8. atha avalehādhikārādhyāyaḥ

Āḍhamalla. adhunāvalehānāṃ prathamatastatsvarūpaviṣayaṃ darśayannāha - kvāthādīnāmiti | kvāthādīnāmityādi grahaṇāt svarasaphāṇṭakalkādayo'bhidhīyante ghanatvamiti | sāndratvaṃ yāvadbhavati tāvatpākaḥ kartavya iti bhāvaḥ | pākastu kvāthādīnāṃ bhavati, yataḥ prathamataḥ kvāthavidhinā pākaṃ kṛtvā paścāt pākena lehaḥ syāditi | tanmātreti tasyā'valehabhakṣaṇārthaṃ mānaṃ palamitaṃ boddhavyaṃ, iti sāmānyamānaṃ bhakṣaṇe'bhihitam || 1 ||

Āḍhamalla. idānīmanukte sitādīnāṃ parimāṇamāha -- anuktamānāvalehe sitā caturguṇā deyā | caturguṇatā'tra sakaladravyādityarthaḥ | guḍastu dviguṇa iti cūrṇadravyāt | dravaṃ toyakṣīrādikaṃ caturguṇam | atrāpi cūrṇāditi bhāvaḥ | sarvatra niścaya iti svatantre paratantre vā || 2 ||

Āḍhamalla. supakva iti | samyak pakve'valehe etādṛśaṃ lakṣaṇaṃ bhavati, kīdṛśaṃ tadāha - tantumattvamityādi | darvyā sañcālanena tantusaṃyukta iva dṛśyate, tena mṛdyamāno'ṅguligrāhī bhavatītyarthaḥ | apsu majjatīti pānīyamadhye yadā kṣiptastadā nimagno bhavati | sthiratvamiti niścalatvam etena dravarahita ityarthaḥ | tathāhi - “toyapūrṇe yadā pātre kṣipto na plavate guḍaḥ | kṣiptastu niścalastiṣṭhet patitastu na śīryate || eṣa pāko guḍādīnāṃ sarveṣāṃ parikīrtitaḥ” iti | pīḍite mudreti tasminnaṅgulyādipīḍite sati mudrādīnāmudbhavo bhavati, mudrā'tra nimnatā | yaduktaṃ “pīḍite tu yadāṅgulyā nimnatā tatra jāyate” iti | gandhavarṇarasodbhava iti sugandhopetaḥ surasopeta iti | yo'valeho bhavati sa supakva ityarthaḥ || 3 ||

Āḍhamalla. dugdhamiti | dugdhamiti sāmānyagrahaṇena sarvāṇi kṣīrāṇi yathādoṣaṃ grāhyāṇi | ikṣurasagrahaṇena sarve ikṣuvikārā gṛhyante | pañcamūlī mahatī hrasvā vā yathā vyādhivihitā grāhyā | kaṣāyajamiti yūṣamityarthaḥ | tena pañcamūlasya kaṣāyeṇa kṛtvā yūṣaḥ so'nupānamiti bhāvaḥ | kaṣāyagrahaṇena svarasakvāthakalkādayo grāhyāḥ | vāsākvātha iti | vāsā āṭarūṣakaḥ, yathāyogyamiti yad yasya doṣasya yogyaṃ tadyathāyogyam | etena doṣānurūpamiti vyādhyanusāraṃ kathitaḥ, tadyathā - vāte'mlamadhuralavaṇaprāyāḥ snigdhādayaḥ, pitte madhurakaṣāyatiktaprāyāḥ śītādayaḥ, kaphe tiktoṣaṇakaṣāyaprāyā rūkṣādayaḥ | mātrā yathā tathāhyuktam - “anupānaṃ prayoktavyaṃ kaphavyādhau palaṃ bhavet | paladvayaṃ tu pitte vānilaje ca palatrayam” iti | yadvā “gaṇḍūṣaṃ mātrayā deyaṃ mṛdau krūre tu pañca ca | anupānaṃ prayoktavyaṃ deśakālādyapekṣayā” iti | anupānamiti | anu paścātpānaṃ tat kutaḥ tadāha - “yathā jalagataṃ tailaṃ tatkṣaṇādeva sarpati | tathā bhaiṣajyamaṅgeṣu prasarpatyanupānataḥ” iti || 4 ||

Āḍhamalla. sa yatheti taṃ darśayannāha - kaṇṭakārīti | laghukaṇṭakārikā sā samūlaphalaśākhā grāhyā | nīradroṇa iti caturāḍhakaparimite pānīye tryūṣaṇaṃ pratyekaṃ palapramāṇamāhuḥ | dhanvayāsakaḥ durālabhā rāsnā, surabhī, śarkarā palaviṃśatiriti sugamam | ghṛtatailayoriti militvā ṣoḍaśapalāni | ghṛtamatra goghṛtam ājaṃ vā vyādhivihitatvāt tailaṃ kaṭutailamatra vadantyeke | yataḥ “kāse śvāse ca hikvāyāṃ kaṭutailaṃ prayojayet” iti | kvacidasya prayogo'pi dṛśyate “guḍaṃ kaṭukatailena miśrayitvā samaṃ lihet | trisaptāhaprayogeṇa śvāsaṃ nirmūlato jayet” iti | śīte madhupalāṣṭakamiti| madhukṣaudramaṣṭapalapramāṇaṃ śīte himasparśe vinikṣipedityarthaḥ | yataḥ ‘uṣṇārtamuṣṇairuṣṇe ca tannihanti yathāviṣam’ iti vacanāt | aparāṇi dravyāṇyāha - catuṣpalaṃ tvagākṣīryā ityādi | tvagākṣīrī vāṃśī | pippalī prasiddhā sudṛḍhe tvaticikkaṇe bhājane pātre śubhe abhagne maṅgalatvāt | ayaṃ lehaḥ kaṇṭakārī saṃjñaḥ | aśeṣata iti sampūrṇāriṣṭadarśanādapi āsaṃcayādityarthaḥ | etenāsya prāmāṇyaṃ darśitam || 5-9 ||

Āḍhamalla. adhunā cyavanaprāśāvalehamāha - pāṭaletyādi| pāṭalā prasiddhā, araṇiḥ agnimanthakaḥ, kāśyaryaḥ gāmbhārī, bilvaṃ prasiddham, aralukaḥ syonākaḥ, parṇyau dve tena śāliparṇī pṛṣṭhaparṇī ceti, tacca dvayaṃ ‘kavarādvayaśabdavācyaṃ, bṛhatyāviti dve bṛhatyau kaṇṭakārīdvayamitityarthaḥ | śṛṅgī karkaṭākhyā, bhūmyāmalī tāmalakī, ṛddhī iti dvivacanatvena ṛddhivṛddhī grāhye, jīvantī śākaviśeṣaḥ jīvakarṣabhakāviti dvau tena jīvaka ṛṣabhakaśceti, kākanā- sikā ‘kauvāḍoḍīti’ loke, vidārī kandaviśeṣaḥ, kākolyāviti dravyadvayaṃ tena kākolī kṣīrakākolī ceti, kama- lamutpalaṃ tadabhāve padmabījaṃ grāhyaṃ, mede dve medā mahāmedā ca, agaruḥ kṛṣṇāgaruḥ, candanaṃ śvetaṃ, sthūlacūrṇamiti udūkhale musalādibhiḥ kuṭṭitamityartha: | na tu vastragālituṃ, pañcāmalaśatāni ceti | āmalakaphalānāṃ guṭikāni pañcaśatāni atra gaṇanāmānam | evaṃ sarvatra palādimānābhāve yathā vakṣyamāṇavarge agastyaharītakyavalehe “harītakīśataṃ bhadram” ityādi | evaṃ bhallātakaguḍe “bhallātakasahasre dve” iti | yatra palādimānamuktaṃ tatra tu palādimānenaiva vyavahāraḥ | yathā pūrvoktā bāhuśālaguḍe “catuṣpalaṃ syādbhallātam” iti | pacediti hastaparipāṭīvyavahārāt, tadyathā akhaṇḍitāmalakaphalaṃ karpaṭe poṭṭalīṃ badhvā kvāthanīyaṃ tena tāni sugrahāṇi syu: | aṣṭāvaśeṣitamityatra yadgrahaṇaṃ tadvṛndaṭippaṇakāramatamālokya kṛtam | vṛnde tu “jñātvā gatarasaṃ dravyaṃ rasaṃ gṛhṇīta gālitam” ityasya vyākhyāyāṃ aṣṭabhāgāvaśeṣeṇa dravyāṇāṃ gatarasatvaṃ syāt iti | kecittu grāhyaṃ pādāvaśeṣitamiti paṭhanti tatra suśrute vāgbhaṭe ca pādaśeṣe rase ityevoktam | niṣkulīkṛtyeti | niṣkulamiti kṣaumādigharṣaṇāt peṣaṇādvā tena asthitvagādirahitamityarthaḥ | saptapalaparimitena sarpiṣā tadbharjanaṃ kāryaṃ cakradattoktaṃ - “sitā matsyaṇḍikābhāve dhātryāśca mṛdubharjanaṃ | caturbhāge jale prāyo dravyaṃ gatarasaṃ bhavet” iti | khaṇḍasya kvāthamiti śīrāśabdavācyaṃ, khaṇḍenāpi kecidvyavaharanti | kṣaudramatra śītībhūte dadyāt cyavanaproktamiti cyavano nāma munistena proktaṃ kathitam, prāśyata iti prāśaḥ cyavanasya prāśa iti bhāvaḥ | kṣīṇo dhātukṣayo rasāyanamiti jarāvyādhināśanaṃ, naro jīrṇavivarjita iti naro'sya sevī puruṣaḥ jīrṇavivarjitaḥ jarārahito bhavatītyarthaḥ | yadvā ajīrṇavivarjī bhavati, tadapi rogamūlameva yataḥ “prāyeṇāhāravaiṣamyādajīrṇaṃ jāyate nṛṇām | tanmūlo rogasaṃghātastadvināśādvinaśyati” iti ||10-21||

Āḍhamalla. atha kūṣmāṇḍāvalehavivaraṇaṃ darśayannāha - niṣkulīti | niṣkulīkṛtyeti tvaṅmajjādirahitāni kūṣmā- ṇḍaśakalāni saṃgṛhyetyarthaḥ | dviguṇaṃ nīramiti kūṣmāṇḍaparimāṇāt tena kūṣmāṇḍaśakalāni tulāparimitāni dvitulāmitaṃ nīramiti ardhāvaśiṣṭaṃ kvātharūpaṃ jalam | śūlāgrairiti kāṣṭhamayaśaṅkumukhaiḥ | bahuśo vyadhediti bahucchidrā- ṇi kūṣmāṇḍaśakalāni kārayediti bhāvaḥ | uktaṃ ca - hastapāṭyāṃ pūrvaṃ niṣkulīkṛtaṃ tadanu kṛtacchidraṃ paścāt saṃsvedya kṣaumeṇa veṣṭayitvā pīḍayet, ātape manāk saṃśoṣya piṣṭvā palaśataṃ gṛhītvā paktavyaṃ, tena kiñcidbharjayitveti kiṃcidatra yathāpākaṃ bharjayet | tathāhi “muktasarpiṣi kūṣmāṇḍe pāko gandhena mudrayet” iti | tajjalamityardhāvaśeṣitaṃ pūvāktaṃ kvātham | khaṇḍāt palaśatamiti śarkarāpalaśatam | ghṛtārdhaṃ kṣaudramāvapediti ghṛtamānādardhaṃ kṣaudraṃ madhu kṣipediti bhāvaḥ | āvapediti grahaṇena śītībhūte tasmin paścāt melayedityarthaḥ | āturaśabda: śoṣādibhiḥ pratyekamabhisaṃbadhyate | bālavṛddheṣu yojayediti saumyatvāt dhātupoṣakatvācca vṛṣyaḥ śukravṛddhikaraḥ bṛṃhaṇo dhātuvṛddhikaraḥ balakṛdojaso vṛddhikara iti || || 22-28 ||

Āḍhamalla. idānīṃ khaṇḍasūraṇāvalehamāha - yuktyeti | kūṣmāṇḍakhaṇḍasya yuktyā kartavyavidhinā ayamapi sūraṇā'valehaḥ kartavyaḥ | sudhīriti grahaṇena pūrvoktakūṣmāṇḍakhaṇḍe yaddravyaṃ yanmānaṃ yā kartavyatā tat sakalaṃ vicārya tenaiva prakāreṇa sūraṇāvalehaḥ sādhyaḥ | viśeṣeṇa mūḍhavātānāṃ mandāgnīnāṃ ca yujyate || 29 ||

Āḍhamalla. athāgastyaharītakyavalehaṃ darśayannāha - harītakīśatamityādi | harītakīśataṃ harītakīguṭikāśataṃ na tu harītakīpalaśataṃ ‘saṃkhyā phalānāṃ śataśaḥ palānām’ iti vacanāt | bhadramiti śreṣṭhaṃ harītakīphalaśataṃ tena navādiguṇasahitamityarthaḥ | tathāhyuktam - ‘navā snigdhā ghanā vṛttā gurvī kṣiptā tathā'mbhasi | nimajjedyā praśa- statvādguṇakṛt sā prakīrtitā’ iti | yavānāmāḍhakamiti | yavo'nnaviśeṣaḥ tasya catuḥṣaṣṭipalāni | kecittu ‘harītakīśataṃ bhadrayavānām āḍhakaṃ tathā’ iti paṭhanti, tatra bhadrayavā indrayavā iti vyākhyānayanti, etanna pracarati sarveṣāṃ saṃpradāyavirodhāt | tasmāddharītakīśataṃ bhadramiti pāṭhaḥ sādhuḥ | daśamūlasya viṃśatipalāni pratyekaṃ dvipalamityarthaḥ | śeṣaṃ dravyaṃ prasiddhaṃ | yavaiḥ svinnairiti upalakṣaṇe tṛtīyā | yavasvinnatā ca caturbhāgāvaśeṣe jale eva bhavati tena caturbhāgāvaśiṣṭameva grāhyaṃ | tantrāntare'pyuktaṃ - ‘yavāḍhakaiḥ pañcabhiraṅghriśeṣaṃ kvāthaṃ nayet’ ityādi | paktvāvalehatvamānīyeti vyavahārāt | harītakīśatasya karpaṭe poṭṭalaṃ baddhvā kvathanaṃ paścādutsvinnaharītakīśatasya ghṛtatailayorbharjanaṃ taddṛḍhārthaṃ | yathā tantrāntare sarvārthasiddhaharītakyāṃ harītakībharjanamuktaṃ | tadanu kvāthe guḍatulāṃ loḍayitvā pākaḥ karyavyaḥ, avataraṇasamaye pippalīcūrṇaprakṣepaḥ | śītībhūte cāpare'hni madhudānamiti vṛddhānāṃ mataṃ; sugandhārthaṃ manāk cāturjāmiti kecit | taduktaṃ - ‘pippalīcūrṇakuḍavaṃ cāturjātāvacūrṇitam’ iti | sarpistailāṣṭakapalamiti yaduktaṃ tanmilitvā grāhyaṃ | ‘harītakīdvayaṃ khādet tena lehena nityaśa’ iti | yadyapi guḍasya bhakṣaṇamānaṃ noktaṃ tathāpi harītakīdvirūpagrahaṇena lehasya palamānaṃ bhavatyeva yathā tantrāntare bhārgīguḍe ‘bhakṣayedabhayādekāṃ lehasyārdhapalaṃ lihet’ iti | tenā'tra harītakībhakṣaṇavidhānādguḍapalaṃ bhakṣyamiti | anye tu gulmocchede harītikīnyāyādguḍaṃ dvipalamāhuḥ, etat sarvameva vyādherbalābalatvāt pracarati | agastyamunivihitatvenāsya siddhaphalatvamucyate || 30-37 ||

Āḍhamalla. idānīṃ kuṭajāvalehamāha - kuṭajatvagiti | kuṭajo vṛkṣaviśeṣaḥ tasya tvak challī sā palaśataparimitā grāhyā | pādaśeṣamiti caturthāṃśaṃ kaṣāyaṃ vastrapūtaṃ kṛtvā grāhyaṃ | kutracidetanna pracarati kintu pādaśeṣamiti pādasya caturthāṃśasya yaccheṣaṃ caturbhāgaṃ tadgrāhyam, etenāṣṭabhāgāvaśeṣaṃ kathitam; tathāca tantrāntare - ‘kuṭajatvakpalaśataṃ jaladroṇe vipācayet | aṣṭabhāgāvaśeṣaṃ tu kaṣāyamavatārayet | vastrapūtaṃ tataḥ kvāthaṃ pacellehatvamāgatam’ iti | triṃśatpalaṃ guḍasyātreti atra kvāthe guḍasya purātanasya triṃśatpalaṃ datvā punarvipacediti yāvat sāndratvaṃ bhavati | cūrṇārthamaparāṇi dravyāṇyāha - rasāñjanamiti rasāñjanaṃ pratītaṃ tacca dārvīkvāthasamudbhavamiti prasiddhiḥ, mocarasaṃ śālmalīveṣṭakam, indrayavaṃ tvacamiti indrayavaṃ kuṭajabījaṃ, tvak guḍatvak | durnāmaprabhavān rogāniti gulmodaraprabhṛtīn, anupāne prayoktavyamiti ājaṃ takraṃ, ājaṃ payaḥ, ājaṃ dadhi, ājaṃ ghṛtaṃ ceti | jalaṃ pānīyaṃ, takrādīnāmabhāvāt etatsakalamanupānaṃ yathāsātmyaṃ niṣevedityarthaḥ | jīrṇe ceti dravye parimite sati pathyabhojī bhavennara iti bhāvaḥ | yataḥ - ‘auṣadhaśeṣe bhukta’mityādivākyānurodhāt || 38-44 ||

Āḍhamalla. kuṭajeti | ayaṃ kuṭajāṣṭakāvaleho vyākhyāyāṃ sugama evāvagantavyaḥ | kartavyavidhistu pūrvavadroddhavyaḥ | darvīpralepanam ityavalehasya saṃsiddhilakṣaṇaṃ sūcitaṃ pūrvoktāvalehavidhau jñātavyam || 45-48 || iti śrīvāstavyānvayaprakāśavaidyaśrībhāvasiṃhātmajenāḍhamallena viracitāyāṃ śūrṅgadharadīpikāyāṃ madhyama- khaṇḍe'valehakalpanādhyāyo'ṣṭamaḥ || 8 ||