47. upadaṃśanidānam · e-Mādhavanidāna

athopadaṃśanidānam | ¹ hastābhighātānnakhadantapātādadhāvanādratyatisevanādvā | yonipradoṣācca bhavanti śiśne pañcopadaṃśā vividhāpacāraiḥ ||1||

sthānapratyāsatterupadaṃśanidānamāha– hastetyādi| nakhadantapātāditi balavadanurāgodayāt nakhadantacchedasthānatvenānukte'pi mehane nakhadantapātaḥ; yaduktaṃ kāmaśāstre– “śāstrasya viṣayastāvadyāvanmandarasā narāḥ| pravṛtte raticakre tu na śāstraṃ nāpi ca kramaḥ||” (kā. sū. sāṃ. a. 2) iti| kalahādivaśādvā mehane nakhadantapātaḥ| adhāvanādaprakṣālanāt| ratyatisevanāditi vyavāyasyātyantasevanāt| yonipradoṣāditi dīrghakarkaśaromādiyogādyoniduṣṭeḥ| śiśne mehane| vividhāpacārairiti aśuddhasalilaprakṣālanabrahmacāriṇīgamanādibhiḥ| upadaṃśasañjñā ca daṃśanopādhimantareṇāpi rūḍhā boddhavyā| yadyapyabhighātakṣate mehane upadaṃśa āgantuḥ ṣaṣṭhaḥ sambhāvyate, tathā'pi tasya doṣaliṅgayuktatayā doṣaja evāntarbhāvaḥ||1||

vraṇatvasāmānyātsthānapratyāsannatvādupadaṃśanidānam| tasya hetumāha– hastetyādi| nakhadantapātāditi balavadanurāgodayātprabalakāmarāgavaśāt kāmināṃ mehane dantanakhapāto bhavati| yaduktaṃ kāmaśāstre– “śāstrasya viṣayastāvadyāvanmandarasā narāḥ| raticakre pravṛtte ca na śāstraṃ nāpi ca kramaḥ||” iti| kalahādivaśādvā mehane nakhadantapātaḥ| adhāvanādaprakṣālanāt, atyupasevanāditi vyavāyasyātyantasevanāt, yonipradoṣāt alpamahādvāradīrghakarkaśaromasaṅkīrṇadeśatvādiyonidoṣāt, rogaprabhṛtervā yoniduṣṭeḥ| vividhopacārairiti kṣāroṣṇamalināmbhaḥprakṣālanabrahmacāriṇīgamanādibhiḥ| pañcopadaṃśā iti vātena, pittena, śoṇitena, kaphena, sannipātena; evaṃ pañca| yadyapyabhighātakṣate mehane upadaṃśa āgantuḥ ṣaṣṭhaḥ sambhavati, tathā'pi tasya doṣaliṅgayuktatayā doṣaja evāntarbhāvaḥ||1||

satodabhedaiḥ sphuraṇaiḥ sakṛṣṇaiḥ sphoṭairvyavasyet pavanopadaṃśam | pītairbahukledayutaiḥ sadāhaiḥ pittena... |2|

paittikamāha– pītairityādi| ² sphoṭairityanusañjanīyam| evamuttaratrāpi|2|–

...raktāt piśitāvabhāsaiḥ ||2|| sphoṭaiḥ sakṛṣṇai rudhiraṃ sravantaṃ raktātmakaṃ pittasamānaliṅgam | sakaṇḍuraiḥ śothayutairmahadbhiḥ śuklairghanaiḥ srāvayutaiḥ kaphena ||3||

raktajamāha– raktādityādi| raktāt piśitāvabhāsairiti māṃsavattāmraiḥ sphoṭaiḥ raktācchoṇitāt upadaṃśaṃ vyavasyet| ‘raktaiḥ’ iti pāṭhāntare raktaiḥ śoṇitaiḥ||2-3||

raktajamāha– piśitāvabhāsairityādi| māṃsavattāmraiḥ sphoṭaiḥ raktāt śoṇitāt upadaṃśaṃ vyavasyet| ‘raktaiḥ’ iti pāṭhāntaram, tatra raktaiḥ śoṇitaiḥ| kaphajamāha– sakaṇḍuraiḥ kaṇḍūyutaiḥ, mahadbhiḥ mahatparigrahaiḥ, ghanairnibiḍaiḥ, sphoṭairiti śeṣaḥ||2-3||

nānāvidhasrāvarujopapannamasādhyamāhustrimalopadaṃśam |4|

sannipātajamāha– nānāvidhetyādi| nānāvidhasrāvarujopapannamiti pratyekadoṣoktasrāvavedanāyuktam| trimalopadaṃśamiti tridoṣopadaṃśam|4|–

sannipātajamāha– nānetyādi| pratyekadoṣoktasrāvavedanāyuktam| trimalopadaṃśamiti tridoṣopadaṃśamasādhyamāhuḥ|4|–

viśīrṇamāṃsaṃ krimibhiḥ prajagdhaṃ muṣkāvaśeṣaṃ parivarjayecca ||4||

asādhyatāmāha– viśīrṇetyādi| muṣkāvaśeṣamiti viśīrṇasamastamehanamāṃsatvenāvaśiṣṭaphalakoṣamātram||4||

varjyamāha– viśīrṇetyādi| viśīrṇamāṃsaṃ śaṭitamāṃsaṃ, kṛmibhiḥ prajagdhaṃ bhakṣitaṃ, muṣkāvaśeṣamiti śīrṇasamastamehanamāṃsatvenāvaśiṣṭaphalakośamātraṃ, ⁴ evamuktalakṣaṇopadaṃśaṃ parivarjayet||4||

sañjātamātre na karoti mūḍhaḥ kriyāṃ naro yo viṣaye prasaktaḥ | kālena śothakrimidāhapākairviśīrṇaśiśno mriyate sa tena ||5||

upakrame cikitsākaraṇārthamāha– sañjātetyādi| viṣaye prasakta iti ⁵ ativyavāyarataḥ| kālena cirakālena||5||

upakrame cikitsākaraṇārthamāha– sañjātetyādi| yo mūḍho viṣaye prasaktaḥ vyavāyāditatparaḥ, sa tenopadaṃśena kālena kālāntareṇa mriyate śothādibhirupadravaiḥ praśīrṇaśiśnaḥ galitamehanaḥ||5||

aṅkurairiva saṅghātairuparyuparisaṃsthitaiḥ | krameṇa jāyate vartistāmracūḍaśikhopamā ||6|| koṣasyābhyantare sandhau sarvasandhigatā'pi vā | (savedanā picchilā ca duścikitsyā tridoṣajā) | liṅgavartirabhikhyātā liṅgārśa iti cāpare ||7||

ekasthānatvenātra liṅgārśa āha– aṅkurairityādi| aṅkurairaṅkurasadṛśairīṣaddīrghaiḥ, ⁶ saṅghātairmāṃsapratānaiḥ, ‘sañjātaiḥ’ iti pāṭhe ‘māṃsaiḥ’ iti śeṣaḥ| tāmracūḍaśikhopamā iti tāmracūḍaḥ, kukkuṭaḥ, taccūḍātulyā| sandhāviti meḍhrarandhrasandhau, sarvasandhigatetyanena sarvasandheruktatvāt| eṣā tridoṣajā, ⁷ vartiriti yojyam; ata eva ‘savedanā picchilā ca duścikitsyā tridoṣajā|’ iti kvacit pāṭhaḥ| suśrute kvacit strīṇāmapyupadaṃśaḥ paṭhyate| yathā– “meḍhrasandhau vraṇāḥ kecit kecit sarvāśrayāstathā| kulatthākṛtayaḥ kecit kecit padmadalopamāḥ|| rujādāhārtibahulāḥ kṛṣṇāstodasamanvitāḥ| śīghraṃ kecidvisarpanti śanaiḥ kecittathā'pare| strīṇāṃ puṃsāṃ ca jāyante upadaṃśāḥ sudāruṇāḥ||” iti| kintu samānatantreṣvadarśanādetadanārṣamāhuḥ||6-7||

ekasthānatvenātra liṅgārśa āha– aṅkurairityādi| aṅkurasadṛśairīṣaddīrghasaṅghātaiḥ māṃsapratānaiḥ| anye sandhāviti ⁸ meḍhrarandhrasandhau, sarvasandhigatetyanena sarvasandheruktatvāt, eṣā tridoṣajā, ata eva “savedanā picchilā ca duścikitsyā tridoṣajā” iti kvacitpaṭhyate| suśrute tu kvacit strīṇāmapyupadaṃśāḥ paṭhyante| tadyathā– “meḍhrasandhau vraṇāḥ kecitkecitsarvāśrayāstathā| kulatthākṛtayaḥ kecitkecitpadmadalopamāḥ|| rujādāhārtibahulāḥ kṛṣṇāstodasamanvitāḥ| strīṇāṃ puṃsāṃ ca jāyante upadaṃśāḥ sudāruṇāḥ||” iti| kintu samānatantreṣvadarśanādetadanārṣamāhuḥ||6-7||

iti śrīmādhavakaraviracite mādhavanidāne upadaṃśanidānaṃ samāptam ||47||

iti śrīkaṇṭhadattakṛtāyāṃ madhukośavyākhyāyāmupadaṃśanidānaṃ samāptam||47|| ⁹

iti śrīvācaspativaidyakṛtāyāṃ mādhavanidānavyākhyāyāmātaṅkadarpaṇākhyāyāmupadaṃśanidānam||47||

pāṭhāntarāḥ

1 . ‘ ... dhāvanādatyupasevanādvā’ iti pā. | ↩
2 . ‘ ... ṣañjanīyam’ iti pā.| ↩
3 . ‘bhedo’ iti pāṭhaḥ kvacitpustake nopalabhyate | ↩
4 . ‘ ... lakṣaṇamupadaṃśam’ iti pā.| ↩
5 . ‘ativyavāyādirataḥ’ iti pā.| ↩
6 . ‘saṅghātairmāṃsasampratānaiḥ’ iti pā.| ↩
7 . ‘vartiriti yojyam’ iti pāṭhaḥ kvacitpustake nopalabhyate | ↩
8 . ‘randhrasandhau’ iti pā.| ↩
9 . ‘ityātaṅkadarpaṇe nidānavyākhyāyāmupadaṃśanidānam||47||’ iti pā.| ↩