69. viṣaroganidānam · e-Mādhavanidāna

atha viṣaroganidānam | sthāvaraṃ jaṅgamaṃ caiva dvividhaṃ viṣamucyate | mūlādyātmakamādyaṃ syāt paraṃ sarpādisambhavam ||1||

pāriśeṣyādviṣaroganidānamucyate– sthāvaramityādi| viṣādajanakatvādviṣaṃ; tacca dvividham– sthāvaraṃ, jaṅgamaṃ ca| mūlādyātmakamiti ādyaṃ sthāvaraṃ mūlādirūpaṃ daśavidhaṃ; yaduktaṃ suśrute “mūlaṃ patraṃ phalaṃ puṣpaṃ tvak kṣīraṃ sāra eva ca| niryāso dhātavaścaiva kandaśca daśamaḥ smṛtaḥ||” (su. ka. a. 2) iti| tatra klītakāśvamārakaguñjāsugandhagargarakaraghāṭavidyucchikhā'nantā-vijayānītyaṣṭau mūlaviṣāṇi, viṣapatrikālambāsuradārukarambhamahākarambhāṇi pañca patraviṣāṇi, ¹ kumudvatīveṇukākarambhamahākarambhakarkoṭakareṇukakhadyotaka-carmarībhagandhāsarpaghātinandanasārapākāni dvādaśa phalaviṣāṇi, vetrakādambavallījakarambhamahākarambhāṇi pañca puṣpaviṣāṇi, antrapācakakartarīyaśaileyakarambhanandanakaraghāṭavarāṭakāni sapta tvaṅniryāsasāraviṣāṇi, kumudaghnīsnuhījālakṣīrīṇi trīṇi kṣīraviṣāṇi, phenāśmabhasma haritālaṃ ca dve dhātuviṣe, ² kālakūṭavatsanābhasarṣapakapālakardamakavairāṭakamustakamahāviṣa-prapauṇḍarīkamūlakahalāhalaśṛṅgimarkaṭakāni trayodaśa kandaviṣāṇi, etāni prāṇaharāṇi; evaṃ pañcapañcāśat sthāvarāṇi viṣāṇi bhavanti| eṣāṃ ca vyādhapulindādibhyo vyaktijñānaṃ kartavyam| paraṃ sarpādisambhavamiti paraṃ jaṅgamaṃ, tacca ṣoḍaśābhidhānam– dṛṣṭiniḥśvāsadaṃṣṭrānakhamūtrapurīṣaśukralālārtavamukhasandaṃśaparditagudāsthi-pittaśūkaśavabhedāt| parditaṃ pāyukṛtaḥ kutsitaśabdaḥ; ‘parda’ kutsite śabde, ityasya prayogāt| tatra dṛṣṭiniḥśvāsaviṣā divyāḥ sarpāḥ, bhaumāḥ sarpā daṃṣṭrāviṣāḥ, mārjāramakaravyāghrādayo daṃṣṭrānakhaviṣāḥ, picciṭakauṇḍinyādayo mūtrapurīṣaviṣāḥ, mūṣikāḥ śukraviṣāḥ, vṛścikavaraṭyucciṭiṅgādaya ³ ārāviṣāḥ, lūtā ⁴ lālārtavaviṇmūtraśukramukhasandaṃśaviṣāḥ, citraśīrṣakaśatadārukaśārikādayo mukhasandaṃśadaṃṣṭrāparditagudapurīṣaviṣāḥ, viṣahatāsthimatsyāsthiprabhṛtayo'sthiviṣāḥ, ⁵ śakulīmatsyādayaḥ pittaviṣāḥ, sūkṣmatuṇḍabhramarādayaḥ śūkaviṣāḥ, kīṭasarpadehā gatāsavaḥ śavaviṣāḥ| eṣāṃ ca suśrutasya kalpasthāne vistaro draṣṭavyaḥ||1||

pāriśeṣyādviṣaroganidānamucyate| viṣādajanakatvādviṣaṃ, tacca dvividham– sthāvaraṃ jaṅgamaṃ ca| taddvaividhyamāha– sthāvaramityādi| mūlādyātmakamiti ādyaṃ prathamam, adanīyamādyamityanye| sthāvaraṃ mūlādisvarūpaṃ daśavidham| yaduktaṃ suśrute– “daśādhiṣṭhānamādyaṃ syāddvitīyaṃ ṣoḍaśāśrayam|” iti, “mūlaṃ patraṃ phalaṃ puṣpaṃ tvak kṣīraṃ sāra eva ca| niryāso dhātavaścaiva kandaśca daśamaḥ smṛtaḥ||” iti ca| tatra klītakāśvamārakaguñjāsugandhagargarakaraghāṭakavidyucchikhā'nantā-vijayānītyaṣṭau mūlaviṣāṇi, viṣapatrikālambāsuradārukarambhamahākarambhāṇi pañca patraviṣāṇi, kumudvatīveṇukākarambhamahākarambhakarkoṭakareṇukakhadyotaka-carmarībhagandhāsarpaghāticandanakaṅkolasārapākāni dvādaśa phalaviṣāṇi, vetrakādambavallīkarambhamahākarambhāṇi pañca puṣpaviṣāṇi, antrapācakakartarīyaśaileyakarambhanandanakaraghāṭavarāṭakāni sapta tvaṅniryāsasāraviṣāṇi, kumudaghnīsnuhījālakṣīrīṇi trīṇi kṣīraviṣāṇi, ⁶ phenāśma haritālaṃ ca dve dhātuviṣe, kālakūṭavatsanābhasarṣapakapālakardamavairāṭakamustakaśṛṅgīprapauṇḍarīka-mūlakahālāhalamahāviṣamarkaṭakānīti trayodaśa kandaviṣāṇi; evaṃ pañcāśatsthāvaraviṣāṇi bhavanti| eṣāṃ vyādhapulindādibhyo vyaktijñānaṃ kartavyam| paraṃ sarpādisambhavamiti paraṃ jaṅgamaṃ; tacca ṣoḍaśābhidhānam| ⁷ dṛṣṭiniḥśvāsadaṃṣṭrānakhamūtrapurīṣaśukralālāsparśamukhasandaṃśaviśardhita-gudāsthipittaśūkaśavabhedāt| parditaṃ viśardhitaṃ pāyukṛtaḥ kutsitaḥ śabdaḥ ‘śṛdhu śabdakutsāyām’ ityasya prayogāt| tatra dṛṣṭiniḥśvāsaviṣā divyāḥ sarpāḥ, bhaumāstu daṃṣṭrāviṣāḥ, mārjāraśvamakaravyāghrādayo daṃṣṭrānakhaviṣāḥ, picciṭakauṇḍinyādayo mūtrapurīṣaviṣāḥ, ⁸ sarpalādayo mūṣikāḥ śukraviṣāḥ| vṛścikavaraṭīmatsyocciṅgaṭādaya ārāviṣāḥ, lūtā lālāsparśaviṇmūtraśukrārtavamukhasandaṃśaviṣāḥ, makṣikājalāyukādayo mukhasandaṃśaviṣāḥ, citraśīrṣakaśatadārukasārikādayo mukhasandaṃśadaṃṣṭrāviśardhitagudapurīṣaviṣāḥ, viṣahatāsthimatsyāsthiprabhṛtayo'sthiviṣāḥ, ⁹ śakulīmatsyādayaḥ pittaviṣāḥ, sūkṣmatuṇḍabhramarādayaḥ śūkaviṣāḥ, kīṭasarpadehā vyasavaḥ śavaviṣā iti| eṣāṃ ca suśrutasya kalpasthāne vistaro draṣṭavyaḥ||1||

nidrāṃ tandrāṃ klamaṃ dāhamapākaṃ lomaharṣaṇam | śothaṃ ¹⁰ caivātisāraṃ ca jaṅgamaṃ kurute viṣam ||2|| (ca. ci. a. 23) |3| ¹¹

tatra jaṅgamaviṣasya bahvadhiṣṭhānatvena prādhānyāt sarvavegānugataṃ sāmānyaliṅgamāha– nidrāmityādi| etat subodhyam||2||

sthāvaraṃ ca jvaraṃ hikkāṃ ¹² dantaharṣaṃ galagraham | phenacchardyaruciśvāsaṃ mūrchāṃ ca kurute ¹³ bhṛśam ||3|| (ca. ci. a. 23) |4| ¹⁴

sthāvarasya sāmānyaliṅgamāha– sthāvaraṃ cetyādi| phenacchardiriti phenasya chardiḥ||3||

tatra jaṅgamaviṣasya sāmānyena liṅgamāha– nidrāmityādi| phenacchardīti phenasya chardirityavagamyate||3||

iṅgitajño manuṣyāṇāṃ vākceṣṭāmukhavaikṛtaiḥ | jānīyādviṣadātāramebhirliṅgaiśca buddhimān ||4|| na dadātyuttaraṃ pṛṣṭo vivakṣurmohameti ca | apārthaṃ bahu saṅkīrṇaṃ bhāṣate cāpi mūḍhavat ||5|| hasatyakasmāt ¹⁵ sphoṭayatyaṅgulīrvilikhenmahīm | vepathuścāsya bhavati trastaścānyonyamīkṣate ||6|| vivarṇavaktro dhyāmaśca nakhaiḥ kiñcicchinattyapi | ālabhetāsanaṃ ¹⁶ dīnaṃ kareṇa va śiroruham ||7|| vartate ¹⁷ viparītaṃ ca viṣadātā vicetanaḥ | (su. ka. a. 1) |

viṣadātṛlakṣaṇamāha– iṅgitajña ityādi| abhiprāyasūcakam īhitamiṅgitaṃ, tajjño vaidyo vācā kriyayā mukhavaikṛtyādinā ¹⁸ ca viṣadātāraṃ jānīyāt| ebhirvakṣyamāṇalakṣaṇaiḥ| na dadātyuttaraṃ pṛṣṭa iti svīyāsatkarmajanitavyāmohāt| apārthamityanarthakam| saṅkīrṇamityasphuṭam| hasatyakasmāditi ¹⁹ ahetorapi hasati| bhayajavāyujanitaparvavyathāpanodanāyāṅgulīḥ sphoṭayati| kriyāntarakaraṇasūcanāya mahīṃ vilikhati| ²⁰ bhītaḥ san pratyekaṃ vīkṣate| dhyāma iti dagdhasamavarṇaḥ| kiñcittṛṇādikam| vartate viparīta iti vāraṃ vāraṃ parivartya tiṣṭhati||4-7||–

avanīpateḥ parikarmiṇo viṣamavacārayantīti teṣāṃ viṣadātṝṇāṃ lakṣaṇamāha– iṅgitajña ityādi| abhiprāyasūcakamīhitamiṅgitaṃ, tajjño vaidyaḥ vācā kriyāmukhavaivarṇyādibhirviṣadātāraṃ jānīyāt, etairliṅgaiśceti vakṣyamāṇaiḥ| tānyeva liṅgānyāha– netyādi| ātmīyā'satkarmajanitavyāmohāt, apārthamiti nirarthakaṃ, saṅkīrṇamiti asphuṭam| hasatyakasmādityādi| ahāsahetorapi hasati| bhayajavāyusambhūtaparvavyathāpanodāyāṅgulīḥ sphoṭayati| kriyāntakaraṇasūcanāya mahīṃ kiñcillikhati| trastaścānyonyamīkṣata iti svapāpakarmopalambhabhayenānyonyamīkṣate| dhyāma iti dagdhasamavarṇaḥ, malinavastravarṇa iti ²¹ ḍallaṇaḥ||4-7||–

udveṣṭanaṃ mūlaviṣaiḥ pralāpo moha eva ca ||8|| jṛmbhaṇaṃ vepanaṃ śvāso ²² mohaḥ patraviṣeṇa tu | ²³ muṣkaśothaḥ phalaviṣairdāho'nnadveṣa eva ca ||9|| bhavet puṣpaviṣaiśchardirādhmānaṃ śvāsa eva ca | tvaksāraniryāsaviṣairupayuktairbhavanti hi ||10|| āsyadaurgandhyapāruṣyaśirorukkaphasaṃsravāḥ | phenāgamaḥ kṣīraviṣairviḍbhedo gurugātratā ||11|| hṛtpīḍanaṃ dhātuviṣairmūrchā dāhaśca tāluni | prāyeṇa kālaghātīni viṣāṇyetāni nirdiśet ||12|| (su. ka. a. 2) |

mūlādiviṣāṇāṃ pramādādupayuktānāṃ pratyekaṃ lakṣaṇamāha– udveṣṭanamityādi| udveṣṭanaṃ ²⁴ daṇḍavimardanavadvyathā| mūlaviṣairityaṣṭavidhairapi, evaṃ patrādīnāmuktānāṃ yāvatsaṅkhyākānāmekaṃ sāmānyalakṣaṇamavagantavyam| prāyeṇa kālaghātīnīti etāni nava mūlādiviṣāṇi kālāntareṇa mārakāṇi bhavantītyarthaḥ| kandaviṣaṃ tu ²⁵ trayodaśavidhamatitīkṣṇatvādvyavāyivikāśyādiguṇayogāttadātvena mārakam||8-12||

navānāṃ mūlādiviṣāṇāṃ pramādādupayuktānāṃ pratyekaṃ lakṣaṇamāha– udveṣṭanamityādi, udveṣṭanaṃ daṇḍādimardanavadvyathā| mūlaviṣairaṣṭavidhairapi|| patraviṣalakṣaṇamāha– jṛmbhaṇamityādi| jṛmbhaṇaṃ jṛmbhābāhulyam| phalaviṣalakṣaṇamāha– ²⁶ muṣketyādi| muṣkayoḥ śvayathuḥ| puṣpaviṣalakṣaṇamāha– ²⁷ bhavedityādi| tvaksāretyādi tvagviṣaiḥ sāraviṣairniryāsaviṣaiḥ pṛthak tribhiḥ| pāruṣyaṃ kharasparśatvaṃ mukhasyaiva, kaphasaṃsravaḥ śleṣmāsrāvaḥ| kṣīraviṣalakṣaṇamāha– phenetyādi| sugamam| dhātuviṣamāha– hṛdityādi| dhātuviṣaiḥ haritālādikaiḥ| eṣāṃ kālāvadhimāha– prāyeṇetyādi| etāni nava mūlādiviṣāṇi kālāntareṇa ghnanti| kandaviṣamapi daśamamatitīkṣṇatvādvyavāyivikāśyādiguṇayogāttadātvena mārakam||8-12||

sadyaḥkṣataṃ pacyate yasya jantoḥ sravedraktaṃ pacyate cāpyabhīkṣṇam | kṛṣṇībhūtaṃ klinnamatyarthapūti kṣatānmāṃsaṃ śīryate cāpi yasya ||13|| tṛṣṇā mūrchā jvaradāhau ca yasya digdhāhataṃ taṃ puruṣaṃ vyavasyet | liṅgānyetānyeva kuryādamitrairvraṇe viṣaṃ yasya dattaṃ pramādāt ||14|| sapītaṃ gṛhadhūmābhaṃ purīṣaṃ yo'tisāryate | phenamudvamate cāpi viṣapītaṃ tamādiśet ||15|| (su. ka. a. 3) |

viṣaliptaśastrahatasya liṅgamāha– sadya ityādi| pacyate cāpyabhīkṣṇamiti sadyastāvat pacyate, paścādapi punaḥ punaḥ pākameti||13-15||

viṣaliptaśastrahatasya liṅgamāha– sadya ityādi| sadyastāvat pacyate paścādapi punaḥpunaḥ pākameti| digdhāhataṃ viṣaliptaśastrahatam| śatrubhirvraṇasañcāritaviṣalakṣaṇamāha– liṅgānītyādi| etānyeva pūrvoktāni, amitraiḥ śatrubhiḥ, vraṇe śastravraṇe, pramādāt anavadhānāt| tantrāntare viṣapītalakṣaṇam– “sapītaṃ gṛhadhūmābhaṃ purīṣaṃ yo'tisāryate| phenamudvamate cāpi viṣapītaṃ tamādiśet||” iti||13-15||

vātapittakaphātmāno bhogimaṇḍalirājilāḥ | yathākramaṃ samākhyātā dvyantarā dvandvarūpiṇaḥ ||16||

sthāvaramabhidhāya jaṅgameṣvatitīkṣṇatvena sarpaviṣe vācye tadāśrayān sarpānāha– vātapittakaphātmāna ityādi| bhogī phaṇī, maṇḍalī maṇḍalavadrathāṅgalāṅgalādirūpamaṇḍalayuktaḥ| rājilaścitradīrgharekhāvān; ete yathākramaṃ vātādyātmāno vātādiprakṛtayaḥ| vyatikarajān sarpān darśayati– dvyantarā dvandvarūpiṇa iti| dvayorantaraṃ viśeṣo yeṣu te tathā| yathā– phaṇinā maṇḍalinyāṃ gonasā jātāḥ, maṇḍalinā gonasena ca phaṇinyāṃ kṛṣṇasarpāḥ, evamanye'pi jātisaṅkarā ūhyāḥ| ‘vyantarā’ iti pāṭhe sa evārthaḥ, viśabdasya dvyarthatvāt; tathā ‘vibhavānmahānākāśaḥ’ ityatra vyākhyātaṃ, vibhavāditi dvibhāvāt; dvibhāvaśca sarvamūrtadravyaiḥ saṃyogaḥ ²⁸ sarvatra upalambhaśceti| dvandvarūpiṇa iti dvayoḥ phaṇimaṇḍalinorvātapittaprakṛtayoryat prakṛtitvaṃ tanmilitaprakṛtitvameṣāmityarthaḥ, vātapittaprakṛtayorathavā dvayoryaddoṣayo rūpaṃ tadrūpamityarthaḥ||16||

sthāvaramabhidhāya jaṅgameṣvatitīkṣṇatvena sarpaviṣe vācye tadāśrayān sarpānāha– vātetyādi| bhogī phaṇī, maṇḍalī rathāṅgalāṅgalādirūpamaṇḍalayuktaḥ, rājilaścitradīrgharekhāvān, ete yathākramaṃ vātapittakaphaprakṛtayaḥ| vyatikarajān sarpān darśayati– dvyantarādvandvarūpiṇa iti| dvyantarāḥ dvayorantaraṃ viśeṣo yeṣu te tathā, yathā– phaṇinā kṛṣṇasarpeṇa maṇḍalinyāṃ gonasā jātāḥ, maṇḍalinā vā gonasena ca| phaṇinyāṃ kṛṣṇasarpāḥ, evamanye'pi jātivyatikarā ūhyāḥ| dvandvarūpiṇa iti dvayoryo bhāvaḥ; tadvanta ityarthaḥ||16||

daṃśo bhogikṛtaḥ kṛṣṇaḥ sarvavātavikārakṛt | pīto maṇḍalijaḥ śotho mṛduḥ pittavikāravān ||17|| rājilottho bhaveddaṃśaḥ sthiraśothaśca picchilaḥ | pāṇḍuḥ snigdho'tisāndrasṛk sarvaśleṣmavikārakṛt ||18|| ²⁹

bhogiprabhṛtikṛtadaṃśeṣu vātādīnāṃ liṅgamāha– daṃśo bhogikṛta ityādi| sarvavātavikārakṛdityanenaiva kṛṣṇatve siddhe ³⁰ taduktiravaśyambhāvitvakhyāpanārtham, evamuttaratrāpi pītādyabhidhānam||17-18||

bhogiprabhṛtibhiḥ kṛtadaṃśeṣu lakṣaṇaṃ vātādīnāmāha– daṃśa iti| sarvavātavikārakṛdityanenaiva kṛṣṇatve siddhe taduktiravaśyambhāvitākhyāpanārtham| evamuttaratrāpi pītādyabhidhānam||17-18||

aśvatthadevāyatanaśmaśānavalmīkasandhyāsu catuṣpatheṣu | yāmye ca daṣṭāḥ parivarjanīyā ṛkṣe ³¹ sirāmarmasu ye ca daṣṭāḥ ||19|| (su. ka. a. 3) |

viśiṣṭadeśādidaṣṭasyāsādhyatvamāha– aśvatthetyādi| yāmye ceti bharaṇyām| ṛkṣe nakṣatre| marmasviti āśughātiṣu| yāmye ceti cakāreṇārdrāśleṣāmaghāmūlakṛttikānāṃ grahaṇam| yaduktamanyatra– “caityāyatanavalmīkaśmaśāneṣu catuṣpathe| ārdrāśleṣāmaghāmūlakṛttikābharaṇīṣu ca|| pañcamyāṃ sandhyayordaṃśe marmasvāśuhareṣu ca| daṣṭāḥ kaṣṭena jīvanti yadi dūtādisampadaḥ||” iti||19|| ³²

viśiṣṭadeśanakṣatradaṣṭasyāsādhyatvamāha– aśvatthetyādi| yāmye ceti bharaṇyāṃ yāmye ityatra “pitrye” iti pāṭhaḥ| pitrye maghāyāṃ, ṛkṣe nakṣatre| ye ca marmasu daṣṭāḥ syuste'pi tyājyāḥ| marmasviti āśughātiṣu| yāmye ceti cakāreṇārdrāśleṣāmaghāmūlakṛttikādīnāṃ samuccayanam| yaduktamanyatra– “caityāyatanavalmīkaśmaśāneṣu catuṣpathe| ārdrāśleṣāmaghāmūlakṛttikābharaṇīṣu ca|| pañcamyāṃ sandhyayordaṃśe marmasvāśuhareṣu ca| daṣṭāḥ kaṣṭena jīvanti yadi dūtādisampadaḥ||” iti||19||

darvīkarāṇāṃ viṣamāśughāti sarvāṇi coṣṇe dviguṇībhavanti |20| (su. ka. a. 3) | ³³

darvītyādi| darvīkarāṇāṃ ³⁴ viṣamāśu hanti aśvatthādau viśeṣeṇa ³⁵ darvīkarāṇāmāśumārakaṃ; darvīkarāḥ phaṇinaḥ| sarvāṇi coṣṇe dviguṇībhavantīti uṣṇasaṃyoge sati sarvāṇi viṣāṇi svarūpato dvaiguṇyaṃ bhajante; “sarvāṇi coktāni yathākrameṇa” iti pāṭhāntare ayamarthaḥ– sarvāṇi bhogimaṇḍalirājilaviṣāṇi yathākrameṇa yathoddiṣṭakrameṇa uktānyaśvatthādiṣvāśughātīni| darvīkaraviṣasya pṛthagupādānaṃ viśeṣārtham|20|–

darvīkarāṇāmityādi| aśvatthādau viśeṣeṇa darvīkarāṇāṃ viṣamāśughātakaṃ, darvīkarāḥ phaṇinaḥ| sarvāṇi coṣṇe ³⁶ viguṇībhavantīti uṣṇasaṃyoge sarvāṇi viṣāṇi svarūpato vaiguṇyaṃ bhajante “sarvāṇi coṣṇe dviguṇībhavanti” iti pāṭhe sarvāṇyaśeṣāṇi ³⁷ viṣāṇyuṣṇakāle dviguṇībhavanti dviguṇaśaktīni bhavanti| “sarvāṇi cordhve dviguṇībhavanti” ityapare paṭhanti| ūrdhve deśa ityarthaḥ| “sarvāṇi coktāni yathākrameṇa” iti pāṭhāntaraṃ, tadāyamarthaḥ– sarvāṇi maṇḍalirājilaviṣāṇi yathākrameṇa yathopadiṣṭakrameṇoktā'śvatthādiṣvāśughātīni| darvīkaraviṣasya pṛthagupādānaṃ viśeṣārtham|20|–

ajīrṇapittātapapīḍiteṣu bāleṣu vṛddheṣu bubhukṣiteṣu ||20|| kṣīṇakṣate mehini kuṣṭhayukte rūkṣe'bale garbhavatīṣu cāpi | (su. ka. a. 3) |

evamapareṣvapi āśughātitvaṃ sambhavati, tānāha– ajīrṇetyādi| ajīrṇapittātapapīḍiteṣviti ajīrṇini doṣatrayaprakopāt, pittātapapīḍitayo raukṣyāt, bālavṛddhayorasampūrṇakṣīṇadhātutvena viṣavegāsahatvāt, bubhukṣiteṣviti ³⁸ pittavṛddhyā uṣṇadehatvāt, kṣīṇakṣata iti kṣatakṣīṇe bahulavātaduṣṭeḥ, mehini doṣatrayaprakopāt, kuṣṭhayukte raktādidoṣāt, rūkṣe vātakopāt, abale kleśāsahatvāt, garbhavatīṣu garbheṇotkṣiptadoṣatvāt; eṣu viṣamāśughātīti||20||–

apareṣu yeṣu yathā''śughātitvaṃ sambhavati tānāha– ajīrṇetyādi| ajīrṇini doṣatrayaprakopādviṣamāśughāti, pittātapapīḍitayo raukṣyāt, bālavṛddhayorasampūrṇakṣīṇadhātutvena viṣavegāsahatvāt| bubhukṣiteṣviti vātapittavṛddhyoṣṇadehatvāt| kṣīṇakṣata iti kṣatakṣīṇe bahulavātaduṣṭeḥ, mehini doṣatrayakopāt, ³⁹ kuṣṭhajuṣṭe raktādidoṣāt, rūkṣe vātakopāt, abale vegāsahatvāt, garbhavatīṣu garbheṇotkṣiptadoṣatvāt; eṣu viṣamāśughātīti||20||–

śastrakṣate yasya na raktameti rājyo latābhiśca na sambhavanti ||21|| śītābhiradbhiśca na romaharṣo viṣābhibhūtaṃ parivarjayettam | jihmaṃ mukhaṃ yasya ca keśaśāto nāsāvasādaśca sakaṇṭhabhaṅgaḥ ||22|| kṛṣṇaḥ saraktaḥ śvayathuśca daṃśe hanvoḥ sthiratvaṃ ca vivarjanīyaḥ | vartirghanā yasya nireti vaktrādraktaṃ sravedūrdhvamadhaśca yasya ||23|| daṃṣṭrānipātāścaturaśca yasya taṃ cāpi vaidyaḥ parivarjayecca | unmattamatyarthamupadrutaṃ vā hīnasvaraṃ vā'pyatha vā vivarṇam ||24|| sāriṣṭamatyarthamaveginaṃ ca jñātvā naraṃ karma na tatra kuryāt | (su. ka. a. 3) |

idānīṃ sarvathā varjanīyamāha– śastrakṣata ityādi| rājyo latābhiśceti rājyo lekhāḥ latābhistāḍanānna bhavanti| ⁴⁰ taduktamālambāyane– “naiti raktaṃ kṣatādyasya latāghātairna rājikāḥ| na lomaharṣaḥ śītādbhirvarjayettaṃ viṣārditam||” iti| jihmaṃ vakraṃ, stabdhamiti kārtikaḥ| keśaśāta iti karṣaṇāt keśotpāṭaḥ| kaṇṭhabhaṅgo grīvāyā ⁴¹ avidhāraṇam| hanvoḥ sthiratvaṃ hanudvayasya lagnatvam| vartirghaneti lālārūpā vartiḥ| raktaṃ sravedūrdhvamadhaśca yasyeti mukhanāsāgudādibhyaḥ śoṇitasrāvaḥ| daṃṣṭrānipātāścaturaśceti catvāra iti prāpte catura iti nirdeśaḥ ⁴² āgamavidheranityatvāt, yathā– “agrataścaturo vedā” ityādi| unmattamatyarthamupadrutamiti unmattamatyarthamunmādavantam, upadrutaṃ jvarātisārādibhiratyarthamupadrutam| hīnasvaraṃ vaktumasamartham| vivarṇaṃ kṛṣṇavarṇam| sāriṣṭaṃ nāsābhaṅgādiyuktam| aveginaṃ ⁴³ gamanādivegarahitaṃ, ⁴⁴ viṇmūtrādivegarahitamiti kārtikaḥ||21-24||–

sarvathā varjanīyamāha– śastretyādi| rājyo lekhāḥ latābhistāḍite'ṅge na sambhavanti nocchalanti| atrālambāyane'pyuktam– “naiti raktaṃ kṣatādyasya latāghāte na rājikāḥ| na lomaharṣaḥ śītādbhirvarjayettaṃ viṣārditam||” iti| aparaṃ varjyamāha– jihmamityādi| jihmaṃ vakraṃ, stabdhamiti kārtikaḥ| keśaśātaḥ gharṣaṇātkeśotpāṭaḥ, kaṇṭhabhaṅgena grīvāyā adhāraṇaṃ, hanvoḥ sthiratvaṃ hanudvayasya lagnatvam| aparamapi varjyamāha– vartirityādi| lālārūpā vartiryasya mukhānnirgacchati| raktaṃ sravedūrdhvamadhaśceti mukhanāsāgudamehanādibhyaḥ śoṇitasrāvaḥ| ⁴⁵ daṃśanipātāścatura iti catvāra iti prāpte'nityatvādāgamābhāvaḥ| anyamapi varjyamāha– unmattamityādi| unmattaṃ unmādavantaṃ, jvarātisārādibhiratyarthamupadrutaṃ ca, hīnasvaraṃ vaktumasamarthaṃ, vivarṇaṃ kṛṣṇavarṇaṃ, sāriṣṭaṃ nāsābhaṅgādiyuktam, aveginaṃ prathamādivegarahitaṃ, ⁴⁶ viṇmūtravegarahitamiti kārtikaḥ||21-24||–

jīrṇaṃ viṣaghnauṣadhibhirhataṃ vā dāvāgnivātātapaśoṣitaṃ vā ||25|| svabhāvato vā guṇaviprahīnaṃ viṣaṃ hi dūṣīviṣatāmupaiti | (su. ka. a. 2) |

sthāvarajaṅgamaviṣameva jīrṇatvādibhirviśeṣairdūṣīviṣasañjñāṃ labhate; tadāha– jīrṇamityādi| viṣaghnauṣadhibhiriti agadādibhiḥ| dāvāgnivātātapaśoṣitaṃ veti dāvāgnirvanāgniḥ| svabhāvato vā guṇaviprahīnamiti svabhāvādeva kimapi viṣaṃ ⁴⁷ vyavāyivikāśiprabhṛtiṣu daśasu guṇeṣu madhye ⁴⁸ ekadvitryādiguṇahīnaṃ yadi bhavati tadā dūṣīviṣatāmupaiti||25||–

sthāvarajaṅgamaviṣameva jīrṇatvādibhiḥ kāraṇairdūṣīviṣasañjñāṃ labhate; tadāha– jīrṇamityādi| viṣaghnauṣadhibhiriti agadādibhirhatavīryaṃ, dāvāgnivātātapaśoṣitaṃ ceti dāvāgnirvanāgniḥ| svabhāvata iti svabhāvādeva kimapi vikāśivyavāyiprabhṛtiṣu daśasu guṇeṣu madhye ekadvitryādiguṇahīnaṃ saddūṣīviṣatāṃ prāpnoti||25||–

vīryālpabhāvānna nipātayettat kaphānvitaṃ varṣagaṇānubandhi ||26|| tenārdito bhinnapurīṣavarṇo vaigandhyavairasyayutaḥ pipāsī | mūrchāṃ bhramaṃ gadgadavāgvamiṃ ca viceṣṭamāno'ratimāpnuyādvā ||27|| (su. ka. a. 2) |

guṇahīnatāmeva kāryeṇa darśayati– vīryālpabhāvādityādi| na nipātayediti na ⁴⁹ mārayati sadyaścireṇa vā| kaphānvitamiti kaphānvitaṃ sat mandībhūtauṣṇyādiguṇaṃ na ⁵⁰ mārayati| varṣagaṇānubandhīti apākāccirasthāyi| tenārdito bhinnapurīṣavarṇa iti tena ⁵¹ dūṣīviṣeṇārditaḥ; bhinnaśabdo'tra purīṣavarṇābhyāṃ pratyekamabhisambadhyate, bhinnavarṇo vivarṇaḥ| vaigandhyavairasyayuta iti viruddhagandhamukhavairasyayuktaḥ| viceṣṭamāno viruddhāṃ ceṣṭāṃ kurvan, aratimasukhaṃ labhate||26-27||

tāmeva guṇahīnatāṃ kāryeṇa darśayati– vīryetyādi| tadvīryasyālpatvāt| na nipātayet na mārayet, sadyaścireṇa vā| kaphānvitaṃ ⁵² sanmandībhūtauṣṇyādiguṇatvāt na mārayati, varṣagaṇānubandhi apākāccirasthāyi| tena gararūpeṇa ye doṣā bhavanti, tāndarśayannāha– teneti| tena gararūpeṇa viṣeṇa pīḍito bhinnapurīṣavarṇādikaḥ syāt, bhinnaśabdo'tra purīṣavarṇābhyāṃ pratyekaṃ sambadhyate| bhinnavarṇo vivarṇaḥ| vigandhavairasyayuta iti viruddhagandhamukhavairasyayuktaḥ, viceṣṭamāna iti viruddhāṃ ceṣṭāṃ kurvan, aratimasukhaṃ labhate||26-27||

āmāśayasthe kaphavātarogī pakvāśayasthe'nilapittarogī | bhavet ⁵³ samuddhvastaśiroruhāṅgo vilūnapakṣastu yathā vihaṅgaḥ ||28|| (su. ka. a. 2) |

sthānaviśeṣeṇa viśiṣṭaliṅgamāha– āmāśayastha ityādi| kaphāvṛtatvena vātakopa āmāśaye, tena kaphavātarogītyuktam| anilapittarogīti pakvāśaye duṣṭavātasambandhena ⁵⁴ pratyāsannasyāśayasthasya pittasya kopaḥ| bhavet samuddhastaśiroruhāṅga iti atrāṅgaśabdāt paraṃ ruhaśabdo draṣṭavyaḥ; tenāyamarthaḥ– samuddhastaśiroruhāṅgaruhaḥ, śiroruhāḥ keśāḥ, aṅgaruhaṃ loma; taduktamālambāyane– “sīdanti keśalomāni tasmin pakvāśayaṃ gate|” ityādi| vilūnapakṣastu yathā vihaṅga iti muṇḍitapakṣaśakunisadṛśaḥ, etat pakvāśayagatasyaiva liṅgam||28||

sthānaviśeṣeṇa viśiṣṭaliṅgamāha– āmāśayastha ityādi| kaphāvṛtatvena vātakopaḥ āmāśaye, tena kaphavātarogītyuktam| anilapittarogīti pakvāśaye duṣṭavātasambandhena pratyāsannāśayasya pittasya kopaḥ| bhavet samuddhastaśiroruhāṅga iti atrāṅgaśabdāt paraṃ ruhaśabdo draṣṭavyaḥ, tenāyamarthaḥ– samuddhastaśiroruhāṅgaruhaḥ| śiroruhaḥ keśaḥ, aṅgaruhaṃ lometyarthaḥ| taduktamālambāyane– “sīdanti keśalomāni tasmin pakvāśayaṃ gate|” iti| vilūnapakṣastu yathā vihaṅga iti muṇḍitapakṣaśakuniriva| ⁵⁵ etacca pakvāśayagatasyaiva liṅgam||28||

sthitaṃ rasādiṣvathavā yathoktān karoti dhātuprabhavān vikārān | kopaṃ ca śītāniladurdineṣu yātyāśu pūrvaṃ śṛṇu tasya rūpam ||29|| (su. ka. a. 2) |

tasya rasādidhātugatasya liṅgamāha– sthitaṃ rasādiṣvityādi| yathoktān karoti dhātuprabhavān vikārāniti suśrute vyādhisamuddeśīyādhyāyoktānannā'śraddhādīn karoti; kopaṃ ca śītāniladurdineṣu yātīti kaphasambandhāt śītādau kāle kopaṃ yāti| pūrvaṃ śṛṇu tasya rūpamiti pūrvarūpaṃ śṛṇvityarthaḥ||29||

tasya rasādidhātugatasya liṅgamāha– sthitamityādi| yathoktān suśrute vyādhisamuddeśīyoktān annā'śraddhādīn karoti| kopaṃ ca śītetyādi kaphasambandhāt śītādau kāle śīghraṃ kopaṃ yāti| pūrvaṃ śṛṇu tasya rūpamiti pūrvarūpaṃ śṛṇvityarthaḥ||29||

nidrāgurutvaṃ ca vijṛmbhaṇaṃ ca viśleṣaharṣāvathavā'ṅgamardam | tataḥ karotyannamadāvipākāvarocakaṃ maṇḍalakoṭhajanma ||30|| māṃsakṣayaṃ pādakarapraśothaṃ mūrchāṃ tathā chardimathātisāram | dūṣīviṣaṃ śvāsatṛṣājvarāṃśca kuryāt pravṛddhiṃ jaṭharasya cāpi ||31|| (su. ka. a. 2) |

tadevāha– nidretyādi| viśleṣaharṣāviti viśleṣo gātrasya śaithilyaṃ, harṣo romaharṣaḥ| etāni vātakaphajāni liṅgāni| tata iti pūrvarūpādanantaram| annamadāvipākāviti annamadaḥ anne bhukte mado harṣaḥ annamadaḥ; kārtikastu annavikṣepaṇamannamadamāha– annamado rasājīrṇamiti gadādharaḥ; avipāko'nnasyāpākaḥ| pādakarapraśothamiti pāde kare ca prakṛṣṭaṃ śothaṃ karoti| “mūrchāṃ tathā chardimathātisāram” ityasya sthāne “pralepakaṃ chardim” ityādi pāṭhāntare ⁵⁶ pralepakaṃ svedapravṛttyā picchilaṃ gātraṃ, jvaraviśeṣaṃ vā||30-31||

tadevāha– nidretyādi| viśleṣo gātraśaithilyaṃ, harṣo romaharṣaḥ, aṅgamardo vedanāviśeṣaḥ; etāni vātakaphajāni, tata iti pūrvarūpādanantaram| annamadāvipākāviti anne bhukte mado harṣo'nnamadaḥ, kārtikastu annavikṣepaṇamannamadamāha, annamado rasājīrṇamiti gadādharaḥ; avipāko'nnasya pākābhāvaḥ| pādakarapraśothamityādi pāde kare ca prakṛṣṭaṃ śophaṃ karoti| mūrchāṃ tathā chardimathātisāramityasya sthāne “pralepakaṃ chardimathātisāram” iti pāṭhāntaram| tatra pralepakaṃ picchilasvedapravṛttyā gātraliptiṃ, jvaraviśeṣaṃ vā karoti||30-31||

unmādamanyajjanayettathā'nyadānāhamanyat kṣapayecca śukram | gādgadyamanyajjanayecca kuṣṭhaṃ tāṃstān vikārāṃśca bahuprakārān ||32|| (su. ka. a. 2) |

tadeva nānāprakāraṃ yadyat karoti tattadāha– unmādamanyadityādi| kṣapayecca śukramiti ṣāṇḍhyaṃ karotītyarthaḥ| tāṃstāniti visarpavisphoṭakādīn||32||

tadeva nānāprakāraṃ yadyatkaroti tattadāha– unmādamityādi| gādgadyaṃ gadgadavākyatām| tāṃstāniti visphoṭakādīn||32||

dūṣitaṃ deśakālānnadivāsvapnairabhīkṣṇaśaḥ | yasmāt sandūṣayeddhātūn tasmāddūṣīviṣaṃ smṛtam ||33|| sādhyamātmavataḥ sadyo yāpyaṃ saṃvatsarotthitam | dūṣīviṣamasādhyaṃ syāt kṣīṇasyāhitasevinaḥ ||34|| (su. ka. a. 2) |

dūṣīviṣasya niruktimāha– dūṣitamityādi| deśakālānnadivāsvapnairiti deśaḥ pracurānilaśītavṛṣṭiranūpādiḥ, kālaḥ śītāniladurdinādiḥ, annaṃ ⁵⁷ yavatilakulatthādi, tairdūṣitaṃ kopitam| abhīkṣṇaśaḥ punaḥ punaḥ| dhātudūṣakatvena dūṣīviṣam| ⁵⁸ saṃyogajaṃ viṣaṃ dvividham– ekaṃ saviṣāviṣasaṃyogakṛtaṃ kṛtrimasañjñam, aparaṃ nirviṣadravyakṛtaṃ garasañjñam| yadāha vṛddhakāśyapaḥ– “ ⁵⁹ saṃyogajaṃ ca dvividhaṃ tṛtīyaṃ viṣamucyate| garaḥ syādaviṣaṃ tatra, saviṣaṃ kṛtrimaṃ matam||” iti| ata eva rasāyane carakaḥ– “daṃṣṭrāviṣe mūlaviṣe sagare kṛtrime viṣe|” iti||33-34||

dūṣīviṣalakṣaṇamāha– dūṣitamityādi| deśaḥ pracurānilaśītavarṣātapaḥ, kālaḥ śītāniladurdinādiḥ, annaṃ yavatilakulatthādi; annasyopalakṣaṇatvādvyavāyavyāyāmakrodhādayo'pi grāhyāḥ; tairdūṣitaṃ kopitam, abhīkṣṇaśaḥ punaḥpunaḥ| dhātudūṣakatvena dūṣīviṣam|| idānīṃ sādhyayāpyapratyākhyeyaṃ ca darśayannāha– sādhyamityādi| sugamam| ⁶⁰ saṃyogajaviṣaṃ dvividham– ekaṃ saviṣā'viṣasaṃyogakṛtaṃ kṛtrimaviṣam, aparaṃ nirviṣadravyakṛtaṃ garasañjñam| yadāha vṛddhakāśyapaḥ– “saṃyogajaṃ ca dvividhaṃ tṛtīyaṃ viṣamucyate| garaḥ syādaviṣaṃ tatra saviṣaṃ kṛtrimaṃ matam||” iti| ata eva rasāyane carakaḥ– “daṃṣṭrāviṣe mūlaviṣe sagare kṛtrime viṣe|” iti| ātmavataḥ pathyāśinaḥ| kṣīṇasya kṣīṇadhātoḥ||33-34||

saubhāgyārthaṃ striyaḥ svedaṃ rajo nānāṅgajān malān | śatruprayuktāṃśca garān ⁶¹ prayacchantyannamiśritān ||35|| taiḥ syāt pāṇḍuḥ kṛśo'lpāgnirgaraścāsyopajāyate | marmapradhamanādhmānaṃ hastayoḥ śothalakṣaṇam ||36|| jaṭharaṃ grahaṇīdoṣo yakṣmā gulmaḥ kṣayo jvaraḥ | evaṃvidhasya cānyasya vyādherliṅgāni darśayet ||37|| ⁶²

etaddvayamapi darśayitumāha– saubhāgyārthamityādi| striyaḥ saubhāgyārthaṃ ⁶³ śatruprayuktā vā saviṣajantūnāṃ svedaṃ, rajaścūrṇaṃ, nānāṅgajān nānāgarakarān malān annādau dadati| tairiti svedarajaḥprabhṛtibhiḥ| garaścāsyeti apākājjaṭharāvasthitasvedādireva garaḥ, ata eva tasyodarāmayaḥ; kiṃvā vakṣyamāṇamarmapradhamanādilakṣaṇo vyādhirgaraḥ| marmapradhamanaṃ marmavyathā| śothalakṣaṇamiti śotha eva lakṣaṇam| jaṭharamudaram| anyasya vyādherliṅgāni darśayediti anyasya visphoṭāderliṅgaṃ darśayati||35-37||

etacca dvayamapi darśayitumāha– saubhāgyārthamityādi| striyaḥ saubhāgyārthaṃ śatruprayuktyā vā saviṣajantūnāṃ svedaṃ, rajaḥ cūrṇaṃ, nānāṅgajānmalān annādau dadati| tairiti svedarajaḥprabhṛtibhiḥ| gara evāsyopajāyata iti apākāt jaṭharāvasthitasvedādireva garaḥ, ata eva tasyodarāmayaḥ| marmapradhamanaṃ marmavyādhiḥ| śothalakṣaṇamiti śotha eva lakṣaṇam| jaṭharaṃ udaram| anyasya vyādhe raktapittādeḥ||35-37||

yasmāllūnaṃ tṛṇaṃ prāptā muneḥ prasvedabindavaḥ | tasmāllūtāstu bhāṣyante saṅkhyayā tāśca ṣoḍaśa ||38|| (su. ka. a. 8) |

samprati lūtānāṃ ghoraviṣatvapratipādanārthamaitihyamāha– yasmāllūnaṃ tṛṇamityādi| iti kila śrutiḥ– “viśvāmitro narapatiḥ kāmadhenorbalātkāraparigraheṇa munisattamaṃ vaśiṣṭhaṃ kopayāñcakāra, kupitena ⁶⁴ tenāntarjvaladaviralakopānalajvalitaṃ kukulayugalamiva bahalapāṭalaṃ locanadvayaṃ vahatā bhagavān raviravalokitaḥ| tatastasya ⁶⁵ bhrūkuṭibhayaṅkaralalāṭataṭaprasyandī svedabindūtkaraḥ pracaṇḍataraḥ pratyāsannalūnatṛṇe ⁶⁶ dhenvarthaṃ sambhṛte nipatito lūtā'bhūt|” iti| tāstu ṣoḍaśa| yadāha suśrutaḥ– “trimaṇḍalā tathā śvetā kapilā ⁶⁷ pītakā tathā| lālāmūtraviṣā raktā kaṭhinā cāṣṭamī smṛtā| sauvarṇikā lājavarṇā jālinyekapadī tathā| kṛṣṇā'gnivaktrā kāṇḍā ca mālāguṇyaṣṭamī matā||” (su. ka. a. 8) iti||38||

samprati lūtānāṃ ghoraviṣatvapratipādanārthamaitihyamāha– yasmādityādi| yasmāt kāraṇāt muneḥ prasvedabindavo lūnaṃ tṛṇaṃ prāptāḥ, tasmāllūtā bhāṣyante, tā lūtāḥ saṅkhyayā ṣoḍaśa bhavanti| iti kila śrutiḥ– ‘yatkāmadhenorbalātparigraheṇa viśvāmitro nṛpatirvaśiṣṭhaṃ kopayāmāsa, tena ca ⁶⁸ kupitenāntarjvaladaviralakopānalajvalitaṃ kukulayugalamiva bahalapāṭalaṃ nayanayugalaṃ vahatā bhagavān raviravalokitaḥ| tatastasya bhṛkuṭibhayaṅkaralalāṭataṭaprasyandī svedabindūtkaraḥ pracaṇḍataraḥ pratyāsannalūnatṛṇe dhenvarthaṃ sambhṛte nipatito lūtā'bhūta||’ iti| tāstu ṣoḍaśa| yadāha suśrutācāryaḥ– “trimaṇḍalā tathā śvetā kapilā pītikā tathā| lālāmūtraviṣā raktā kaṭhinā cāṣṭamī smṛtā|| sauvarṇikā lājavarṇā jālinyeṇīpadī tathā| kṛṣṇā snigdhamukhī kāṇḍā mālātuṇḍyaṣṭamī tathā|| tāsāmaṣṭau kṛcchrasādhyā varjyāstāvatya eva tu|” iti| matāntareṇotpattiranyathā varṇyate– “anye vadanti bhuktasya duṣṭasyānnasya mūrchanāt| sambhavanti viṣasphoṭā ye lūtākīṭalakṣaṇāḥ|| yathāsvaṃ dhārayantaste lūtākīṭāstu kīrtitāḥ|” iti||38||

tābhirdaṣṭe daṃśakothaḥ pravṛttiḥ kṣatajasya ca | jvaro dāho'tisāraśca gadāḥ syuśca tridoṣajāḥ ||39|| piḍakā vividhākārā maṇḍalāni mahānti ca | śothā mahānto mṛdavo raktāḥ śyāvāścalāstathā ||40|| sāmānyaṃ sarvalūtānāmetaddaṃśasya lakṣaṇam | (su. ka. a. 8) |42|

tāsāṃ ⁶⁹ sāmānyadaṃśalakṣaṇamāha– tābhirdaṣṭa ityādi| daṃśakotha iti daṃśadeśe pūtibhāva ityarthaḥ| pravṛttiḥ kṣatajasyeti raktasya pravartanam| sarvalūtānāmiti asādhyāṣṭavidhasauvarṇikādilūtānāmeva sāmānyalakṣaṇaṃ jñeyam| ⁷⁰ yatastrimaṇḍalādīnāmaṣṭānāṃ kṛcchrasādhyatvaṃ, tābhirdaṣṭe śiroduḥkhamityādinā sāmānyalakṣaṇamabhidhāya sauvarṇikādyanantarametat paṭhitavān suśrutaḥ| mādhavakareṇa tu ṣoḍaśānāṃ lūtānāṃ sāmānyalakṣaṇametadityabhiprāyeṇa paṭhitamiti||39-40||–

tāsāṃ sāmānyadaṃśalakṣaṇamāha– tābhirityādi| ⁷¹ daṃśakothaḥ daṃśadeśe pūtibhāva ityarthaḥ| pravṛttiḥ kṣatajasyeti raktapravartanam| sarvalūtānāmityādi| asādhyāṣṭavidhasauvarṇikādilūtānāmetatsāmānyalakṣaṇamiti pratyetavyam| yataḥ kṛcchrasādhyatvam aṣṭavidhatrimaṇḍalādilūtānām| “tābhirdaṣṭe śiroduḥkhaṃ kaṇḍūrdaśe ca vedanā| bhavanti ca viśeṣeṇa gadāḥ ślaiṣmikavātikāḥ||” iti| evaṃ sāmānyalakṣaṇamabhidhāya sauvarṇikādyanantarametat, tābhirdaṣṭe ‘daṃśakotha’ ityādikaṃ paṭhitavān suśrutaḥ| mādhavakareṇa tu ṣoḍaśalūtānāṃ sāmānyalakṣaṇametadityabhiprāyeṇa paṭhitamiti||39-40||

daṃśamadhye tu yat kṛṣṇaṃ śyāvaṃ vā jālakācitam ||41|| ūrdhvākṛti bhṛśaṃ pākaṃ kledaśothajvarānvitam | dūṣīviṣābhirlūtābhistaddaṣṭamiti nirdiśet ||42|| (ca. ci. a. 23) |

trimaṇḍalādayo'ṣṭau dūṣīviṣāstāsāṃ lakṣaṇamāha– daṃśamadhye tvityādi| ūrdhvākṛtīti ūrdhvagasvarūpam; anye ‘dagdhākṛti’ iti paṭhanti, tadvyaktārtham| dūṣīviṣābhiriti kālāntaraprakopiviṣābhiḥ| daṣṭamiti daṃśam||41-42||

trimaṇḍalādayo'ṣṭau dūṣīviṣāstāsāṃ lakṣaṇamāha– daṃśamadhya ityādi| ūrdhvākṛti ūrdhvagasvarūpam| dūṣīviṣābhiriti ⁷² kālāntaraprakopiviṣābhiḥ, daṣṭamiti daṃśanam||41-42|| ⁷³

, ⁷⁴ śothāḥ śvetāḥ sitā raktāḥ pītā ⁷⁵ vā piḍakā jvaraḥ | ⁷⁶ prāṇāntikāśca jāyante śvāsahikkāśirograhāḥ ||43|| (ca. ci. a. 23) |

sauvarṇikādīnāmaṣṭānāmasādhyānāṃ prāṇaharāṇāṃ sāmānyalakṣaṇamāha– śotha ityādi| prāṇāntikā iti prāṇaharāḥ||43||

sauvarṇikādayo'ṣṭāvasādhyāḥ prāṇaharāḥ, tāsāṃ lakṣaṇamāha– śotha ityādi| anye “śvetā sitā raktāḥ pītā ca” iti paṭhanti| tatra piḍakā jvaraśca| prāṇāntikāḥ prāṇaharāḥ||43||

ādaṃśācchoṇitaṃ pāṇḍumaṇḍalāni jvaro'ruciḥ | lomaharṣaśca dāhaścāpyākhudūṣīviṣārdite ||44|| (ca. ci. a. 23) |

ākhudūṣīviṣalakṣaṇamāha– ādaṃśādityādi| ādaṃśāt śoṇitamityatra ‘galati’ iti śeṣaḥ| ākhavaḥ śukraviṣāḥ| yaduktam– “śukraṃ patati yatraiṣāṃ ⁷⁷ śukraspṛṣṭaiḥ spṛśanti yat|” (su. ka. a. 7) iti||44||

ākhudūṣīviṣalakṣaṇamāha– ādaṃśādityādi| ādaṃśācchoṇitamityatra galatīti śeṣaḥ||44||

mūrchāṅgaśothavaivarṇyakledaśabdāśrutijvarāḥ | śirogurutvaṃ lālāsṛkchardiścāsādhyamūṣikaiḥ ||45|| (ca. ci. a. 23) |

prāṇaharamūṣikalakṣaṇamāha– mūrchetyādi| aṅgaśotheti mūṣikākāra evāṅgaśotho jñeyaḥ| yaduktamanyatra– “cīyate granthibhiścāṅgamākhuśāvakasannibhaiḥ|” (su. ka. a. 7) iti| ⁷⁸ śabdāśrutiḥ bādhiryam; anye ‘mandā ruciḥ’ iti paṭhanti asādhyamūṣikaiḥ māraṇātmakaiḥ||45||

prāṇaharamūṣakalakṣaṇamāha– mūrchetyādi| aṅgaśotheti mūṣikākāro'ṅgaśopho boddhavyaḥ| yaduktamanyatra– “cīyate granthibhiścāṅgamākhuśāvakasannibhaiḥ|” iti| ⁷⁹ mandaśrutiriti bādhiryam| anye ‘mandāruciḥ’ iti paṭhanti| asādhyamūṣikaiḥ māraṇātmakaiḥ||45||

kārṣṇyaṃ śyāvatvamathavā nānāvarṇatvameva vā | moho'tha varcaso bhedo daṣṭe syāt kṛkalāsakaiḥ ||46|| (ca. ci. a. 23) | ⁸⁰

kṛkalāsadaṣṭaliṅgamāha– kārṣṇyamityādi| ⁸¹ varcaso bhedo'tisāraḥ||46||

kṛkalāsadaṣṭalakṣaṇamāha– varcaso bheda ityādi| ⁸² varcaso bhedaḥ atisāraḥ| ⁸³ kṛkaṇṭakaḥ kṛkalāsaḥ||46||

dahatyagnirivādau ca bhinattīvordhvamāśu ca | vṛścikasya viṣaṃ yāti daṃśe paścāttu tiṣṭhati ||47|| daṣṭo'sādhyaśca hṛdghrāṇarasanopahato naraḥ | māṃsaiḥ patadbhiratyarthaṃ vedanārto jahātyasūn ||48|| (ca. ci. a. 23) | ⁸⁴

vṛścikaviṣaliṅgamāha– dahatyagnirivetyādi| ⁸⁵ vṛścikaḥ svanāmakhyātaḥ, sa ca ārāviṣaḥ| daṣṭo'sādhyaśca hṛdghrāṇarasanopahato nara iti yadā ⁸⁶ hṛdayanāsājihvopaghāto bhavati tadā taddaṣṭo na sādhyaḥ| māṃsaiḥ patadbhiratyarthaṃ vedanārto jahātyasūnityādinā'yamaparo'sādhyaprakāraḥ| ‘daṣṭo'sādhyaistu’ iti pāṭhapakṣe'sādhyaiḥ sadyaḥprāṇaharairvṛścikairdaṣṭo yathoktaliṅgo bhavati| carake'pyayameva pāṭhaḥ||47-48||

vṛścikadaṣṭalakṣaṇamāha– dahatītyādi| ūrdhvam upariṣṭādāśu yāti paścācca daṃśe tiṣṭhati| vṛścikadaṣṭāsādhyalakṣaṇamāha– hṛdghrāṇarasanopahato nara ityādi| yadā hṛdayanāsājihvopaghāto bhavati, tadā daṣṭo na sādhyaḥ| māṃsaiḥ patadbhiratyarthaṃ vedanārto jahātyasūnityayamaparo'sādhyaḥ| ‘daṣṭo'sādhyaiḥ’ iti pāṭhe asādhyaiḥ sadyaḥprāṇaharairvṛścikairdaṣṭo yathoktaliṅgo bhavati||47-48||

visarpaḥ śvayathuḥ śūlaṃ jvaraśchardirathāpi ca | lakṣaṇaṃ kaṇabhairdaṣṭe ⁸⁷ daṃśaścaivāvasīdati ||49|| (ca. ci. a. 23) |

kaṇabhadaṣṭaliṅgamāha– visarpa ityādi| kaṇabhaḥ kīṭaviśeṣaḥ||49||

kaṇabhadaṣṭalakṣaṇamāha– visarpa ityādi| kaṇabhaḥ kīṭaviśeṣaḥ| viśīryate galati||49||

hṛṣṭalomocciṭiṅgena stabdhaliṅgo bhṛśārtimān | daṣṭaḥ śītodakeneva siktānyaṅgāni manyate ||50|| (ca. ci. a. 23) |

ucciṭiṅgadaṣṭaliṅgamāha– hṛṣṭarometyādi||50||

ucciṭiṅgadaṣṭaliṅgamāha– hṛṣṭarometi| ucciṭiṅganāmnā vṛścikena daṣṭaḥ pumān, hṛṣṭaromā kaṇṭakitadehaḥ, stabdhamehanaḥ, tathā bhṛśārtiyuktaḥ| śītodakenevāṅgāni siktāni manyate| suśrutastu ucciṭiṅgaṃ kīṭaviśeṣamāha||50||

ekadaṃṣṭrārditaḥ śūnaḥ sarujaḥ pītakaḥ ⁸⁸ satṛṭ | chardirnidrā ca saviṣairmaṇḍūkairdaṣṭalakṣaṇam ||51|| matsyāstu saviṣāḥ kuryurdāhaṃ śothaṃ rujaṃ tathā | kaṇḍūṃ śothaṃ jvaraṃ mūrchāṃ saviṣāstu jalaukasaḥ ||52|| (ca. ci. a. 23) | ⁸⁹

saviṣamaṇḍūkādidaṣṭaliṅgamāha– ekadaṃṣṭrārdita ityādi| svabhāvādekayā daṃṣṭrayā kṛto daṃśo bhavati||51-52||

saviṣamaṇḍūkadaṣṭalakṣaṇamāha– eketyādi| svabhāvādekadaṃṣṭrayā kṛto daṃśo bhavati|| saviṣamatsyalakṣaṇamāha– matsyā ityādi| sugamam| saviṣajalaukādaṣṭalakṣaṇamāha– ⁹⁰ kaṇḍūmityādi| kuryuriti ⁹¹ pūrvakriyayā sambandhaḥ||51-52||

vidāhaṃ śvayathuṃ todaṃ svedaṃ ca gṛhagodhikā |53| (ca. ci. a. 23) |

gṛhagodhikādaṣṭaliṅgamāha– vidāhamityādi| gṛhagodhikā jyeṣṭhī, anye tu bhrāmarakamāhuḥ| atra vakṣyamāṇaṃ kuryāditi sambandhanīyaṃ, tena vidāhādīnāṃ karmatvam|53|–

gṛhagodhikādaṣṭalakṣaṇamāha– vidāhamityādi| gṛhagodhikā brāhmaṇīti loke, anye bhramarakamāhuḥ| atra vakṣyamāṇaṃ ‘kuryāt’ iti sambandhanīyam|53|–

daṃśe svedaṃ rujaṃ dāhaṃ kuryācchatapadīviṣam ||53|| (ca. ci. a. 23) |

śatapadīdaṣṭalakṣaṇamāha– ⁹² daṃśe ityādi| kuryācchatapadīviṣamiti śatapadī kāruṇḍikā||53||

śatapadīviṣaṃ daṃśe svedaṃ rujaṃ dāhaṃ kuryāt| śatapadī kāraṇḍī||53||

kaṇḍūmān maśakairīṣacchothaḥ smānmandavedanaḥ | asādhyakīṭasadṛśamasādhyaṃ maśakakṣatam ||54|| (ca. ci. a. 23) |

maśakadaṣṭaliṅgamāha– kaṇḍūmānityādi| asādhyakīṭasadṛśamiti asādhyakīṭairlūtādibhiḥ samalakṣaṇamiti| asādhyaṃ ⁹³ maśakakṣatamiti pañcasu maśakeṣu madhye ⁹⁴ pārvatīyamaśakakṣatamasādhyam| yadāha suśrutaḥ– “ ⁹⁵ pārvatīyaistu kīṭaiśca prāṇaharaistulyalakṣaṇam|” iti||54||

maśakadaṣṭalakṣaṇamāha– ⁹⁶ kaṇḍūmānityādi| sugamam| asādhyakīṭasadṛśamityādi asādhyakīṭairlūtādibhiḥ samavedanamityarthaḥ| asādhyaṃ maśakakṣatamiti pañcasu maśakeṣu parvatīyamaśakakṣatamasādhyam| suśrute'pyuktam– “parvatīyaistu kīṭakaiḥ prāṇaharaistulyalakṣaṇam|” iti||54||

sadyaḥprasrāviṇī śyāvā dāhamūrchājvarānvitā | piḍakā makṣikādaṃśe tāsāṃ tu sthagikā'suhṛt ||55|| (ca. ci. a. 23) |

makṣikādaṣṭaliṅgamāha– ⁹⁷ sadya ityādi| tāsāṃ ca sthagikā'suhṛditi ⁹⁸ tāsāṃ suśrutoktaṣaṇmakṣikāṇāṃ madhye sthagikā prāṇaharetyarthaḥ||55||

makṣikādaṣṭalakṣaṇamāha– sadya ityādi| tāsāṃ tu suśrutoktānāṃ madhye sthagikākhyā makṣikā asuhṛt prāṇaharītyarthaḥ||55||

catuṣpadbhirdvipadbhiśca nakhadantaviṣaṃ ca yat | ⁹⁹ śūyate pacyate vā'pi sravati jvarayatyapi ||56||

catuṣpadbhiriti ¹⁰⁰ catuṣpādā vyāghrādayaḥ| ¹⁰¹ dvipādā vanamānuṣavānarādayaḥ||56||

catuṣpadadvipadadaṣṭalakṣaṇamāha– catuṣpadbhirityādi| catuṣpadā vyāghrādayaḥ, dvipadā mānavavānarādayaḥ, tairyat nakhakṣataṃ dantakṣataṃ ca, ¹⁰² tacchūyate śophayuktaṃ bhavati, tathā pacyate, tathā sravati, tathā jvarayati||56||

śvaśṛgālatarakṣvarkṣavyāghrādīnāṃ yadā'nilaḥ | śleṣmapraduṣṭo muṣṇāti sañjñāṃ sañjñāvahāśritaḥ ||57|| tadā prasrastalāṅgūlahanuskandho'tilālavān ¹⁰³| avyaktabadhirāndhaśca so'nyonyamabhidhāvati ||58|| pramūḍho'nyatamastveṣāṃ khādan viparidhāvati | tenonmattena daṣṭasya daṃṣṭriṇā saviṣeṇa tu ||59|| suptatā jāyate daṃśe kṛṣṇaṃ cātisravatyasṛk | digdhaviddhasya liṅgena prāyaśaścopalakṣitaḥ ||60||

atra kecit viṣādhikārasāmānyāt śvādīnāmapi vyāghrādīnāṃ bhallakānāṃ viṣalakṣaṇaṃ bhaṇanti| tadāha– śvetetyādi| śvā kukkuraḥ, śṛgālaḥ prasiddhaḥ, tarakṣurmṛgaśatrurvyāghraviśeṣaḥ, caraṣa iti loke, ṛkṣo bhallūkaḥ atilomaśaḥ, ṛccha iti loke prasiddhaḥ| ādiśabdād vṛkacitrādayo hiṃsrāḥ paśavo grāhyāḥ| śvādīnāṃ yadā anilo vāyuḥ śleṣmapraduṣṭaḥ san sañjñāvahāśritaḥ sañjñāvahasrotogataḥ sañjñāṃ samyagjñānaṃ muṣṇāti harati| samyagjñānaharaṇācca hīdṛśo bhavatītyāha– tadetyādi| prasrastaṃ sthānacyutaṃ, lāṅgūlaṃ vāladhiḥ, mehanaṃ ca| prasrastaśabdo lāṅgūlādibhiḥ pratyekaṃ sambandhanīyaḥ| atilālāvān atiśayena lālāsrāvayuktaḥ| avyaktabadhiro'ndhaśca na vyakto badhiro'ndho vetyarthaḥ| anyonyamabhidhāvati parasparaṃ daṣṭumabhidhāvati| hanuskandhasthāne ‘śūnaskandhaḥ’ iti kecitpaṭhanti| ‘pramūḍho'nyatamasteṣāṃ khādanviparidhāvati|’ ityatrottarārdhaṃ kecitpaṭhanti| eṣāṃ madhye'nyatama ekatamaḥ pramūḍhaḥ san khādan viśeṣeṇa paridhāvati| teneti daṃṣṭriṇā| suptatā bādhiryam| upalakṣito yukta ityarthaḥ||57-60||

yena cāpi bhaveddaṣṭastasya ceṣṭāṃ rutaṃ naraḥ | bahuśaḥ pratikurvāṇaḥ kriyāhīno vipaśyati ||61|| daṃṣṭriṇā yena daṣṭaśca tadrūpaṃ yastu paśyati | apsu cādarśabimbe vā tasya tadriṣṭamādiśet ||62|| trasyatyakasmādyo'bhīkṣṇaṃ dṛṣṭvā spṛṣṭvā'pi vā jalam | jalatrāsaṃ tu taṃ vidyādriṣṭaṃ tadapi kīrtitam ||63|| ¹⁰⁴ adaṣṭo vā jalatrāsī na kathañcana siddhyati | prasupto votthito vā'pi svasthastrasto na siddhyati ||64|| (su. ka. a. 7) |

idānīṃ śvādidaṣṭasya riṣṭamāha– yenetyādi| ceṣṭāṃ kriyāṃ, rutaṃ śabdaṃ, bahuśaḥ anekavāraṃ, pratikurvāṇaḥ anukurvan, kriyāhīnaḥ svakīyakāyādivyāpārarahitaḥ| idānīmaparamapyariṣṭaṃ nirdiśannāha– daṃṣṭriṇetyādi| taddaṃṣṭrirūpadarśanamariṣṭaṃ maraṇalakṣaṇam| punaraparamariṣṭaṃ nirdiśannāha– trasyatītyādi| akasmājjalatrāsahetuṃ vinā, apiśabdāt śrutvā'pi jalatrāsarogaṃ jānīyāttasyeti sambandhaḥ| riṣṭamityādi| tadapi jalatrasanamariṣṭaṃ maraṇaṃ kīrtitam| etaccāriṣṭaṃ daṣṭasya| atrārthe tantrāntare– “vyādhitena śvādinā daṣṭasya śleṣmā kupitaḥ srotovāhinīrdhamanīranupraviśya sañjñānāśamāpādayati| tato naraḥ ¹⁰⁵ spṛṣṭvā dṛṣṭvā śrutvā ca jalaṃ trasyati, tasyāpi tadriṣṭaṃ jānīyāt|” iti| ¹⁰⁶ evamadaṣṭasyāpi jalatrāso riṣṭameveti darśayannāha– ¹⁰⁷ adaṣṭa ityādi| asminnarthe tantrāntare– “ ¹⁰⁸ adaṣṭasyāpi jantorhi jalatrāso bhavedyadi| tasyāriṣṭaṃ hi bhiṣajo bruvate viṣacintakāḥ|| jalaṃ vinā jalatrāso jāyate śleṣmasañcayāt|” iti| atha coktam– “buddhisthānaṃ yadā śleṣmā kevalaḥ pratipadyate| tadā buddhau niruddhāyāṃ śleṣmaṇā'dhiṣṭhito naraḥ|| jāgratsupto'thavā''tmānaṃ majjantamiva manyate| salilāttrasyati tadā jalatrāsaṃ tu taṃ viduḥ|| śleṣmaghnaṃ tatra kartavyaṃ śodhanaṃ śamanāni ca| āhārasya vidhānena yāvatsa prakṛtiṃ vrajet||” iti| ayaṃ jalatrāsaḥ kupitakaphasya bhavatīti riṣṭaṃ na bhavati| ata evā'tra cikitsopadeśaḥ| ¹⁰⁹ daṣṭasya tu riṣṭameva, tathā svasthasya jāgrato vā jalamantareṇa trāso riṣṭameveti darśayannāha– prasupta iti| sugamam||61-64||

praśāntadoṣaṃ prakṛtisthadhātumannābhikāmaṃ samamūtraviṭkam | prasannavarṇendriyacittaceṣṭaṃ vaidyo'vagacchedaviṣaṃ manuṣyam ||65|| (su. ka. a. 6) |

viṣāturaḥ kīdṛśo nirviṣo bhavatīti darśayitumāha– praśāntadoṣamityādi| annābhikāmamityanena prakṛtisthāgnitoktā| yadāha carakaḥ– “prāyeṇopahatāgnitvāt sapicchamatisāryate| prāpnoti cāsyavairasyaṃ na cānnamabhinandati||” iti| samamūtraviṭkamiti akṣīṇānatiriktamūtrapurīṣam| anye ‘ ¹¹⁰ samasūtrajihvam’ iti paṭhanti, tadā'yamarthaḥ– samamavikṛtaṃ ¹¹¹ sūtraṃ jihvā ca yasya sa tathā; etena viṣajuṣṭā jihvā na rasabodhinī bhavati, ¹¹² sūtramapi jihvāyāṃ viṣaprabhāveṇa ¹¹³ vaikṛtaṃ bhavatīti pratipādayati| jihvāgrahaṇenaiva ¹¹⁴ sūtragrahaṇe siddhe tasya ca rasagrahaṇe anuguṇatvapratipādanārthaṃ pṛthagupādānam| anena ślokena “samadoṣaḥ samāgniśca” (su. sū. a. 15) ityādiślokasya sakala evārtha upabaddhaḥ||65||

aviṣo naraḥ kīdṛśo bhavati taddarśayitumāha– ¹¹⁵ prasannadoṣamityādi| prasannadoṣaṃ ¹¹⁶ samāvasthitavātādikam| prakṛtisthadhātumiti dadhatīti dhātavo rasādayo malādayaśca| annābhikāmaṃ bhojanābhilāṣam, annābhikāmamityanena prakṛtisthāgnitoktā| yadāha carakaḥ– “prāyeṇopahatāgnitvātsapicchamatisāryate| prāpnoti cāsyavairasyaṃ na cānnamabhinandati||” iti| samamūtraviṭkamiti akṣīṇānatiriktamūtrapurīṣam| anye ‘samamūlajihvam’ iti paṭhanti, tadāyamarthaḥ– samam avikṛtaṃ mūlaṃ jihvā ca yasya sa tathā| etena viṣaduṣṭajihvā rasavedinī na bhavati, mūlamapi jihvāvat viṣaprabhāveṇa vikṛtaṃ bhavatīti pratipādayati| jihvāgrahaṇenaiva mūlagrahaṇe siddhe, tasya rasagrahaṇe'rdhaguṇatvapratipādanārthaṃ pṛthagupādānam| anena ślokena “samadoṣaḥ samāgniśca” ityādeḥ ślokasya sakala evārtho nibaddhaḥ| vaidyo'vagacchedaviṣaṃ manuṣyamiti uktalakṣaṇaḥ puruṣo'viṣo bhavati, viparītalakṣaṇastu viṣāturaḥ| tathāhi– “pravṛddhadoṣā'prakṛtisthadhātumanannakāṅkṣaṃ ¹¹⁷ hatamūlajihvam| viruddhavarṇendriyavittaceṣṭaṃ vaidyo'vagacchetsaviṣaṃ manuṣyam||” iti| idaṃ saviṣāviṣalakṣaṇamiti||65||

iti śrīmādhavakaraviracite mādhavanidāne viṣanidānaṃ samāptam ||69||

iti śrīkaṇṭhadattakṛtāyāṃ madhukośavyākhyāyāṃ viṣanidānaṃ samāptam||69|| ¹¹⁸ sūktimuktāvalīgranthe guruṇā yanna gumphitam|| mayā samastamagranthi tadgirā ¹¹⁹ śuddhiyuktayā||1|| guṇanidhigurubaddhe dāmni vāṅmālatīnāṃ paramaparimalaśrīdhāmni labdhāvalambam|| sphurati vacanakundaṃ mandasaurabhyaleśādvacanamapi madīyaṃ kiñcidetat kadācit||2|| iti śrīvijayarakṣitaśrīkaṇṭhadattābhyāṃ viracitā madhukośavyākhyā samāptā||69|| ¹²⁰

iti śrīvācaspativaidyaviracitāyāṃ mādhavanidānavyākhyāyāmātaṅkadarpaṇākhyāyāṃ viṣanidānam||69||

pāṭhāntarāḥ

1 . ‘ ... nandanakaṅkolasārapākāni’ iti pā.| ↩
2 . ‘ ... markeṭakāni’ iti pā.| ↩
3 . “āraśabdenātra vṛścikādilāṅgūlasthitaḥ kaṇṭako bhaṇyate, tasya ca sthūlaśūkarūpatvācchūkagrahaṇenaiva grahaṇam; ata eva dṛṣṭiniḥśvāsetyādisūtre pṛthaṅnodāhṛtamāragrahaṇam|” iti ḍalhaṇaḥ| ↩
4 . ‘lālāsparśaviṇmūtra ... ’ iti pā.| ↩
5 . ‘śakunīmatsyādayaḥ’ iti pā.| ↩
6 . ‘phenāśmabhasma’ iti pā.| ↩
7 . ‘dṛṣṭiṃ niḥśvāsa ... ’ iti pā.| ↩
8 . ‘sarpalādayo’ iti pāṭhaḥ kvacitpustake nopalabhyate | ↩
9 . ‘śakunīmatsyādayaḥ’ iti pā.| ↩
10 . ‘caivātīsāram’ iti pā. | ↩
11 . ‘atra ca’ iti pā.| ↩
12 . ‘dantaharṣagalagraham’ iti pā. | ↩
13 . ‘viṣam’ iti pā. | ↩
14 . ‘sthāvarasāmānyaliṅgamāha’ iti pā.| ↩
15 . ‘sphoṭedaṅgulī ... ’ iti pā. | ↩
16 . ‘dīnaḥ’ iti pā. | ↩
17 . ‘viparītaśca’ iti pā. | ↩
18 . ‘ca’ iti pāṭhaḥ kvacitpustake nopalabhyate | ↩
19 . ‘ahāsāddhetorapi’ iti pā.| ↩
20 . ‘bhītaḥ san pratyekaṃ vīkṣate|’ iti pāṭhaḥ kvacitpustake nopalabhyate | ↩
21 . ‘ḍallanaḥ’ iti pā.| ↩
22 . ‘jñeyam’ iti pā. | ↩
23 . ‘mukhaśothaḥ’ iti pā. | ↩
24 . ‘daṇḍādimardanavadvyathā’ iti pā.| ↩
25 . ‘daśamamatitīkṣṇatvād ... ’ iti pā.| ↩
26 . ‘muṣketyādi’ iti pāṭhaḥ kvacitpustake nopalabhyate | ↩
27 . ‘bhavedityādi’ iti pāṭhaḥ kvacitpustake nopalabhyate | ↩
28 . ‘sarvatra sarvopalambhaśceti’ iti pā.| ↩
29 . ‘bhogiprabhṛtibhiḥ kṛtadaṃśeṣu’ iti pā.| ↩
30 . ‘taduktiravaśyaṃ bhavanakhyāpanārtham’ iti pā.| ↩
31 . ‘śirāmarmasu’ iti pā. | ↩
32 . ‘viśiṣṭadeśanakṣatradṛṣṭasyāsādhyatvamāha’ iti pā.| ↩
33 . ‘darvītyādi’ iti pāṭhaḥ kvacitpustake nopalabhyate | ↩
34 . ‘viṣamāśughātīti’ iti pā.| ↩
35 . ‘darvīkarāṇāṃ viṣamāśumārakam’ iti pā.| ↩
36 . asyāyameveṣṭaḥ pāṭhaḥ| ↩
37 . ‘viṣāṇyadanakāle’ iti pā.| ↩
38 . ‘vātapittavṛddhyā’ iti pā.| ↩
39 . ‘kuṣṭhaduṣṭe’ iti pā.| ↩
40 . ‘anavāyane'pyuktam’ iti pā.| ↩
41 . ‘adhāraṇam’ iti pā.| ↩
42 . ‘ayāgavidheranityatvāt’ iti pā.| ↩
43 . ‘prathamādivegarahitam’ iti pā.| ↩
44 . ‘viṇmūtravegādirahitamiti’ iti pā.| ↩
45 . ‘daṃṣṭrānipātāścatura’ iti pā.| ↩
46 . ‘viṇmūtraṃ vegarahitamiti’ iti pā.| ↩
47 . ‘vyavāyivikāsiprabhṛtiṣu’ iti pā.| ↩
48 . ‘ekadvitriguṇahīnam’ iti pā.| ↩
49 . ‘mārayet’ iti pā.| ↩
50 . ‘mārayet’ iti pā.| ↩
51 . ‘gararūpeṇa pīḍitaḥ’ iti pā.| ↩
52 . ‘sanmandībhūtauṣṇyādiguṇāt’ iti pā.| ↩
53 . ‘samuddhasta ... ’ iti pā. | ↩
54 . ‘pratyāsannāśayasya’ iti pā.| ↩
55 . ‘etena’ iti pā.| ↩
56 . ‘pralepakatvena svedapravṛttyā gātraliptatvam’ iti pā.| ↩
57 . ‘surātilakulatthādi’ iti pā.| ↩
58 . ‘kṛtrimam’ iti pā.| ↩
59 . ‘kṛtrimam’ iti pā.| ↩
60 . ‘kṛtrimaviṣam’ iti pā.| ↩
61 . ‘prayacchantyannamāśritān’ iti pā. | ↩
62 . ‘taddvayamapi’ iti pā.| ↩
63 . ‘śatruprayuktyā’ iti pā.| ↩
64 . ‘tenāntarjvalanavirala ... ’ iti pā.| ↩
65 . ‘bhrukuṭiloṭṭabhavo bhayaṅkaro lalāṭataṭaprasyandī’ iti pā.| ↩
66 . ‘dhenvarthamupātte’ iti pā.| ↩
67 . ‘pītikā’ iti pā.| ↩
68 . ‘kupitenāntarjvalanavirala ... ’ iti pā.| ↩
69 . ‘sāmānyalakṣaṇamāha’ iti pā.| ↩
70 . ‘yatastrimaṇḍalānām’ iti pā.| ↩
71 . ‘daṃśakothaḥ’ iti pāṭhaḥ kvacitpustake nopalabhyate | ↩
72 . ‘kālāntare prakopiviṣābhiḥ’ iti pā.| ↩
73 . ‘sarpāṇāmeva viṇmūtrāt kīṭāḥ syuḥ kīṭajāstu tāḥ dūṣīviṣāḥ prāṇaharā iti saṅkṣepato matāḥ’ iti pā. | ↩
74 . ‘śothaḥ’ iti pā. | ↩
75 . ‘sapiḍakā jvarāḥ’ iti pā. | ↩
76 . ‘prāṇāntikābhiḥ’ iti pā. | ↩
77 . ‘śukraspṛṣṭāḥ’ iti pā.| ↩
78 . agrimapaṅktiḥ kvacitpustake nopalabhyate | ↩
79 . evaṃ pāṭhābhiprāyeṇa| ↩
80 . ‘kṛkalāsaiḥ daṣṭaliṅgamāha’ iti pā.| ↩
81 . ‘varcaso bhedo'tisāraḥ’ iti pāṭhaḥ kvacitpustake nopalabhyate | ↩
82 . ‘varcaso bhedaḥ’ iti pāṭhaḥ kvacitpustake nopalabhyate | ↩
83 . ‘syācca kṛkaṇṭakaiḥ’ iti pā.| ↩
84 . ‘vṛścikaviṣaliṅgaṃ tadviṣādharasaṅkhyāṃ cāha’ iti pā.| ↩
85 . ‘vṛścikaḥ svanāmakhyātaḥ’ iti pāṭhaḥ kvacitpustake nopalabhyate | ↩
86 . kvacitpustake ‘hṛdayanāsājihvopaghāto bhavati tadā’ etatsthāne ‘hṛdayanāsājihvopahatastadā’ iti pā.| ↩
87 . ‘daṃśaścaiva viśīryate’ iti pā., ‘daṃśaścaivāvaśīryate’ iti ca pā. | ↩
88 . ‘satṛḍ’ iti pā. | ↩
89 . ‘saviṣamaṇḍūkadaṣṭaliṅgamāha’ iti pā.| ↩
90 . ‘kaṇḍūmityādi’ iti pāṭhaḥ kvacitpustake nopalabhyate | ↩
91 . ‘pūrvakriyāsambandhaḥ’ iti pā.| ↩
92 . ‘daṃśe ityādi’ iti pāṭhaḥ kvacitpustake nopalabhyate | ↩
93 . ‘maśakakṣatamiti’ iti pāṭhaḥ kvacitpustake nopalabhyate | ↩
94 . ‘parvatīya ... ’ iti pā.| ↩
95 . ‘parvatīyaistu’ iti pā.| ↩
96 . ‘kaṇḍūmānityādi’ iti pāṭhaḥ kvacitpustake nopalabhyate | ↩
97 . ‘sadya ityādi’ iti pāṭhaḥ kvacitpustake nopalabhyate | ↩
98 . kvacitpustake ‘tāsāṃ suśrutoktaṣaṇmakṣikāṇām’ etatsthāne ‘kāṇḍarikādisuśrutoktaṣaṇmakṣikāsu’ iti pā.| ↩
99 . ‘pūyate’ iti pā. | ↩
100 . ‘catuṣpadā’ iti pā.| ↩
101 . ‘dvipadā’ iti pā.| ↩
102 . ‘pūyate’ ityatra ‘śūyate’ iti pā.| ↩
103 . ‘atilālavān’ atra hrasvatā chando'nurodhena ↩
104 . ‘adṛṣṭo’ iti pā. | ↩
105 . ‘spṛṣṭvā śrutvā ca jalaṃ trasyati, tadriṣṭaṃ jānīyāt’ iti pā.| ↩
106 . ‘evamadṛṣṭasyāpi’ iti pā.| ↩
107 . ‘adṛṣṭa’ iti pā.| ↩
108 . ‘adṛṣṭasyāpi’ iti pā.| ↩
109 . ‘dṛṣṭasya’ iti pā.| ↩
110 . ‘samamūlajihvam’ iti pā.| ↩
111 . ‘mūlam’ iti pā.| ↩
112 . ‘mūlamapi’ iti pā.| ↩
113 . kvacitpustake ‘vaikṛtaṃ bhavatīti pratipādayati’ etatsthāne ‘vikṛtaṃ bhavatītyarthaḥ’ iti pā.| ↩
114 . ‘mūlagrahaṇe’ iti pā.| ↩
115 . asyāyameveṣṭaḥ pāṭhaḥ| ↩
116 . ‘svabhāvasthitavātādikam’ iti pā.| ↩
117 . ‘śatamūlajihvam’ iti pā.| ↩
118 . ‘sūktimuktāvalīgumphe’ iti pā.| ↩
119 . ‘śuddhamuktayā’ iti pā.| ↩
120 . ‘ityātaṅkadarpaṇe nidānavyākhyāyāṃ viṣanidānam||69||’ iti pā.| ↩