsaviddhaliṅgamapi’ iti pā.| ↩
33 . ‘śirāstambho'patānakaḥ’ iti pā. ↩
34 . ‘ityātaṅkadarpaṇe nidānavyākhyāyāṃ sadyovraṇanidānam||43||’ iti pā.| ↩