44. bhagnanidānam · e-Mādhavanidāna

atha bhagnanidānam | bhagnaṃ samāsāddvividhaṃ hutāśa kāṇḍe ca sandhau ca hi tatra sandhau | utpiṣṭaviśliṣṭavivartitaṃ ca tiryaggataṃ kṣiptamadhaśca ¹ ṣaṭ ca ||1||

āgantusāmānyāt bhagnanidānam| dvividhaṃ hi bhagnaṃ savraṇamavraṇaṃ ca, tatra savraṇamabhidhāyāvraṇamāha– bhagnaṃ samāsādityādi| hutāśa iti agniveśasambodhanaṃ, ² carake hutāśaśabdenāgniveśo'bhidhīyate, ekadeśenāpi samudāyapratīteḥ| kāṇḍe ca sandhau ceti sandhivicchinnamekaṃ, ³ dvitīyaṃ kāṇḍabhagnaṃ; kāṇḍamasthikāṇḍaḥ, kāṇḍena ca nalakakapālavalayataruṇarucakānāṃ ⁴ grahaḥ, tatra bhagnaṃ kāṇḍe bhagnaṃ; dvayorasthnoḥ, sandhānaṃ sandhiḥ, tadviśleṣaḥ sandhimuktam| tatra sandhāviti sandhau mukte ‘liṅgamabhidhīyate’ iti śeṣaḥ| nanu kathaṃ sandhimuktaṃ bhagnamucyate? asthnāṃ hi bhaṅgo yuktaḥ| ucyate– asthiviśleṣo'tra bhagno'bhipretaḥ, sa ca kāṇḍabhagne sandhimukte cāstīti na doṣaḥ||1||

āgantutvasāmānyādbhagnamāha– bhagnamityādi| taṃ cāgantuvraṇaṃ samāsāt dvividhamāhuḥ, kathamityāha– kāṇḍe bhagnaṃ tathā sandhau ceti; sandhivicchinnamekaṃ, kāṇḍamasthikāṇḍaḥ, kāṇḍena ca nalakakapālavalayataruṇarucakānāṃ grahaṇaṃ, tatra bhagnaṃ kāṇḍe bhagnam| dvayorasthnoḥ sandhānaṃ sandhiḥ, tadviśleṣaḥ sandhimuktam| sandhimuktasya ṣāḍvidhyamāha– utpiṣṭetyādi| tatra sandhāviti tatra tayoḥ kāṇḍabhagnasandhibhagnayormadhye, sandhau mukte'pi ‘liṅgamabhidhīyata’ iti śeṣaḥ| utpiṣṭādibhedena ṣoḍhā bhavati| nanu, kathaṃ sandhimuktaṃ bhagnamucyate? asthnāṃ bhaṅgo yuktaḥ; ucyate asthiviśleṣo'tra bhagno'bhipretaḥ, sa ca kāṇḍabhagne sandhimukte cāstīti na doṣaḥ||1||

prasāraṇākuñcanavartanogrā ruk sparśavidveṣaṇametaduktam | sāmānyataḥ sandhigatasya liṅgam... |2|

sandhibhagnasya sāmānyaliṅgamāha– prasāraṇetyādi| prasāraṇākuñcanavartanogrā rugiti prasāraṇādiṣu ugrā ruk| vartanaṃ niṣkriyatayā'vasthānam|1|–

tatra sandhimuktasya sāmānyalakṣaṇamāha– prasāraṇetyādi| prasāraṇādiṣu ugrā ruk vyathā, vartanamiti niṣkriyatayā'vasthānam| etatsāmānyaliṅgam|1|–

...utpiṣṭasandheḥ śvayathuḥ samantāt ||2|| viśeṣato rātribhavā rujā ca, viśliṣṭaje tau ca rujā ca nityam | vivartite pārśvarujaśca tīvrāstiryaggate tīvrarujo bhavanti ||3|| kṣipte'tiśūlaṃ ⁵ viṣamatvamasthnoḥ kṣipte tvadho rugvighaṭaśca sandheḥ |

utpiṣṭādiliṅgamāha– utpiṣṭasandherityādi| utpiṣṭaṃ dvābhyāmasthibhyāṃ sandhau gharṣaṇam| śvayathuḥ samantāditi ubhayabhāge śothaḥ, ubhayataḥ sandhyasthnorgharṣitatvāt| viśeṣato rātribhavā rujā ceti abhighātakupita eva rātrau śaityenātyantaṃ vṛddho vāyuḥ rujāṃ karoti| ⁶ atra cūrṇitatvena mārgāvaraṇāt vātakopa ityarthaḥ| viśliṣṭaje iti viśliṣṭajāte sandhimukte, viśliṣṭaṃ manāk sandhiviśleṣaḥ śithilatāmātraṃ, viśliṣṭamiti bhāve ktaḥ| tau ceti viśliṣṭe rātrirujāsamantācchothau; samantācchotho'pyatrālpo bodhyaḥ, sandheranabhighātāt| sandhivikriyayā asthnorapasṛtatvāt madhyanimnatvaṃ, “utpiṣṭamatha viśliṣṭaṃ sandhiṃ vaidyo ⁷ na ghaṭṭayet|” (su. ci. a. 2) iti vacanāt; manāgvikriyayā vā| rujā ca nityamiti sarvadā rujā balavatī bhavatītyutpiṣṭādviśeṣaḥ| vivartite iti ‘sandhau’ iti śeṣaḥ, vivartite viparītaṃ vartite; vivartanaṃ sandhau ⁸ dvayorasthnorvivṛtirvibhramaṇamanārjavatā| pārśvarujaśca tīvrā iti ⁹ ābhyantarasandhisthānayoḥ pārśvasandhyasthnoḥ ¹⁰ pārśvagamanāttīvrāḥ pārśvarujaḥ| tiryaggata iti tiryakkṣipte| atra hyekaṃ sandhyasthi sandhisthānaṃ tyaktvā tiryagyāti| kṣipte'tīti atikṣipte; ‘ūrdhvam’ iti śeṣaḥ| atra hyekāsthivikriyayā ubhayāsthivikriyayā vā dvayorapyasthnoḥ parasparātikramaṇaṃ dūragamanaṃ vā; viśliṣṭe tu manāk śithilatāmātram; adhaḥkṣipte tu kiñcidadhogamanamiti viśeṣaḥ| “viṣamāśca sakthnoḥ” iti pāṭhe tu ‘ruja’ iti śeṣaḥ| kṣipte tvadhorugvighaṭaśca sandheriti adhaḥkṣipte ruk rujā, sandhervighaṭaśca vighaṭanam| ‘viruddhaceṣṭā vighaṭasya’ iti pāṭhāntare vighaṭitasya sandherityarthaḥ| atra adho'sthigamanam| adhaḥ kṣiptavadūrdhvaṃ kṣiptasyāpyabhidhāne prāpte anuktiratikṣipte'varodhāt||2-3||–

viśiṣṭaliṅgamāha– utpiṣṭasandherityādi| utpiṣṭaṃ dvābhyāmasthibhyāṃ sandhau gharṣaṇaṃ, śvayathuḥ samantāditi ubhayabhāge śophaḥ, ubhayataḥ ¹¹ sandhyasthnorgharṣaṇāt| viśeṣata ityādyabhighātakupita eva rātrau śaityenātyantaṃ vṛddho vāyuḥ rujaṃ karoti, atra cūrṇitatvena mārgāvaraṇādvātaprakopa ityarthaḥ| viśliṣṭamāha– viśliṣṭaja ityādi| viśliṣṭe sandhimukte tau ca nityaṃ ¹² ca rujā ca bhavati| viśliṣṭaṃ manāksandhiviśleṣaḥ, śithilatāmātraṃ; viśliṣṭamiti bhāve ktaḥ| tenālpaḥ śopho boddhavyaḥ| tau ceti ¹³ rātrirujāsamantācchothau, samantācchotho'pyatrālpo bodhyaḥ, sandheranabhighātāt| sandhivikriyayā asthnorapasṛtatvānmadhyanimnatvam| “utpiṣṭamatha viśliṣṭaṃ sandhimuktaṃ tathā cyutam| ¹⁴ jaghanaṃ pratipiṣṭaṃ ca bhagnaṃ yattadvivarjayet||” iti| manāk vikriyayā vā| rujā ca nityamiti sarvadā rujā balavatī bhavatītyutpiṣṭādviśeṣaḥ| vivartitamiti, sandhāviti śeṣaḥ| vivartite viparītaṃ vartite, vivartanaṃ sandhau dvayorasthnorvivṛtirvibhramaṇamanārjavatā| pārśve rujāśca tīvrāḥ santi, atyantasandhisthānayoḥ pārśvasandhyasthnoḥ pārśvagatatvāttīvrāḥ pārśvarujaḥ, cakārāt sandhisaṃśrayayorapyasthnorvyāvartanena pārśvopagamanādviṣamāṅgateti ḍallaṇaḥ| tiryagityādi– tiryak kṣipte, sandhāviti śeṣaḥ| atra hyekasandhyasthi sandhisthānaṃ tyaktvā tiryagyāti| atikṣiptamāha– kṣipta ityādi| kṣipte ūrdhvamiti śeṣaḥ| atra tu dvayorapi ¹⁵ asthnoḥ parasparātikramaṇaṃ, dūragamanaṃ vā, viśliṣṭe tu manāk śithilatāmātramiti bhedaḥ| adhaḥkṣipte tu kiñcidadhogamanamiti viśeṣaḥ| ¹⁶ sakthnorūrukaṭisandhyorviṣamamiti| ¹⁷ śūlaṃ viṣamamiti kadāciddhīnaṃ kadācidvivṛddham| ‘viṣamāśca sakthnoḥ’ iti pāṭhāntaram| ¹⁸ tatra rujā iti śeṣaḥ| adhaḥkṣiptamāha– kṣipte tvityādi| adhaḥkṣipte'dhogate sandhau ruk rujā, sandhervighaṭaśca, vighaṭo vighaṭanam| ‘viruddhaceṣṭā vighaṭasya’ iti pāṭhāntare vighaṭitasya sandherityarthaḥ| atrādho'sthigamanam| adhaḥkṣiptavadūrdhvakṣiptasyāpyabhidhāne ¹⁹ prāpte'nuktiratikṣipte'varodhāt||2-3||–

kāṇḍe tvataḥ karkaṭakāśvakarṇavicūrṇitaṃ piccitamasthichallikā ||4|| kāṇḍeṣu bhagnaṃ hyatipātitaṃ ca majjāgataṃ ca sphuṭitaṃ ca vakram | chinnaṃ dvidhā dvādaśadhā'pi kāṇḍe srastāṅgatā śotharujātivṛddhiḥ ||5|| sampīḍyamāne bhavatīha śabdaḥ sparśāsahaṃ spandanatodaśūlāḥ | sarvāsvavasthāsu na śarmalābho bhagnasya kāṇḍe khalu cihnametat ||6||

ataḥ paraṃ kāṇḍe bhagnamabhidhīyate– kāṇḍe tvata ityādi| kāṇḍe ityatra bhagnamiti śeṣaḥ| ata iti ataḥ param| karkaṭaketi ubhayoḥ pārśvayornipīḍanenāvanatam, ata eva madhye granthirivonnataṃ karkaṭatulyatvāt karkaṭakam| aśvakarṇeti aśvakarṇavat vipulāsthinirgamādaśvakarṇam| vicūrṇitamiti kṣuṇṇamasthi, tacca śabdasparśābhyāmavagantavyam| piccitamiti yantritaṃ bahuśotham| asthichalliketi challaṃ valkalaṃ tadatrāstīti asthichallikā, atra ²⁰ matvarthīyaṣṭhikan| atra tu ā na bhavati, vṛddheranityatvāt| eṣā ²¹ pārśvagatastokāsthiviśleṣādbhavati| ‘asthichallitam’ iti vā pāṭhaḥ, challamasya ²² sañjātamiti challitam| kāṇḍeṣu bhagnamityanena kāṇḍabhagnamabhidhīyate, prasāraṇe kampamānaṃ kāṇḍabhagnam| yadyapi ²³ kāṇḍe bhagnaṃ sarvameva karkaṭādi, tathā'pi viśiṣṭe kāṇḍabhagne kāṇḍabhagnasañjñeyaṃ boddhavyā| yathā– jāṅgalaśabdo ²⁴ jaṅghālādyaṣṭavidhamāṃsavarge ²⁵ sāmānye, viśeṣe punareṇādāveva ca vartate| atipātitamiti ²⁶ asthiniḥśeṣataśchinnamatipātitam| majjāgatamiti asthyavayavo'sthimadhyamanupraviśya majjānaṃ niḥsārayatīti majjāgatam| sphuṭitaṃ stokaṃ ²⁷ bahudhā vidīrṇaṃ śūkapūrṇamiva vedanāvat| vakramiti avimuktāsthi kubjībhūtaṃ vakram| vakratā'pi bhagnatvaṃ jñeyam| chinnaṃ dvidheti ekamaṇuvidīrṇaṃ, bahuvidīrṇamanyat; ²⁸ ekaṃ vidīrṇaṃ, saṃlagnamaparaṃ vidīrṇaṃ dvidhābhūtam; anyastu vipulaikavidaraṇamityāha; suśrute etat pāṭitasañjñam| kāṇḍe bhagnasya dvādaśavidhatvaṃ niyamayati– kāṇḍa iti| atra bhagnamiti śeṣaḥ| apiśabdo'tra bhinnakramaḥ, sa cāvadhāraṇārthaṃ, tena chinnamityatra sambadhyate| chinnameva dvidhā, na karkaṭādi||4-6||

ataḥ paraṃ kāṇḍe bhagnamāha– kāṇḍe tvityādi| chinnaṃ dvidhā kāṇḍe ityatra bhagnam iti śeṣaḥ| ata iti ataḥ param| karkaṭaketi ubhayoḥ pārśvayoḥ nipīḍanenāvanatam, ata eva madhye granthirivonnataṃ karkaṭatulyatvātkarkaṭakam| aśvakarṇeti aśvakarṇavadvipulāsthinirgamādaśvakarṇam| vicūrṇitamiti kṣuṇṇamasthi, tacca śabdasparśābhyāmavagantavyam| piccitamiti yantritaṃ bahuśotham| asthicchalliketi– challaṃ valkalaṃ, tadatrāstīti asthicchallikā, eṣā ²⁹ pārśvagatastokāsthyavayavaviśleṣādbhavati| “asthicchallitam” iti vā pāṭhaḥ| challamasya jātaṃ challitam| kāṇḍeṣu bhagnamityādi| anena kāṇḍabhagnamityabhidhīyate| prasāraṇe kampamānaṃ kāṇḍabhagnam| yadyapi kāṇḍe bhagnaṃ sarvameva karkaṭakādi, tathā'pi viśiṣṭe kāṇḍe bhagne sañjñeyaṃ boddhavyā| atipātitamiti ³⁰ asthi niḥśeṣataśchinnamatipātitam| majjāgatamiti asthyavayavo'sthimadhyamanupraviśya majjānaṃ niḥsārayatīti majjāgatam| ³¹ sphuṭitaṃ stokaṃ bahudhā vidīrṇaṃ śūkapūrṇamiva vedanāvat| vakramiti avimuktāsthi ³² kubjībhūtaṃ vakraṃ, vakratā'pi bhagnatvaṃ jñeyam| chinnaṃ dvidheti ekamaṇuvidīrṇaṃ, bahuvidīrṇamanyat| kaścidekatarapārśvalagnamaparatra vidīrṇamityāha, ³³ anyaśca vipulaikavidaraṇam, etacca suśrute pāṭitasañjñam| kāṇḍe bhagnasya dvādaśavidhatvaṃ niyamayati– dvādaśadhā'pi kāṇḍa iti kāṇḍe; ityatra bhagnamiti śeṣaḥ| apiśabdo'tra bhinnakramaḥ, sa cāvadhāraṇārthaḥ, tena chinnamityatra sambadhyate, chinnameva dvidhā na karkaṭakādi| sāmānyena kāṇḍabhagnalakṣaṇamāha– srastāṅgatetyādi| ³⁴ kāṇḍe bhagnasyaitaccihnaṃ srastāṅgatā śopharujayorativṛddhiḥ| sampīḍyamāne hastādinā mṛdite sati śabdaḥ, sparśāsahaśca, tathā spandanatodaśūlā bhavanti| sarvāsu śayanāsanādikāsvavasthāsu śarmalābho na bhavati||4-6||–

bhagnaṃ tu kāṇḍe bahudhā prayāti samāsato nāmabhireva tulyam ||7||

kāṇḍe bhagnasya dvādaśaprakārādapyadhikatvamāha– bhagnamityādi| samāsato nāmabhireva tulyamiti saṅkṣepato nāmānurūpametadavagantavyamityarthaḥ||7||

kāṇḍe bhagnasya dvādaśaprakārādapyadhikatvamāha– bhagnamityādi| saṅkṣepato nāmānurūpametadevāvagantavyaṃ, yasyedṛśāsthi bhagnaṃ tasyaiva nāmetyarthaḥ||7||

alpāśino'nātmavato jantorvātātmakasya ca | upadravairvā juṣṭasya bhagnaṃ kṛcchreṇa sidhyati ||8|| (su. ci. a. 3) |

kaṣṭasādhyatāmāha– alpetyādi| vātātmakasyeti vātaprakṛteḥ| upadravairiti upadravā jvarādhmānamūtrapurīṣasaṅgādayaḥ||8|| ³⁵

bhagnasya kṛcchrasādhyatvamāha– alpāśina iti| āhārarahitasya, anātmavato'pathyāśinaḥ, vātātmakasya vātaprakṛteḥ| upadravairityādi upadravā jvaramohamūtrapurīṣasaṅgādayaḥ||8||

bhinnaṃ kapālaṃ kaṭyāṃ tu sandhimuktaṃ tathā cyutam | jaghanaṃ pratipiṣṭaṃ ca varjayeddhi vicakṣaṇaḥ ||9|| asaṃśliṣṭakapālaṃ ca lalāṭe cūrṇitaṃ ca yat | bhagnaṃ stanāntare pṛṣṭhe śaṅkhe mūrdhni ca varjayet ||10|| (su. ni. a. 15) |

asādhyatāmāha– bhinnaṃ kapālamityādi| bhagnamiti vācye bhinnamiti yat kṛtaṃ, tat kapālānāṃ prāyaśo bhedāt| ata evoktam– “kapālāni vibhajyante” (su. śā. a. 5) iti| nanu, kaṭyasthnaḥ kapālasañjñāyā abhāvāt kathamucyate bhinnaṃ kapālaṃ kaṭyāmiti? ³⁶ taduktaṃ suśrute– “jānunitambāṃsagaṇḍatāluśaṅkhavaṅkṣaṇaśiraḥsu kapālāni|” (su. śā. a. 5) iti; ucyate– nitambagrahaṇena tatra kaṭīgrahaṇādadoṣaḥ; athavā sarvaṃ kapālasañjñitam asthibhinnaṃ, tathā kaṭyāṃ cāsthibhinnaṃ varjayet| asaṃśliṣṭakapālaṃ ceti tu niyamārthaṃ; tena lalāṭe kapālasyāsaṃśliṣṭasyāsādhyatvaṃ, nānyathā bhinnasyeti| bhinnaṃ kapālamiti kāṇḍabhagnametat| sandhimuktamiti nānāvidhamapi sandhimuktaṃ kaṭyāṃ na sidhyatīti| cyutamiti adhaḥkṣiptam, anyastu viśliṣṭamāha; athavā kaṭyāṃ sandhimuktaṃ cyutalakṣaṇaṃ na sarvam| jaghanaṃ pratipiṣṭaṃ ceti jaghanasthāne piṣṭamutpiṣṭametattathā cyutamiti ca| sandhimuktaṃ punarviśeṣārthamuktaṃ, viśeṣābhidhānādanyasya kaṭīsandhimuktasya kadācit sādhyatā sūcyate, ata eva cikitsite “tataḥ sthānasthite sandhau” (su. ci. a. 3) iti vakṣyati| asaṃśliṣṭakapālaṃ ca lalāṭe cūrṇitaṃ ca yaditi yathā avidyamānasaṃśleṣaṃ yat kapālaṃ, tathā lalāṭe cūrṇitaṃ ca yat vighaṭitasandhi tadasādhyam| bhagnamiti sāmānyena sandhimuktaṃ kāṇḍabhagnaṃ ca gṛhyate| anye tu bhagnamityanena kāṇḍabhagnaviśeṣaṃ ‘prasāraṇe kampamānam’ ityanenoktaṃ vadanti| uktaṃ ca bhālukinā– “śaṅkhe mūrdhni stanāntare vā kāṇḍe bhagnaṃ maraṇāya|” iti| stanāntare urasi, mūrdhni cūḍāsthāne||9-10||

asādhyatāmāha– bhinnamityādi| bhagnamiti vācye bhinnamiti yatkṛtaṃ, tatkapālānāṃ prāyaśo bhedāt| yaduktamihaiva– ‘kapālāni vibhidyante’ ityādi| nanu, ³⁷ kaṭyasthnaḥ kapālasañjñāyā abhāvāt kathamucyate bhinnaṃ kapālaṃ kaṭyāmiti? yaduktaṃ suśrute– “jānunitambāṃsagaṇḍatāluśaṅkhavaṅkṣaṇaśirassu kapālāni” iti| ucyate– nitambagrahaṇena tatra kaṭīgrahaṇādadoṣaḥ, athavā sarvaṃ kapālasañjñitamasthibhinnaṃ, chedāttathā kaṭyāṃ cāsthibhinnaṃ ca varjayet| sandhimuktamityādi nānāvidhamapi sandhimuktaṃ kaṭyāṃ na siddhyati| tathā kaṭyāṃ cyutamiti adhaḥkṣiptaṃ, sañjñeyam| piṣṭamutpiṣṭamasañjñaṃ ca, jaghanaṃ ³⁸ prati lakṣīkṛtaṃ na siddhyati| punarvarjyaṃ bhagnamāha– asaṃśliṣṭamityādi| yathā tathā avidyamānasaṃśleṣaṃ yat kapālaṃ tathā lalāṭe cūrṇitaṃ yat vighaṭitasandhi tadasādhyam| bhagnamiti sāmānyena sandhimuktaṃ kāṇḍe bhagnaṃ ca gṛhyate, anye tu bhagnamiti kāṇḍe bhagnamāhuḥ| yaduktaṃ bhālukinā– “śaṅkhe mūrdhni stanāntare vā kāṇḍe bhagnaṃ maraṇāya|” iti| ³⁹ stanāntare urasi, stanagrahaṇena stanāntaraṃ boddhavyam||9-10||

samyak sandhitamapyasthi durnikṣepanibandhanāt | saṅkṣobhādvā'pi yadgacchedvikriyāṃ tacca varjayet ||11|| (su. ni. a. 15) |

sarveṣāmanavadhānato'sādhyatvamāha– samyagityādi| sandhitaṃ saṃyamitam| durnikṣepanibandhanāditi duḥsthāpanāttathā duṣṭabandhanāt| saṅkṣobhādveti abhighātabhayādisaṅkṣobhāt| ayamarthaḥ– samyaksaṃyamitamapi duḥsthāpanāt, sunyastamapi duṣṭabandhanāt, sunyastaṃ ⁴⁰ subaddhamapi saṅkṣobhādvikṛtamasādhyam||11||

sarveṣāmanavadhānato'sādhyatvamāha– samyagityādi| durnikṣepanibandhanāt duḥsthāpanāt ⁴¹ tathā duṣṭabandhanāt| saṅkṣobhādveti abhighātabhayādisaṅkṣobhāt| ayamarthaḥ– samyaksaṃyamitamapi duṣṭabandhanāttathā sunyastaṃ subaddhamapi saṅkṣobhāt vikṛtamasādhyam||11||

taruṇāsthīni namyante bhidyante nalakāni ca | kapālāni vibhajyante sphuṭanti rucakāni ca ||12|| (su. ni. a. 15) |

asthiviśeṣeṇa bhagnaviśeṣamāha– taruṇāsthīnītyādi| namyante vakrībhavanti, tenātra vakralakṣaṇaṃ bhagnam| ghrāṇakarṇākṣipuṭeṣu taruṇaṃ komalamasthi| bhidyante nalakāni ceti asthyantarānupraveśādbhidyante, atipātitalakṣaṇena ca bhagnena nalakāni yujyante; anye tu dvādaśavidhamapi bhagnamatrecchanti| kapālāni vibhajyanta iti kapāleṣu vidaraṇalakṣaṇo bhagnaḥ| ‘vibhidyante’ iti pāṭhāntaram, arthastu sa eva| rucakāni dantāḥ, teṣu sphuṭitalakṣaṇo bhagnaḥ| asthīni pañcavidhāni taruṇanalakakapālavalayarucakabhedāt| rucakāni ceti cakārāt valayānyapi sphuṭitāni bhavantīti| etat suśrute sphuṭitaṃ bhagnam||12||

asthiviśeṣeṇa bhagnaviśeṣamāha– taruṇetyādi| ghrāṇakarṇākṣikūṭeṣu taruṇāsthīni komalāsthīni, namyante vakrībhavanti| atra vakralakṣaṇaṃ bhagnam| bhidyante nalakānītyādi| asthyantarānupraveśādbhidyante, atipātitalakṣaṇena ca bhagnena nalakāni yujyante| anye tu dvādaśavidhamapi bhagnamātramicchanti| kapāleṣu vidaraṇalakṣaṇo bhagnaḥ| rucakāni dantāḥ, teṣu sphuṭitalakṣaṇo bhaṅgaḥ| asthīni pañcavidhāni, taruṇanalakakapālavalayarucakabhedāt| cakārād valayānyapi sphuṭantīti jñeyam| etacca suśrute sphuṭitaṃ bhagnam||12||

iti śrīmādhavakaraviracite mādhavanidāne bhagnanidānaṃ samāptam ||44||

iti śrīkaṇṭhadattakṛtāyāṃ madhukośavyākhyāyāṃ bhagnanidānaṃ samāptam||44|| ⁴²

iti śrīvācaspativaidyaviracitāyāṃ mādhavanidānavyākhyāyāmātaṅkadarpaṇākhyāyāṃ bhagnanidānam||44||

pāṭhāntarāḥ

1 . ‘ṣoḍhā’ iti pā. | ↩
2 . sampratyupalabhyamāne carakatantre bhagnanidānaṃ na paṭhyate| ↩
3 . ‘dvitīyaṃ kāṇḍabhagnaṃ;’ iti pā. kvacitpustake nopalabhyate | ↩
4 . ‘grahaṇam’ iti pā.| ↩
5 . ‘viṣamā rugasthnoḥ’ iti pā. | ↩
6 . ‘rātrighūrṇitatvena’ iti pā.| ↩
7 . ‘vighaṭṭayet’ iti pā.| ↩
8 . ‘ ... rvibhramaṇamārjavatā’ iti pā.| ↩
9 . ‘atyaktasandhisthānayoḥ’ iti pā.| ↩
10 . ‘pārśvagatatvāttīvrāḥ’ iti pā.| ↩
11 . ‘sandhyasthnorgharṣaṇatvāt|’ iti pā.| ↩
12 . ‘ca’ iti pāṭhaḥ kvacitpustake nopalabhyate | ↩
13 . ‘viśliṣṭarātrirujāsamantācchothau’ iti pā.| ↩
14 . ‘saghanam’ iti pā.| ↩
15 . ‘śakthnoḥ’ iti pā.| ↩
16 . ayaṃ paṅktiḥ kvacitpustake nopalabhyate | ↩
17 . ‘śūlaviṣamamiti’ iti pā.| ↩
18 . atra ‘tatra’ iti kvacitpustake adhikaḥ pā.| ↩
19 . ‘prāpte'nuktamapi ūrdhvakṣiptābhidhānam’ iti pā.| ↩
20 . ‘matvarthīyaṣṭikaṇ’ iti pā.| ↩
21 . ‘pārśvagatastokāsthyavayavaviśleṣādbhavati’ iti pā.| ↩
22 . ‘jātam’ iti pā.| ↩
23 . ‘kāṇḍabhagnam’ iti pā.| ↩
24 . ‘bileśayādau’ iti pā. ‘jāṅgalādyaṣṭavidhamāṃsavarge’ iti vā pā.| ↩
25 . ‘sāmānye'pi ṣaḍvidhamāṃsavarge bileśayādau, punareṇādāveva viśeṣe ca vartate|’ iti pā.| ↩
26 . ‘asthiniḥśeṣitacchinna ... ’ iti pā.| ↩
27 . ‘bahudhā’ iti pāṭhaḥ kvacitpustake nopalabhyate | ↩
28 . ‘ekatarapārśvalagnamekam’ iti pā.| ↩
29 . ‘pārśvagatastokāsthyavayavaviśeṣādbhavati’ iti pā.| ↩
30 . ‘asthiniḥśeṣitacchinnamatipātitam’ iti pā.| ↩
31 . ‘sphuṭitastokam’ iti pā.| ↩
32 . ‘kubjībhūtavakram’ iti pā.| ↩
33 . ‘anyacca’ iti pā.| ↩
34 . ‘kāṇḍabhagnasya etaccihnam’ iti pā.| ↩
35 . ‘bhagnakṛcchramāha’ iti pā.| ↩
36 . ‘yaduktam’ iti pā.| ↩
37 . ‘kaṭyasthikapālasañjñāyā’ iti pā.| ↩
38 . ‘prati’ iti pāṭhaḥ kvacitpustake nopalabhyate | ↩
39 . ‘adhastanāntare’ iti pā.| ↩
40 . ‘subandhamapi’ iti pā.| ↩
41 . ‘tathā’ iti pāṭhaḥ kvacitpustake nopalabhyate | ↩
42 . ‘ityātaṅkadarpaṇe nidānavyākhyāyāṃ bhagnanidānam||44||’ iti pā.| ↩