67. stanyaduṣṭinidānam · e-Mādhavanidāna

atha stanyaduṣṭinidānam | viśaṃsteṣvapi gātreṣu yathā śukraṃ na dṛśyate | sarvadehāśritatvācca śukralakṣaṇamucyate ||1||

adṛśyasyāpi ¹ stanyasya prasiddhopamānena pravartane hetuṃ darśayannāha– viśannityādi| śukralakṣaṇaṃ stanyamucyata iti śeṣaḥ| kuta ityāha– yathā śukraṃ viśaṃsteṣu chinneṣvapi gātreṣu na dṛśyate, tasmāddhetoḥ| dvitīyaṃ hetumāha– sarvadehāśritatvāditi| śukravatsamastaśarīrāśritatvāt||1||

tadeva ceṣṭayuvaterdarśanāt smaraṇādapi | śabdasaṃśravaṇāt sparśāt saṃharṣācca pravartate ||2|| suprasannaṃ manastatra harṣaṇe heturucyate | ² āhārarasayonitvādevaṃ stanyamapi striyāḥ ||3||

śukradṛṣṭāntena stanyasyābhyantaradarśanaṃ pratipādya tenaiva dṛṣṭāntena bahiḥpravartanaṃ pratipādayannāha– tadityādi| tadeva śukraṃ pravartate bahirniḥsarati| saṃharṣāt viśiṣṭasaṅkalpalakṣaṇāt| saṃharṣe hetucatuṣṭayaṃ nirdiśannāha– iṣṭayuvaterityādi| iṣṭayuvatidarśanādihetucatuṣṭayena yaḥ saṃharṣaḥ, sa suprasanna eva manasi bhavati, iti manaso'pi prasannasya kāraṇatvaṃ darśayannāha– suprasannetyādi| tatra harṣaṇe hetuḥ suprasannamīrṣyādyanabhibhūtaṃ mana ucyate| śukreṇa saha prastutasya stanyasya sādharmyāddhetuṃ darśayannāha– āhāretyādi| pūrvaṃ stanyamapi striyāḥ pratartate, śukramāhārarasayonitvātpravartate, stanyamapi tathā, tasmātpravartate||2-3||

tadevāpatyasaṃsparśāddarśanāt smaraṇādapi | grahaṇācca śarīrasya śukravat sampravartate | sneho nirantarastatra ³ prasrave heturucyate ||4||

nanu śukramāhārarasayonyapi saṃharṣātkāraṇātpravartate, atra ca kiṃ kāraṇamityāha– tadevetyādi| tadeva stanyaṃ śukravat ⁴ sampravartate| apatyasaṃsparśādikāraṇacatuṣṭaye'pi sneho mūlakāraṇamiti tadeva darśayannāha– sneha ityādi| prasrave stanyasravaṇe atrāpi catvāro hetavaḥ parameṣṭayuvatisthāne'trāpatyagrahaṇaṃ, mūlahetuharṣasthāne snehaḥ, prasannasthāne nirantaraḥ||4|| ⁵

gurubhirvividhairannairduṣṭairdoṣaiḥ pradūṣitam | kṣīraṃ ⁶ mātuḥ kumārasya nānārogāya kalpate ||5||

stanāśritatvena stanyaduṣṭimāha– gurubhirvividhairityādi| gurubhirannairhetubhūtairye duṣṭā doṣāstaiḥ pradūṣitam||5||

stanāśritatvena stanyasya duṣṭimāha– gurubhirityādi| gurubhirannairhetubhūtairye duṣṭā doṣāstaiḥ pradūṣitaṃ dhātryāḥ kṣīraṃ kumārasya nānārogāya kalpate| nānārogānutpādayatītyarthaḥ||5||

kaṣāyaṃ salilaplāvi stanyaṃ mārutadūṣitam | kaṭvamlalavaṇaṃ pītarājīmat pittasañjñitam ||6|| kaphaduṣṭaṃ ghanaṃ toye nimajjati sapicchalam | dviliṅgaṃ dvandvajaṃ vidyāt sarvaliṅgaṃ tridoṣajam ||7||

stanyaduṣṭilakṣaṇamāha– kaṣāyamityādi| salilaplāvīti salile yadutplavate lāghavāt tat salilaplāvi| etadupalakṣaṇaṃ, tena tanutvādyapi boddhavyam| kaṭvamlalavaṇamiti kaṭu tiktaṃ, tikte'pi kaṭuśabdapravṛtteriti vadanti| pītarājīmaditi pītarekhāyuktam, ⁷ tatrāpi nīlalohitāśca rājyo jñeyāḥ| ⁸ pittasañjñitamiti pittaduṣṭasañjñitam| sañjñitamityatra saṃyutamiti pāṭhāntaram| toye nimajjati gurutvāt| atimādhuryādyapi bodhyam| prasannasya tu sādhāraṇaṃ madhurapāṇḍutvam| abhighātenāpi stanyaṃ duṣṭaṃ sambhavatyeva, kintu tasya vātikastanyalakṣaṇaireva saṅgrahaṇaṃ kartavyam| stanyasvarūpaṃ ca suśrutenoktam| tadyathā– “rasaprasādo madhuraḥ pakvāhāranimittajaḥ| kṛtsnadehāt stanau prāptaḥ stanyamityabhidhīyate||” (su. ni. a. 10) iti||6-7||

vātikamāha– kaṣāyamityādi| ⁹ salilaplāvi salile yadutplavate lāghavāt, etadupalakṣaṇaṃ, tena tanutvādyapyanuktaṃ boddhavyam| paittikamāha– kaṭvityādi| kaṭu tiktaṃ, tikte'pi kaṭuśabdasya pravṛtteriti vadanti, pītarājīmaditi pītarekhāyuktam, atrāpi nīlalohitāśca rājyo boddhavyāḥ| pittasañjñitamiti pittaduṣṭamiti sañjñitam| ślaiṣmikamāha– kaphaduṣṭamityādi| toye nimajjatīti gurutvāt| atimādhuryādyapi boddhavyam| sāṃsargikasānnipātikāvāha– dviliṅgamiti| sugamam||6-7||

aduṣṭaṃ cāmbunikṣiptamekībhavati pāṇḍuram | madhuraṃ cāvivarṇaṃ ca prasannaṃ tat praśasyate ||8||

avikṛtastanyamāha– aduṣṭamityādi| ambunikṣiptamekībhavati sarvātmanā jalena sahaikībhavatīti bodhyaṃ, vātādiduṣṭasyāpyekadeśenaikībhāvopalambhāt| avivarṇamiti avidyamānavātādiduṣṭavarṇam| etat samadoṣaprakṛtikṣīrasya prasannasya lakṣaṇam| anye tvavivarṇamityatra nañ īṣadarthe, tena yadvātādiprakṛtivarṇānuviddhamapi pāṇḍuramalpaduṣṭatvāttad gṛhṇanti| kecit pāṇḍurasthāne ‘sarvaśaḥ’ iti paṭhanti, tadā sarvātmanā jalena sahaikībhavatīti vyakto'rthaḥ| atra pakṣe avivarṇamityanenaivāduṣṭaśuklavarṇatā jñeyā| prasannaṃ ¹⁰ prakṛtistham||8||

avikṛtaṃ stanyamāha– aduṣṭamityādi| ambunikṣiptamekībhavati ¹¹ sarvātmanā jalena sahaikībhūtaṃ bhavatīti boddhavyam| avivarṇamiti avidyamānavātādiduṣṭavarṇam||8||

iti śrīmādhavakaraviracite mādhavanidāne stanyaduṣṭinidānaṃ samāptam ||67||

iti śrīkaṇṭhadattakṛtāyāṃ madhukośavyākhyāyāṃ stanyaduṣṭinidānaṃ samāptam||67|| ¹²

iti śrīvācaspativaidyaviracitāyāṃ mādhavanidānavyākhyāyāmātaṅkadarpaṇākhyāyāṃ stanyaduṣṭinidānam||67||

pāṭhāntarāḥ

1 . ‘stanyaprasiddhopamānena’ iti pā.| ↩
2 . ‘āhārasamayonitvādevam’ iti pā. | ↩
3 . ‘prasave’ iti pā. | ↩
4 . ‘saṃvartate’ iti pā.| ↩
5 . atra ‘iti śrīvācaspativaidyaviracitāyāṃ mādhavanidānavyākhyāyāmātaṅkadarpaṇākhyāyāṃ stanyaduṣṭinidānam||67||’ iti kvacitpustake adhikaḥ pāṭhaḥ| ↩
6 . ‘dhātryāḥ’ iti pā. | ↩
7 . ‘atrāpi’ iti pā.| ↩
8 . ‘nimajjati’ iti pā.| ↩
9 . ‘salile plavate’ iti pā.| ↩
10 . ‘pravṛtistham’ iti pā.| ↩
11 . asmātpūrvaṃ ‘sa’ iti kvacitpustake adhikaḥ pā.| ↩
12 . ‘ityātaṅkadarpaṇe nidānavyākhyāyāṃ stanyaduṣṭinidānam||67|| iti pā.| ↩