61. asṛgdaranidānam · e-Mādhavanidāna

athāsṛgdaranidānam | viruddhamadyādhyaśanādajīrṇādgarbhaprapātādatimaithunācca | yānādhvaśokādatikarṣaṇācca bhārābhighātācchayanāddivā ca | taṃ ¹ śleṣmapittānilasannipātaiścatuṣprakāraṃ pradaraṃ vadanti ||1||

strīpuṃsāṃ sādhāraṇān vikārānabhidhāya pumpratiniyatasyopadaṃśāderuktatvāt strīniyatarogābhidhānam| tatra ca yonivyāpattiviśeṣe'pyārtavapravṛttisadbhāvāt prathamaṃ ² duṣṭārtavapravṛttisvarūpaṃ pradaramāha– viruddhetyādi| viruddhamadyaṃ duṣṭamadyam; athavā viruddhaṃ saṃyogādiviruddhaṃ, madyaṃ ca svarūpataḥ| ajīrṇādapakvabhojanāt| atikarṣaṇāt laṅghanādyatiyogena kṣīṇadhātutvāt| taṃ śleṣmapittānilasannipātairityatra śleṣmaṇo'gre'bhidhānaṃ ³ śleṣmaje'pi vedanāsūcanārtham||1||

atha pradaranidānārambhaḥ| tasya nidānamāha– viruddhetyādi| viruddhamadyaṃ vyāpannaṃ madyaṃ, kiṃvā viruddhaṃ kṣīramatsyādi madyaṃ ca| tasya saṅkhyāsamprāptimāha– tamityādi| vṛddhāḥ vṛddhavaidyāḥ||1||

asṛgdaraṃ bhavet sarvaṃ sāṅgamardaṃ savedanam |2| (su. śā. a. 2) |

tasya sāmānyarūpamāha– asṛgdaramityādi| savedanaṃ saśūlam| asṛg dīryate cyavate yasminnityasṛgdaraṃ; tantrāntaramatra– “tadevātiprasaṅgena pravṛttamanṛtāvapi| asṛgdaraṃ vijānīyāt purastāduktalakṣaṇam||” (su. śā. a. 2) iti| tadeveti ārtavam|2|– ⁴

tasyātivṛttau daurbalyaṃ bhramo mūrchā madastṛṣā | dāhaḥ pralāpaḥ pāṇḍutvaṃ tandrā rogāśca vātajāḥ ||2|| (su. śā. a. 2) |

ārtavātipravṛttau upadravānāha– tasyātivṛttau daurbalyamityādi| rogāśca vātajā iti ākṣepakakampādayaḥ||2||

upadravānāha– tasyetyādi| atipravṛttau atipravṛddhau daurbalyādayaḥ| vātajā iti ākṣepāpatānakampādayaḥ||2||

āmaṃ sapicchāpratimaṃ sapāṇḍu pulākatoyapratimaṃ kaphāttu | sapītanīlāsitaraktamuṣṇaṃ pittārtiyuktaṃ bhṛśavegi pittāt ||3|| rūkṣāruṇaṃ phenilamalpamalpaṃ vātārti vātāt piśitodakābham | sakṣaudrasarpirharitālavarṇaṃ majjaprakāśaṃ kuṇapaṃ tridoṣāt ||4|| taṃ cāpyasādhyaṃ pravadanti tajjñā, na tatra kurvīta bhiṣak cikitsām | śaśvat sravantīmāsrāvaṃ tṛṣṇādāhajvarānvitām | kṣīṇaraktāṃ durbalāṃ ca tāmasādhyāṃ vinirdiśet ||5||

ślaiṣmikādibhedena viśeṣalakṣaṇānyāha– āmamityādi| āmam āmarasānuviddham| sapicchāpratimamiti picchā śālmalyādiniryāsaḥ, tatsadṛśaṃ picchilamityarthaḥ; ⁵ saśabda īṣadarthe| pulākatoyapratimaṃ ⁶ prakṣālitapalalatoyasadṛśam; anye pulākaṃ gavedhukamāhuḥ| pittārtiyuktaṃ dāhacimicimādiyuktam| bhṛśavegi bahuvegi| vātārti todādilakṣaṇam| piśitodakābhaṃ ⁷ māṃsaprakṣālanajalasadṛśam| sakṣaudrasarpirharitālavarṇamiti nānāvarṇatvaṃ tridoṣakopādeva| ⁸ kṣaudravarṇaṃ manākkapilaṃ, sarpirvarṇaṃ vilīnaghṛtavat kiñcidaruṇaṃ ca| majjaprakāśaṃ majjā asthisnehaḥ, tatsamam| kuṇapaṃ śavagandhi| ⁹ taccāpyasādhyamiti cikitsānivṛttyartham||3-5||

tatra śleṣmajamāha– āmamityādi| āmam āmarasasaṃyuktaṃ, sapicchāpratimaṃ, ¹⁰ sadyaḥsrutaśālyādimaṇḍatulyaṃ, picchilamityarthaḥ| pulākatoyapratimaṃ gavedhukānnavārivat, ¹¹ anye pulākaṃ tucchadhānyamāhuḥ| pittajamāha– setyādi| pittārtiyuktaṃ santāpādiyuktaṃ, bhṛśavegi bahudhāraṃ bhūripravṛtti| vātikamāha– rūkṣetyādi| piśitodakābhaṃ māṃsaprakṣālanodakavarṇam| tridoṣamāha– setyādi| kṣaudravarṇaṃ manākkapilaṃ sarpirvarṇaṃ vilīnaghṛtavat, haritālavarṇaṃ pītaṃ, majjaprakāśaṃ majjā'sthisnehaḥ tatsamaṃ, kuṇapaṃ śavagandhi, ¹² asādhyamiti cikitsānivṛttyartham||3-5||

māsānniṣpicchadāhārti pañcarātrānubandhi ca | naivātibahulātyalpamārtavaṃ śuddhamādiśet ||6|| śaśāsṛkpratimaṃ yacca yadvā lākṣārasopamam | tadārtavaṃ praśaṃsanti yaccāpsu na virajyate ||7|| (su. śā. a. 2) | ¹³

viśuddhārtavalakṣaṇamāha– māsādityādi| niṣpicchadāhārtīti apicchilamadāhamaśūlādi vedanam, etena ¹⁴ vikṛtavātādiliṅgarahitamityarthaḥ| pañcarātrānubandhīti “pañcarātraṃ ¹⁵ prabhūtapravṛttyā'nubadhnātītyarthaḥ|” alpapravṛttyā pañcarātrāt parato'pyanubadhnāti| taduktaṃ hārīte– ‘ ¹⁶ ṣoḍaśadivasānyṛtukālaḥ’| iti| videhe'pyuktam– “strīṇāmṛturbhavati ṣoḍaśa vāsarāṇi|” iti| śaśāsṛgityādinā varṇadvayaṃ vātādiprakṛtibhedāt| yaccāpsu na virajyate iti yenārtavena rañjitaṃ vastramapsu prakṣālitaṃ sallohitaṃ na bhavati tadviśuddham| tathāca hiraṇyākṣaḥ– “surendragopasaṅkāśaṃ snigdhaṃ ca madhugandhi ca| apicchilamaśītaṃ ca yadvāso na virañjayet||” ¹⁷ iti||6-7||

śuddhārtavalakṣaṇamāha– māsetyādi| ¹⁸ apicchadāhārtīti apicchilam, adāham, aśūlādivedanam, etena vikṛtavātādilakṣaṇarahitamityarthaḥ| pañcarātrānubandhīti pañcarātraṃ ¹⁹ prabhūtapravṛttyā'nubadhnāti yadityarthaḥ| alpapravṛtyā pañcarātrātparato'pyanubadhnāti| yaduktaṃ hārīte– “ṣoḍaśadivasānyṛtukālaḥ” iti| videho'pyuktavān– “strīṇāmṛturbhavati ṣoḍaśa vāsarāṇi” ²⁰ iti| punaśca śuddhalakṣaṇamāha– śaśetyādi|| varṇadvayābhidhānaṃ vātādiprakṛtibhedena varṇabhedāt| yaccāpsu na virajyata iti yadārtavaṃ karpaṭagataṃ sat apsu jaleṣu saṃyujyamāneṣu na vivarṇaṃ bhavati| ayamarthaḥ– yat dhautaṃ sat vāso na virañjayati| yaduktaṃ hiraṇyākṣe– “indragopakasaṅkāśaṃ snigdhaṃ ca madhugandhi ca| apicchilamaśītaṃ ca yadvāso na virañjayet||” iti||6-7||

iti śrīmādhavakaraviracite mādhavanidāne asṛgdaranidānaṃ samāptam ||61||

iti śrīkaṇṭhadattakṛtāyāṃ madhukośavyākhyāyāmasṛgdaranidānaṃ samāptam||61|| ²¹

iti śrīvācaspativaidyaviracitāyāṃ mādhavanidānavyākhyāyāmātaṅkadarpaṇākhyāyāṃ pradaranidānam||61||

pāṭhāntarāḥ

1 . ‘...catuḥprakāram’ iti pā. | ↩
2 . ‘...svarūpasya pradasya nidānamucyate’ iti pā.| ↩
3 . ‘ślaiṣmike'tipravṛttibodhārtham’ iti pā.| ↩
4 . ‘tasyātivṛddhau’ iti pā. | ↩
5 . ‘saśabda īṣadarthe’ iti pāṭho kvacitpustake nopalabhyate | ↩
6 . ‘tucchadhānyaprakṣālanajalasadṛśam’ iti pā.| ↩
7 . ‘prakṣālitamāṃsajalasadṛśam’ iti pā.| ↩
8 . agrimapaṅktiḥ kvacitpustake nopalabhyate | ↩
9 . agrimapaṅktiḥ kvacitpustake nopalabhyate | ↩
10 . ‘sadyaḥśālyādimaṇḍatulyam’ iti pā.| ↩
11 . atra ‘pūyarasaḥ|’ iti kvacitpustake adhikaḥ pā.| ↩
12 . ‘cāpyasādhyamiti’ iti pā.| ↩
13 . ‘cikitsānivṛtyarthaṃ śuddhārtavalakṣaṇamāha’ iti pā.| ↩
14 . ‘nirdoṣatvāddāhapicchādirahitam’ iti pā., ‘nirdoṣatvāddāhapittādirahitam’ iti vā pā.| | ↩
15 . ‘..'nubadhnāti yadityarthaḥ’ iti pā.| ↩
16 . ‘udbhūtapravṛttyā pañcarātraṃ, tataḥ paraṃ svalpapravṛttyā tu ṣoḍaśadināni’ iti pā.| ↩
17 . ‘iti’ etatpāṭhaḥ kvacitpustake nopalabhyate | ↩
18 . etādṛśapāṭhābhiprāyeṇa| ↩
19 . ‘prabhūtapravṛttyanubadhnāti’ iti pā.| ↩
20 . ayaṃ pāṭhaḥ kvacitpustake nopalabhyate | ↩
21 . ‘ityātaṅkadarpaṇe nidānavyākhyāyāṃ pradaranidānam||61||’ iti pā.| ↩